Ua Lalata Mai le Manumalo o le Tapuaiga Moni

“E fai foi Ieova ma Tupu i le lalolagi uma lava.”—SAKARIA 14:9.

1. O le ā na oo i Kerisiano faauuina a o faagasolo le Taua Muamua a le Lalolagi, ma na faapefea ona valoia mai lenei mea?

A O FAAGASOLO le taua muamua a le lalolagi, na puapuagatia ai Kerisiano faauuina i le tele o faigata ma faafalepuipuiina i atunuu sa fetauai. O a latou taulaga o viiga ia Ieova sa matuā faasaina, ma na latou oo ai i se tulaga ua faaaunuua faaleagaga. O nei mea uma sa valoia mai i le Sakaria 14:2, lea e faamatalaina ai se osofaiga faavaomalo o le a faia ia Ierusalema. O le aai o loo taʻua i lenei valoaga o le “Ierusalema faalelagi,” le Malo faalelagi a le Atua ma o le nofoaga  o “le nofoālii o le Atua ma le Tamai Mamoe.” (Eperu 12:22, 28; 13:14; Faaaliga 22:3) O ē faauuina a le Atua o loo i le lalolagi ua fai ma sui o lena aai. Na faasaoina mai le osofaiga, o ē faamaoni sa iai, i le mumusu e faatagaina i latou e faaaunuua ese mai “le aai.” *

2, 3. (a) Ua faapefea ona manumalo le tapuaiga a Ieova talu mai le 1919? (e) Talu mai le 1935, o le ā le mea na tupu ai?

² I le 1919 na faasaʻolotoina ai ē faauuina faatuatua mai lo latou tulaga faaaunuua, ma na vave lava ona latou faaaogaina tatau le vaitaimi o le filemu lea na sosoo ai ina ua mavae le taua. I le avea o ni sāvali o le Ierusalema faalelagi, sa latou puea ai le avanoa matagofie e talaʻia ai le tala lelei o le Malo o le Atua ma fesoasoani i le aoaoina o sui mulimuli o le 144,000. (Mataio 24:14; 2 Korinito 5:20) I le 1931 na latou tauaveina ai le igoa talafeagai faale-Tusi Paia o Molimau a Ieova.—Isaia 43:10, 12.

³ Talu mai lena taimi, sa lei toe faatalatū ai Molimau faauuina a le Atua. E oo lava ia Hitila ma lana vaega faa-Nasi sa lē mafai ona latou toe taofia i latou. E ui i sauāga i le lalolagi aoao, ae o loo fua mai pea a latou galuega i le lalolagi atoa. Ae maise lava mai le tausaga e 1935, ua aufaatasi atu ai ia i latou le “motu o tagata e toatele” mai atunuu uma, lea na valoia i le tusi o Faaaliga. O i latou foi nei o ni Kerisiano ua tuuina atu ma papatisoina ma ua “ta foi o latou ofu, ma ua faasinasinaina o latou ofu i le toto o le Tamai mamoe,” o Iesu Keriso. (Faaaliga 7:9, 14) Peitai ane, e lē o latou o ni ē faauuina, e iai se faamoemoe faalelagi. O loo latou faamoemoe atu e ʻaināina le mea lea na misia ona o Atamu ma Eva, ua taʻua, o le olaga lelei atoatoa faaletagata i luga o se lalolagi parataiso. (Salamo 37:29; Mataio 25:34) I aso nei, ua silia i le lima miliona le aofai o ē o loo faia aʻe ai le motu o tagata e toatele. O loo manumalo nei le tapuaiga moni ia Ieova, ae e lei oo mai lona manumalo faaiu.

Tagata Ese i le Malumalu Faaleagaga o le Atua

4, 5. (a) O fea o loo tapuai atu ai le motu o tagata e toatele ia Ieova? (e) O ā faaeaga ua latou olioli ai, ma o le faataunuuga lena o le ā le valoaga?

⁴ E pei ona valoia, o le motu o tagata e toatele “ua latou auauna foi [i le Atua] i lona malumalu i le ao ma le po.” (Faaaliga 7:15) Talu ai e lē o latou o ni Isaraelu faaleagaga, po o ni faitaulaga, e foliga mai ai na vaaia e Ioane i latou o loo tutū i le malumalu i le lotoā pito i fafo mo Nuu Ese. (1 Peteru 2:5) Maeu le faamamaluina ua iai le malumalu faaleagaga o Ieova, ua faatumulia ona vaipanoa uma i lenei vao o tagata e toatele o ē, ua iai faatasi ma le vaega totoe o le Isaraelu faaleagaga, o loo vivii atu ia te ia!

⁵ E lē auauna atu le motu o tagata e toatele i le Atua i le tulaga lea o loo fai ma ata o le lotoā pito i totonu mo faitaulaga. E lē o taʻuamiotonuina i latou mo le fuafuaga ina ia avea ma ataliifai, faaleagaga o le Atua. (Roma 8:1, 15) Peitai ane, e ala i le faaalia o le faatuatua i le taulaga a Iesu, ua latou maua ai se tulaga mamā i luma o Ieova. Ua taʻuamiotonuina i latou i le fuafuaga o le avea ma ana uo. (Faatusatusa i le Iakopo 2:21, 23.) Ua faaeaina foi i latou e tuuina atu a latou taulaga e taliaina i le fata faitaulaga faaleagaga a le Atua. O lea, e tusa ai ma lenei motu o tagata e toatele, ua faagasolo ai le faataunuuga matagofie o le valoaga i le Isaia 56:6, 7 e faapea: “O tagata ese foi o e faatasi mai ia Ieova, ē o auauna ia te ia, ma alolofa i le suafa o Ieova, . . . ou te aumaia i latou lava i loʻu mauga paia, ma aʻu faafiafia ia te i latou i loʻu fale tatalo; o a latou taulaga mu ma a latou taulaga e talia ia i loʻu fata faitaulaga; auā e taʻua loʻu fale o le fale tatalo mo nuu uma.”

6. (a) O ā ituaiga o taulaga o loo ofo atu e tagata ese? (e) O le ā sa faamanatu atu ia i latou e le tanoa vai lea sa i totonu o le lotoā mo faitaulaga?

 ⁶ E aofia ai i taulaga o loo ofo atu e nei tagata ese, o “le fua lea o . . . laugutu [e pei o ni taulaga o fua o saito ua lelei ona sauniunia], o loo faafetai atu i lona suafa [o le Atua]” ma “agalelei ma alolofa atu.” (Eperu 13:15, 16) O le tanoa vai telē lea sa tatau ona faaaogā e faitaulaga e mulumulu ai o se faamanatuga tāua foi i nei tagata ese. E ao foi ia i latou ona gauai atu i le faamamāina faaleagaga ma tau i amio a o faasolosolo ina manino atili atu ia i latou le Afioga a le Atua.

Le Mea Paia ma Mea o Loo Iai i Totonu

7. (a) E tatau faapefea ona manatu le motu o tagata e toatele i faaeaga o le faiva paia faaositaulaga? (e) O ā ni faaeaga faaopoopo ua maua e nisi tagata ese?

⁷ Pe iai ea se uiga o le Mea Paia ma mea o loo iai i totonu mo lenei motu o tagata e toatele o tagata ese? Ioe, o le a lē tāitai ona latou oo i le tulaga lea ua fai ma ata o le Mea Paia. E lē toe fanauina i latou ina ia avea ma atalii faaleagaga o le Atua o ni tagatanuu faalelagi. Pe avea ea la lenei itu ma pogai latou te matatauʻa ai pe losilosi? E leai. Nai lo lea, latou te olioli i lo latou faaeaga o le lagolagosua atu i le vaega totoe o le 144,000, ma latou faaalia le talisapaia loloto o le fuafuaga a le Atua i le avea o nei atalii faaleagaga e fai ma ataliifai, o ē o le a auai faatasi ma Keriso i le siitiaina o tagata i le lelei atoatoa. E lē gata i lea, ua faapelepeleina e le motu o tagata e toatele o tagata ese le alofa tunoa sili o le Atua i le foaiina atu ia i latou o se faamoemoe i le lalolagi o le ola e faavavau i le Parataiso. O nisi o nei tagata ese, e pei o le ʻau Netini o aso anamua, ua tuuina i ai faaeaga o le vaavaaia o mea i le fesoasoani atu i le faiva paia faaositaulaga. * (Isaia 61:5) O i latou nei ua tofia mai ai e Iesu “alii sili i le lalolagi uma.”—Salamo 45:16.

8, 9. O le ā le aogā e maua e le motu o tagata e toatele mai le manatunatu i mea o loo iai i totonu o le Mea Paia?

⁸ E ui o le a lē tāitai ona latou ulu atu i le Mea Paia faafaatusa, ae ua aʻoaʻoina mai e le motu o tagata e toatele o tagata ese ni lesona tāua mai mea o loo iai i totonu. E pei ona sa manaomia e le tuugalamepa le utu atu pea i ai o le suauu, ua faapena foi ona manaomia e tagata ese le agaga paia e fesoasoani ia i latou ina ia malamalama ai i upu moni o loo faasolosolo mai i le Afioga a le Atua, ua faaauala mai i “le auauna faamaoni ma le mafaufau.” (Mataio 24:45-47) E lē gata i lea, ua fesoasoani le agaga o le Atua ia i latou e tali atu ai i lenei valaaulia: “Ua fetalai mai le Agaga ma le faatoanofotane [le vaega totoe faauuina], ‘Ina sau ia’; ina fai atu foi ia o lē faalogo, ‘Ina sau ia’; o lē fia inu, ina sau ia, atoa ma lē manao i ai, ina ave fua ia le vai o le ola.” (Faaaliga 22:17) O lea, o le tuugalamepa ua avea o se faamanatu i le motu o tagata e toatele i lo latou tiute tauave o le susulu atu o ni Kerisiano ma ia alofia so o se mea i a latou amioga, i mafaufauga, i upu, po o gaoioiga e ono faatiga ai i le agaga paia o le Atua.—Efeso 4:30.

⁹ O le laulau o areto sa ua faamanatu ai i le motu o tagata e toatele e faapea, ina ia tumau i le maloloina faaleagaga, e tatau ona latou faaaogā e lē aunoa meaʻai faaleagaga mai le Tusi Paia ma lomiga a “le auauna faamaoni ma le mafaufau.” (Mataio 4:4) O le fata faitaulaga o mea manogi e faamanatu ai ia i latou le tāua o le tatalo faatauanau ia Ieova mo le fesoasoani ina ia tumau ai pea lo latou faamaoni. (Luka 21:36) O a latou tatalo e tatau ona faaaofia ai faaaliga mai le loto o viiga ma faafetai. (Salamo 106:1) O le fata faitaulaga o mea manogi e faamanatu ai foi ia i latou le manaoga ina ia vivii atu i le Atua i isi auala, e pei o le ala atu i lo latou peseina ma le loto atoa o pese o le Malo i sauniga faa-Kerisiano ma lo latou sauniuni lelei e fai ma le uigā le ‘taʻutino atu i le lautele o le faaolataga.’—Roma 10:10.

 Le Manumalo Atoatoa o le Tapuaiga Moni

10. (a) O le ā le faamoemoe sili e mafai ona tatou tulimatai atu i ai? (e) O le ā le mea e tupu e tatau ona faataunuuina muamua?

¹⁰ I aso nei, e ‘toatele tagata’ mai nuu uma o loo lolofi atu i le fale o le tapuaiga a Ieova. (Isaia 2:2, 3) I le faamaoniga o lenei mea, ua faapea mai ai le Faaaliga 15:4: “Le Alii [Ieova] e, o ai se le mataʻu ma vivii atu i lou suafa? Auā ua na o oe e paia; Auā e o mai nuu uma lava, ma latou ifo i ou luma; auā ua faaalia au faamasinoga tonu.” I le mataupu e 14 o le Sakaria ua faamatala ai mea o loo sosoo mai. I le lumanai lata mai, o uiga leaga o le toatele o tagata i le lalolagi o le a oo atu i se tumutumuga a o latou potopoto faatasi mo le taimi mulimuli ina ia sii taua atu ia Ierusalema—o sui o loo iai i le lalolagi o le Ierusalema faalelagi. Ona gaoioi loa lea o Ieova. I le avea ma Atua o Taua, ‘o le a afio moni atu o ia ma tau le taua ma na nuu’ o ē na faia mai lenei osofaiga.—Sakaria 14:2, 3.

11, 12. (a) O le a faapefea ona tali atu Ieova i le osofaiga tele o loo fotuai mai i tagata tapuai o i lona malumalu? (e) O le ā o le a iu i ai le taua a le Atua?

¹¹ “O lenei le mala e taia aʻi e Ieova o nuu uma e tau ma Ierusalema; e lāuvale lava o latou tino, a o tutū i o latou vae; e totō o latou mata i mea e tutū ai, ma o latou laulaufaiva e faaumatia ia i o latou gutu. O lea aso foi e i ai ia te i latou le atuatuvale tele mai ia Ieova; ona taitasi ai lea ma tago o le tasi i le lima o le tasi; e taitasi foi ma sii i luga o latou lima o le tasi i le tasi.”—Sakaria 14:12, 13.

¹² O le a tatou faatalitali pea ma vaai, pe o se mala moni pe faafaatusa lenei mala. Peitai ane, e tasi le mea ua mautinoa. A o agaʻi mai fili o le Atua e fai la latou osofaiga tele i auauna a Ieova, o le a taofia i latou e ni faatinoga uigaese o le mana e sili ona malosi o le Atua. O le a faagūgūina o latou gutu. O le a peiseai ua leaga o latou laulaufaiva ia sa tetee mai. O le a nenefu i la latou vaai lo latou sini autasi, e peiseai ua leaga o latou mata. O o latou malosi faaletino, lea sa faamalosia ai i latou e faia le osofaiga, o le a faaleaogaina. Ona o le fenuminumiai, o le a latou toe liliu atu ai lava le tasi i le isi, ma faia se fasiotiga tagata tele. Ona tafiesea ai lea o fili uma faalelalolagi o le tapuaiga i le Atua. I le iuga, o le a faamalosia ai nuu uma ia latou iloa le pule silisili ese aoao a Ieova. O le a faataunuuina ai le valoaga e faapea: “E fai foi Ieova ma Tupu i le lalolagi uma lava.” (Sakaria 14:9) Pe a mavae lena, ona saisaitia lea o Satani ma ana temoni a o amataina le Pulega o le Afe Tausaga a Keriso, faatasi ai ma faamanuiaga sili o loo teuina mo tagata.—Faaaliga 20:1, 2; 21:3, 4.

Le Toetu i le Lalolagi

13. O ai ē ua “totoe uma lava i nuu uma”?

¹³ Ua faaauau mai le valoaga a Sakaria i le mataupu e 14, fuaiupu e 16: “O e totoe uma lava i nuu uma o e o mai e tau ma Ierusalema, latou te o ae lava i lea tausaga ma lea tausaga e ifo i le Tupu, o Ieova o ʻau; e fai ai foi le tausamiga o fale apitaga.” E tusa ai ma le Tusi Paia, o tagata uma o loo ola i aso nei o ē o loo soifua pea e oo atu i le iuga o lenei faiga leaga o mea ma o ē ua faamasinoina o ni fili o le tapuaiga moni o le a “faasalaina i latou lava i le fanoga [e] faavavau lava.” (2 Tesalonia 1:7-9; tagai foi i le Mataio 25:31-33, 46.) O le a leai se toetu mo i latou. E foliga mai la, o ē o loo “totoe” e aofia ai tagata o nuu o ē na maliliu a o lei oo i le taua faaiu a le Atua ma o i latou na o loo iai se faamoemoe faale-Tusi Paia o le toetu. Na folafola mai e Iesu: “E oo mai le aso, e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.”—Ioane 5:28, 29.

14. (a) O le ā e tatau i ē ua toe faatutūina mai ona faia ina ai maua ai le ola e faavavau? (e) O le ā o le a tupu i so o se tasi e musu e tuuina atu i latou ia Ieova ma faatinoina le tapuaiga moni?

¹⁴ O i latou uma nei ua toe faatutūina mai e tatau ona iai se mea latou te faia ina ia avea  ai lo latou toetu ma toetu i le ola ae lē o le toetu i le faasala matuia. E tatau ona latou ō mai i lotoā faalelalolagi o le malumalu o Ieova ma ifo i le tuuina atu lea i le Atua e ala ia Iesu Keriso. So o se tasi e toetu mai o lē musu e faia lenei finagalo o le a puapuagatia o ia i le mala lava lea e tasi e oo i ai nuu i aso nei. (Sakaria 14:18) O ai na te iloa pe toafia ē e toe faatutūina mai o le a aufaatasi atu ma le olioli i le motu o tagata e toatele i le faamanatuina o le Tausamiga faafaatusa o Fale Apitaga? E mautinoa, o le a toatele, ma o le a iu foi ina faamamaluina ai atili le malumalu sili faaleagaga o Ieova!

Le Tausamiga Faafaatusa o Fale Apitaga

15. (a) O ā nisi o vala mataina o Tausamiga o Fale Apitaga i Isaraelu anamua? (e) Aisea na osi ai taulaga i povi poʻa e 70 a o faagasolo le tausamiga?

¹⁵ I tausaga taitasi, sa manaomia ai ona faamanatu e Isaraelu anamua le Tausamiga o Fale Apitaga. E tasi le vaiaso le umi ma sa faia i le faaiuga o la latou seleselega. Sa avea o se taimi o le olioli ma le faafetai. I le gasologa atoa o le vaiaso, sa latou nonofo ai i ni fale apitaga lē tumau e ato i laulaau, ae maise lava laupama. O lenei tausamiga sa faamanatu atu ai ia Isaraelu le auala na faasaoina ai e le Atua o latou augatamā mai  Aikupito ma le auala na ia tausia ai i latou a o latou aumau i fale apitaga a o fesavaliai solo mo le 40 tausaga i le vaomatua seia oo ina latou taunuu atu i le Nuu o le Folafolaga. (Levitiko 23:39-43) A o faagasolo le tausamiga, e 70 povi poʻa sa osi ai taulaga i le fata faitaulaga i le malumalu. E foliga mai, o lenei vala o le tausamiga sa faavaloaga mai ai le galuega lelei atoatoa ma le matuā faasaoola lea na faia e Iesu Keriso. O aogā o lana taulaga togiola o le a iu ina tafe atu i le anoanoai o fanau mai aiga e 70 o tagata na tupuga mai ia Noa.—Kenese 10:1-29; Numera 29:12-34; Mataio 20:28.

16, 17. (a) O anafea na amata ai le Tausamiga na faaatagia mai e le tausamiga o Fale Apitaga, ma na faapefea ona faagasolo? (e) Ua faapefea ona auai atu le motu o tagata e toatele i le faamanatuina?

¹⁶ O lea na faasino atu ai le Tausamiga o Fale Apitaga i le aoaoina olioli o ē agasala ua togiolaina i totonu o le malumalu sili faaleagaga o Ieova. O le faataunuuga o lenei tausamiga na amata i le Penetekoso i le 33 T.A. ina ua amata le aoaoina olioli o Isaraelu faaleagaga i totonu o le faapotopotoga Kerisiano. (Galuega 2:41, 46, 47) Sa talisapaia e i latou nei faauuina e faapea o i latou o ni “e āumau” i le lalolagi a Satani auā o lo latou “nuu moni ua i le lagi lea.” (1 Peteru 2:11; Filipi 3:20) Sa iai se taimi na tau faaitiitia ai le tāua o le tausamiga olioli ona o le faaaposetasi na iu i ai ina ua faavaeina Kerisinetoma. (2 Tesalonia 2:1-3) Peitai ane, i le 1919 na toe faaolaolaina ai le tausamiga i le aoaoina olioli o sui mulimuli o le 144,000 o Isaraelu faaleagaga, sosoo mai ai ma le aoaoina o le motu o tagata e toatele mai atunuu uma lea o loo taʻua i le Faaaliga 7:9.

¹⁷ Ua faamatalaina mai le iai o laupama i lima o le motu o tagata e toatele, lea e faaalia ai o i latou foi o ni ē o loo faamanatuina ma le olioli le Tausamiga na faaatagia mai e le tausamiga o Fale Apitaga. Ona o ni Kerisiano tuuina atu, ua latou olioli ai e auai i le galuega o le aoaoina atili o tagata tapuai i totonu o le malumalu o Ieova. E lē gata i lea, ona o ni ē agasala, ua latou talisapaia ai e lē o ia i latou ni aiā e nonofo mau ai i le lalolagi. O i latou, faatasi ai ma ē o le a toe faatutūina mai i le lumanai, e ao ona latou faaalia pea le faatuatua i le taulaga togiola a Keriso, seia latou oo atu i le lelei atoatoa faaletagata i le iuga o le Pulega o le Afe Tausaga a Keriso.—Faaaliga 20:5.

18. (a) O le ā o le a tupu i le iuga o le Pulega o le Afe Tausaga a Iesu Keriso? (e) O le ā faapefea ona iu ina manumalo aoao le tapuaiga moni a Ieova?

¹⁸ Ona tutulai atu ai lea i luma o le Atua ē uma o loo tapuai ia te ia i le lalolagi, ua avea i latou o ni tagata lelei atoatoa e lē toe manaomia se faiva faaositaulaga i le lagi. O le a oo mai le taimi e ‘toe tuuina atu ai e Iesu Keriso le malo i lona Atua ma o le Tamā.’ (1 Korinito 15:24) O le a toe tatala mai Satani “i ni nai aso” ina ia tofotofoina tagata lelei atoatoa. O so o se tasi e lē faamaoni ai o le a faaumatia e faavavau, faatasi ma Satani ma ana temoni. O i latou o ē tumau i le faamaoni o le a foaiina atu i ai le ola e faavavau. O le a avea i latou ma ē nonofo mau i le Parataiso i le lalolagi. Ona maua ai lea e le Tausamiga na faaatagia mai e le tausamiga o Fale Apitaga se faaiuga mamalu, ma le manuia. O le a manumalo le tapuaiga moni e iu ai i le mamalu e faavavau o Ieova ma le fiafiaga tumau mo tagata.—Faaaliga 20:3, 7-10, 14, 15.

[Faaopoopoga i lalo]

Fesili Autalu

□ Na faapefea ona osofaia “Ierusalema” a o faagasolo le taua muamua a le lalolagi?—Sakaria 14:2.

□ O le ā ua tupu i tagata o le Atua talu mai le 1919?

□ O ai i aso nei o loo auai i le faamanatuina o le Tausamiga faafaatusa o Fale Apitaga?

□ O le a faapefea ona manumalo atoatoa le tapuaiga moni?

[Fesili mo le Suʻesuʻega]

[Ata i le itulau 23]

Sa faaaogā laupama i le faamanatuina o le Tausamiga o Fale Apitaga