E Ao Faapefea Ona Tatou Tatalo i le Atua?

INA ua talosagaina e se soo se taitaiga e uiga i le tatalo, sa lei teena e Iesu le tuuina atu ia te ia. E tusa ai i le Luka 11:2-4, sa ia tali atu e faapea: “Pe a outou tatalo, ia outou fai atu: Le Tamā e, Ia paia lou suafa. Ia oo mai lou malo. Ia e foai mai ia te i matou i lea aso ma lea aso a matou mea e ʻai e tatau ma le aso. Ia e faamagalo ia te i matou i a matou agasala, Auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le faaosoosoga.” Ua tele ina lauiloa lenei tatalo o le Tatalo a le Alii. O loo aumaia ai le anoanoai o faamatalaga.

O le mea muamua, ua taʻua mai ia i tatou e le uluai upu lē e tatau ona faalagilagi atu i ai a tatou tatalo—i lo tatou Tamā. Mātau mai, sa matuā lē faatagaina lava e Iesu le tatalo atu i se isi tagata, faatusa, “sagato,” po o ia foi. Auā, ua fetalai mai le Atua e faapea: “O loʻu mamalu foi ou te le avatua lea i se tasi, ma loʻu viiga ou te le avatua i tupua ua ta.” (Isaia 42:8) O lea, o tatalo e tuusaʻo atu i so o se mea po o so o se tasi nai lo le tatou Tamā faalelagi, e lē faafofogaina e ia, e tusa lava po o le ā le faamaoni o le tagata tapuai. I le Tusi Paia, ua na o Ieova le Atua ua taʻua o “Le faafofoga tatalo.”—Salamo 65:2.

Atonu e faapea mai nisi ua avea “sagato” o ni fofoga fetalai o tagata i le Atua. Peitai ua faatonuina mai e Iesu e faapea: “O aʻu nei le ala, ma le upu moni ma le ola; e le alu atu lava se tasi i le Tamā, pe a le ui mai ia te au. O mea uma foi tou te ole atu ai i loʻu igoa, ou te faia lava; ina ia viia le Tamā ona o le Atalii.” (Ioane 14:6, 13) Sa lē faaaofia e Iesu le manatu e faapea, e mafai e so o se tasi e taʻua o se sagato ona tautua i le matafaioi o se fofoga fetalai. Ia mātau foi po o ā fa a le aposetolo o Paulo e uiga i le Keriso: “O ia na maliu, a ua toe tu mai lava o ia; o loo i le itu taumatau foi o le  Atua, o loo fautua foi o ia mo i tatou.” “E faalatalata atu i le Atua ona o ia, auā o loo soifua pea ia e fautua mo i latou.”—Roma 8:34; Eperu 7:25.

Le Suafa e Ao Ona Faapaiaina

O upu na sosoo ai o le tatalo a Iesu e faapea: “Ia paia lou suafa.” E mafai faapefea e se tasi ona faapaia, pe faaesea le suafa o le Atua seʻi vaganā ua ia iloa ma faaaogaina? Ua iloatino le Atua i le suafa patino o Ieova, e silia i le 6,000 taimi i le “Feagaiga Tuai.”

Ua faapea mai le faamatalaga i le pito i lalo o le Esoto 6:3 i le Douay Version a le Katoliko e tusa ai i le suafa o le Atua: “Ua tuufaatasia e nisi o ona po nei le suafa o Ieova . . . , ona o le faaleoga saʻo o le suafa [o le Atua], lea o loo iai i le tusitusiga faa-Eperu, ma ua leiloa atu ona o le umi e lei toe faaaogaina.” O lea o loo faaaogā e le New Jerusalem Bible a le Katoliko le igoa Iauē (Yahweh). E ui ina fiafia nisi o tagata popoto i le faaleoga [Iauē], ae o “Jehovah” (Ieova) o se auala lea ua loa ona faavaeina ma faamaonia lona faaleoina o le suafa tauatua i le faa-Peretania. Ua iai i nisi gagana o latou lava faaleoga o le suafa tauatua. O le manatu tāua, o le tatou faaaogaina o le suafa i se auala e faapaiaina ai. Pe ua aʻoaʻoina oe e lau ekalesia e faaaogā le suafa o Ieova i le tatalo?

Mataupu Talafeagai mo le Tatalo

Na sosoo ai ma le aʻoaʻoina e Iesu o ona soo e tatalo e faapea: “Ia oo mai lou malo.” Ua faaopoopo mai le Evagelia a Mataio i upu nei: “Ia faia lou finagalo, I le lalolagi e pei ona faia i le lagi.” (Mataio 6:10) O le Malo o le Atua o se pulega e faafoeina e Iesu Keriso. (Isaia 9:6, 7) E tusa ai i valoaga a le Tusi Paia, o le a lē pine ae tafiesea pulega faaletagata uma ae aumaia se tulaga filemu i le lalolagi aoao. (Salamo 72:1-7; Tanielu 2:44; Faaaliga 21:3-5) O lea, e ao ai la i Kerisiano moni ona avea le Malo o fotuai mai o se matua e taʻutaʻu atu pea i a latou tatalo. Pe ua aʻoaʻoina oe e lau ekalesia e faia faapea?

O se mea e fiafia ai, na faaalia foi e Iesu e faapea e mafai ona aofia i a tatou tatalo ia mataupu totino o loo tatou manatu mamafa i ai. Ua ia fetalai: “Ia e foai mai ia te i matou i lea aso ma lea aso a matou mea e ʻai e tatau ma le aso. Ia e faamagalo ia te i matou i a matou agasala, Auā foi matou te faamagaloina atu ia i latou uma o e agaleaga mai ia te i matou. Aua foi e te taitaiina i matou i le faaosoosoga.” (Luka 11:3, 4) Ua faatatau fetalaiga a Iesu e faapea, e mafai ona tatou sailia le finagalo o le Atua i mataupufai o feagai ai i aso uma lava, e mafai foi ona tatou faalatalata atu ia Ieova e uiga i so o se mea atonu o faapopoleina ai i tatou po o afaina ai le filemu o o tatou mafaufau. O le faatoga atu i se tulaga faifai pea i le Atua i lenei auala o le a fesoasoani ai ia i tatou e sapaitalia lo tatou faalagolago atu ia te ia. Ma ua tatou saga iloa ai lana taaʻiga i o tatou olaga. O le talosaga i le Atua i aso taitasi e faamagalo i tatou i o tatou masei e faapena foi ona aogā. Ona tatou iloa atili ai lea o o tatou vaivaiga—ma lava papale ai i sese o isi. O le timaʻiga a Iesu ina ia tatou tatalo mo le laveaiina mai faaosoosoga e talafeagai foi, ae maise lava i le tagai atu i le paʻū maulalo o tulaga tau amio a le lalolagi. I le ogatasi ma lena tatalo, ua tatou faaeteete ai ia alofia siomaga ma tulaga e ono mafai ona taitaia ai i tatou i le faia o mea sese.

E lē mafesiligia ai la, le taʻu mai e le Tatalo a le Alii ia i tatou le tele o mea e uiga i le ofoina o tatalo e fiafia i ai le Atua. Ae pe o le finagalo ea o Iesu o le tau ina tatou taʻutaʻu o lenei tatalo ma lagi faatauloto i taimi uma?

Fautuaga Atili i Tatalo

Sa aaoina mai e Iesu nisi faatonuga i tatalo. I le Mataio 6:5, 6, ua tatou faitau ai e faapea: “Pe a e tatalo, aua neʻi e pei o tagata faafiaamiotonu auā, ua latou fia tutū ma tatalo i sunako ma fetaulaigāala, ina ia iloa i latou e tagata. . . . A o oe, pe a e tatalo, ina ulu atu ia i lou afeafe, ma pupuni lona puipui, i le e tatalo ai i lou Tamā o i le mea lilo; o lou Tamā foi o lē silasila i le mea lilo, na te avatu se taui ia te oe.” Ua aʻoaʻoina i tatou e nei upu e faapea e lē tatau ona ofoina atu ia tatalo i se auala faaalialia ma le fia mamapo ina ia faaofo ai se tasi.  Pe e te sasaa atu ea lou loto ia Ieova i se auala lilo, e pei ona uunaia mai e le Tusi Paia?—Salamo 62:8.

Na aaoina atu e Iesu lenei lapataiga e faapea: “A outou tatalo, aua neʻi tāutu i a outou upu, e pei o nuu ese; auā fa te i latou, o le tele o a latou upu e talia ai i latou.” (Mataio 6:7) E mautinoa lava, sa lei talia e Iesu le taulotoina o tatalo—sa lei talia foi e ia le faitauina mai i ni tusi. Na faasa foi e ana fetalaiga le faaaogaina o le rosalio.

Ua ioe mai se tusi tatalo a le Katoliko e faapea: “Atonu o a tatou tatalo sili o o tatou lava manatunatuga mai le loto pe a tatou liliu atu ia te ia i le loto faafetai po o manaoga foi, i taimi o faanoanoaga, pe o le tatou viiviia pea o ia i aso taitasi.” Na sau mai le loto ia tatalo a Iesu lava ia, e lei taulotoina. Mo se faaaoaoga, ia faitau le tatalo a Iesu ua faamauina i le Ioane mataupu e 17. O loo talafeagai i le tatalo faaaʻoaʻo, lea e faamamafa ai le faanaunauga o Iesu o le faapaiaina o le suafa o Ieova. Sa lei taulotoina le tatalo a Iesu ma sa sau mai le taʻele o le loto.

Tatalo e Faafofogaina e le Atua

Afai sa aʻoaʻoina oe e ofo atu ni tatalo tauloto, ina ia tatalo i “sagato” po o faatusa, pe faaaogā ni mea faalelotu e pei o le rosalio, o le auala la e tatalo ai e pei ona faataatia mai e Iesu, atonu e foliga mai e faigata i le taimi muamua. Peitai, o le ki o le iloa lelei o le Atua—lona suafa, ana fuafuaga, ma ona uiga totino. E mafai ona e faataulauina lenei tulaga e ala i se suesuega maeʻaeʻa o le Tusi Paia. (Ioane 17:3) Ua nofo sauni Molimau a Ieova ma loto malilie e fesoasoani ia te oe i lenei tulaga. Ioe, ua latou fesoasoani i le faitau miliona i le lalolagi aoao e ‘tofotofo ma latou iloa e lelei Ieova’! (Salamo 34:8) O le tele e te iloa ai le Atua, o le tele foi lea o le faaosofia o oe e viiviia o ia i le tatalo. Ma o le tele e te faalatalata atu ai ia Ieova i le tatalo faatauanau, o le vavalalata foi lena o lau faiā ma ia.

O lea ua uunaia ai le ʻau tapuai moni uma a le Atua ia “tatalo e le aunoa.” (1 Tesalonia 5:17) Ia faamautinoa o loo ogatasi moni au tatalo ma le Tusi Paia, e aofia ai faatonuga a Iesu Keriso. I lenei auala o le a mafai ai ona e mautinoa o le a talia e le Atua au tatalo.

[Ata i le itulau 7]

O le tele tatou te aʻoaʻoina e uiga ia Ieova, o le tele foi lena e faaosofia ai i tatou e tatalo atu ia te ia mai le loto