Ia Tausisia le Autasi i Nei Aso e Gata Ai
Ia Tausisia le Autasi i Nei Aso e Gata Ai
“Ia tusa la outou amio ma le tala lelei . . . ua outou tumau i le agaga e tasi, ma le manatu e tasi, o loo finau faatasi mo le faatuatuaga ua i le tala lelei.”—FILIPI 1:27.
1. O le ā le faaeseesega o loo iai i le va o Molimau a Ieova ma le lalolagi?
O ASO nei o “aso e gata ai.” E aunoa ma le masalomia, ua oo mai nei “aso faigata.” (2 Timoteo 3:1-5) I nei “ona po o le iuga,” ma lona sosaiete faaletagata ua lē mautonu, o loo matilatila ai le eseesega o Molimau a Ieova ona o lo latou filemu ma le autasi. (Tanielu 12:4) Peitai o tagata taitoatasi o le aiga aoao o tagata tapuai o Ieova ua manaomia ona latou galulue mamafa ina ia tausisia lenei autasi.
2. O le ā na taʻua e Paulo e faatatau i le tausisia o le autasi, ma o le ā le fesili o le a tatou talanoaina?
2 Na timaʻi atu le aposetolo o Paulo i ona uso Kerisiano ina ia tausisia le autasi. Na ia tusi atu: “Ia tusa la outou amio ma le tala lelei ia Keriso, pe afai ou te alu atu ma feiloai ma outou, pe ou te nofo ese, ia ou iloa pea sina tala ia te outou, ua outou tumau i le agaga e tasi, ma le manatu e tasi, o loo finau faatasi mo le faatuatuaga ua i le tala lelei; o loo le faamatatauina outou i se mea e tasi e i latou o e tetee mai; auā o le faailoga lea ia te i latou o le malaia, a o le faailoga o le ola ia te outou, e mai le Atua foi lea.” (Filipi 1:27, 28) O upu a Paulo ua faaalia manino ai e tatau ona tatou galulue faatasi o ni Kerisiano. O lea la, o le ā o le a fesoasoani ia i tatou ina ia tausisia ai lo tatou autasi faa-Kerisiano i nei taimi faigata?
Gauai Atu i le Finagalo Tauatua
3. O anafea ma na faapefea ona avea tagata o Nuu Ese lē peritomeina ma soo o Keriso?
3 O se tasi o auala e tausisia ai lo tatou autasi o le gauai atu lea i le finagalo tauatua i taimi uma lava. O lenei mea atonu e manaomia ai se fetuutuunaiga i o tatou mafaufauga. Seʻi manatu i uluai soo Iutaia o Iesu Keriso. Ina ua muai talaʻi atu le aposetolo o Peteru i tagata o Nuu Ese e lē peritomeina i le 36 T.A., na liligiina ifo e le Atua lona agaga paia i luga o nei tagata o nuu ese, ma papatisoina ai i latou. (Galuega, mataupu 10) A o lei oo mai i lena taimi, sa na o tagata Iutaia, o tagata ua liliu i le faa-Iutaia, ma tagata Samaria na avea ma soo o Iesu Keriso.—Galuega 8:4-8, 26-38.
4. Ina ua uma ona faamatala atu le mea na tupu e tusa ai ma Konelio, o le ā na fai mai ai Peteru, ma o le ā le tofotofoga na faapogaia e lenei mea mo soo Iutaia o Iesu?
4 Ina ua logotala le ʻau aposetolo ma isi uso sa i Ierusalema e uiga i le faaliliuina o Konelio ma isi tagata o Nuu Ese, sa latou fiafia ina ua faalogo i le tala a Peteru. Ina ua uma ona faamatala atu le mea na tupu e tusa ai ma Konelio ma isi tagata talitonu o Nuu Ese, na faaiu atu le tala a le aposetolo i upu nei: “O lenei, afai e tusa le alofa [o le agaga paia] ua foaiina mai e le Atua ia te i tatou [tagata Iutaia] atoa ma i latou [o tagata talitonu o Nuu Ese], ina ua faatuatua i le Alii o Iesu Keriso, o ai ea aʻu nei ou te mafaia ona vavao atu i le Atua?” (Galuega 11:1-17) Sa avea lenei mea o se tofotofoga mo soo Iutaia o Iesu Keriso. Pe na latou gauai atu ea i le finagalo o le Atua ma talia tagata talitonu o Nuu Ese e avea ma o latou uso tapuai? Pe o le a lamatia ea le autasi o auauna a Ieova o loo i le lalolagi?
5. Na faapeī uiga na faaalia e le ʻau aposetolo ma isi uso i le mea moni e faapea ua foai atu e le Atua i Nuu Ese le salamō, ma o le ā e mafai ona tatou aʻoaʻoina mai lenei uiga?
5 Ua faapea mai le tala: “Ua latou [le ʻau aposetolo ma isi uso] faalogo mai i ia upu, ona latou faalologo lea, ua vivii atu foi i le Atua, ua faapea ane, ‘E moni, ua foai atu e le Atua i nuu ese le salamo e ola ai.’” (Galuega 11:18) O lena uiga na faasaoina ma uunaia ai atili le autasi o soo o Iesu. I le na o se taimi puupuu lava, ae ua agaʻi atu le galuega talaʻi i tagata o Nuu Ese, ma sa iai le faamanuiaga a Ieova i na galuega. E tatau ona tatou talia pe a manaomia mai la tatou lagolagosua e faatatau i le faavaeina o se faapotopotoga fou pe a faia foi ni fetuunaiga faatiokarate e tusa ai ma le taitaiga a le agaga paia o le Atua. O la tatou lagolagosua ma le loto atoa o le a faafiafiaina ai Ieova ma o le a fesoasoani ia i tatou e tausisia ai lo tatou autasi i nei aso e gata ai.
Ia Pipii Atu i le Upu Moni
6. O ā āuga ua faia e le upu moni i le autasi o tagata tapuai o Ieova?
6 I le avea ma vaega o le aiga o tagata tapuai a Ieova, tatou te tausisia ai le autasi auā o i tatou uma ‘ua aʻoaʻoina e Ieova’ ma tatou pipii mausalī atu ai i lana upu moni ua faaalia. (Ioane 6:45; Salamo 43:3) Talu ai ua faavae aʻe a tatou aʻoaʻoga i le Afioga a le Atua, ua tatou tautala ai ma le loto gatasi. Tatou te talia ma le fiafia meaʻai faaleagaga ua faaavanoa e Ieova e ala mai i “le auauna faamaoni ma le mafaufau.” (Mataio 24:45-47) O na aʻoaʻoga laugatasia e fesoasoani ia i tatou e tausisia ai lo tatou autasi i le lalolagi aoao.
7. Pe afai e faafaigata ia i tatou taitoatasi ona malamalama i se aʻoaʻoga patino, o le ā e tatau ona tatou faia, ae o le ā e lē tatau ona tatou faia?
7 Ae faapefea pe afai e faafaigata ia i tatou taitoatasi ona malamalama pe talia se aʻoaʻoga patino? E tatau ona tatou tatalo mo le atamai ma faia ni sailiiliga i le Tusi Paia ma lomiga faa-Kerisiano. (Faataoto 2:4, 5; Iakopo 1:5-8) E mafai ona fesoasoani le talanoa atu i se toeaina. Pe afai e lē manino pea le manatu, atonu e sili ona lelei pe a faataatia ai loa iina le mataupu. Atonu o le a lomia mai i se isi taimi nisi faamatalaga atili i le mataupu, ona faalauteleina ai lea o lo tatou malamalamaga. Peitai, o se mea sese, pe a tatou taumafai e faatalitonu isi o le faapotopotoga ina ia latou talia o tatou manatu ese. O lenei mea o le a iu ai i ni fefinauaiga, e lē faasaoina ai le autasi. Maeu le sili atu ona lelei pe a ‘savavali pea i le upu moni’ ma faalaeiau i isi ina ia faia foi faapea!—3 Ioane 4.
8. O le ā le uiga e talafeagai ona faaalia i le upu moni?
8 I le uluai senituri, na faapea mai ai Paulo: “O ona po nei tatou te vaavaai ai faanenefu i le faaata, a o ia ona po tatou te fesagai ai; o nei ona po ou te iloa ai faaleatoa, a o ia ona po ou te iloa tino ai, pei ona iloatinoina o aʻu.” (1 Korinito 13:12) E ui lava sa lei malamalama Kerisiano anamua i faamatalaga uma, ae na latou tumau pea i le autasi. Ua sili atu ona matuā manino le malamalamaga ua ia i tatou i le taimi nei e faatatau i fuafuaga a Ieova ma lana Afioga o le upu moni. O lea, seʻi o tatou loto faafetai mo le upu moni ua tatou maua e ala mai le “auauna faamaoni.” Ma seʻi o tatou faafetaia le taitaiina o i tatou e Ieova e ala i lana faalapotopotoga. E ui lava e lē tutusa pea i taimi uma le tele o le poto ua tatou maua, ae tatou lē o matelaina pe galala i le itu faaleagaga. Nai lo lea, ua autasia pea i tatou e lo tatou Leoleo Mamoe, o Ieova, ma tausia lelei i tatou.—Salamo 23:1-3.
Ia Faaaogā Tatau le Laulaufaiva!
9. E mafai faapefea ona faaaogā le laulaufaiva e uunaia atili ai le autasi?
9 O le faaaogaina o le laulaufaiva e faalaeiau ai i isi o se auala tāua lea e uunaia atili ai le autasi ma le agaga o le fealofani o le auuso. Sa avea o se puna o faalaeiauga le tusi lea na avatu ai le tali mo le mataupu i le peritomeina, e pei ona auina atu e le vaega pule o le uluai senituri. Ina ua uma ona faitau atu, ona ‘olioli ai lea i faamafanafanaga’ le ʻau soo o Nuu Ese i Anetioka. O Iuta ma Sila, o ē na aumaia le tusi mai Ierusalema, sa la “faamafanafana atu, ma faamalosi atu i le au uso i upu e tele.” E mautinoa lava, o le iai iina o Paulo ma Panapa sa faalaeiauina ma faamalosia ai foi uso talitonu i Anetioka. (Galuega 15:1-3, 23-32) O le tele foi lena o mea e mafai ona tatou faia a o tatou potopoto faatasi mo sauniga faa-Kerisiano ma ‘fefaamafanafanaai ai’ e ala i lo tatou auai ma a tatou upu faalaeiau.—Eperu 10:24, 25.
10. Ina ia tausisia le autasi, o le ā e ono mafai ona fai pe a tupu aʻe le faia o ni upu leaga po o le laulauvavale?
10 Peitai ane, o le sese ona faaaogā o le laulaufaiva e mafai ona lamatia ai lo tatou autasi. Na tusi mai le soo o Iakopo: “E faapea foi le laulaufaiva, o le mea itiiti lea, a ua lafo upu faasausili. Faauta, o le afi itiiti e mu ai le vao laau e tele!” (Iakopo 3:5) E inosia e Ieova i latou o ē faapogaia maseiga. (Faataoto 6:16-19) O faamatalaga faapena e mafai ona faapogaia ai le lē autasi. O lea la, e faapefea pe afai o loo faia ni upu leaga, o lona uiga, o le laulauvavale i se tasi po o le taufāifai atu ia te ia? O le a taumafai le autoeaina e fesoasoani i lē ua faia le sese. Peitai ane, o se tagata fai upu leaga e lē salamō, e tatau ona faateʻaeseina o ia ina ia mafai ai ona tausisia pea le filemu, le maopoopo, ma le autasi o le faapotopotoga. Auā foi, na tusi mai Paulo: “Ai se tasi ua taʻuusoina a e . . . agatele [“fai upu leaga,” NW] . . . aua lava neʻi tou feoai, aua foi tou te aai faatasi ma le o faapea.”—1 Korinito 5:11.
11. Aisea e tāua ai le loto maulalo pe afai ua tatou faia se tala ua faapogaia ai se va lē lelei ia i tatou ma se isi uso talitonu?
11 O le puleaina o le laulaufaiva e fesoasoani lea ia i tatou ina ia tausisia ai le autasi. (Iakopo 3:10-18) Ae seʻi faapea la o se tala ua tatou faia ua faapogaia ai se va lē lelei ia i tatou ma se isi uso Kerisiano. Pe o le a lē talafeagai ea le tausolomua e tausia le filemu ma lo tatou uso, e ala i le faatoese atu i ai pe afai e tatau ai? (Mataio 5:23, 24) E moni, o lenei gaoioiga e manaomia ai le loto maulalo, po o le maulalo ifo o le mafaufau, peitai na tusi mai Peteru: “Ia oofu outou uma lava i le loto maulalo o le tasi i le tasi; auā, E tetee atu le Atua i e faamaualuluga, a e foaiina mai le alofa tunoa i e faamaulalo.” (1 Peteru 5:5) O le loto maulalo o le a uunaia ai i tatou e ‘sailia le filemu’ ma o tatou uso, e ala i le taʻutino atu o a tatou measese ma faia ni faatoesega talafeagai. O le a fesoasoani lenei ina ia tausisia ai le autasi o le aiga o Ieova.—1 Peteru 3:10, 11.
12. E mafai faapefea ona tatou faaaogā le laulaufaiva e uunaia atili ma tausisia ai le autasi o tagata o Ieova?
12 E mafai ona tatou faalautele atu le agaga lelei o le aiga ia i latou o loo i le faalapotopotoga a Ieova pe afai tatou te faaaogā tatau o tatou laulaufaiva. Talu ai o le mea lena na faia e Paulo, sa mafai ai ona ia faamanatu atu i uso i Tesalonia e faapea: “Pei ona outou iloa, sa matou i ai ia te outou taitasi, pei o le tamā i lana lava fanau, na matou apoapoai atu ia te outou, o faamafanafana atu foi, ma taʻutino atu, ina ia outou savavali ia tatau i le Atua.” (1 Tesalonia 2:11, 12) O le faataatiaina o se faaaoaoga lelei i lenei tulaga, na mafai ai e Paulo ona ia uunaia ona uso Kerisiano ina ia “faamafanafana i e loto iti.” (1 Tesalonia 5:14) Seʻi mafaufau i le tele o se lelei e mafai ona tatou faia e ala i le faaaogā o le laulaufaiva e apoapoai, e faalaeiau, ma faamalosiau atu ai i isi. Ioe, o “le upu i ona aso ua tatau i ai, e lelei naua lea.” (Faataoto 15:23) E lē gata i lea, o faamatalaga faapena e fesoasoani ina ia uunaia atili ma tausisia ai le autasi o tagata o Ieova.
Ia Faamagalo Atu!
13. Aisea e tatau ai ona tatou faamagalo atu?
13 O le faamagaloina o sē na faatiga mai ae ua faatoese e manaomia tele pe afai tatou te fia tausisia le autasi faa-Kerisiano. Ma e tatau ona faafia ona tatou faamagalo atu? Na fetalai atu Iesu ia Peteru: “Ou te le fai atu . . . seia atu fitu, a ia fitugafulu ni fitu.” (Mataio 18:22) Pe afai tatou te lē faamagalo atu, o lona uiga o le a lē lelei foi mo i tatou. E faapefea? Auā, o lagona tiga ma le teuloto pea o se lagona ita o le a aveesea mai ai ia i tatou le filemu o le mafaufau. Ma pe afai ua lauiloa i tatou ona o ni uiga sauā ma le lē loto faamagalo, e mafai ona tatou aumaia ai ni aafiaga tiga ia i tatou lava. (Faataoto 11:17) O le taofiofia pea o se lagona ita po o le ita faamoemoe e lē faafiafiaina ai le finagalo o le Atua ma e mafai ona taitaia atu i se agasala matuia. (Levitiko 19:18) Seʻi manatua, na vavaeeseina le ulu o Ioane le Papatiso ona o se faufauga na faia e le fafine leaga o Herotia, o lē na “ita” ia te ia.—Mareko 6:19-28.
14. (a) O le ā ua aʻoaʻo mai e le Mataio 6:14, 15 ia i tatou e faatatau i le faamagalo atu? (e) Pe tatau ea ona tatou faatalitali pea seʻi faatoese mai se isi ona faatoʻā faamagalo atu lea i ai?
14 O upu nei ua aofia ai i le tatalo faaaoao a Iesu: “Ia e faamagalo ia te i matou i a matou agasala, Auā foi matou te faamagaloina atu ia i latou uma o e agaleaga mai ia te i matou.” (Luka 11:4) Afai tatou te lē faamagalo atu, ua ia i tatou la se lamatiaga, atonu i se aso o le a lē toe faamagaloina e Ieova le Atua a tatou agasala, auā na fetalai Iesu: “Afai tou te faamagaloina atu tagata i a latou agasala, e faamagaloina foi outou e lo outou Tamā o i le lagi. A e afai tou te le faamagaloina atu tagata i a latou agasala, e le faamagaloina foi e lo outou Tamā a outou agasala.” (Mataio 6:14, 15) O lea, afai tatou te mananao moni e faia la tatou vaega i le tausisia o le autasi i le aiga o tagata tapuai o Ieova, o le a tatou faamagalo atu la, atonu pe i le tau lava ina faagalo se mea tiga na fai mai ona o le lē mafaufau lelei ma sa faia e aunoa ma ni fuafuaga leaga na iai. Na taʻua e Paulo e faapea: “Ia fefaapalepaleai, ma ia fefaamagaloai outou, pe afai ua agaleagaina se tasi e se tasi; faapei ona faamagalo mai le Alii [Ieova] ia te outou, ia faapea foi outou.” (Kolose 3:13) Pe afai tatou te faamagalo atu, ua tatou fesoasoani ai i le tausisia o le autasi e sili ona tāua o le faalapotopotoga a Ieova.
Le Autasi ma Filifiliga Totino
15. O le ā e fesoasoani i tagata o Ieova ina ia tausisia ai le autasi a o faia ni filifiliga totino?
15 Sa faia i tatou e le Atua ina ia tatou saʻoloto e filifili o tatou lava ala o gaoioiga, faatasi ai ma le faaeaga ma le tiute tauave e faia ai a tatou filifiliga totino. (Teuteronome 30:19, 20; Kalatia 6:5) Peitai, ua mafai ona tatou tausisia lo tatou autasi auā tatou te usitaia tulafono ma mataupu silisili o le Tusi Paia. O iina e faavae mai ai le faia o a tatou filifiliga totino. (Galuega 5:29; 1 Ioane 5:3) Seʻi faapea ua mapuna aʻe se fesili e faatatau i le solitu. E mafai ona tatou faia se filifiliga totino atamai e ala i le manatuaina e faapea “e le ni o le lalolagi” i tatou ma o lea ua tatou ‘tuʻi i a tatou pelu e fai ma uamea o suotosina.’ (Ioane 17:16; Isaia 2:2-4) O le tulaga foi lena, pe afai e tatau ona tatou faia se filifiliga totino e tusa ai o la tatou faiā ma le Faiga Malo a le atunuu, tatou te manatunatu i mea o loo fai mai ai le Tusi Paia e faatatau i le toe totogi atu o mea a le ‘Atua i le Atua,’ ae i le taimi foi e tasi o loo tatou usitai atu i “faipule silisili” e tusa ai o mataupu tau i le malo. (Luka 20:25; Roma 13:1-7; Tito 3:1, 2) Ioe, o le manatuaina o tulafono ma mataupu silisili a le Tusi Paia pe a faia filifiliga totino e fesoasoani i le tausisia o lo tatou autasi faa-Kerisiano.
16. E mafai faapefea ona tatou fesoasoani i le tausisia o le autasi pe a faia ni filifiliga na e lē o aafia ai se tulafono po o se mataupu silisili faale-Tusi Paia? Ia faataitai.
16 E mafai ona tatou fesoasoani i le tausisia o le autasi faa-Kerisiano e oo lava foi pe a faia se filifiliga e matuā patino lava i le tagata lava ia ma e lē o aafia ai se tulafono po o se mataupu silisili faale-Tusi Paia. E faapefea? E ala i le faaalia o le manatu mamafa alofa mo i latou o ē ono aafia ai i la tatou filifiliga. Seʻi faataitai: I le faapotopotoga i Korinito anamua, na mapuna aʻe ai se faafitauli e faatatau i le faaaogaina o aano manufasi e fai ai taulaga i tupua. O le mea moni lava, sa lē faia e se Kerisiano sana vaega i se sauniga faaifo i tupua. Peitai ane, sa lē o se agasala le aia o se aano manufasi ua lelei ona faaalu ese le toto, na totoe mai i lenei fuafuaga, ma sa faatauina atu i le maketi. (Galuega 15:28, 29; 1 Korinito 10:25) E ui lava i lea, sa afaina loto fuatia ifo o nisi Kerisiano e faatatau i le ʻaia o lenei aano manufasi. O lea na faalaeiau atu ai Paulo i isi Kerisiano ina ia latou aloese mai le faatausuaiina o i latou na. Auā o le mea moni, na ia tusi atu: “Afai e tausuai loʻu uso ona o le mea e ʻai, ou te le toe ʻai lava i tino o manu e oo i le faavavau, ina neʻi tausuai ai loʻu uso ia te aʻu.” (1 Korinito 8:13) E tusa lava la pe leai se tulafono po o se mataupu silisili faale-Tusi Paia o aafia ai, ae maeu se agalelei pe a manatunatu i isi a o faia a tatou filifiliga totino na e mafai ona aafia ai le autasi o le aiga o le Atua!
17. O le ā ua fautuaina le faia pe afai e tatau ona fai ni a tatou filifiliga totino?
17 Pe afai tatou te lē o mautinoa po o le ā le laasaga e tatau ona fai, e atamai la ona filifili ina ia faia le mea tatou te tausia ai pea se loto fuatia ifo mamā, ma e tatau i isi ona latou faaaloalogia la tatou filifiliga. (Roma 14:10-12) O le mea moni, pe afai e tatau ona tatou faia se filifiliga totino, e ao ona tatou saili atu e ala i le tatalo mo le taitaiga a Ieova. I le pei o le faisalamo, e mafai ona tatou tatalo atu ma le mautinoa: “Ia e liliu mai ou fofoga ia te au; . . . Auā o oe lava loʻu papa, ma loʻu ʻolo; ia e taʻitaʻi mai ma tausi ia te au ona o lou suafa.”—Salamo 31:2, 3.
Ia Tausisia Pea le Autasi Faa-Kerisiano
18. Na faapefea ona faataitaia mai e Paulo le autasi o le faapotopotoga Kerisiano?
18 I le 1 Korinito mataupu e 12, ua faaaogā ai e Paulo le tino o le tagata e faataitaia mai ai le autasi o le faapotopotoga Kerisiano. Sa ia faamamafaina le faalagolago atu o le tasi i le isi ma le tāua o vaega taitasi. Na fesili Paulo: “Afai foi o mea uma o le itu tino e tasi ia, pe faapefea le tino? A o lenei, e lasi itu tino, a e tasi lava le tino ia. E le mafai foi i le mata ona fai ane i le lima, ‘E leai sou aoga ia te au’; e le mafai foi i le ulu ona fai ifo i vae, ‘Lua te le aoga ia te au.’” (1 Korinito 12:19-21) I le tulaga tutusa, e lē o i tatou uma o i totonu o le aiga o tagata tapuai o Ieova e tutusa uma mea tatou te faatinoina. Peitai, ua tatou autasi, ma e manaomia e le tasi le isi.
19. E mafai faapefea ona tatou manuia mai sauniuniga faaleagaga a le Atua, ma o le ā na fai mai ai se tasi uso matua e tusa ai ma lenei tulaga?
19 E pei lava ona manaomia e le tino meaʻai, le tausiga lelei, ma le taitaiga, ua faapena foi ona tatou manaomia sauniuniga faaleagaga o loo foai mai e le Atua ia i tatou e ala mai i lana Afioga, i lona agaga, ma lana faalapotopotoga. Ina ia manuia mai nei sauniuniga, e tatau ona avea i tatou ma vaega o le aiga o Ieova o loo i le lalolagi. Ina ua mavae le tele o tausaga o iai se tasi uso i le auaunaga i le Atua, na ia tusi mai: “Ou te matuā faafetai ona ua ou ola aʻe e tusa ai ma le poto e uiga i fuafuaga a Ieova mai lava i la aso a o lei oo i le 1914, a o lei matuā manino lelei upu moni . . . e oo mai i lenei aso o lea ua matuā susulu le upu moni e pei o le tusaʻo o le la. Pe afai e iai se mea e sili ona tāua ia te aʻu, o lona uiga o le pipii mau atu lea i le faalapotopotoga vaaia a Ieova. O mea na tutupu ia te au i taimi anamua ua aʻoaʻoina ai aʻu i le lē aogā o le faalagolago atu i manatu faaletagata. O le taimi lava na manino ai i loʻu mafaufau lena manatu, sa ou maumauaʻi loa e tumau ai i le faalapotopotoga faamaoni. Pe iai ea se isi auala e mafai ai e se tasi ona maua le finagalo malie o Ieova ma ana faamanuiaga?”
20. O le ā e tatau ona tatou maumauaʻi e fai i lo tatou autasi o ni tagata o Ieova?
20 Ua valaaulia e Ieova ona tagata ina ia ō ese mai le lalolagi pogisa ma le lē autasi. (1 Peteru 2:9) Ua ia aumaia i tatou i le autasi ua faamanuiaina e autasi ai ma ia ma o tatou uso talitonu. O le a iai lenei autasi i le faiga fou o mea lea ua matuā lalata mai lava. O lea la, i nei aso faigata o aso e gata ai, seʻi o tatou faaauau pea ona ‘faaofuina i tatou i le alofa’ ma faia mea uma tatou te mafai ina ia uunaia atili ma tausisia ai lo tatou autasi e sili ona tāua.—Kolose 3:14.
O le a Faapefea Ona E Tali?
□ Aisea e mafai ai e le faia o le finagalo o le Atua ma le pipiimau atu i le upu moni ona fesoasoani ia i tatou e tausisia ai le autasi?
□ Ua faapefea ona fesootai le autasi ma le faaaogā tatau o le laulaufaiva?
□ O le ā ua aofia ai i le faamagalo atu?
□ E mafai faapefea ona tatou tausisia le autasi a o faia ni filifiliga totino?
□ Aisea e tausisia ai le autasi faa-Kerisiano?
[Fesili mo le Suʻesuʻega]
[Ata i le itulau 16]
E pei lava ona faapotopoto faatasi e lenei leoleo mamoe lana lafu, ua faapena foi ona autasia e Ieova ona tagata
[Ata i le itulau 18]
O lo tatou faatoese atu ma le loto maulalo pe a tatou faapogaia ni tiga, tatou te fesoasoani ai i le uunaia atili o le autasi