Litaea—Pe ua Tatala ai ea se Avanoa mo Galuega Faatiokarate?

LITAEA—i le toatele, o le iuga lea o se taimi umi o mafatiaga ma le ogotia. I le lē toe taofiofia i le fiu ma le matuā pisi tele i faasologa, o le toatele ua latou tulimataia le oo atu i le litaea o se avanoa mo tausaga e fai ai le faitalia o le tagata ma le saʻolotoga totino. E ui i lea, ua masani lava ona oo atu ai i le fiu ma le lē fiafia. O tafaoga ma mausa ua lē aumaia ai se faamalieina i le tagata lava ia nai lo lea e aumaia e galuega.

Ae i Molimau a Ieova, o le litaea ua mafai ona tatalaina atu ai ‘se faitotoa lautele e taitaiina atu ai i galuega.’ (1 Korinito 16:9) E ui ina aumai e le tulaga matua faafitauli ma tapulaa, o nisi o tagata matutua ua latou iloaina faapea, e faatasi ai ma le fesoasoani a Ieova ua mafai ai ona latou faateleina la latou auaunaga ia te ia. Seʻi mafaufau i mea na tutupu i nisi o Kerisiano matutua i Holani. A o faagasolo le tausaga faaleauaunaga o le 1995, e toʻa 269 o le sili atu i le 1,223 o paeonia (auauna sauatoa o ē faalauiloa le Malo) e taʻi 50 o latou tausaga po o le sili atu foi. I le 269 o nei paeonia, e toʻa 81 i latou ua taʻi 65 o latou tausaga pe sili atu foi.

O nisi ua mafai ona paeonia ona ua faaauau i le tulaga pisi lava lea e tasi sa latou faia a o iai i a latou galuega faaletino. (Faatusatusa i le Filipi 3:16.) E manatua e se tasi o Kerisiano ua litaea e suafa ia Karel e faapea: “Ina o oʻu faigaluega i laʻu galuega faaletino, sa masani ona ou amata i le 7:30 i le taeao. Ina ua amata ona maua laʻu penisione, sa faia saʻu faaiuga e faaauau pea i le faasologa lava lea e tasi. E amata loʻu aso i le faia o le galuega mekasini i luga o le alatele i luma o le nofoaga e tutū ai nofoaafi i le ta o le fitu i taeao taitasi.”

O se faasologa lelei o le ala lea i le taulau manuia o taumafaiga. (Faataoto 21:5) Mo se faataitaiga, o nisi ua mafai ona latou tuuesea se vaega tupe talafeagai e fesoasoani ai ia i latou i la latou auaunaga. O nisi ua latou filifili e faaitiitia tupe faaalu mo i latou lava ma ua faigaluega ai faavaitaimi. Seʻi manatunatu ia Theodore ma Ann. Sa la amataina lo la olaga faaipoipo i le avea ma paeonia seia oo ina tulai mai ia manaoga faaleaiga ua manaomia ai loa ona taofia. Peitai sa olaola pea lo la agaga fia paeonia! A o tuputupu aʻe le la fanau teine, sa la faalaeiau soo ia i latou ia paeonia. Ae sili atu ona tāua, sa faataatia e Theodore ma Ann se faataitaiga lelei, i le auai soo i le auaunaga paeonia lagolago. O lea a o tutupu aʻe ina matutua teine, sa amata ona faaitiitia e Theodore ma Ann a la galuega faaletino ina ia mafai ai ona tele se taimi mo le auaunaga i le fanua.

Ina ua ulu atu la la fanau teine i le faiva faataimi atoa ma la tuua ai le aiga, sa amata ai loa e Ann ona paeonia. I se tasi aso sa ia faalaeiau atu ai ia Theodore e faamavae mai i lana galuega. Sa ia fautua atu: “E mafai lava e i taʻua uma ona paeonia.” Sa faailoa atu e Theodore i lona pule ona faanaunauga. Na faateʻia o ia ina ua ofoina atu e lona pule se fesoasoani e ala i le tuuina atu ia te ia o se galuega faavaitaimi ma faapea atu: “Ou te masalo ua e manao e te faigaluega faasauatoa mo lou pule i lugā [i le lagi].” O loo olioli nei Theodore ma Ann i le galulue faatasi o ni paeonia.

O nisi na amata ona paeonia ona o ni mea na tutupu i o latou olaga. O le matuā faanoanoa i le maliu o le la tama teine ma le tama a le la tama e sefulu ona tausaga sa oo ai ina mafaufauina loloto e se tasi ulugalii ua matutua le auala e faaaogaina ai o la olaga o loo totoe. (Failauga 7:2) Nai lo le lofia i faanoanoaga, sa la faia le auaunaga faasauatoa, lea o loo la olioli ai nei mo le sili atu i le valu tausaga!

E talitonuina faapea, e manaomia ni filifiliga moni maumaututu ina ia tumau ai i le faiva faataimi atoa. Mo se faataitaiga, o Ernst ma lana avā, o Riek, sa la amata ona paeonia i le taimi lava na tuua ai e le la fanau le aiga. E lei leva lava ae ofoina atu loa ia Ernst e se tasi sa la auaumea muamua faapisinisi se galuega e tele ai ni tupe e maua. Sa tali atu Ernst e faapea: “Ua ma mauaina se pule e sili ona lelei, ma e ma te lē o  mananao e tuua lo ma auauna atu ia te ia!” Talu ai sa tumau Ernst ma lana avā i le “faigaluega” mo Ieova, sa tatalaina atu ai ia te i laua nisi o faaeaga o le auaunaga. Sa la auauna i le galuega matagaluega mo le sili atu i le 20 tausaga ma o loo faaauau pea i le auaunaga paeonia seia oo mai i le asō. Pe la te faanoanoa ea i lo la faataulagaina totino? I se vaitaimi ua tuanai sa tusi mai ai lenei ulugalii e faapea: “Pe afai o le finagalo lea o Ieova, i le tolu masina i le lumanai e ma te faamanatuina ai le 50 tausaga o la ma faaipoipoga, lea e masani ona taʻua o le faamanatuga faaauro. Ae o lo ma talitonuga atoatoa e ma te faapea atu o o ma tausaga faaauro na amata ina ua amata la ma paeonia.”

O le toatele ua latou iloa faapea o le faitotoa e taitaiina atu ai i galuega faateleina, o le a taitaiina atu ai foi i le faateleina o le olioli! O se tasi o uso o lē sa amataina lana paeonia i le lua vaiaso talu ona atoa lona 65 tausaga ua ia faapea mai: “E tatau ona ou faapea atu, ou te lei mauaina muamua lava se taimi faapenei i loʻu olaga ua matuā faatumulia i faamanuiaga nai lo le sefulu tausaga ua tuanai o le galuega paeonia.” O se ulugalii faaipoipo o ē sa paeonia mo le sili atu i le fitu tausaga sa la faapea mai: “O le ā se isi mea e tatau ona faia e se ulugalii e tutusa o matou tausaga ma o matou tulaga? E masani ona ma vaaia tagata e tutusa o matou tulaga i le oganuu—o loo faamaepaepa i le laufaumalū i o latou aiga, faateleina le lapopoa, matutua, ma malō le tino. O le auaunaga ua faaauau ai ona ma malolosi i le mafaufau ma le tino. E ma te faatasi i taimi uma. E ma te taliē i le tele o taimi ma olioli i le olaga.”

Peitai, e lē o tagata matutua uma ua faatagaina e o latou tulaga e paeonia. E mafai ona faamautinoa atu i nei Kerisiano faapea e talisapaia e Ieova so o se mea lava latou te mafaia i lana auaunaga. (Faatusatusa i le Mareko 12:41-44.) Mo se faataitaiga, o se tasi o tuafafine ua faataotolia i maʻi ua tausia i se nofoaga e tuu ai tagata matutua. Peitai, na tatalaina pea se faitotoa o galuega mo ia! Sa fesili atu se fomaʻi ia te ia po o le ā lana mea o fai i le tele o ona taimi. Sa ia faamatalaina e faapea: “Sa ou taʻu atu ia te ia e lē o lava loʻu taimi. Sa faigata ona ia malamalama i lenei mea. Sa ou taʻu atu ia te ia ua māfua lenei mea ona o oʻu taimi ua faatumulia i galuega e faamalieina ai. Ou te lē o faanoanoa i le tuua toatasi, ae o loo oʻu sailia isi o ē o loo faanoanoa i le tuua toatasi ma taumafai e taʻu atu ia i latou le mea o loo teuina e le Atua mo tagata.” Sa ia aoteleina mea i lona faapea atu: “Mai i se tasi ua toeitiiti 80 ona tausaga e lē tele ni mea o toe faatalitalia mai ia te ia. Ia tatalo mo aʻu ina ia ou mafai ai pea ona ou tataʻia atu le toatele ia Ieova.”

Pe o e iai ea i tausaga litaea? O le avanoa e faifai mālie ai atonu e manaia lona faatosina mai, ae peitai e lē o le avanoa lea mo faamanuiaga faaleagaga. Ia manatunatu faatasi ma le tatalo i lou tulaga. Atonu o le a mafai ai ona e agaʻi atu i le avanoa e tau atu i galuega faateleina i le faiva ia Ieova.

[Ata i le itulau 25]

O le litaea e mafai ona taitaiina atu ai i galuega faateleina i le faiva