O Mea e Mafai Ona Tatou Aʻoaʻoina Mai i Meaola e “Sili Ona Popoto”

O MASINI mo le faamaluluina o le ea, le faafetaiaia o le mālūlū, le tuueseina o le masima mai vai, ae maise lava le suasami, ma le faiga e mafai ai ona iloa mea o loo i lalo o le suavai e ala i le lagonaina o siuleo, o iuga ia o suesuega ua lauiloa i tagata o le 20 senituri. Peitai, ua leva ona iai i le olaga o meaola i le faitau afe o tausaga a o lei faia e tagata nei mea. Ioe, ua maua aogā e tagata i lo latou suesueina o ia meaola e “sili ona popoto.” (Faataoto 30:24-28; Iopu 12:7-9) O nisi o meaola patino, e foliga mai, ua avea ma faiaʻoga lē magagana o tagata, ma e mafai ona tatou mauaina ai le fiafiaga tele i le iloiloina o uiga ua matuā ese ai nei meaola.

Pe mafai ona tatou maua aogā mai le suesueina o uiga o ni meaola patino? O le mea moni, sa faatusaina e Iesu ona soo i mamoe, gata, lupe, e oo lava i sē akerise. O le ā sa i lona finagalo a o ia faatusaina ona soo i nei meaola? Seʻi o tatou iloiloina.

“O Aʻu Mamoe e Faalogo Mai i Latou i Loʻu Leo”

Ua taʻua mamoe e sili atu i le faaluaselau i le Tusi Paia. E pei ona faamatalaina e le Smith’s Bible Dictionary e faapea: “O le mamoe o se faatusa lea o le agamalu, onosai, ma le gauai.” I le mataupu e 53 o le Isaia, sa faatusaina ai faavaloaga Iesu lava ia i se mamoe. Maeu le fetaui o lona faatusaina o ona soo i lena lava meaola e tasi! Ae o lē fea uiga o mamoe sa i le finagalo o Iesu?

Sa fetalai Iesu e faapea: “O aʻu mamoe e faalogo mai i latou i loʻu leo, ua ou iloa foi i latou, ua latou mulimuli mai foi ia te au.” (Ioane 10:27) O lea sa ia faamatilatila ai le agamalu o ona soo ma lo latou naunau e mulimuli atu ia te ia. O mamoe moni e faalogo i lo latou leoleo mamoe ma loto malie e mulimuli atu ia te ia. O le leoleo mamoe foi e māfana atu o ia i le lafu.

Atonu e salalau solo se lafu i le fanua a o latou aai, ae o mamoe taitasi e taumafai e fesootai atu i le vaega o le lafu atoa. O lea pe afai e lagona e le mamoe lona lē mautonu po o le fefe, “ona mafai loa lea ona latou faapotopoto ma le faanatinati,” o le faamatalaga lea a le tusi o le Alles für das Schaf (Mea Uma mo le Mamoe). Afai e sosola ese mamoe ina ia sao mai lamatiaga, latou te ō faatasi o se lafu, e tutū i nisi taimi ina ia toe fuafua le tulaga o loo iai. “E sosola faasolosolo ina ia tuu atu ai le avanoa i tamai mamoe ma mamoe vaivai e faaauau ai ona pipii atu pea i le lafu. E ofoina atu foi e le lafu se puipuiga faapitoa mo i latou.” O le ā e mafai ona tatou aʻoaʻoina mai lenei uiga?

E lē o taapeape Kerisiano moni i aso nei i le lotolotoi o lotu ma vaega o Kerisinetoma. Nai lo lena, latou te faatasitasi i totonu o le lafu e tasi. O Kerisiano taitoatasi e latou te lagona se māfana totino atu i lenei lafu a le Atua, ma o lenei mea e saosaolaumea ai i le autasi o le  faalapotopotoga o Molimau a Ieova. Po o le ā lava le taimi e tulai mai ai tulaga faigata—po o maʻi matautia, taua, po o mala faalenatura—o fea o loo sulufai atu i ai tagata tapuai taitoatasi mo le taitaiga ma le puipuiga? I totonu o le faalapotopotoga a Ieova, lea o loo ofoina mai ai le saogalemu faaleagaga.

O faapefea ona mauaina mai fautuaga mai le Tusi Paia? E ala mai i lomiga e pei o Le Olomatamata ma lona soa o le Ala Mai! O nei mekasini atoa ai ma sauniga faa-Kerisiano o loo aumaia ai fesoasoani faapitoa ia i latou o loo moomia se fesoasoani faaopoopo, e pei lava o tamai mamoe ma mamoe vaivai i se lafu. Mo se faataitaiga, o le uaʻi atu ua tuuina atu i se matua ua tuua toatasi ma i latou ua pagatia i mafatiaga. O lea, maeu le atamai o le faitau o mekasini taitasi, auai i sauniga uma a le faapotopotoga, ma ia faatatauina mea o loo tatou aʻoaʻoina! O lena tatou te faaalia ai le agamalu ma le tosina malosi atu i le lafu mamoe a le Atua.—1 Peteru 5:2.

“Ia Outou Atamamai Pei o Gata, a ia Fifilemu e Pei o Lupe”

Ua taʻua e le Smith’s Bible Dictionary e faapea: “I le itu atoa i Sasaʻe sa faaaogā ai le gata o se faailoga o le leaga, o le agaga o le lē usiusitai.” I le isi itu, o “laʻu lupe” o se taʻu o le alofa faapelepele. (Pese a Solomona 5:2) O lea, o le ā sa i le finagalo o Iesu, ina ua ia faalaeiau atu i ona soo ina ia “atamamai pei o gata, a ia fifilemu e pei o lupe”?—Mataio 10:16.

Sa tuuina atu e Iesu faatonuga mo le talaʻiga ma le aʻoaʻo atu. E ono mafai ona faatalitalia e ona soo taimi e talileleia ai ma taimi foi e lē talileleia mai ai la latou galuega talaʻi. O le a toaitiiti latou te faaalia le fiafia, ae o isi o le a teena le tala lelei. O nisi e oo lava ina latou sauāina nei auauna faamaoni a le Atua. (Mataio 10:17-23) O le a faapefea ona tali atu soo i sauāga?

I le Das Evangelium des Matthäus (Le Evagelia a Mataio), ua faapea mai Fritz Rienecker e tusa ai ma le Mataio 10:16: “O le atamai . . . e tatau ona ō faatasi ma le faamaoni, le moni, ma le matuā manino lelei, ia leai se mafuaaga e faapogaia ai faitioga mai fili. O sāvali a Iesu Keriso ua iai i le lotolotoi o ē tetee ma le sauā, o i latou o ē e aunoa ma se amanaiaina o le ʻau aposetolo ma latou osofaia e aunoa ma se alofa, ma sa faia i so o se avanoa lava latou te mauaina. O lea la, ua talafeagai ai—i le pei lava o le gata—ona tulimataia pea i latou o ē faatautee mai, ma ia toe iloiloina ma le manino tulaga o mea; ma ia faafoeina lelei tulaga o mea e aunoa ma le faaaogaina o togafiti po o le taufaasese, ia mamā ma moni i upu ma gaoioiga ma ia faamaonia i latou lava o ē pei ni lupe.”

O le ā la e mafai ona aʻoaʻoina e auauna a le Atua i aso nei mai upu o loo i le Mataio 10:16? I aso nei, ua tali mai tagata i le tala lelei e pei lava ona sa latou faia i le uluai senituri. Pe a fetaiai ma sauāga, o Kerisiano moni e manaomia ona latou tuufaatasia le atamai o le gata ma le tulaga mamā o le lupe. E lē mafai e Kerisiano ona faaaogaina le taufaasese po o le lē faamaoni, e lē amio piopio, e moni, ma faamaoni i le faalauiloaina atu o le feau o le Malo i isi.

Ina ia faataitaia: O aumea i galuega, o talavou i aʻoga, po o tagata lava o lou aiga atonu e mafai ona latou faia ni faamatalaga e faaleagaina ai lou talitonuga o se Molimau a Ieova. O le gaoioiga vave lava, atonu o le tali atu lea i se uiga tutusa e ala i le matuā tauleagaina o lo latou faatuatuaga. Ae pe o se taʻumamāina lena? Ailoga. Afai e te faaalia i ē o faitioina oe e faapea o a latou faaupuga e lē o afaina ai lau amio tauagafau, atonu o le a taofia ai la i latou  i le faia o ni faamatalaga matuitui. O le a ia te oe la le atamai atoa ai ma le lē mataʻuleagaina—le ‘atamai e pei o le gata, ae filemu e pei o le lupe.’

ʻO Sē Akerise o le Faatusa Lea o Solofanua ua Sauniunia mo le Taua’

Ua lipotia mai e le mekasini o le GEO e faapea, i le 1784 sa faatamaʻia ai Aferika i Saute e se aofaiga pito tele o [sē akerise] sa faamauina i faamaumauga i le talafaasolopito.” Sa ufitia ai se vaega e tusa ma le 2,000 maila faatafafa [5,200 kilomita faatafafa], pe tusa o le tuufaatasia faalima lea o Hong Kong. Ua faapea mai le Smith’s Bible Dictionary o sē akerise “ua latou faia faatamaʻiaga i mea totō i atunuu na latou oo atu i ai.”

I le faaaliga na tuuina atu e le Atua o mea o le a tutupu i “le aso o le Alii,” sa faaaogā ai e Iesu se faaaliga o se ʻau o sē akerise. Sa ia faapea mai e tusa ai ma i latou: “O sē akerise foi ua tino mai e pei o solofanua ua saunia i le taua.” (Faaaliga 1:1, 10; 9:3-7) O le ā la le uiga o lenei faatusa?

Ua loa ona malamalama Molimau a Ieova e faapea o sē akerise o le Faaaliga mataupu e 9 ua faaāta ai auauna faauuina a le Atua i luga o le lalolagi i lenei senituri. * O nei Kerisiano ua tofiaina i se galuega faapitoa—ia talaʻia le feau o le Malo i le lalolagi aoao ma faia soo. (Mataio 24:14; 28:19, 20) Ua manaomia ai i latou ia foia faafitauli ma pipiimau atu pea i la latou galuega. O le ā se isi faatusa e faamatalaina ai i latou nai lo sē akerise lē mafaatoilaloina?

E ui e sili laitiiti atu lava i le lua inisi le umi, ae o sē akerise e masani ona latou faimalaga i le va o le 60 ma le 120 maila [100 i le 200 kilomita] i le aso. O sē akerise o le toafa atonu latou te oo atu i le 600 maila [1,000 kilomita]. Ua faamatalaina e le GEO e faapea: “O ona apaau e apatā faasefuluvalu i le sekone ma faia faapea mo le 17 itula i le aso—o se mea e leai se isi iniseti e mafai ona faia.” Maeu se galuega tele mo lenei meaola laitiiti!

I le avea o se vaega, o Molimau a Ieova e lē maluelue i le faalauiloaina o le tala lelei o le Malo. Ua latou talaʻia nei i le sili atu i le 230 atunuu. O nei auauna a le Atua ua latou manumalo i le tele o faigata ina ia mafai ai ona auai i le faia o se sao i le tauaveina o le galuega. O ā ituaiga o faafitauli o latou fesagai? Faailoga tagata, faasasaaga faaletulafono, maʻi, lotovaivai, ma teteega mai auaiga, o nisi na o nai mea ua taʻua. Ae ua leai se mea e mafaia ona taofia lo latou agaigai i luma. E latou te pipii mau atu i la latou galuega ua tuuina atu i ai e le Atua.

Ia Faaauau Ona Faaali Atu Uiga Faa-Kerisiano

Ioe, sa faatusa e Iesu ona soo i mamoe, gata, lupe, ma sē akerise. Ua fetaui lelei lea mo o tatou aso. Aisea? Talu ai ona o le iuga o lenei faiga o mea ua lalata tele mai, ma o faafitauli ua oo atu i sona tulaga ogoogo nai lo so o se isi lava taimi.

I le teuina i le mafaufau o upu faafaatusa a Iesu, ua pipii atu ai Kerisiano i le lafu mamoe a le Atua ma talia ma le agamalu fautuaga mai le faalapotopotoga a Ieova. E latou te faaauau ona leoleomalu ma mataala i tulaga e ono faalavelavea ai a latou gaoioiga faa-Kerisiano, a o latou tumau ma le lē matauleagaina i mea uma. I le ma lea, ua latou naunautai e faia le finagalo o le Atua e ui i toatuga. Ma ua faaauau ona latou aʻoaʻoina mai i nisi o meaola e “sili ona popoto.”

[Faaopoopoga i lalo]