Ua Olioli le Aiga o Ieova i le Autasi e Sili Ona Tāua
Ua Olioli le Aiga o Ieova i le Autasi e Sili Ona Tāua
“Faauta, o le mea e matuā lelei ma le matagofie lava, pe a nonofo faatasi lava o uso.”—SALAMO 133:1.
1. O le ā le tulaga o loo iai le tele o aiga i aso nei?
UA IAI toatuga i aiga i aso nei. I le tele o aiga, ua tau malepelepe faiā faalefaaipoipoga. Ua faateleina le taatele o talagā faaipoipoga, ma o loo matuā faanoanoa ai le toatele o fanau a ulugalii ua tatala faaipoipoga. E faitau miliona aiga ua lē fiafia ma lē autasi. Peitai, e iai se aiga o loo latou maua le olioli ma le autasi moni. O le aiga aoao lea a Ieova le Atua. I totonu o lena aiga, e mano ni mano o agelu lē vaaia o loo faatinoina a latou tofiga e ogatasi ma le finagalo o le Atua. (Salamo 103:20, 21) Ae pe o iai ea se aiga i le lalolagi o olioli i lena autasi?
2, 3. (a) O ai ua avea nei ma vaega o le aiga aoao o le Atua, o le ā e mafai ona faatusaina i ai Molimau uma a Ieova i aso nei? (e) O ā fesili o le a tatou talanoaina?
2 Na tusi mai le aposetolo o Paulo: “Ou te tootuli ai i le Tamā, o ia ua faaigoaina ai le aiga uma o i le lagi atoa ma le lalolagi.” (Efeso 3:14, 15) O aiga uma lava o loo i le lalolagi ua faaigoaina i latou e le Atua auā o ia o Lē na Foafoaina Mea. E ui e leai ni aiga faaletagata i le lagi, ae i se gagana faafaatusa, ua faaipoipo atu le Atua i lana faalapotopotoga faalelagi, ma o le a iai se faatoanofotane faaleagaga a Iesu e aufaatasi atu ia te ia i le lagi. (Isaia 54:5; Luka 20:34, 35; 1 Korinito 15:50; 2 Korinito 11:2) Ua avea nei i latou faamaoni o ē faauuina o loo i le lalolagi o se vaega o le aiga aoao o le Atua, ma o “isi mamoe” a Iesu o loo iai le faamoemoe faalelalolagi, o isi foi na ona tagata o le a iai. (Ioane 10:16; Roma 8:14-17; Le Olomatamata, o Ianuari 15, 1996, itulau 31) Peitai, e mafai ona faatusaina Molimau uma a Ieova i aso nei i se aiga autasi i le lalolagi aoao.
3 Pe o oe ea o se vaega o le aiga matagofie faavaomalo o auauna a le Atua? Pe afai o e iai, ua e olioli la i se tasi o faamanuiaga sili e mafai ona maua e so o se tasi. E faitau miliona o le a molimauina lena aiga o Ieova i le lalolagi aoao—lana faalapotopotoga vaaia—o se mapusaga o le filemu ma le autasi o loo iai i se vaipanoa faalelalolagi ua na o vevesi ma fevaevaeaiga e maua ai. E ono faamatalaina faapefea le autasi o le aiga o Ieova i le lalolagi aoao? Ma o ā vala ua uunaia atili ai lena autasi?
Maeu le Lelei ma le Matagofie!
4. E faapefea ona e faamatala mai i au lava upu mea o loo taʻua i le Salamo 133 e faatatau i le autasi faaleuso?
4 Sa matuā talisapaia e le faisalamo o Tavita le autasi faaleuso. Na oo foi ina faagaeeina o ia e pese atu ai! Seʻi tagai faalemafaufau atu ia te ia ma lana kitara a o ia pese: “Faauta, o le mea e matuā lelei ma le matagofie lava, pe a nonofo faatasi lava o uso. Ua tusa ma le suāuu lelei i luga o le ulu, na tafe ifo i le ʻava, o le ʻava lava a Arona, na tafe ifo i le ua o ona ofu. E tusa ma le sau i Heremoni, ua totō ifo i luga o mauga o Siona; auā na poloai Ieova ia oo i ai lana faamanuia, o le ola lava lea e faavavau.”—Salamo 133:1-3.
5. E faavae aʻe i le Salamo 133:1, 2, o le ā le faatusatusaga e mafai ona faia i le va o le fanauga a Isaraelu ma auauna a le Atua i aso nei?
5 O na upu sa faatatau atu i le autasi faaleuso na olioli ai tagata anamua o le Atua, le fanauga a Isaraelu. A o iai i Ierusalema mo a latou tausamiga e tolu faaletausaga, sa latou nonofo faatasi ai i le autasi. E ui ina eseese ituaiga latou te ō mai ai, ae o i latou o se aiga e tasi. O le auaufaatasi sa iai se aafiaga aogā ia i latou, e pei o se uu fou e faauuina ai o loo sasala lona manogi matagofie. Ina ua sasaa lena uu i luga o le ulu o Arona, na tafe ifo i lana ʻava ma oo atu i le kola o lona ofu. I le tulaga o le fanauga a Isaraelu, o le autasia sa iai se aafiaga lelei na maua ai e tagata sa potopoto faatasi. Sa faaleleia ai ni feeseeseaiga, ma faateleina ai le autasi. E faapena foi le autasi o loo iai i le aiga aoao a Ieova i aso nei. O le auaufaatasi e lē aunoa ma o tatou uso talitonu ua iai se aafiaga aogā faaleagaga i ona tagata. Ua faaleleia ai so o se feeseeseaiga po o ni faafitauli a o latou faatatauina fautuaga o le Afioga a le Atua. (Mataio 5:23, 24; 18:15-17) E talisapaia tele e tagata o Ieova fetufaaiga ua maua mai ona o lo latou autasi faaleuso.
6, 7. Na faapefea ona faatusaina le autasi o Isaraelu i le sau mai le Mauga o Heremoni, ma o fea e mafai ona maua ai faamanuiaga a le Atua i aso nei?
6 Na faapefea i le nonofo faatasi ma le autasi o Isaraelu, ona faatusaina foi i le sau mai le Mauga o Heremoni? Talu ai e silia i le 9,000 futu [2,800 mita] le maualuga o lenei mauga, e toeitiiti lava atoa le tausaga o lilofia lona tumutumu i le kiona. O le tumutumu aisā o le Mauga o Heremoni ua faapogaia ai le liu vai o le ea mālū o le po ma faatupuina ai le tele o le sau lea e faaolaolaina ai faatoaga pe a oo mai le tau mātūtū. O ave o le ea mālūlū mai atumauga o Heremoni e mafai ona tauave atu ai na ea mālū i le mamao e oo atu i le itu i saute o Ierusalema, lea e liu suavai ai le ea e avea ma sau. Na saʻo ai la le taʻua e le faisalamo o ‘le sau o Heremoni o loo agaʻi atu i luga o le Mauga o Siona.’ Maeu se faamanatuga matagofie mai o āuga faafouina e uunaia atili i le autasi o le aiga o tagata tapuai o Ieova!
7 A o lei faavaeina le faapotopotoga Kerisiano, sa avea Siona, po o Ierusalema, ma totonugalemu o le tapuaiga moni. O lea, o iina na poloaia e le Atua le iai o faamanuiaga. Talu ai i le malumalu i Ierusalema sa afio ai i se tulaga faafaatusa le Puna o faamanuiaga uma, o iina la sa solo mai ai faamanuiaga. Talu ai ua lē toe faapitoa le faatūina o le tapuaiga moni i se nofoaga maʻoti e tasi, o lea la, o faamanuiaga, o le alofa, ma le autasi o auauna a le Atua e mafai ona maua i so o se vaega o le lalolagi i aso nei. (Ioane 13:34, 35) O ā nisi o vala e uunaia atili ai lenei autasi?
O Vala e Uunaia Atili ai le Autasi
8. O le ā ua tatou aʻoaʻoina e faatatau i le autasi i le Ioane 17:20, 21?
8 O le autasi o tagata tapuai o Ieova e faavae aʻe i le usitai atu i le Afioga a le Atua o loo iai le malamalamaga saʻo, e aofia ai aʻoaʻoga a Iesu Keriso. O le auina mai e Ieova o lona Alo i le lalolagi ina ia molimau atu i le upu moni ma maliu i se maliu faataulaga, na tatalaina ai le auala mo le faavaeina o le faapotopotoga autasi faa-Kerisiano. (Ioane 3:16; 18:37) O le iai o le autasi moni i ona tagata, na faamanino mai e Iesu ina ua ia tatalo: “E le faapito laʻu tatalo mo i latou nei, a o i latou foi e faatuatua ia te au ona o la latou upu; ina ia tasi i latou uma, faapei o oe le Tamā o i totonu ia te au, o aʻu foi o i totonu ia te oe, ia tasi i latou i totonu ia te i taua; ina ia talitonu le lalolagi ua e auina mai aʻu.” (Ioane 17:20, 21) Na maua e soo o Iesu le autasi na tutusa ma le autasi o loo iai i le va o le Atua ma lona Alo. Na tupu lenei mea auā sa latou usitaia le Afioga a le Atua ma aʻoaʻoga a Iesu. O le uiga lava lea o loo avea ma vala autū i le autasi o le aiga o Ieova i le lalolagi aoao i aso nei.
9. O le ā le matafaioi ua faatinoina e le agaga paia i le autasi o tagata o Ieova?
9 O le isi vala ua autasia ai tagata o Ieova o le iai ia i tatou o le agaga paia po o le malosi galue o le Atua. Ua mafai ai ona tatou malamalama i le upu moni ua faaalia mai o le Afioga a Ieova ma tatou auauna autasi atu ai ia te ia. (Ioane 16:12, 13) E fesoasoani le agaga ia i tatou ia alofia ai amioga a le tino na e lē maua ai se autasi e pei o misa, le loto leaga, le ita, ma le matauʻa. Ae nai lo lea, e faapogaia e le agaga o le Atua i tatou ina ia atiina aʻe fua e maua ai le autasi, e pei o le alofa, le olioli, le filemu, le onosai, le agalelei, le amiolelei, le faatuatua, le agamalu, ma le pulea totino.—Kalatia 5:19-23.
10. (a) O le ā le faatusatusaga e mafai ona faia i le va o le alofa o loo iai i se aiga faaletagata e autasi, ma le alofa lea e faamaonia le iai ia i latou o ē o loo tuutoina atu ia Ieova? (e) Na faapefea e se tasi o le Vaega Pule ona faailoa mai ona lagona e faatatau i le feiloai faatasi ma ona uso faaleagaga?
10 O se aiga autasi e fealofani ona tagata ma fiafia e auaufaatasi. Pe a faatusatusa atu i ai, o i latou o loo i le aiga ua autasia o tagata tapuai o Ieova e alolofa i latou ia te ia, i lona Alo, ma i o latou uso talitonu. (Mareko 12:30; Ioane 21:15-17; 1 Ioane 4:21) E pei lava ona fiafia se aiga e taumamafa faatasi, ua faapena foi ona fiafia i latou ua tuutoina atu i le Atua e auai i sauniga faa-Kerisiano, i fonotaga, ma tauaofiaga ina ia maua ai aogā mai auaufaatasiga matagofie ma taumafa faaleagaga e sili ona lelei. (Mataio 24:45-47; Eperu 10:24, 25) Na faapea mai se tasi o le Vaega Pule a Molimau a Ieova: “Ia te au ia, o le feiloai faatasi ma uso o se tasi lea o fiafiaga sili i le olaga ma o se puna o faalaeiauga. Ou te fiafia tele e iai ma i latou o ē muamua taunuu i le Maota o le Malo, ma iai foi ma i latou o ē mulimuli ō ese pe a talafeagai. Ou te lagona se olioli i loʻu loto pe a talatalanoa ma tagata o le Atua. E saʻoloto lava oʻu lagona pe a ou iai faatasi ma i latou.” Po o faapena ea ou lagona?—Salamo 27:4.
11. O le ā le galuega e sili ona maua ai e Molimau a Ieova le fiafia, ma o ā iuga e maua mai le taulai atu o o tatou olaga i le auaunaga i le Atua?
11 E maua e se aiga autasi le fiafia i le faifaimea faatasi. E faapena foi ona maua e i latou o loo i le aiga o tagata tapuai o Ieova le olioli pe a autasi i le faia o la latou galuega talaʻi o le Malo ma le faia o soo. (Mataio 24:14; 28:19, 20) O le faia i ai e lē aunoa o se sao tatou te vavalalata atu ai i isi Molimau a Ieova. O le taulai atu o o tatou olaga i le auaunaga i le Atua ma lagolagoina galuega uma a ona tagata e uunaia atili ai foi le agaga autasi o le aiga ia i tatou.
E Manaomia Tele le Maopoopo Faatiokarate
12. O ā uiga faaalia o se aiga e fiafia ma autasi, ma o le ā le faatulagaga na uunaia atili ai le autasi i faapotopotoga Kerisiano i le uluai senituri?
12 O se aiga e iai se taitaiga malosi ae faia ma le alofa ma e maopoopo, e tele lava ina autasi ma fiafia. (Efeso 5:22, 33; 6:1) O Ieova o ia o le Atua o le maopoopoga filemu, ma o i latou uma i lona aiga latou te manatu ia te ia o “lē Silisili ese.” (Tanielu 7:18, 22, 25, 27; 1 Korinito 14:33) Latou te amanaia foi ua ia tofia lona Alo, o Iesu Keriso, e avea ma suli i mea uma lava ma ua foaiina atu ia te ia le pule i mea uma i le lagi ma le lalolagi. (Mataio 28:18; Eperu 1:1, 2) Ona o Keriso o le ulu o le faapotopotoga Kerisiano, ua avea ai ma faalapotopotoga e maopoopo ma autasi. (Efeso 5:23) Ina ia faatonutonuina galuega a faapotopotoga i le uluai senituri, sa iai se vaega pule na faia aʻe i aposetolo ma isi “toeaina” ua taʻumatuaina faaleagaga. Sa tofu faapotopotoga taitasi ma o latou ovasia tofia, po o toeaina, ma auauna o le faiva. (Galuega 15:6; Filipi 1:1) O le usiusitai ia i latou o taimua na faatupu atili ai le autasi.—Eperu 13:17.
13. E faapefea ona taaʻina mai e Ieova tagata, ma o le ā e iu i ai lenei mea?
13 Ae pe o lenei ea la maopoopoga e faapea ai o le autasi o tagata tapuai o Ieova ua mafai ona faia ona o se taitaiga e soona pulepuletutū? E matuā leai lava! E leai se mea lē alofa e faatatau i le Atua po o lana faalapotopotoga. E taaʻina mai e Ieova tagata e ala i le faaalia atu i ai o le alofa, ma i tausaga taitasi e faitau selau o afe i latou ua loto malilie ma olioli e avea ma vaega o le faalapotopotoga a Ieova, e ala i le papatisoina e avea o se faailoga o lo latou tuuina atu ma le loto atoa i le Atua. Ua faapei o latou uiga o le uiga sa ia Iosua, o lē na faalaeiau atu i ona uso Isaraelu: “Ina filifili ia o outou i le aso nei, po o ai tou te auauna i ai . . . a o aʻu nei ma loʻu aiga, matou te auauna ia Ieova.”—Iosua 24:15.
14. Aisea e mafai ai ona tatou faapea atu e faatiokarate le faalapotopotoga a Ieova?
14 I le avea ma vaega o le aiga o Ieova, ua lē gata ai ina tatou olioli, ae ua tatou saogalemu foi. O le tulaga lena, talu ai e faatiokarate lana faalapotopotoga. O le Malo o le Atua o le faatiokarate (mai le upu Eleni the·osʹ, atua, ma le kraʹtos, le pule). O se pule mai le Atua, ua tofia ma faavaeina e ia. O le “nuu paia” ua faauuina a Ieova o loo gauai atu i lana pulega ma ua faapena ai foi ona faatiokarate. (1 Peteru 2:9) Ona ua avea le Faatiokarate Sili, o Ieova, ma o tatou Faamasino, le Faitulafono, ma o le Tupu, ua matuā tatau ai lava ona tatou lagona le saogalemu. (Isaia 33:22) Ae faapefea pe afai e mapuna aʻe ni finauga ma lamatia ai lo tatou olioli, le saogalemu, ma le autasi?
Ua Gaoioi le Vaega Pule
15, 16. O le ā le finauga na mapuna aʻe i le uluai senituri, ma aisea?
15 Ina ia faasaoina le autasi o se aiga, atonu e tatau ona foia mai lea taimi i lea taimi ni finauga. Seʻi faapea, sa tatau ona foia se faafitauli faaleagaga ina ia faasaoina ai le autasi o le aiga o tagata tapuai o le Atua i le uluai senituri T.A. O le ā la sa tatau ona fai? Sa gaoioi le vaega pule, i le faia o filifiliga i mataupu faaleagaga. O loo ia i tatou se faamatalaga faale-Tusi Paia o lena gaoioiga.
16 I le pe tusa o le 49 T.A., na feiloai ai le vaega pule i Ierusalema ina ia foia se faafitauli matuia ma o iina na faasaoina ai le autasi o “le aiga . . . o le Atua.” (Efeso 2:19) I le tusa ma le 13 tausaga muamua atu, na talaʻi atu ai le aposetolo o Peteru ia Konelio, ma papatisoina ai loa uluai tagata o Nuu Ese, o ē na talitonu. (Galuega, mataupu 10) A o faagasolo le uluai malaga faamisionare a Paulo, e toatele tagata o Nuu Ese na latou taliaina le Faa-Kerisiano. (Galuega 13:1–14:28) O le mea moni, na faavaeina ai i Anetioka i Suria se faapotopotoga o Kerisiano mai Nuu Ese. Na manatu nisi Kerisiano Iutaia e faapea e tatau i tagata o Nuu Ese ua liulotu ona peritomeina ma tausia le Tulafono faa-Mose, ae sa lē ioe i ai isi. (Galuega 15:1-5) O lenei finauga sa ono iu ai i le matuā malepe o le autasi, pe oo foi ina faaeseese ai le faavaeina o ni faapotopotoga a tagata Iutaia mai tagata o Nuu Ese. O lea na vave ai loa ona gaoioi le vaega pule ina ia faasaoina le autasi faa-Kerisiano.
17. O le ā le faagasologa autasi faatiokarate ua faamatalaina i le Galuega mataupu e 15?
17 Ua taʻua i le Galuega 15:6-22, “ona faapotopoto lea o le au aposetolo ma toeaina e filifili i lenei mea.” Sa iai foi ma nisi, e aofia ai se usugafono mai Anetioka. Na muamua ona faamatala e Peteru faapea ‘o ia na muai faalogo ai tagata o nuu ese i le tala lelei ma latou talitonu.’ Ona sosoo lea ma le faalogo atu o “le toatele uma” a o faamatala e Panapa ma Paulo “faailoga ma vavega e tele ua faia e le Atua i nuu ese.” Ona sosoo lea ma le faaali atu o se manatu o Iakopo i le auala e ono foia ai le faafitauli. Ina ua maeʻa ona faia e le vaega pule se filifiliga, ua taʻu mai ia i tatou e faapea: “Ona lelei ai lea i le au aposetolo, ma toeaina, atoa ma le ekalesia uma, e filifili ma aauina atu i Anetioka faatasi ma Paulo ma Panapa ni o latou tagata.” O na ‘tagata na filifilia’—o Iuta ma Sila—sa la aveina atu se tusi faalaeiau i uso talitonu.
18. O le ā le faaiuga na faia e le vaega pule, o loo aofia ai le Tulafono faa-Mose, ma na faapefea i lenei mea ona aafia ai Kerisiano Iutaia ma Nuu Ese?
18 Na amata le tusi lea sa faasilasila atu ai le faaiuga a le vaega pule i upu nei: “O loo alolofa atu le au aposetolo, ma toeaina, atoa ma le au uso i le au uso o tagata o nuu ese o i Anetioka, ma Suria, ma Kilikia.” Sa auai foi ma nisi uso i lenei fono mataina, ae foliga mai o le vaega pule sa faia aʻe i “le au aposetolo, ma toeaina.” Na taitaia i latou e le agaga o le Atua, auā ua faapea mai le tusi: “Ua lelei i le Agaga Paia ma i matou nei, ia le faaee atu se tasi avega ia te outou, na o nei mea e tatau: ia faamamao outou i mea e fasia mo tupua, ma le toto, ma mea titina, ma le faitaaga.” (Galuega 15:23-29) Sa lei manaomia ona peritomeina Kerisiano ma tausia le Tulafono faa-Mose. O lenei faaiuga na fesoasoani ai i tagata Kerisiano Iutaia ma Nuu Ese ina latou gaoioi ma tautala ma le autasi. Sa olioli faapotopotoga, ma faaauau ai pea i le autasi e sili ona tāua, e pei foi ona iai i le aiga o le Atua i le lalolagi aoao i aso nei i lalo o le taitaiga faaleagaga a le Vaega Pule o Molimau a Ieova.—Galuega 15:30-35.
Auauna i le Autasi Faatiokarate
19. Aisea ua uluola ai le autasi i le aiga o tagata tapuai o Ieova?
19 E uluola le autasi pe a felagolagomai tagata o se aiga. O le tulaga moni foi lena i le aiga o tagata tapuai o Ieova. Ona o ni ē faatiokarate, sa auauna ai i le Atua toeaina ma isi i le faapotopotoga i le uluai senituri i se tulaga felagolagomai atoatoa ma le vaega pule ma talia a latou faaiuga. Faatasi ai ma le fesoasoani a le vaega pule, sa ‘talaʻia ai le upu’ e toeaina ma ‘sa tasi foi upu uma lava’ i manatu o tagata lautele o faapotopotoga. (2 Timoteo 4:1, 2; 1 Korinito 1:10) O lea sa tutusa pau lava upu moni faale-Tusi Paia na taulimaina i le faiva ma na sa taulimaina i sauniga faa-Kerisiano, pe e i Ierusalema, i Anetioka, i Roma, i Korinito, po o se isi lava mea. O le autasi faatiokarate foi lena o loo iai i aso nei.
20. Ina ia faasaoina lo tatou autasi faa-Kerisiano, o le ā e tatau ona tatou faia?
20 Ina ia faasaoina lo tatou autasi, e tatau ia i tatou uma o ē ua fai ma vaega o le aiga o Ieova i le lalolagi aoao, ona faaalia le alofa faatiokarate. (1 Ioane 4:16) E manaomia ona tatou gauai atu i le finagalo o le Atua ma faaalia le faaaloalo loloto mo ‘le auauna faamaoni’ ma le Vaega Pule. I le pei o lo tatou tuutoina atu i le Atua, o le mea moni, o lo tatou usiusitai foi, e faia ma le loto malie ma le olioli. (1 Ioane 5:3) Maeu le fetaui lelei o le faafesootaia e le faisalamo o le olioli ma le usiusitai! Na ia pese e faapea: “Ia outou vivii atu ia Ioa, Amuia le tagata o lē mataʻu ia Ieova, o loo o fiafia tele i ana poloaiga.”—Salamo 112:1.
21. E mafai faapefea ona tatou faamaonia atu o i tatou o ni ē faatiokarate?
21 O Iesu, le Ulu o le faapotopotoga, e matuā faatiokarate o ia ma na te faia pea le finagalo o lona Tamā. (Ioane 5:30) O lea, seʻi o tatou mulimuli atu i lo tatou Faaaoao e ala i lo tatou faia i se uiga faatiokarate ma le autasi o le finagalo o Ieova, e ala i le felagolagomai atoatoa ma Lana faalapotopotoga. Ona mafai ai lea i le olioli mai le loto ma le agaga faafetai, ona tatou toe usuina atu le pese a le faisalamo e faapea: “Faauta, o le mea e matuā lelei ma le matagofie lava, pe a nonofo faatasi lava o uso.”
O le a Faapefea Ona E Tali?
□ E mafai faapefea ona fesootai atu lo tatou autasi faa-Kerisiano i le autasi o loo i le Salamo e 133?
□ O ā nisi vala e uunaia atili ai le autasi?
□ Aisea e manaomia tele ai le maopoopoga faatiokarate mo le autasi o tagata o le Atua?
□ Na faapefea ona gaoioi le vaega pule i le uluai senituri ina ia faasaoina le autasi?
□ O le ā le uiga o le autasi faatiokarate ia te oe?
[Fesili mo le Suʻesuʻega]
[Ata i le itulau 13]
Sa gaoioi le veaga pule e faasaoina le autasi