“Ia Faapea Foi Outou Ona Paia i a Outou Amio Uma”

“A e pei ona paia o ia na valaauina outou, ia faapea foi outou ona paia i a outou amio uma; auā ua tusia, Ia paia outou, auā o aʻu nei e paia lava aʻu.”—1 PETERU 1:15, 16.

1. Aisea na faalaeiauina ai e Peteru Kerisiano ina ia paia?

AISEA na tuuina mai ai e le aposetolo o Peteru le fautuaga o loo i luga? Talu ai sa ia iloaina se manaoga mo Kerisiano taitoatasi ina ia leoleoina ona manatu ma amio ina ia mafai ai ona tausia ia talafeagai ma le tulaga paia o Ieova. O lea na ia faatomua mai ai upu o loo taʻua i luga e faapea: “O lenei, ia outou fusi ae i sulugatiti o outou mafaufau, ia faautauta . . . Ia pei o fanau gauai, aua neʻi amio outou e tusa ma o outou tuʻinanau tuai, a o vālea outou.”—1 Peteru 1:13, 14.

2. Aisea na lē paia ai o tatou tuinanau a o lei aʻoaʻoina e i tatou le upu moni?

² O o tatou tuinanau muamua sa lē paia. Aisea? Ona o le toatele o i tatou sa mulimuli atu i ala o le lalolagi a o lei taliaina le upu moni faa-Kerisiano. Na iloa lelei e Peteru lenei mea ina ua ia tusi mai ma le manino e faapea: “Ua lava ia aso ua mavae na fai ai e outou le manao o e faapaupau, o savavali i le faamatāitu ma tuʻinanau, ma le inu tele i uaina, ma poula, ma inugāava, ma le ifo i tupua e soli ai tulafono.” O le mea moni sa lei taʻua mai e Peteru amioga e lē paia ua taatele i lo tatou lalolagi i aso nei talu ai sa lei aliali mai i lena vaitaimi.—1 Peteru 4:3, 4.

3, 4. (a) E faapefea ona tatou faafetaiaia tuinanauga leaga? (e) Pe e tatau i Kerisiano ona leai ni faalogona? Faamatala.

³ Pe na e mātauina mai ea o nei tuinanau e fiafia i ai le tino, le tofo, ma faalogona? Pe a tatou faatagaina nei mea e pulea i tatou, ona faigofie lava lea ona lē paia o tatou manatu ma gaoioiga. Ua faataitaia mai ai e lenei mea le manaomia ona tuu atu le malosi i le mafaufau tonu ina ia pulea a tatou gaoioiga. Ua faapenei ona faamatala mai e Paulo: “O lenei, le au uso e, ou te aioi atu ia te outou, ona o le alofa mutimuti vale o le Atua, ia outou tuuina atu o outou tino i le Atua, o le taulaga ola, ma le paia, ma le mālie, o le mea lea e tatau ai ona outou faia.”—Roma 12:1, 2.

⁴ Ina ia tuuina atu i le Atua se taulaga e paia, e ao ona taitaia i tatou e le mana o le mafaufau tonu, ae lē o le pulea e faalogona. Pagā le toatele ua aafia i amioga lē mamā ona ua latou faatagaina lagona e pulea ai a latou amio! E lē o le uiga o lenei mea e faapea o le a matuā solipala ai i lalo o tatou faalogona; pe a faia faapea, e faapefea la ona faailoa atu lo tatou olioli i le auaunaga ia Ieova? Peitai, afai tatou te mananao e fua mai fua o le agaga nai lo galuega o le tino, ua tatau ai la ona toe fuataiina o tatou mafaufau e tusa ma ala o le finagalo o Keriso.—Kalatia 5:22, 23; Filipi 2:5.

Ia Paia le Olaga, Auā e Paia le Tau

5. Aisea na mataalia ai Peteru i le manaoga mo le faapaiaina?

⁵ Aisea na matuā mataalia ai Peteru i le manaoga mo le faapaiaina mo Kerisiano? Talu ai sa iloa lelei e ia le tau paia ua uma ona totogia ina ia togiolaina ai tagata usiusitai. Na ia tusi mai faapea: “Auā ua outou iloa e lei togiolaina outou i mea e pala, o le ario po o le auro, nai la outou amio le aoga na tuuina mai  e o outou tamā; a o le toto tāua o Keriso pei o lo le tamai mamoe e le ponā lava, e leai foi sona ila.” (1 Peteru 1:18, 19) Ioe, o le Puna o le paia, o Ieova le Atua, na auina mai lona Alo pele e toatasi, “le Paia o le Atua,” i le lalolagi ina ia totogia le togiola ua mafai ai e tagata ona maua se faiā lelei ma le Atua.—Ioane 3:16; 6:69; Esoto 28:36; Mataio 20:28.

6. (a) Aisea e lē faigofie ai mo i tatou ona tausisia pea le paia o amio? (e) O le ā e mafai ona fesoasoani ia i tatou e tausia le paia o a tatou amio?

⁶ E ui i lea, ua tatou iloa e lē faigofie ona ola i se olaga e paia a o iai i le lotolotoi o le lalolagi faapiopio a Satani. Ua ia tataoina mailei mo Kerisiano moni, o ē o loo taumafai e ola i lana faiga o mea. (Efeso 6:12; 1 Timoteo 6:9, 10) O omiga mai i galuega, o teteega mai i aiga, o tauemuga i aʻoga, ma omiga mai uo e manaomia ai le matuā malosi faaleagaga ina ia mafai ai e se tasi ona faatumauina le paia. Ua faamamafa mai ai e lena mea le vaega tāua e faia e a tatou suesuega totino ma le auai e lē aunoa i sauniga faa-Kerisiano. Na fautua atu Paulo ia Timoteo e faapea: “O matua o upu [“po o upu e aogā,” NW] e ola ai, na e faalogologo mai ai ia te au, ia e taofia i le faatuatua ma le alofa ia Keriso Iesu.” (2 Timoteo 1:13) Tatou te faalogo atu i na upu e aogā mai i le Maota o le Malo ma i a tatou suesuega totino o le Tusi Paia. E mafai ona fesoasoani mai ia i tatou ina ia paia ai a tatou amio i aso taitasi i vala eseese uma lava.

Amio Paia i Totonu o le Aiga

7. E ao faapefea ona aafia o tatou aiga i le tulaga ua faapaiaina?

⁷ Ina ua sii mai e Peteru le Levitiko 11:44,  na ia faaaogā le upu Eleni o le haʹgi·os, o lona uiga o le “vavae ese mai le agasala ma tuutoina atu i le Atua, paia.” (O le lomifefiloi a W. E. Vine o le Expository Dictionary of New Testament Words) E ao faapefea ona aafia ai i tatou i lenei tulaga paia i lo tatou olaga i le aiga faa-Kerisiano? E tatau ona mautinoa o o tatou olaga i le aiga e ao ona faavae i le alofa, auā “o le Atua, o le alofa lava ia.” (1 Ioane 4:8) O le alofa faataulagaina o le suauu lea e sologa lelei ai le faiā i le va o paaga ma le va o mātua ma fanau.—1 Korinito 13:4-8; Efeso 5:28, 29, 33; 6:4; Kolose 3:18, 21.

8, 9. (a) O le ā le tulaga e tupu i nisi taimi i le aiga Kerisiano? (e) O le ā le fautuaga aogā ua aumaia e le Tusi Paia i lenei mataupu?

⁸ Atonu tatou te manatu faapea o le faaalia o lea ituaiga alofa o le a otometi ona iai i se aiga Kerisiano. Peitai, e ao ona faailoa atu e lē o taimi uma e pulea ai e le alofa le aiga Kerisiano e pei ona sa tatau ona iai. E ono foliga atu o loo faaalia le alofa i le Maota o le Malo, ae pagā le faigofie ona faaitiitia o lo tatou tulaga faapaiaina i le siomaga faaleaiga. Ona teʻi lava lea ua galo ia i tatou o le avā o loo avea pea o ia ma o tatou tuafafine Kerisiano po o le tane o loo tumau pea ona avea o ia ma uso (ma atonu o se auauna o le faiva po o se toeaina) lea e foliga mai e faaaloalogia i le Maota o le Malo. E oo ina tatou feita, ma e mafai ona tutupu mai ai ni finauga aasa. E mafai ona totolo mai ai se olaga uigalua i o tatou olaga. Ua lē toe avea loa le faiā o se tane ma se avā faa-Kerisiano ae ua na o se tamaloa ma se fafine e feainai. Ua galo ia i laua e tatau ona iai se siomaga paia i totonu o le aiga.  Atonu ua amata ona la tautatala e pei o tagata o le lalolagi. Pagā le faigofie ona puna mai ai loa i le gutu ni faamatalaga taufāifai ma le faatiga!—Faataoto 12:18; faatusatusa i le Galuega 15:37-39.

⁹ E ui i lea na fautua mai Paulo e faapea: “Aua neʻi alu atu se upu leaga [faa-Eleni, loʹgos sa·prosʹ, “faamatalaga leaga,” o lona uiga e lē paia] ai o outou gutu, na o le upu lelei e ati ae ai i mea e aoga, e tupu ai le lelei i e faalogologo i ai.” Ma e faatatau lea i tagata uma o faalogologo i totonu o le aiga, e aofia ai ma le fanau.—Efeso 4:29; Iakopo 3:8-10.

10. E faapefea ona faatatau le fautuaga i le tulaga faapaiaina i le fanau?

¹⁰ E lē gata i lea, o le taiala lenei e uiga i le faapaiaina e tutusa lelei lona faatatauina atu i fanau o i totonu o se aiga Kerisiano. Pagā le faigofie mo i latou ona foi mai i le aiga mai le aʻoga ma amata ona faataitai atu i tala fouvale ma le lē faaaloalo a o latou tupulaga faalelalolagi! Fanau e, aua le tosina fua i uiga na faaalia e tama lē migao o ē na fāifai i le perofeta a Ieova, o ē ua tutusa ma le toatele o talavou i aso nei ua lē mafaufau o latou gutu ma fai upuleaga. (2 Tupu 2:23, 24) E lē tatau ona faaleagaina lau tautala i le gagana masoā soona tuulafoai a tagata paiē pe lē manatu mamafa e faaaogā upu e logoleleia. I le avea ma Kerisiano, o la tatou tautala e tatau ona paia, logoleleia, ia atiina aʻe, agalelei, ma “ia faamāi i le masima.” E ao ona iloa ai e ese i tatou mai isi tagata.—Kolose 3:8-10; 4:6.

Tulaga Paia ma o Tatou Aiga Lē Talitonu

11. Aisea e lē uiga ai le faapaiaina faapea ua avea ma ē ua amiotonu naʻuā?

¹¹ A o tatou taumafai ma le mataalia e faatino le paia, e lē tatau ona tatou foliga atu e sili ona lelei ma amiotonu naʻuā nai lo isi, ae maise lava pe a tatou feutagai ma tagata lē talitonu o le aiga. O lo tatou agalelei ma amioga faa-Kerisiano e tatau ona fesoasoani ia i latou ina ia iloa e ese i tatou i se auala e aogā, e faapea tatou te iloa auala e faaalia ai le alofa ma le faapalepale, e pei ona sa faia e le Samaria agalelei i le faataoto a Iesu.—Luka 10:30-37.

12. E mafai faapefea e paaga Kerisiano ona avea le upu moni o se mea e sili atu ona logoleleia i a latou paaga?

¹² Na faamamafa mai e Peteru le tāua o le vaaiga saʻo e tatau ona faaali atu i tagata lē talitonu o le aiga ina ua ia tusi atu i avā Kerisiano e faapea: “Ia faapea outou fafine, ia usiusitai i a outou lava tane, afai foi e le faalogo nisi i le upu, ia maua i latou i le amio lelei a avā, a e leai se upu, pe a latou vaai ane i a outou amio mamā ma le faaaloalo.” E mafai e se avā Kerisiano (po o le tane e tusa ai i lena mataupu), ona avea le upu moni o se mea e sili atu ona logoleleia i se paaga lē talitonu pe afai o lana amio e mamā, magafagafa, ma faaaloalo. O le uiga o lenei mea e tatau ona fetuutuunai le faasologa faatiokarate ina ia lē tuulafoaia ai le paaga lē talitonu. *—1 Peteru 3:1, 2.

13. E mafai faapefea e toeaina ma auauna o le faiva ona fesoasoani atu i nisi taimi i tane lē talitonu ina ia talisapaia le upu moni?

¹³ O nisi taimi e mafai ona fesoasoani atu ai toeaina ma auauna o le faiva e ala i le faamasani atu i se tulaga faasamasamanoa i le tane lē talitonu. I lenei auala, atonu o le a ia iloa ai o Molimau e pei lava o isi tagata lautele, o tagata e tauagafau e tele mea e fiafia i ai, e aofia ai ma isi mataupu e ese mai le Tusi Paia. I se tasi mea na tupu, na faaalia ai e se toeaina le naunau atu i le mausa a se tasi tane o le fagota. Na lava lena e soloia ai le papupuni sa iai ma maua ai se faigauo. Na oo ina avea lena tane ma uso ua papatisoina. I se isi mea na tupu, sa fiafia tele se tasi tane lē talitonu i ni tamaʻi manu felelei lanu meamata ma samasama. Sa lē faavaivai ai toeaina. Na suesueina e se tasi o toeaina le mataupu e faatatau i nei manufelelei laiti, ina ia mafai ai ona fai se la talanoaga ma le tamaloa i lena  mataupu e pele ia te ia i le taimi la te toe feiloai ai! O le avea ma sē e paia, e lē faapea ai o le a pumoomoo le mafaufau ma taotasi atu i se mea e tasi.—1 Korinito 9:20-23.

E Mafai Faapefea Ona Paia i Tatou i le Faapotopotoga?

14. (a) O le ā se tasi auala a Satani mo le faaleagaina o le faapotopotoga? (e) E mafai faapefea ona tatou tetee i mailei a Satani?

¹⁴ O Satani le Tiapolo o le taufaaleaga, auā o le igoa Eleni mo le Tiapolo, o le di·aʹbo·los, o lona uiga o “lē tautuai” po o “lē taufaaleaga.” O le taufaaleaga, o se tasi o ona tomai faapitoa, ma e taumafai o ia e faaaogā i le faapotopotoga. O le auala e sili ona fiafia i ai o ia o le faitala. Pe tatou te faatagaina ea i tatou e fai ma sē ua ia faavaleaina i lenei ituaiga o amio e lē paia? E mafai faapefea ona tupu lena mea? E ala i le amataina o le faitala, po o le toe faamatalaina o se tala faitatala, ia po o le faalogologo atu foi i lea ituaiga tala. Ua faapea mai le faataoto poto: “O le tagata faapiopio, e faatupuina e ia le misa; ma lē faatuaupua, na te faateaeseina uo.” (Faataoto 16:28) O le ā le vailaau aogā i le faitala ma le taufaaleaga? E tatau ona tatou mautinoa ia atiina aʻe la tatou tautala ma ia faavae i le alofa. Pe afai tatou te vaai mo mea lelei a o tatou uso nai lo mea e manatu o loo leaga ai i latou, o le a avea la a tatou talanoaga ma mea e lelei ma faaleagaga i taimi uma lava. Ia manatua foi, e faigofie tele ona faitio. Ma o le tagata o loo faitala atu ia te oe e uiga i isi, atonu na te faia atu foi ou tala i isi!—1 Timoteo 5:13; Tito 2:3.

15. O ā uiga e pei o Keriso o le a fesoasoani i tagata uma o le faapotopotoga ina ia tausisia ai le paia?

¹⁵ Ina ia tausia pea le paia o le faapotopotoga, e manaomia e i tatou uma lava ona maua le finagalo o Keriso, ma ua tatou iloa o lona uiga silisili o le alofa. O lea, na fautua atu ai Paulo i uso i Kolose ina ia alolofa mutimutivale e pei o Keriso: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai . . . , ma ia fefaamagaloai outou . . . A o le alofa, e lautua lea i nei mea uma, o le fusi lea e atoatoa ona lelei ai.” Ona ia toe faaopoopo atu lea e faapea: “Ia pule foi le filemu mai ia Keriso i o outou loto.” O le iai o se agaga faamagalo faapea, e mautinoa lava e mafai ai ona tatou tausisia le autasi ma le paia o le faapotopotoga.—Kolose 3:12-15.

Po o Faaalia ea lo Tatou Tulaga Paia i o Tatou Tuaoi?

16. Aisea e tatau ai ona avea la tatou tapuaiga paia ma tapuaiga fiafia?

¹⁶ Ae faapefea o tatou tuaoi? O le ā lo latou manatu ia i tatou? Po o tatou faasusulu atu le olioli e maua mai i le upu moni, po o tatou avea le upu moni o se mea e foliga atu o se avega mamafa? Afai o tatou paia moni lava e pei ona paia Ieova, e tatau la ona aliali manino atu i la tatou tautala ma i a tatou amio. E ao ona manino atu o la tatou tapuaiga o se tapuaiga fiafia. Aisea e faapea ai? Talu ai o Ieova lo tatou Atua o se Atua fiafia, o lē finagalo ina ia olioli ona tagata tapuai. O le pogai lena ua mafai ai ona faapea mai le faisalamo e faatatau i tagata o Ieova i taimi anamua: “Amuia le nuu e fai Ieova mo latou Atua.” Po o tatou faaatagia atu lena fiafia? Po o faailoa atu e a tatou fanau le toafimalie i le iai faatasi ma tagata o Ieova i le Maota o le Malo ma i fonotaga?—Salamo 89:15, 16; 144:15e.

17. O le ā e mafai ona tatou faia e faaalia ai le faatinoina o le paleni i le tulaga faapaiaina?

¹⁷ E mafai foi ona faaalia le paleni i la tatou tapuaiga paia i le agaga lagolagosua ma le agalelei atu i tuaoi. O nisi taimi e manaomia ai ona galulue faatasi tuaoi, atonu i le faamamāina o le alalafaga, po o le faaleleia o auala e pei ona faia e isi atunuu. I lenei vala, e mafai ona aliali manino atu ai lo tatou tulaga paia i le auala o tausia ai a tatou togalaau, le laufanua, po o isi o a tatou meatotino. Afai e faataatitia solo lapisi po o le lē teua lelei foi o le laufanua, atonu e oo foi lava i ni taavale tuai malepelepe o loo iloa uma mai e tagata i le auala, pe e mafai ea ona tatou  faapea atu o loo tatou feagai ai ma le faaaloalo ma o tatou tuaoi?—Faaaliga 11:18.

Le Tulaga Paia i Galuega ma i Aʻoga

18. (a) O le ā se mea ua avea ma toatuga mo Kerisiano i aso nei? (e) E mafai faapefea ona ese i tatou mai le lalolagi?

¹⁸ Na tusi atu le aposetolo o Paulo i Kerisiano i le aai lē paia o Korinito e faapea: “Ua ou tusi atu ia te outou i laʻu tusi, aua tou te feoai ma e faitaaga; e le faasino lea i e faitaaga o lenei lalolagi, atoa ma e matapeapea, ma e fao mea, ma e ifo i tupua; ana faapea, e ao ina outou o ese atu i le lalolagi.” (1 Korinito 5:9, 10) O le toatuga lenei mo Kerisiano, o ē e ao ona miomiō faatasi i aso taitasi ma tagata amioleaga po o tagata foi e lē o iai ni tapulaa. O se tofotofoga tele lenei o le faamaoni, ae maise lava aganuu o loo faalaeiauina ai po o loo tuusaʻoloto ai faiga faasoesa faaleituaiga e ala i upu ma amio, o faiga faapiopio, ma le lē faamaoni. I lenei faatulagaga, e leaga āuga e oo ia i tatou pe a tuu ifo i lalo o tatou taiala ina ia foliga atu ai o loo “tutusa” ma i latou o siomia ai i tatou. Nai lo lea, o o tatou uiga agalelei ae ia ese mai pea a tatou amioga faa-Kerisiano, e tatau ona tumatilatila ai i tatou i le vaaiga a tagata faautauta, i latou o loo iloa o latou manaoga faaleagaga ma o loo saili mo se mea e sili atu ona lelei.—Mataio 5:3; 1 Peteru 3:16, 17.

19. (a) Fanau e, o ā tofotofoga ua iai ia te outou i le aʻoga? (e) O le ā e mafai ona faia e mātua e lagolagosua atu ai i a latou fanau ma a latou amio ua faapaiaina?

¹⁹ E faapena foi ona tele tofotofoga o feagai ai ma a tatou fanau i aʻoga. O outou o mātua, po o tou asiasi atu ea i le aʻoga o ō atu i ai lau fanau? Po o e iloa le ituaiga siomaga o loo iai iina? Po o iai se lua faiā lelei ma le faiaʻoga? Aisea ua tāua ai nei fesili? Talu ai o le tele o aai o le lalolagi, ua avea aʻoga ma mea e lē saogalemu ai ona o sauāga, o fualaau faasaina, ma faiga faaleituaiga. Pe e mafai faapefea e lau fanau ona tausisia le faamaoni ma a latou amio ia paia pe afai latou te lē mauaina le lagolagosua atoatoa ma le matuā malamalama o mātua? Ua talafeagai ai ona fautua mai Paulo i mātua e faapea: “O outou tamā, aua neʻi faaita i a outou fanau, ina neʻi faapalapala i latou.” (Kolose 3:21) O se tasi o auala e faaʻonoʻono ai i fanau o le lē taulau lea ona malamalama i o latou faafitauli ma tofotofoga o feagai ai i aso taitasi. O le sauniunia ina ia feagai ai ma faaosoosoga i aʻoga e amata mai lea i le siomaga faaleagaga i se aiga Kerisiano.—Teuteronome 6:6-9; Faataoto 22:6.

20. Aisea ua tāua ai ia i tatou uma le tulaga paia?

²⁰ I le aotelega, aisea ua tāua ai le tulaga paia ia i tatou uma? Auā e aogā e fai ma puipuiga faasaga i faaosoosoga a le lalolagi a Satani ma ona mafaufauga. O loo avea nei o se faamanuiaga ma o le a faapea foi i le lumanai. E fesoasoani foi e faamautinoa mai ai ia i tatou le ola lea o le a avea ma ola moni i le lalolagi fou amiotonu. E fesoasoani ia i tatou ina ia avea ma Kerisiano paleni, e faigofie ona faafesootai, faigofie ona faatalanoa—e lē o ni tagata e mamapo naʻuā ma lē manatu mamafa mo isi. I se uiga faigofie, e pei ai i tatou o Keriso.—1 Timoteo 6:19.

[Faaopoopoga i lalo]

Pe E te Manatua?

□ Aisea na iloa ai e Peteru le manaoga ina ia fautuaina Kerisiano i le tulaga faapaiaina?

□ Aisea e lē faigofie ai ona uia se olaga faapaiaina?

□ O le ā e mafai ona faia e i tatou uma ina ia faaleleia ai le tulaga faapaiaina i totonu o le aiga?

□ Ina ia tausisia pea le paia o le faapotopotoga, o le ā le amioga e lē paia e ao ona tatou teena?

□ E faapefea ona faatumauina lo tatou tulaga paia i le galuega ma i aʻoga?

[Fesili mo le Suʻesuʻega]

[Ata i le itulau 16, 17]

I le avea o ni Molimau a Ieova, e ao ona tatou olioli i le auauna atu i le Atua ma i isi galuega