Michael Faraday—O se Saienitisi ma o se Tagata o le Faatuatua

“O lē na uluai maua le Eletise.” “O se saienitisi aupito sili ona tele ana suesuega na faia o ē uma na soifua.” O ni faamatalaga se lua nei e uiga ia Michael Faraday, na fanau i le 1791 i Egelani, o lē na ia mauaina le malosiaga faaeletise i ana suesuega, na iu ai i le fausiaina o masini ma afi e alu i le eletise.

SA TELE ina aʻoaʻo atu Faraday i mataupu tau vailaau ma le foiaina o maʻi i le Royal Institution i Lonetona. O ana aʻoaʻoga na fuafuaina ina ia faalauiloa atu ai le faasaienisi, ma fesoasoani i tagata talavou e taofimau ai i manatu lavelave. Sa ia maua ni faailoga mai i iunivesite eseese. Peitai, sa lē manao o ia i ni viiga mai tagata. Sa matuā aafia o ia i le lotu, sa sili ona fiafia i le toafilemu o lona fale e tolu potu ma i le auaufaatasi ma lona aiga ma uso talitonu. Sa auai Faraday i se vaega faalotu na ia faamatalaina e faapea “o se lotu o Kerisiano e matuā toaitiiti ma inosia, na lauiloa . . . o Sandemanians.” O ai i latou? O ā o latou talitonuga? Ma na faapefea ona aafia ai Faraday i lenei mea?

 Le ʻAu Sandeman

Ua mātauina e Geoffrey Cantor, le tusitala o le tusi Michael Faraday: Sandemanian and Scientist e faapea: “O le uluai sootaga i le va o le aiga o Faraday ma le lotu Sandeman, na faamauina e mātua o mātua o Michael Faraday.” Sa latou auaufaatasi ma so o se faifeau sa faimalaga solo e lē taumulimuli i faiga a lotu masani, o ana aumea na lagolagoina talitonuga o Sandeman.

O Robert Sandeman (1718-1771) o se tagata na aʻoga i le iunivesite o Edinburgh, sa suesue i le matematika, faa-Eleni, ma isi gagana, ina ua oo i se tasi aso, sa ia faalogo ai i le talaʻiga a se faifeau sa i le lotu Perepereane muamua, o John Glass. O mea na ia faalogo i ai na faapogaia ai lona tuua o le iunivesite, foi atu i le aiga i Perth, ma aufaatasi atu ia Glass ma ana aumea.

I tausaga o le 1720 ma agaʻi mai ai, na amata ai ona masalomia e John Glass nisi o aʻoaʻoga a le Lotu a Sikotilani. O ana suesuega i le Afioga a le Atua na iu ai i lona faia o se faaiuga e faapea, o le nuu o Isaraelu i le Tusi Paia, ua faaatagia ai se nuu faaleagaga, o ona tagatānuu na ō mai i le tele o atunuu eseese. E leai lava se mea na ia maua e faamaonia ai le tatau ona eseese lotu mo atunuu taitasi.

I le lē loto malie i lana lotu i Tealing, i fafo atu o Dundee, i Sikotilani, na vavae ese ai Glass mai le Lotu a Sikotilani ma faamaopoopoina ana lava sauniga. Pe tusa ma le toʻa selau tagata na auai ma ia, ma mai le amataga, na latou lagona ai le manaomia ona tausia le autasi ia i latou. Na latou filifili e mulimuli i taitaiga a Keriso o loo faamauina i le Mataio mataupu e 18 fuaiupu e 15 e oo i le 17, e foia ai so o se feeseeseaiga e ono oo ia i latou. Mulimuli ane, sa latou faia ai sauniga faalevaiaso na faapotopoto ai foi ma i latou e faatuatuaga faatasi mo talosaga ma apoapoaiga.

Ina ua amata ona auai e lē aunoa ni tagata se toatele i sauniga a vaega eseese, sa manaomia loa ni tane taʻumatuaina e vaavaaia la latou tapuaiga. Ae o ai na agavaa? Sa uaʻi totoʻa atu John Glass ma ana aumea i upu na tusia e le aposetolo o Paulo e uiga i lenei mataupu. (1 Timoteo 3:1-7; Tito 1:5-9) E latou te lei maua se mea o taʻua ai i le Tusi Paia le aʻoaʻoina i se iunivesite pe manaomia foi ona malamalama i le faa-Eperu ma le faa-Eleni. O lea, ina ua uma ona iloiloina faatasi ma le tatalo taiala faale-Tusi Paia, ona latou tofia ai lea o tane agavaa e avea ma toeaina. O i latou sa faamaoni i le Lotu a Sikotilani sa manatu i lea mea e faapea, “e tusa lava o le upu vale i le Atua” mo tagata e lei aʻoaʻoina “o ē lalaga ie, suʻisuʻi, ma galulue fanua” i lo latou faatagā foliga atu e malamalama i le Tusi Paia ma talaʻia lana feau. O lea, i le 1733, na fausia ai e Glass ma ona uso talitonu lo latou lava maota mo sauniga i le aai o Perth, ae sa taumafai le aufailotu o le nuu e uunaia le faamasino ina ia tutuli ese i latou mai le aai. Sa lē taulau i latou, ma sa faatuputeleina lea gaoioiga.

Na faaipoipo atu Robert Sandeman i le afafine matua o Glass, ina ua 26 tausaga, na avea ai o ia ma toeaina i le faapotopotoga o le vaega a Glass i Perth. Sa sili ona mamafa ia te ia ona tiute o le avea o se toeaina, o lea na ia filifili ai e tuutoina lona taimi atoa i le galuega faafaifeau. Mulimuli ane, ina ua mavae le maliu o lona faletua, sa “fiafia ma loto malie [Robert] e auauna i le Alii i so o se mea sa manaomia ai o ia,” e pei ona mātauina ai i tusitusiga e uiga i lona talaaga.

Salalau Atu le Lotu a Sandeman

Sa faalautele atu ma le maelega e Sandeman lana faiva mai Sikotilani e oo i Egelani, o iina na faatoateleina ai uso talitonu. I le taimi lena, sa tele ai fefinauaiga i soo o Calvin i Egelani. Sa talitonu nisi o i latou e faapea, ua uma ona muai filifilia i latou mo le faaolataga. Ae i le isi itu, sa ʻau Sandeman ma i latou sa iai le manatu e faapea, o le faatuatua e manaomia mo le faaolataga. I le lagolagoina o lenei manatu, na ia faasalalauina ai se tusi na toe lomia faafa, ma na aliaʻi mai foi i ni tusi se lua a Amerika. E tusa ai ma le faamatalaga a Geoffrey Cantor, o le lomiaina o lenei tusi, sa “o se mea na numera tasi lona tāua, na siitia ai le lotu [Sandeman] e sili atu nai lo o le tulaga faatapulaa sa iai i lona amataga faa-Sikotilani.”

 I le 1764, na faimalaga atu ai i Amerika Sandeman faatasi ma isi toeaina o le vaega a Glass, o se asiasiga na lāgā ai le tele o fefinauaiga ma teteega. Ae peitai, na iu lea asiasiga i le faavaeina ai o se vaega o Kerisiano e faapena o latou manatu i Danbury, i Connecticut. * O inā, i le 1771, na maliu ai Sandeman.

Talitonuga Faalotu a Faraday

Sa taofimau le talavou o Michael i aʻoaʻoga a Sandeman mai ona mātua. Sa ia iloa e faapea sa vavae ese tagata Sandeman mai ia i latou e lē o faatinoina mea o loo aʻoaʻo e le Tusi Paia. Mo se faaaoaoga, sa latou teena le auai i sauniga o faaipoipoga a le Lotu Egelani, ua latou filifilia e faatapulaa sauniga o a latou faaipoipoga i mea tatau e tusa ai ma le tulafono.

E gauai atu i pulega a malo, ae solitu i mataupu faapolotiki, o uiga na sa mātauina ai le vaega a Sandeman. E ui o ni sui faaaloalogia o le nuu, ae seāseā lava ona latou aafia i ni tulaga lautele. Ae i nisi o tulaga na latou talia, sa latou alofia le auai i faiga vaega faapolotiki. O le tausisi i lenei tulaga, sa faalumaina ai i latou. (Faatusatusa i le Ioane 17:14.) Sa talitonu tagata Sandeman e faapea, o le Malo faalelagi o le Atua, o le fuafuaga atoatoa lea mo le pulega. Ua mātauina e Cantor e faapea, ua latou manatu i faiga faapolotiki o se “taaloga faatauvaa e palapalā e aunoa ma ni amioga tatau.”

E ui ina vavae ese mai isi, ae latou te lei faia uiga faa-Faresaio. Sa latou faalauiloa mai e faapea: “Ua matou filifili maumauai e matuā tatau lava ona alo ese mai le Agaga ma Faiga faa-Faresaio anamua, i le faia o le tele o Agasala ma le tele o Tiute nai lo o mea ua faia e le Tusi Paia; ma i le faaleaogaina po o le Solia tuusaʻo o Poloaiga tauatua e ala i Uputuu po o Faamolemolega poto a tagata.”

Sa latou taliaina le faiga faale-Tusi Paia i le faateʻaina mai ia i latou o so o se tagata o lē sa onā, se tagata faomea, se tagata faitaaga, po o sē faia isi agasala matuiā. Afai na salamō moni le tagata agasala, sa latou taumafai e toe faafoi mai o ia. Auā o le faia faapea na latou mulimuli ai i le poloaiga a le Tusi Paia ina ia “faateaeseina e outou lena tagata amio leaga ia te outou.”—1 Korinito 5:5, 11, 13.

Sa usiusitai tagata o Sandeman i le poloaiga faale-Tusi Paia ina ia faamamao ma le toto. (Galuega 15:29) Na finau atu John Glass e faapea, e iai le matafaioi a tagata o le Atua ina ia usiusitai i le faasaina o le toto e pei lava ona poloaiina e le Atua le uluai tagata ina ia aua neʻi aai i le fua o le laau e iloa ai le lelei ma le leaga. (Kenese 2:16, 17) O le lē usiusitai i le poloaiga e faatatau i le toto, na iu foi i le teena o le faaaogaina tatau o le toto o Keriso, ae maise le fai ma togisala. Na faaiu mai Glass e faapea: “O lenei faasaina o le ʻaina o le toto, sa tumau pea, ma o loo tumau pea ona sili atu lona tāua.”

O le iloiloina e tagata o Sandeman o le Tusi Paia sa fesoasoani ia i latou e alofia ai le tele o mailei e paʻūū ai. Mo se faaaoaoga, e tusa ai ma faafiafiaga, sa latou vaavaai i faatonuga a Keriso e fai ma taiala. Sa latou faapea mai: “E matou te lei faia ni Tulafono i mea e lei faia ai faapena e Keriso, pe tuulafoaiina foi ni tulafono na ia tuuina mai ia i matou. O le mea lea, ona matou te lē o mafai ona maua se mea o taʻua ai le faasaina o Faafiafiaga i le lautele po o ni tulaga faapitoa; e matou te manatu i so o se Faafiafiaga e faaletulafono, pe afai e lē fesootai ma Tulaga e matuā agasala ai.”

E ui lava sa tele ni manatu na faavae saʻo mai le Tusi Paia sa taofi i ai tagata o Sandeman, ae latou te lei maua le tāua o le galuega lea e iloa ai Kerisiano moni, e faapea, e tatau i tagata taitoatasi ona talaʻi atu le tala lelei o le Malo i isi. (Mataio 24:14) Peitai, o a latou sauniga sa avanoa mo tagata uma, ma o iina sa latou taumafai ai e faailoa atu ia i latou uma o ē e fesili atu ia i latou e uiga i lo latou faamoemoe.—1 Peteru 3:15.

Na faapefea e uiga i nei talitonuga ona aafia ai le saienitisi o Michael Faraday?

Faraday le Tagata a Sandeman

O faaaloaloga ma faamamaluga sa faalagilagi ai o ia ona o mea fou ofoofogia na ia mauaina, ae sa soifua lava Michael Faraday i se olaga faigofie.  Pe a maliu se tagata taʻutaʻua ma sa manaomia ona auai tagata lautele i o latou falelauasiga, sa mātauina lava Faraday i lona lē auai, sa lē mafai e lona loto fuatia ifo ona faatagaina o ia e auai pe faaaafia i se sauniga a le Lotu Egelani.

Ona o se saienitisi, sa pipiimau ai Faraday i mea moni sa mafai ona ia faatinoina. I lea, sa ia alofia ai le faauo atu i tagata popoto o ē sa faamuamua o latou lava manatu ma faia ni a latou itu i finauga. E pei ona ia faamatala atu i se aofia i se tasi taimi e faapea ‘o le mea moni o loo faavae ai le faasaienisi, e iai pea lava ona faamaoniga moni, ma e lē mafai ona tatou faaletonu ai auā e moni pea lava ana faamaoniga.’ Sa ia faamatalaina le faasaienisi e faapea e faalagolago ‘i mea moni ua iloiloina ma le faaeteete.’ I le faaiuina o se tasi o faamatalaga e uiga i malosiaga autū o le natura, na faalaeiauina ai e Faraday lana ʻau faalogologo ina ia mafaufau loloto i “Lē na faia na mea.” Ona ia sii mai lea o upu a le aposetolo Kerisiano o Paulo e faapea: “Auā o ana mea e le vaaia talu ona faia o le lalolagi, e vaaia lava ia i le mafaufau i mea na faia, o lona mana faavavau lava lea ma lona Atua.”—Roma 1:20.

O le mea na faaesea ai Faraday e matuā ese lava mai le toatele o isi saienitisi, o lona naunau lea e aʻoaʻo mai i le Tusi faagaeeina a le Atua faapea ma le tusi o le natura. Na mātauina e  Cantor e faapea: “E ala i lona suesueina o aʻoaʻoga a Sandeman, na ia iloaina ai le auala e ola ai i le usiusitai i tulafono tauamio a le Atua faapea ma le folafolaga i le ola e faavavau. E ala i ana suesuega faasaienisi, na ia masani lelei ai i tulafono tau i le malosiaga na filifilia e le Atua e pulea ai le vateatea.” Sa talitonu Faraday e faapea, “e lē mafai e le faasaienisi ona faavaivaia le pule atoatoa a le Tusi Paia, ae o le faatinoina o le faasaienisi i se auala faa-Kerisiano moni, e mafai ona faamalamalamaina ai le isi tusi a le Atua.”

Sa teena ma le loto maulalo e Faraday le tele o faaaloaloga na mananao isi e faaee atu ia te ia. Sa ia tausisi pea e faaalia le lē fiafia e faaee atu ia te ia se taʻu maualuga. Sa manao o ia e tumau pea i le taʻu masani ‘o le Susuga a Faraday.’ Sa ia tuutoina le tele o lona taimi i ana galuega i le avea o se toeaina, e aofia ai le faimalaga atu e lē aunoa mai le laumua i se nuu i tua o Norfolk e vaaia se vaega toaitiiti o tagata talitonu o loo nonofo ai iina.

Na maliu Michael Faraday ia Aokuso 25, 1867, ma na teu i le fanuatanu o Highgate i Lonetona i mātū. Ua taʻu mai ia i tatou e se tusitala o talaaga o tagata o John Thomas e faapea, o Faraday “sa ia saunia mo tupulaga i le lumanai se aofaiga tele o mea e lē filogia na ausia e le faasaienisi nai lo o se isi lava saienitisi suesue i malosiaga, ma o iuga aogā o mea na ia maua ua matuā taaʻina ai le natura masani o le olaga o tupulaga o le malamalama.” Na tusia e Sarah Faraday ina ua oti lana tane o Michael e faapea: “E na o le Feagaiga Fou e mafai ona ou faasino atu i ai e faapea sa avea ma ona taiala & pule; auā sa ia manatu i ai o le Afioga lea a le Atua . . . o loo faapea ona fusia ai Kerisiano i aso nei e pei o le taimi na tusia ai”—o se molimau olaola e uiga i se saienitisi iloga o lē na ola tuutoina mo lona faatuatuaga.

[Faaopoopoga i lalo]

[Pusa i le itulau 29]

Ua tofiaina e avea o se faiaʻoga i le Britain’s Royal Institution, ua faalauiloa atu ai e Michael Faraday le faasaienisi i se auala e oo lava i tagata talavou e mafai ona malamalama i ai. O lana fautuaga i uso faiaʻoga, o loo i ai ni fautuaga aogā e lelei mo Kerisiano i aso nei o ē o loo aʻoaʻo atu i le lautele ona manatunatu i ai.

□ “O le lauga tautala, e lē tatau ona faatopetope ma faavavevave, ma iu ai ina lē malamalama, ae ia faagesegese ma ia malamalama gofie.”

□ E tatau i se failauga ona taumafai e faaoso le naunau o lana aofia “i le amataga o lana mataupu, ma e ala i le faasolosolo lelei o manatu e aunoa ma le mātauina e le aofia, ia aasa pe afai e tusa ai ma le manaoga o le mataupu.”

□ “O le a avea o se tulaga maulalo mo se failauga lona faia o ni upu po o ni uiga e viiviia pe avatu ai le faamālō a tagata ia te ia.”

□ I le faaaogaina o se auivi: “E avea pea o se avega tauave mo aʻu . . . le tusia o se ata [o le mataupu] i se pepa ma faatumuina avanoa e ala i le manatuaina o na mea i le mafaufau, a lē i le faafesootaia o manatu po o mafaufauga. . . . E iai saʻu faasologa o ulutala autū ma ulutala laiti e faasolosolo lelei, ma ou te galueaiina ai aʻu mataupu e faavae mai i nei ulutala.”

[Ē Ana le Ata i le itulau 26]

Both pictures: By courtesy of the Royal Institution