Pe e Lē Mafai Ona Oti le Solu?

O LOO savalivali lemū atu uo ma aiga, i tafatafa o le pusa maliu e lē tapunia. Ua latou faataupupula atu i le tino o se taulealea e 17 ona tausaga. Ua faigata ona mātauliaina o ia e ana uo mai le aʻoga. O togafitiga sa faia mo lona maʻi sa tele ina toulu ai lona lauulu; o le kanesa ua matuā faaitiitia ai lona mamafa. Po o la latou uo moni ea lenei? I nai vaiaso a o lei tupu lenei mea, sa tele ona manatu, o fesili, sa malosi—sa ola! Ua maligi loimata o le tinā o le tama ma taʻu ma saga taʻutaʻu e faapea: “Ua sili atu nei ona fiafia Tomi. E finagalo le Atua ina ia la faatasi ma Tomi i le lagi.”

Ua mauaina e le tinā loto faavauvau sina lototele ma sina faamafanafanaga i le manatu faapea o loo ola pea si ana tama. Sa ia aʻoaʻoina mai i le lotu e faapea o le solu e lē mafai ona oti, o le nofoaga lena o uiga totino, o mafaufauga, ma manatunatuga—o le “tagata lava ia.” O lona talitonuga e faapea, o le solu o lana tama e lē mafai lava ona oti; auā o se agaga ola ua tuua lona tino i le oti ae alu i le lagi e faatasi ai ma le Atua ma agelu.

I taimi o mafatiaga, e vave lava ona pipii atu le loto o le tagata i so o se ala e maua mai ai se faamafanafanaga, o lea la e lē faigata ona iloa le pogai ua matuā mauaa ai lenei talitonuga. Seʻi manatunatu mo se faataitaiga, i le auala sa faaupuina ai e le faifeau o J. Paterson-Smyth ona manatu ia lava i le Gospel of the Hereafter e faapea: “O le oti o se mea e matuā faatauvaa pe a faatusatusa atu i le taui o mulimuli mai—e ofoofogia, e matuā ofoofogia lava, le oo atu i le lalolagi lea ua faaulufale atu i ai i tatou e le Oti.”

I le lalolagi aoao ma le tele o lotu ma aganuu, ua talitonu ai tagata e faapea ua iai i totonu o le tagata se solu e lē mafai ona oti, o se agaga e faaauau pea ona ola pe a oti le tino. Ua toetoe lava o le faitau afe o lotu ma vaega lotu o Kerisinetoma ua iai lea talitonuga. O se aʻoaʻoga autū foi lea i Iutaia. E talitonu tagata Hinitu e faapea o le agaga i totonu o le tagata, po o le solu, sa foafoaina i le amataga, o loo falepuipui i totonu o le tino ina ua fanau mai, ma e faasolo atu pe a oti i se isi tino i se faataamilosaga faifai pea o le toe fanau mai i se isi tino fou. E talitonu tagata Musalimi e faapea o le solu e ola faatasi ma le tino seia oo lava ina oti le tino ona ola ai lava lea o le solu. O isi faatuatuaga—o tagata Aferika, o Sinitō, e oo lava i le lotu Puta e ese foi se isi auala—ua latou aʻoaʻoina vala eseese e uiga i lenei lava mataupu.

O Nisi Fesili Lavelave

Ua taliaina pea le manatu e uiga i le solu e lē mafai ona oti o se manatu ua toetoe lava taliaina i le lalolagi aoao, ae peitai ua faatulai mai ai nisi o fesili lavelave. Mo se faataitaiga, ua tau mānatu tagata i le nofoaga e alu i ai le solu o lē pele ua maliu pe afai sa lē lelei lona olaga. Pe o le a toe ola mai i se isi ituaiga o olaga e maualalo ifo teisi? Po ua auina atu ea o ia i pulekatolio ina ia faamamāina ai i se afi seia talafeagai ona alu lea i le lagi? Ae e sili atu ona leaga, pe o le a faapuapuagatia ea o ia e faavavau i se afi i seoli? Po o ia ea, o se agaga e tatau ona faamalieina e pei ona aʻoaʻoina e lotu o ē talitonu i le manatu e faapea e fai agaga o mea uma?

O na ituaiga o manatu e aliaʻe ai popolega mamafatu mo le olaga. Pe tatou te faamalieina ea agaga o ē pele ia i tatou ua maliliu ina neʻi faatigaina mai ia i tatou? Pe e ao ea ona tatou fesoasoani atu ia i latou ina ia ō ese mai le matautia o pulekatolio? Pe e na o lo tatou gatete ea ma lē mautonu ona o le fefe i lo latou faapuapuagatia i seoli? Pe tatou te tausia ea ni meaola ona o le manatu faapea o loo ia i latou ni solu o ē ua maliliu?

Ua lē o faamafanafanaina foi i fesili ua tulai mai e uiga i le Atua lava ia. Mo se faataitaiga, o le toatele o mātua, e pei o le tinā sa muai taʻua, e muai faamafanafanaina i le manatu e faapea ua “ave” e le Atua ia solu e lē mafai ona  oti o a latou fanau i le lagi ina ia faatasi ai ma ia. E ui i lea, e toatele nisi e lē umi lava ae amata ona tau mānatu po o le ā le ituaiga o Atua ua ia taiaina i se maʻi matautia se tamaitiiti e lē sala, ma aveesea faafuasei mai mātua loto faavauvau ma ave le tamaitiiti i le lagi i se oti faafuasei. O fea o iai le faamasinotonu, le alofa, le alofa mutimutivale, o sea Atua? O nisi ua oo lava ina latou fesiligia le atamai o sea Atua. Ua latou tuufesili, pe aisea ua tuua ai e se Atua atamai nei solu uma i luga o le lalolagi i le amataga pe afai o le a iu aʻe i le lagi? Pe e lē o le uiga ea o lena mea e faapea o le foafoaina o le lalolagi o se galuega sa faia fua?—Faatusatusa i le Teuteronome 32:4; Salamo 103:8; Isaia 45:18; 1 Ioane 4:8.

Ma le manino lava la o le aʻoaʻoga i le solu faaletagata e lē mafai ona oti, po o le ā lava le auala o aʻoaʻoina ai lea aʻoaʻoga, ua faatulai mai ai ni fesili lavelave, ua oo lava ina feeseeseai ai. Aisea? O le vaega tele o le faafitauli e māfua mai le amataga o le aʻoaʻoga. E mafai ona e malamalama i le suesueina pupuu o nei amataga; ma atonu o le a faateʻia oe i le iloaina o le mea o fai mai ai le Tusi Paia lava ia e uiga i le solu. Ua ofoina mai ai se faamoemoe e sili atu mo le ola pe a mavae le oti nai lo le aʻoaʻoga taatele a lotu o le lalolagi.