Lipoti a Ē Faalauiloa le Malo

‘Ua Tatalaina Nei se Faitotoa Lautele mo le Galuega’ i Cuba

NA AVEA le aposetolo o Paulo ma tagata iloga i le talaʻia o le tala lelei o le Malo o le Atua. Sa ia faaaogaina so o se avanoa e faaoo atu ai i isi le folafolaga a Lē na Foafoaina Mea, o le ola lea e faavavau mo tagata usiusitai. A o asiasi atu i Efeso anamua, na iloa ai e Paulo se tulaga fou o le a faatagaina ai o ia e fesoasoani atili ai i tagata e toatele. Na ia faapea mai: “A e ou te nofo pea i Efeso . . . Auā ua faaavanoa mo aʻu le faitotoa lautele ma le matuā aoga.”—1 Korinito 16:8, 9.

Ua mauaina nei foi e Molimau a Ieova i Cuba se tulaga fou. E ui lava e lei oo ina lesitalaina faaletulafono, ae ua mafai nei e Molimau ona talaʻi atu i le lautele lo latou faamoemoe faale-Tusi Paia i tagata o le atunuu. E lei leva tele atu talu ona faailoa mai e le malo o Cuba lo latou naunautai e faataga isi vaega faalelotu ina ia faia a latou galuega ma le saʻoloto. Ua taʻua faalauaitele e le peresitene o Castro ia Molimau a Ieova o se vaega faalelotu lea ua faapea ona faaleleia ai nei fesootaiga a le malo o Cuba.

O lenei tulaga fou ua ‘tatalaina ai se faitotoa lautele mo le galuega’ mo Molimau. E fai ma faataitaiga, ua faatoʻā tatalaina nei se ofisa o Molimau a Ieova i Cuba, ua faapena ona fesoasoani ia i latou auā le faamaopoopoina o la latou galuega talaʻi i lena atunuu. E sili atu ma le 65,000 Molimau o loo fesoasoani i tagata ina ia suesue ma malamalama i le Tusi Paia. Latou te faaaogaina lomiga faale-Tusi Paia, e pei o mekasini o Le Olomatamata ma le Ala Mai! E toatele tagata Cuba e naunau i le amiotonu o loo maua aogā mai le suesueina o le Tusi Paia ma Molimau a Ieova.

O loo faia foi e lē aunoa e Molimau ia sauniga i ni vaega toalaiti i le motu atoa. O nisi taimi e oo lava ina latou olioli i le faaeaga o le faia o ni fonotaga tetele e ala i ni vaega pe ā ma le 150. Ua latou talisapaia moni le faatagaga ua latou mauaina mai i faipule o Cuba, ua faapea ona avatu ai ia i latou le avanoa e potopoto ai ma o latou uso ma tuafāfine faaleagaga, i le peseina o viiga i le Atua, ma tatalo faatasi.

E lei leva tele talu ai nei ona faia le Tauaofiaga Itumalo o le “Mataʻu i le Atua” e silia ma le faaafe taimi i totonu o faaiuga o vaiaso e tolu. Na faapea mai se tasi lipoti o le “maopoopo, pulea, ma le filemu” sa mautinoa le iai i tauaofiaga uma. Na faamālō atu faipule o le malo i Molimau i lenei itu.

I le lalolagi aoao, ua taumafai ai Kerisiano moni e faataulauina le poloaiga na tuuina mai e le Atua ia i latou ina ia talaʻi le tala lelei o le Malo o le Atua. I le taimi foi lava e tasi, ua latou taumafai ai e tausisia se faiā lelei ma faipule faalemalo. (Tito 3:1) E mulimuli Molimau a Ieova i le fautuaga a le aposetolo o Paulo, o lē na tusi mai e faapea: “O lenei, e muamua i mea uma ou te apoapoai atu ia faia olega, ma tatalo, ma faatoga, ma faafetai mo tagata uma lava; mo tupu ma i latou uma ua i ai le pule, ina ia tatou nonofo ma le le atuatuvale ma le filemu, i le amio Atua uma lava ma le amio matagofie.”—1 Timoteo 2:1, 2.