Fesili Mai le Au Faitau

Ua faaalia i lipoti mai nisi tausaga ua iai sina faatelega o le faitau aofai o i latou na ʻaai ma feinu i le areto ma le uaina i le Faamanatuga. Pe ua faailoa mai ai ea e lenei mea e faapea e toatele ē e fou ua faauuina e le agaga paia?

E iai mafuaaga maumaututu e talitonu ai e faapea o le aofaiga o Kerisiano faauuina e 144,000 na faamaeʻaina i le faitau sefulu o tausaga ua mavae.

I le Galuega 2:1-4, ua tatou faitau ai ia i latou na avea ma uluai tagata o lena vaega faatapulaaina: “Ua oo atu foi i le aso Penetekoso, sa i ai uma lava i latou i le mea e tasi ma le loto gatasi. Ona faafuasei mai lea o le taalili mai le lagi, peiseai o le matagi ua agi tele mai, ua tumu uma ai le fale sa latou nonofo ai. Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.”

Ina ua maeʻa lena, ona filifilia lea e Ieova o isi, ma na ia faauuina i latou i lona agaga paia. E faitau afe na faaopoopo atu i ai i uluai tausaga o le Faa-Kerisiano.  I le faamanatuina o le Faamanatuga i o tatou taimi, e masani ona faailoa mai e le failauga upu a le aposetolo o Paulo o i le Roma 8:15-17, o loo taʻua ai o ē ua faauuina e ‘mauaina le agaga o le valaauina e fai ma ataliifai.’ Na faaopoopo mai Paulo e faapea o le agaga paia ua latou mauaina ‘e molimau mai i o latou agaga, o i latou o fanau a le Atua, o suli faatasi ma Keriso.’ O i latou o ē o loo iai moni lava lea agaga e faauuina ai, ua latou iloaina lelei ma le mautinoa. E lē o se moomooga po o se faaatagiaina mai o se uiga tau faalogona ma le lē mautonu ia i latou lava.

Ua tatou malamalama o lenei valaauliaina faalelagi ua faaauau i le gasologa mai o senituri, e ui lava i le vaitaimi na taʻua o Vaitausaga o le Pogisa, na ono iai ni taimi na toaitiiti ai le numera o ē na faauuina. * I le toe faavaeina o le Faa-Kerisiano moni e latalata i le faaiuga o le senituri ua mavae, na valaauliaina ma filifilia atili ai nisi. Ae e foliga mai i le ogatotonu o vaitausaga e amata mai i le 1930, na atoa ai le numera aofai e 144,000. O lea na amata ai ona aliaʻe se vaega o Kerisiano e alolofa faamaoni ua iai le faamoemoe faalelalolagi. Na faaupuina e Iesu i latou na o “isi mamoe,” o ē ua autasia e tapuai faatasi ma ē faauuina o se lafu mamoe e tasi ua talileleia.—Ioane 10:14-16.

O faamaoniga mai le faitau sefulu o tausaga ua tuanai e atagia mai ai le faaiuina o le filifilia o ē faauuina ma le faamanuiaina e Ieova o le faatuputupulaia pea o le “motu o tagata e toatele” o ē e faamoemoe e faasaoina i “le puapuaga tele.” (Faaaliga 7:9, 14) Mo se faaaoaoga, i le faamanatuina o le Faamanatuga i le 1935, na faatasi atu i ai le 63,146, o i latou na ʻaai ma feinu i le areto ma le uaina e faamaonia ai la latou taʻutinoga, sa 52,465. I le tolusefulu tausaga mulimuli ane ai, i le 1965, na oo atu ai le faitau aofai o ē na auai i le 1,933,089, a ua faaitiitia ē na ʻaai ma feinu i le 11,550. I le agaʻi mai i le isi 30 tausaga i lo tatou vaitaimi, i le 1995 na oso aʻe ai le faitau aofai o ē na auai i le 13,147,201, ae sa na o le 8,645 na ʻaai ma feinu i le areto ma le uaina. (1 Korinito 11:23-26) E faamautinoa mai ai, a o mavae atu le faitau sefulu o tausaga, o le faitau aofai o i latou o faapea mai o le vaega totoe ua tele ina faaitiitia—sa 52,400 i le 1935; 11,500 i le 1965; 8,600 i le 1995. Peitai ane, o ē e iai le faamoemoe e ola i le lalolagi ua faamanuiaina, ma ua matuā faatoateleina lo latou faitau aofai.

O le lipoti pito lata mai lava ua faamaumauina o le lipoti lea o le tausaga e 1995, ma ua faaalia mai ai e toʻa 28 na sili atu ai ē na ʻaai nai lo le tausaga ua teʻa e ui o i latou na ʻaai ma feinu na paʻū moni lava pe a fuafaatatau atu i ē na aufaatasi ai. Ona e mautinoa e iai nisi na faaopoopo atu i ai na faia sa latou faaiuga e ʻaai ma feinu i le areto ma le uaina, e leai la se mafuaaga e faapopoleina ai fua i tatou. I le faagasologa mai o tausaga, e oo lava i ē fou faatoʻā papatisoina sa teʻi lava ua amata ona aai ma feinu. O le tele o mea faapena na tutupu, ina ua mavae sina vaitaimi, na iu ai ina latou faailoa mai i lumāmea o lena mea sa o se mea sese. O isi ua latou iloaina e faapea na latou ʻaai ma feinu ona na māfua mai i se tali atu i faalogona atonu ona o le omia faaletino po o le mafatia o le mafaufau. Ae na oo lava ina latou iloa e faapea e lei valaauliaina moni i latou mo le olaga i le lagi. Na latou faatalosagaina le alofa mutimutivale ma uiga malamalama o le Atua. Ma ua faaauau pea ona latou auauna atu ia te ia o ni Kerisiano e lelei, alofa faamaoni, o loo faamoemoe atu e ola e faavavau i le lalolagi.

E lē manaomia fua ona popole se tasi o i tatou pe afai ua amata ona ʻai ma inu pe ua lē toe ʻai foi pe toe inu se tagata i le areto ma le uaina. O le mea moni e lē o sa tatou vaega le faamasinoina o se tasi pe faamata ua faauuina moni lava o ia i le agaga paia ma valaauliaina mo le olaga faalelagi pe leai. Manatua faamautinoaga maumaututu a Iesu: “O aʻu nei o le leoleo mamoe lelei; ua ou iloa aʻu mamoe.” Ua faapena foi ona matuā mautinoa le silafia e Ieova o i latou o ē ua ia filifilia o ni atalii faaleagaga. Ua lava ma totoe mafuaaga e talitonu ai e faapea o le faitau aofai o ē faauuina o le a faaauau ona faaitiitia a o faasolo atu ina afu le soifua ma nisi mea e lē mailoa e tutupu mai e faamutaina ai o latou soifua faalelalolagi. E ui i lea, e pei ona tatau ona faamaonia le faamaoni o i latou nei ua faauuina moni seia oo i le oti, ma tepa taulai atu mo le mauaina o le pale o le ola, o isi la mamoe o ē ua faasinasinaina o latou ofu i le toto o le Tamai Mamoe, e mafai foi ona tepa taulai atu i le faasaoina i le puapuaga tele ua toe o se aga.—2 Timoteo 4:6-8; Faaaliga 2:10.

[Faaopoopoga i lalo]