Le Afio Mai o Iesu po o le Faatasi Mai o Iesu—O Lē Fea?

“Pe se a foi le faailoga o lou faatasi mai, ma le faaiuga o le faiga o mea?”—MATAIO 24:3, NW.

1. O le ā le vaega na faia e fesili i le faiva a Iesu?

O LE faaaogaina ma le tomai e Iesu o fesili na māfua ai ona manatunatu lana ʻau faalogologo, na oo ai lava ina tilofaia mataupu i ni vaaiga fou. (Mareko 12:35-37; Luka 6:9; 9:20; 20:3, 4) E mafai ona tatou loto faafetai ona sa ia taliina foi ia fesili. O ana tali na faapupula mai ai upu moni semanū tatou te lē iloa pe malamalama foi i ai.—Mareko 7:17-23; 9:11-13; 10:10-12; 12:18-27.

2. O le ā le fesili e tatau ona tatou matuā naunau atu i ai i le taimi nei?

² I le Mataio 24:3, tatou te mauaina ai le tasi o fesili aupito sili ona tāua na taliina e Iesu. A o lalata atu i le iuga o lona soifuaga i le lalolagi, na faatoʻā uma lava ona lapataia e Iesu e faapea o le malumalu i Ierusalema o le a faatafunaina, e faailogaina ai le iuga o le faiga o mea faa-Iutaia. Ua faaopoopo mai le tala o i le Mataio e faapea: “Ua nofo o ia i le mauga o Olive, ona o mai ai lea o le au soo ia te ia ua na o i latou, ua faapea mai, ‘Ia e fetalai mai ia te i matou pe oo afea ia mea? Pe se a foi le faailoga o lou faatasi [“afio,” King James Version] mai, ma le faaiuga o le faiga o mea?’”—Mataio 24:3, NW.

3, 4. O le ā le eseesega tāua o loo iai i le auala ua faaaogā ai e Tusi Paia se upu autū o i le Mataio 24:3?

³ E faitau miliona le ʻau faitau o le Tusi Paia ua tau mānatu faapea, ‘Aisea na fesiligia ai e  le ausoo lena fesili, ma e tatau faapefea ona aafia ai aʻu i le tali a Iesu?’ I le tali atu a Iesu i le fesili, na ia fetalai ai e faatatau i le foliga mai o lau o laau e iloa ai “ua latalata” le taumafanafana. (Mataio 24:32, 33) Ona o lenei mea, e tele lotu ua aʻoaʻoina e faapea na fesili aposetolo mo se faailoga o le “afio mai” o Iesu, le faailoga e faamaonia ai ua matuā lalata mai lava lona toe afio mai. Ua latou talitonu ai e faapea o lona “afio mai” o le vaitaimi tonu lea na te aveina aʻe ai Kerisiano i le lagi ma faaoo mai ai loa le iuga i le lalolagi. Pe e te talitonu e saʻo lena manatu?

⁴ Nai lo le faaaogaina o le upu “afio mai,” o isi faaliliuga o le Tusi Paia, e aofia ai ma le New World Translation of the Holy Scriptures, ua faaaogā le upu “faatasi mai.” Pe e ono mafai ona avea le mea lea na fesili atu ai le ausoo ma le tali atu a Iesu e ese mai i mea o aʻoaʻoina e lotu? O le ā moni lava le mea na fesiligia? Ma o le ā le tali na tuuina atu e Iesu?

O le ā sa Latou Fesili Ai?

5, 6. O le ā sa tatou faaiuga e faatatau i manatu o aposetolo ina ua latou fesiligia le fesili ua faapea ona tatou faitau i ai i le Mataio 24:3?

⁵ I le manatu atu i mea na fetalai ai Iesu e uiga i le malumalu, e aliali mai na iai i manatu o le ausoo le fuafuaga o le faiga o mea faa-Iutaia ina ua latou fesili mo ‘se faailoga o lona faatasi mai [po o le “afio mai”] ma le faaiuga o le faiga o mea [“vaitaimi” i sona uiga moni].’—Faatusatusa le “lalolagi” i le 1 Korinito 10:11 ma le Kalatia 1:4, KJ.

⁶ I lena taimi, e tapulaa le malamalama sa iai i aposetolo e faatatau i aʻoaʻoga a Iesu. Muamua atu, sa latou tau mānatu e faapea o “le a faaalia loa mai le malo o le Atua.” (Luka 19:11; Mataio 16:21-23; Mareko 10:35-40) Ma e oo foi lava ina ua maeʻa le talanoaga i le Mauga o Olive, peitai a o lei faauuina i le agaga paia, na latou fesili ai pe o le a toe fuatai e Iesu le Malo ia Isaraelu i lena taimi.—Galuega 1:6.

7. Aisea na fesili ai aposetolo o Iesu e faatatau i lona tofiga i le lumanai?

⁷ E ui i lea, na latou iloa e faapea o le a afio ese o ia, auā sa lei leva talu ona fetalai o ia: “E toe itiiti nai aso e i ai ia te outou le malamalama; savavali ia manū o ia te outou le malamalama.” (Ioane 12:35; Luka 19:12-27) O lea e mautinoa na ono tau mānatu i latou, ‘Afai o le a afio ese Iesu, o le a faapefea ona tatou iloa lona toe foi mai?’ Ina ua faailoa mai o ia o le Mesia, e toatele na lē iloaina o ia. Ma e silia ma le tausaga mulimuli ane ai, na faaauau ona iai fesili pe faamata o le a ia faataunuuina mea  uma sa tatau ona faia e le Mesia. (Mataio 11:2, 3) O lea, na iai mafuaaga na fesili ai le ʻau aposetolo e faatatau i le lumanai. Ae, e toe faamanatu atu, pe na latou fesili ea i se faailoga e faapea e lē o toe mamao ona afio mai lea o ia pe na latou fesili atu mo se isi mea e ese?

8. E foliga mai o le ā le gagana na faia ai le talanoaga a aposetolo ma Iesu?

⁸ Seʻi mafaufau faapea o oe o se manulele na faalogologo atu i le talanoaga i le Mauga o Olive. (Faatusatusa i le Failauga 10:20.) Atonu o le a e faalogo atu ia Iesu ma aposetolo o talanoa i le gagana Eperu. (Mareko 14:70; Ioane 5:2; 19:17, 20; Galuega 21:40) E ui i lea, e aliali mai na latou iloa foi le gagana Eleni.

Mea na Tusia e Mataio —I le Gagana Eleni

9. O le ā ua faavae aʻe ai le tele o faaliliuga faaonaponei o le tusi o Mataio?

⁹ O faamaumauga mai le senituri lona lua T.A. ua faailoa mai ai e faapea na uluai tusia e Mataio lana Evagelia i le gagana Eperu. E mautinoa na ia toe tusia mulimuli ane i le gagana Eleni. E tele tusitusiga Eleni ua faasaoina e oo mai i o tatou vaitaimi ma ua fai ma faavae mo le faaliliuina o lana Evagelia i gagana o ona po nei. O le ā na tusia e Mataio i le gagana Eleni e tusa ai ma lena talanoaga i luga o le Mauga o Olive? O le ā na ia tusi faatatau i ai i le “afio mai” po o le “faatasi mai” na fesili atu ai le ausoo ma mea na tali atu ai Iesu?

10. (a) O le ā le upu Eleni mo le “afio mai” na tele ina faaaogā e Mataio, ma o ā uiga e mafai ona iai i lea upu? (e) O le ā le isi upu Eleni e faaosofia ai foi le naunau?

¹⁰ I uluai mataupu e 23 o le Mataio, e silia ma le 80 taimi ona tatou mauaina ai se veape taatele faa-Eleni o le erʹkho·mai, mo le upu “afio mai.” E masani ona faailoa mai ai le uiga o loo sau po o le latalata mai, e pei ona maua i le Ioane 1:47 e faapea: “Ua silafia e Iesu o Natanielu o loo sau ia te ia.” E faalagolago lava i le uiga o faaaogā ai, o le veape erʹkho·mai e mafai ona uiga ua “taunuu,” “alu,” “ua oo atu,” “maliu mai,” po o “ua alu ese se tasi.” (Mataio 2:8, 11; 8:28; Ioane 4:25, 27, 45; 20:4, 8; Galuega 8:40; 13:51) Ae i le Mataio 24:3, 27, 37, 39, na faaaogā ai e Mataio se upu e ese, o se nauna e lē o faaaogaina i se isi lava vaega o Evagelia: o le upu pa·rou·siʹa. Talu ai na faagaeeina e le Atua le tusiaina o le Tusi Paia, aisea na ia faagaeeina ai Mataio ina ia faaaogā lenei upu Eleni i nei fuaiupu ina ua tusia lana Evagelia i le gagana Eleni? O le ā lona uiga, ma aisea tatou te fia iloaina ai?

11. (a) O le ā le uiga o le upu pa·rou·siʹa? (e) E faapefea i faaaoaoga mai tusitusiga a Josephus ona faailoa atu ai lo tatou malamalamaga o le pa·rou·siʹa? (Tagai i le faamatalaga i le pito i lalo.)

¹¹ Ina ia fanatonu le malama, o le uiga o le pa·rou·siʹa o le “faatasi mai.” Ua faapea mai le Expository Dictionary of New Testament Words a Vine: “PAROUSIA, . . . o le uiga moni [lava], o se faatasi mai, para, faaopoopo i ai ma le ousia, (mai le eimi, i ai), ua faailoa ai le taunuu mai ma le faatasi e sosoo ane ai. Mo se faaaoaoga, i se tusi na tusia i paʻu o laau anamua (papyrus), na taʻua ai e se tamaitai le tāua o lona parousia (faatasi mai) i se nofoaga ina ia mafai ai ona taulimaina mataupu e fesootai atu i lona fanua.” Ua faamatala e isi lomifefiloi e faapea, o le pa·rou·siʹa ua faailoa mai ai ‘le asiasiga a se pule.’ O lea, e lē tau ina faatatau atu i le taimi tonu e taunuu ai, ae o le faatasi ai e afua i le taimi e taunuu ai ma faasolo atu ai i luma. I se tulaga mataina, o le auala foi lena na faaaogā ai e le tusitala Iutaia o tala faasolopito o Josephus le pa·rou·siʹa, ma na soifua o ia i le vaitaimi o aposetolo. *

12. E faapefea ona fesoasoani mai le Tusi Paia ia i tatou e faamautinoa ai le uiga o le upu pa·rou·siʹa?

 ¹² O le uiga o le “faatasi mai,” ua matuā manino lelei e tusa ai i isi lomiga anamua, e ui i lea ua faapitoa le naunau atu o Kerisiano i le auala ua faaaogā ai e le Afioga a le Atua le pa·rou·siʹa. O le tali e tutusa lelei ma le uiga na faaaogā e tusitusiga anamua—faatasi mai. Ua tatou iloa mai i faataitaiga o i tusi a Paulo. Mo se faaaoaoga, na ia tusi atu i Filipi e faapea: “Faapei ona outou anaana mai e le aunoa, ia outou galueaiina pea lo outou faaolataga i le mataʻu ma le gatete, e le gata ina o tatou nonofo [“faatasi,” NW] ma outou, a e atili ai pe a ou le i ai.” Na ia taʻua foi le noanoatia ma i latou ina ia olioli ‘i lona toe faatasi mai [pa·rou·siʹa] ma i [latou].’ (Filipi 1:25, 26; 2:12) Ua faitauina faapenei nisi faaliliuga, “i loʻu toe iai ma outou” (Weymouth; New International Version); “ina ua ou toe faatasi ma outou” (Jerusalem Bible; New English Bible); ma le “ina ua outou toe talia aʻu ia faatasi ma outou.” (Twentieth Century New Testament) I le 2 Korinito 10:10, 11, na faia ai e Paulo se faaeseesega i ‘lona faatasi ai i le tino’ ma lona ‘lē faatasi ai.’ I nei faataitaiga, ua manino sa lē o talanoa o ia i lona tali oo atu po o le taunuu atu; na ia faaaogā le pa·rou·siʹa i le uiga faapea o loo ia faatasi ai. * (Faatusatusa i le 1 Korinito 16:17.) Ae faapefea la faamatalaga e uiga i le pa·rou·siʹa o Iesu? Pe o faauiga atu i lona “afio mai,” po o faasino atu i se faatasi mai e faaumiumi?

13, 14. (a) Aisea e tatau ai ona tatou faia se faaiuga faapea o le pa·rou·siʹa e faaauau atu mo se vaitaimi faaumiumi? (e) O le ā e ao ona fai atu ai e tusa ma le umi o le pa·rou·siʹa o Iesu?

¹³ O Kerisiano faauuina i le vaitaimi o Paulo sa naunau atu i latou i le pa·rou·siʹa (faatasi mai) o Iesu. Ae na lapatai atu Paulo ia i latou ina ia aua neʻi ‘faaseseina i o latou manatu.’ Muamua e tatau ona aliai mai “le tagata o le amio leaga,” ua faamaonia e faatatau atu i failotu o Kerisinetoma. Na tusi Paulo e faapea ‘o le faatasi mai o le tagata o le amio leaga e pei o galuega a Satani; i le mana uma, ma faailoga, ma vavega pepelo.’ (2 Tesalonia 2:2, 3, 9) E manino la, o le pa·rou·siʹa, po o le faatasi mai “o le tagata o le amio leaga” sa lē faatatau atu i le taunuu mai mo sina taimi puupuu; o le a faaauau atu mo se vaitaimi, le vaitaimi lea o le a faia ai faailoga pepelo. Aisea ua tāua ai lenei manatu?

¹⁴ Seʻi manatunatu i le fuaiupu e muamua atu i le fuaiupu e pei ona taʻua i luga ua faapea mai: “Ona faaalia mai ai lea o le ua amio leaga, e fano o ia i le Alii o Iesu i le mānava mai o lona fofoga, ma faaumatia i le faaali mai o lana [“faatasi mai,” NW].” E pei lava ona umi se vaitaimi e faatasi mai ai “le tagata o le amio leaga,” e faapena foi ona umi le vaitaimi o le faatasi mai o Iesu ma o le a taualuga i le faafanoina o lena tagata o le amioleaga, le “tagata . . . o le malaia.”—2 Tesalonia 2:8.

Vala Eseese o le Gagana Eperu

15, 16. (a) O le ā le upu faapitoa ua faaaogā i le tele o faaliliuga o le tusi a Mataio i le gagana Eperu? (e) E faapefea ona faaaogā le upu bohʼ i le Tusi Paia?

¹⁵ E pei ona uluai taʻua, na mautinoa le tusia muamua e Mataio o lana Evagelia i le gagana Eperu. O lea, o le ā le upu Eperu na ia faaaogaina i le Mataio 24:3, 27, 37, 39? O faaliliuga eseese o le tusi a Mataio ua faaliliuina i le gagana Eperu faaonaponei ua maua ai le ituaiga o veape o le bohʼ, o loo iai i le fesili a aposetolo ma le tali atu a Iesu. E mafai ona oo atu ai i le faitauina faapenei: “O le ā le faailoga o lou [bohʼ] ma le faaiuga o le faiga o mea?” ma le, “E pei ona faia i ona po o Noa, e faapena foi le [bohʼ] o le Atalii o le tagata.” O le ā le uiga o le upu bohʼ?

¹⁶ E ui e iai ona uiga eseese, ae o le veape Eperu o le bohʼ o lona uiga autū o le “sau.” Ua faapea mai le Theological Dictionary of the Old Testament: ‘E 2,532 ona faaaogaina, bohʼ o le veape e tele ina faaaogā e Tusitusiga Eperu ma o le veape autū e faamatala atu ai gaoioiga.’  (Kenese 7:1, 13; Esoto 12:25; 28:35; 2 Samuelu 19:30; 2 Tupu 10:21; Salamo 65:2; Isaia 1:23; Esekielu 11:16; Tanielu 9:13; Amosa 8:11) Pe ana faaaogā e Iesu ma ona aposetolo se upu faapena e tele ni ona uiga eseese, atonu o le a finauina lona uiga. Ae pe sa latou faia faapea?

17. (a) Aisea atonu ua lē o faailoa mai ai e faaliliuga faa-Eperu faaonaponei o le tusi o Mataio mea tonu na fetalai i ai Iesu ma aposetolo? (e) O fea isi tusi atonu tatou te mauaina ai se fesoasoani e uiga i le ā le upu na ono faaaogā e Iesu ma aposetolo, ma mo le ā se isi mafuaaga ua avea ai lenei tusi o se mea tatou te naunau atu i ai? (Tagai i le faamatalaga i le pito i lalo.)

¹⁷ Ia manatua, o faaliliuga i le gagana Eperu faaonaponei o ni faaliliuga atonu e lē o aumaia tonu ai lava le mea na tusia e Mataio i le gagana Eperu. O le mea moni na faaaogā e Iesu se upu e ese i lo le bohʼ, se upu e fetaui lelei ma le upu pa·rou·siʹa. E mafai ona tatou iloaina lenei mea mai le tusi a le polofesa o George Howard i le 1995 o le Hebrew Gospel of Matthew. Sa faaautū atu le tusi i le finauga aasa i le senituri lona 14 faasaga i le Faa-Kerisiano na faia e le fomaʻi Iutaia o Shem-Tob ben Isaac Ibn Shaprut. Ua maua ai i lena tusi se tusi Eperu o le Evagelia a Mataio. Ua iai faamaoniga e iloa ai e lei faaliliuina mai i le gagana Latina po o le gagana Eleni i le vaitaimi o Shem-Tob, o le tusi la lenei a Mataio ua matuā leva tele ma na uluai tusia lava i le gagana Eperu. * Atonu ua fesoasoani lea ia i tatou e malamalama atili ai i upu na taʻua i le Mauga o Olive.

18. O le ā le upu faa-Eperu e faaosofia ai le naunau ua faaaogā e Shem-Tob, ma o le ā lona uiga?

¹⁸ I le Mataio 24:3, 27, 39, e lē o faaaogaina e le tusi o Mataio a Shem-Tob le veape bohʼ. Nai lo lea, ua faaaogā mai ai le nauna e fesootai atu i ai o le bi·ʼahʹ. E na o le pau le mea o loo aliali mai ai lena nauna i Tusitusiga Eperu o le Esekielu 8:5, ma e faauiga atu i le “faitotoa.” Nai lo le faamatala mai ai o le gaoioiga o loo sau, ua faatatau atu le bi·ʼahʹ iina i le amataga po o le faitotoa o se fale; ma pe afai ua e tu i le faitotoa po o le ala, ua e iai foi i totonu o le fale. E lē gata i lea, ua masani foi ona faaaogā e ni tusitusiga faalotu e lē faale-Tusi Paia na maua mai Tusi Taai o le Sami Mate le upu bi·ʼahʹ e faatatau atu i le taunuu po o le amataina o le tofiga faaositaulaga. (Tagai i le 1 Nofoaiga a Tupu 24:3-19; Luka 1:5, 8, 23.) Ma o le faaliliuga na faia i le 1986 i le gagana Eperu mai le Peshitta faa-Syriac (po o le, Arama) mai anamuā e faaaogā ai le bi·ʼahʹ i le Mataio 24:3, 27, 37, 39. O lea o loo iai faamaoniga e faapea i taimi anamuā o le nauna bi·ʼahʹ atonu na iai sona uiga e ese ai mai le veape bohʼ ua faaaogā i le Tusi Paia. Aisea ua naunau tele ai i lenei mea?

19. Afai na faaaogā e Iesu ma aposetolo le upu bi·ʼah,ʹ o le ā se faaiuga atonu tatou te faia?

¹⁹ Atonu na faaaogā e aposetolo i le latou fesili ma i le tali atu a Iesu lenei nauna o le bi·ʼah.ʹ E tusa lava pe na o le pau le mea na i manatu o aposetolo o le taunuu mai o Iesu i le lumanai, ae sa ono faaaogā e Keriso le upu bi·ʼahʹ ina ia aofia ai ni mea e sili atu nai lo mea na mafaufau i ai aposetolo. Sa ono faasino atu e Iesu i lona taunuu mai e amata se tofiga fou; o lona taunuu mai o le a fai lea ma amataga o lona tofiga fou. Ua fetaui lelei ma le uiga o le upu pa·rou·siʹa, lea na sosoo ai le faaaogaina mai e Mataio. O le faaaogaina faapea o le upu bi·ʼahʹ e tatau ona malamalama i ai, ua lagolagoina ai le mea ua leva ona aʻoaʻoina e Molimau a Ieova, e faapea o le “faailoga” tuufaatasi na tuuina mai e Iesu sa faaatagia mai ai lona faatasi mai.

 Faatalitali Atu i le Taualuga o Lona Faatasi Mai

20, 21. O le ā e mafai ona tatou aʻoaʻoina mai fetalaiga a Iesu e faatatau i ona po o Noa?

²⁰ O lo tatou suesueina o le faatasi mai o Iesu e ao ona iai se taaʻiga tuusaʻo i o tatou olaga ma mea o loo tatou tatalia. Na faalaeiau atu Iesu i ona soo ina ia tumau i le mataala. Na ia aumaia se faailoga ina ia mafai ona iloa ai lona faatasi mai, e ui ina e toatele o le a latou lē faalogo: “A e pei o ona po o Noa, e faapea foi pe a sau [“faatasi mai,” NW] le Atalii o le tagata. Auā e pei ona faia i ona po a o lei oo le lolo, ua latou aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, na le iloa foi e i latou ina seia oo le lolo, ma aveesea i latou uma; e faapea foi pe a sau [“faatasi mai,” NW] le Atalii o le tagata.”—Mataio 24:37-39.

²¹ I ona po o Noa, o le toatele o tagata o lena tupulaga sa faaauau ona faia mea e masani ai i o latou olaga. Na valoia e Iesu o le a faapena foi “le faatasi mai o le Atalii o le tagata.” Atonu na manatu tagata sa i le vaitaimi o Noa e leai se mea e tupu. Ua e silafia le mea moni na tupu. O na ona po sa faapea ona faaauau mo se vaitaimi, na oo atu i se taualuga ina ua “oo le lolo, ma aveesea i latou uma.” Na aumaia foi e Luka se tala talitutusa lelei na faapea ona faatusaina ai e Iesu “ona aso o Noa,” ma “ona aso o le Atalii o le tagata.” Na faamalosiau mai Iesu: “E faapea lava i le aso e faaalia mai ai le Atalii o le tagata.”—Luka 17:26-30.

22. Aisea e tatau ai ona tatou naunau atu faapitoa i le valoaga a Iesu o i le Mataio mataupu e 24?

²² O nei mea uma ua iai se uiga e matuā tāua ia i tatou ona o loo tatou ola nei i se vaitaimi ua tatou mātauliaina ai mea o loo tutupu na faapea ona valoia mai e Iesu—o taua, mafuie, faamaʻi, oge, ma le sauāina o ona soo. (Mataio 24:7-9; Luka 21:10-12) O nei mea tutupu ua matuā faamaonia talu mai le suiga o le talafaasolopito e le taua iloga lea ua taʻua o le Taua Muamua a le Lalolagi, e ui ina manatu i ai tagata o mea tutupu ua masani ai talafaasolopito. Ae peitai, ua mātaulia e Kerisiano moni nei mea tutupu e iai ni o latou uiga e sili ona tāua, e pei lava ona iloa e tagata mataalia le latalata mai o le taumafanafana ina ua matala mai lau o se mati. Na fautua mai Iesu e faapea: “Ia faapea foi outou, pe a iloa e outou ia mea ua faia, ia outou iloa ua latalata le malo o le Atua.”—Luka 21:31.

23. Ia te ai ua matuā faapitoa i ai fetalaiga a Iesu o i le Mataio mataupu e 24, ma aisea?

²³ Na faatatau e Iesu le vaega tele o lana tali atu i le Mauga o Olive i ona soo. O i latou na e faia se vaega i le galuega faasaoola o le talaʻia o le tala lelei i le lalolagi atoa a o lei oo i le iuga. O i latou ia o le a iloa “le mea e inosia e faatafunaina aʻi, . . . ua tu i le mea paia.” O i latou foi ia e tali atu e ala i le “sosola” a o lei oo mai le puapuaga tele. Ma o i latou foi ia o le a matuā aafia i upu ua toe faaopoopo mai e faapea: “A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.” (Mataio 24:9, 14-22) Peitai, o le ā le uiga o na upu faaoso manatu, ma aisea e mafai ai ona faapea atu ua aumaia e na upu ia i tatou se faavae e maua atili ai le fiafia, mautinoa, ma le maelega i le taimi nei? O le suesuega o loo sosoo mai o le Mataio 24:22 o le a aumaia ai le tali.

[Faaopoopoga i lalo]

E Faapefea Ona E Taliina?

□ Aisea e tāua ai le iloa o le eseesega ua faaupu ai e Tusi Paia le Mataio 24:3?

□ O le ā le uiga o le pa·rou·siʹa, ma aisea ua avea ai o se mea e naunau atu i ai?

□ O le ā le manatu tutusa atonu o loo iai i le Mataio 24:3 i le gagana Eleni ma i le gagana Eperu?

□ O le ā le mea moni e faatatau i le taimi e manaomia ona tatou iloa i le mauaina o le malamalamaga e faatatau i le Mataio mataupu e 24?

[Fesili mo le Suʻesuʻega]

[Ata i le itulau 10]

Le Mauga o Olive, e faapea ona iloa atu ai Ierusalema