Lesona Aogā Mai le Nuu o le Folafolaga

O LE Nuu o le Folafolaga e pei ona maua i faamaumauga a le Tusi Paia, e mautinoa e tutasi. I lenei vaipanoa laitiiti, ua tatou maua ai le tele o ituaiga o laufanua eseese. I le itu i mātū, e iai mauga e ufitia ona tumutumu i le kiona; i le itu i saute, e iai vaega vevela. E iai laufanua maulalo o eleele pala, o vaipanoa o vaomatua lafulafuā e lē o aināina, ma vaega maugā o le atunuu e maua i ai faatoaga o laau ʻaina ma e mo le faatataa ai o lafumanu.

O le eseese o tulaga o le maualuga, le tau, ma le eleele, ua tutupu aʻe ai le anoanoai o ituaiga eseese o laau tetele, laau iti, ma isi ituaiga o laau iti—e aofia ai ma nisi o laau e tupu olaola i mauga maualuluga mālūlū, o isi e ola i toafa vevela, faapea ma isi e ola i fanua maulalo o eleele pala, po o fanua laugatasi e maualuluga ma gaoā. Na taʻua e se tasi tagata poto tau i laau e faapea, e tusa ma le 2,600 laau eseese o loo maua ai i lea vaipanoa! O uluai tagata Isaraelu na suesueina le laueleele, na latou vaaia i lena taimi faamaoniga o le lelei o le laueleele. Na latou aumaia mai i se tasi o vanu e tatafe ai vaitafe se fuifui vine e matuā telē lava, ma sa faaaogaina se amo e tausoa ai e ni tamaloloa se toalua! O lea sa talafeagai ai ona faaigoaina lea vanu o Esekolo, o lona uiga “Fuifui Vine.” *—Numera 13:21-24.

 Ae seʻi o tatou vaai totoʻa nei i nisi o laufanua o lenei vaega tutasi o le atunuu (Nuu o le Folafolaga), ae maise lava le vaega i saute.

Le Nuu Maulalo

O lona talafatai, o le matafaga i sisifo o le Nuu o le Folafolaga faapea ma le Sami Metitirani. Pe tusa ma le 25 maila [40 kilomita] i fanuāuta e iai le Nuu Maulalo (Shephelah). O le upu “Shephelah” o lona uiga o le “Nuu Maulalo,” ae o le mea moni, o se vaipanoa maupuepue ae ua taʻua e maulalo, pe a faatusatusa atu i mauga o Iuta i le itu i sasaʻe.

Tagai i le vaega o loo faailogaina i le faafanua o le laufanua ma mātau le fesootaiga o le Nuu Maulalo ma oganuu o loo siomia ai. I le itu i sasaʻe, o mauga o Iuta; i le itu i sisifo, o le fanua laugatasi i le talafatai o Filisitia. I lea, o le nuu maulalo i taimi o le Tusi Paia sa avea o se pa puipui na vavae ese ai le nuu o le Atua mai o latou fili anamua. So o se vaegaʻau lava la e osofai mai i le itu i sisifo, e tatau ona uia le Nuu Maulalo a o lei osofai atu i Ierusalema, le laumua o Isaraelu.

Na tupu se mea faapena i lona iva o senituri T.L.M. Ua lipotia mai e le Tusi Paia le tupu o Suria o Asaeli e faapea, na ‘alu aʻe e tau ma Kata [atonu i le tuaoi o le Nuu Maulalo] ma puʻea ai, ona faasaga ai lea o Asaeli o le a alu atu e tau ma Ierusalema.’ Na mafai e le tupu o Ioasa ona taofia Asaeli e ala i le faia o se faiga faatogafalea i lona foaiina atu ia te ia o le tele o meatāua eseese mai le malumalu ma le maota o le tupu. Ae peitai, ua atagia ai i lenei faamatalaga e faapea, o le Nuu Maulalo, sa matuā sili ona tāua mo le saogalemu o Ierusalema.—2 Tupu 12:17, 18.

E mafai ona tatou aʻoaʻoina se lesona aogā mai lenei mea. Na manao Asaeli e faatoilaloina Ierusalema, ae sa tatau ona ia uia muamua le Nuu Maulalo. E faapena foi Satani le Tiapolo, o loo “saili . . . e ʻaina” auauna a le Atua, ae e tatau ona ia uia muamua se pa puipui malosi—lo latou pipiimau atu i mataupu silisili o le Tusi Paia, e pei o mataupu silisili e faatatau i aumea leaga ma le manao tele i meafaitino. (1 Peteru 5:8; 1 Korinito 15:33; 1 Timoteo 6:10) O le lē tausisi i mataupu silisili o le Tusi Paia e masani lava o le laasaga muamua lena agaʻi i le faia o agasala matuiā. O lea, ia tausia pea le puipuimaluina o lena pa puipui. Mulimuli i mataupu silisili o le Tusi Paia i le asō, ona e lē solia ai lea o tulafono a le Atua i aso uma lava.

Le Atunuu Maugā o Iuta

I le agaʻi atili i totonu o fanuāuta mai le Nuu Maulalo o loo taoto ai le atunuu maugā o Iuta. O se vaipanoa maugā lenei, e maua ai le saito lelei, suauu olive, ma le uaina. Ona o lona tulaga maualuga, na avea ai foi Iuta ma aai sili ona lelei mo sulufaiga. I lea, na fausia ai foi iina e le tupu o Iotama ‘fale leoleo ma ʻolo.’ I taimi o faalavelave, sa mafai ona sosola atu i ai tagata iina mo le saogalemu.—2 Nofoaiga a Tupu 27:4.

O Ierusalema, sa taʻua foi o Siona, o se vaega maupuepue o le atunuu maugā o Iuta. Sa foliga mai na malupuipuia Ierusalema ona sa siomia ona itu e tolu e vanu matomato, ma o le itu i mātū, sa puipuia e se pa e sautuatolu, e tusa ai ma le faamatalaga a le tusitala o talafaasolopito i le uluai senituri o Josephus. Ae i le avea o se aai o sulufaiga, e sili atu mea e manaomia nai lo o pa ma auupega e tausia ai lona saogalemu. E tatau foi ona iai ni vai. E tāua tele lava lenei mea i le taimi e siomia ai, auā a leai se vai, o le a vave lava ona uunaia tagatānuu ia ua puʻea i totonu o le aai e siilima atu.

Na maua e Ierusalema vai mai le Taelega o Seloa. Ae peitai, i le  faagasologa o lona valu o senituri T.L.M., a o ālo atu mo le vagaia o le aai e ʻau a Asuria, na fausia ai e le tupu o Esekia se pa i tua, e pupuni ai le Taelega o Seloa i totonu o le aai. Sa ia pupuni foi vai puna uma i tua o le aai, ina ia lē maua ai e ʻau vagaia a Asuria ni vai mo i latou lava. (2 Nofoaiga a Tupu 32:2-5; Isaia 22:11) E lē na ona pau lena. Na maua e Esekia se auala e faatafe mai ai isi vai i totonu o Ierusalema!

I se mea na taʻua o se tasi o galuega mataina i aso anamua, na eli ai e Esekia se alāvai i lalo o le eleele mai i le vaipuna o Kiona e oo atu lava i le Taelega o Seloa. * E tusa ma le 6 futu (1.8 mita) le maualalo o lenei alāvai, ae 1,749 futu (533 mita) le umi. Seʻi mafaufau i ai—se alāvai e toetoe lava tasi vaetolu o le maila [ʻafa kilomita] le umi, e eli atu i se papa! I aso nei, i le tusa ma le 2,700 tausaga mulimuli ane, ua mafai ai e tagata asiasi maimoa i Ierusalema ona āsa atu i lenei galuega maoaʻe faainisinia, ua lauiloa e tagata uma o le alāvai o Esekia.—2 Tupu 20:20; 2 Nofoaiga a Tupu 32:30.

O taumafaiga a Esekia ina ia puipuia ma faateleina le tafe atu o vai i Ierusalema, e mafai ona aʻoaʻo mai ai ia i tatou se lesona aogā. O Ieova “o le puna o le vaiola.” (Ieremia 2:13) O ona manatu o loo i le Tusi Paia, e maua ai le ola. O le mafuaaga lena e tatau ai ona faia suesuega totino faale-Tusi Paia. Ae o avanoa e suesue ai, ma le poto e maua mai ai, o le a lē tau ina tafe atu ia te oe. Atonu e tatau ona e ‘eli ni alāvai,’ i le faia lea o se taumafaiga e faaavanoa se taimi mai lau faasologa masani feomaʻi mo au suesuega totino. (Faataoto 2:1-5; Efeso 5:15, 16) O le taimi lava e te amata ai, ia pipiimau loa i lau faasologa, ma ia sili ona faamuamua lau suesuega totino. Ia faaeteete ina ia aua neʻi faatagaina so o se tasi po o se mea e taofia oe mai lenei puna tautele e maua ai le vai.—Filipi 1:9, 10.

Vaipanoa o le Vaomatua

I le itu i sasaʻe o le mauga o Iuta, e iai le Vaomatua o Iuta, e igoa foi ia Iesimoni, o lona uiga o le “Toafa.” (1 Samuelu 23:19, faamatalaga pito i lalo) I le Sami Oona, o lenei vaega lafulafuā e faia aʻe i mato papa ma vanu tafatō. I le maualalo e tusa ma le 3,900 futu (1,200 mita), i le na o le 15 maila [24 kilomita], e malutia ai le Vaomatua o Iuta mai matagi o timuga mai sisifo, ma i lea e faalētele ai se timu e maua ai iina. E lē taumatea o le vaomatua lenei na auina atu i ai le ʻoti mo Agasala i le Aso o le Togisala faaletausaga. O inā foi na sola atu i ai Tavita mai  ia Saulo. O inā na anapogi ai Iesu mo aso e 40 ma mulimuli ane ai faaosoosoina e le Tiapolo.—Levitiko 16:21, 22; Salamo 63, ona uluai upu amata; Mataio 4:1-11.

Pe tusa ma le 100 maila [160 kilomita] i saute sisifo o le Vaomatua o Iuta, e iai le Vaomatua o Parana. O le tele o nofoaga sa tolauapi ai Isaraelu i le 40 tausaga talu ona latou malaga ese mai i Aikupito agaʻi i le Nuu o le Folafolaga, sa faatutūina iina. (Numera 33:1-49) Na tusia e Mose e uiga “i le vao e tele ma le matautia, e i ai gata uogo ma akarava, o le nuu naumati foi, e le o i ai se vai.” (Teuteronome 8:15) O se mea e ofo ai ona o le mafai ona faasaoina ai o le faitau miliona o tagata Isaraelu! Peitai, na faaolaina i latou e Ieova.

Seʻi tau ina avea lenei mea o se faamanatuga e faapea, e mafai foi e Ieova ona faaolaina i tatou ai lenei lalolagi ua naumati faaleagaga. Ioe, o i tatou foi o loo fesavaliai solo i luga o gata ma akarava, e tusa lava pe e lē o ni mea moni. Atonu e tatou te fetaiai i aso uma ma tagata o ē e lē taofiofi i le soona lafo mai o upu ogoogo e ono aafia gofie ai o tatou mafaufauga. (Efeso 5:3, 4; 1 Timoteo 6:20) E tatau ai ona avatu le faamālō ia i latou o loo tauivi e auauna i le Atua e ui lava i nei toatugā. O lo latou faamaoni, o le faamaoniga malosi lea e iloa ai o loo lagolagoina moni lava i latou e Ieova.

O Mauga o Karamelu

O le uiga o le igoa Karamelu o “Togalaau ʻAina.” O lenei vaega lafulemu i le itu i mātū, e tusa ma le 30 maila [50 kilomita] le umi, o loo teuteuina i togāvine, togāolive, ma laau e ʻaina o latou fua. E lē mafai ona faagaloina le mamalu ma le matagofie o le laufanua e lei faatoʻaina o lenei atumauga maupuepue. O loo tautala le Isaia 35:2 e uiga i “le matagofie o Karamelu” e faatusaina i ai le matuā fuatele ma le mamalu o le laueleele na toe faafoisia o Isaraelu.

E iai ni nai mea mataina na tutupu i Karamelu. O inā na luʻia ai e Elia ia perofeta a Paala ona “paū ifo lea o le afi a Ieova” e faamaonia ai Lona silisili ese. O le tumutumu foi o Karamelu na iloa atu ai e Elia se ao itiiti lea na oo mai ai timuga tetele, na faaiuina ai faavavega le lāmala ia Isaraelu. (1 Tupu 18:17-46) O lē na sui ia Elia o Elisaia, sa i le Mauga o Karamelu ina ua sau le fafine Sunema e saili lana fesoasoani ona o le tama a le fafine ua oti, lea na toe faatūina mulimuli ane e Elisaia.—2 Tupu 4:8, 20, 25-37.

O loo iai pea i auvae mauga o Karamelu ia togalaau ʻaina, togāolive, ma togāvine. I le tau e totogo ai mea, e matuā ufitia atoa ai nei auvae mauga i se vaaiga uigaese o fugalaau matuā matagofie. “O lou ulu i ou luga ua pei o Karamelu,” o le tala lena a Solomona i le teine Sulami, atonu sa faauiga i le matagofie o lona lauulu po o le tulaga manaia mai o lona ulu i lona ua.—Pese a Solomona 7:5.

O le matagofie ua ufitia ai atumauga o Karamelu ua faamanatu mai ai ia i tatou e uiga i le matagofie faaleagaga ua tuuina mai e Ieova i lana faalapotopotoga o tagata tapuai i aso nei. (Isaia 35:1, 2) O loo ola moni Molimau a Ieova i se parataiso faaleagaga, ma ua latou ioe faatasi ma saafiafiga a le tupu o Tavita, o lē na tusi e faapea: “Ua fuafuaina moʻu le fanua i laufanua matagofie. Ua ou fiafia foi i loʻu lava tofi.”—Salamo 16:6, NW.

E moni, e iai luʻi faigata e tatau ona faafesagaia e le nuu faaleagaga o le Atua i aso nei, e pei lava ona fesagai pea Isaraelu  anamua ma teteega mai fili o le Atua. Peitai, e lē tāitai ona leiloa atu i Kerisiano moni faamanuiaga ua saunia e Ieova—e aofia ai le malamalama ua faateleina o upu moni o le Tusi Paia sa lei faapea ona iai muamua, se auuso i le lalolagi aoao, ma le avanoa e maua ai le ola e faavavau i le parataiso i le lalolagi.—Faataoto 4:18; Ioane 3:16; 13:35.

“E Pei o le Faatoaga a Ieova”

O le Nuu o le Folafolaga anamua, sa matagofie i le vaai. Sa lelei ona faamatalaina e faapea sa “tafe ai le suāsusu ma le meli.” (Kenese 13:10; Esoto 3:8) Na taʻua e Mose lea nuu o “se nuu lelei, o le nuu o vaitafe, o vaipuna, atoa ma vai tetele o puna mai i vanu ma mauga; o le nuu o saito, ma karite, ma vine, ma mati, ma rimoni; o le nuu e iai le suāuu olive ma le meli, o le nuu e te ʻai ai i mea e ʻai ma le le oge lava, e te lē mativa ai i se mea e tasi; o le nuu e uamea ona maa, o ona mauga foi e te eli ai le ʻapa memea.”—Teuteronome 8:7-9.

Afai sa mafai ona saunia e Ieova se nuu tamaoaiga ma matagofie faapena mo ona tagata anamua, e mautinoa foi la le mafai ona ia tuuina mai i ana auauna faamaoni i aso nei se parataiso mamalu ua faalautele atu i le lalolagi aoao—e iai mauga, vanu, vaitafe, ma vaituloto. Ioe, o le Nuu o le Folafolaga anamua faapea ma ona matagofie eseese, ua na o se ata lena o le parataiso faaleagaga lea o loo olioli ai ana Molimau i aso nei faapea ma le Parataiso o le lalolagi fou i le lumanai. O inā o le a faataunuuina ai le folafolaga o loo faamauina i le Salamo 37:29 e faapea: “E fai lava le nuu [lalolagi] mo tagata amiotonu, e nonofo ai pea [e faavavau] i latou.” Pe a tuuina mai e Ieova lena aiga Parataiso i tagata usiusitai, maeu le fiafia o le a oo ia i latou e asiasi atu i ona “vaipanoa” uma ma faia ai faapea e faavavau!

[Faaopoopoga i lalo]

[Faafanua i le itulau 4]

(Tagaʻi i le lomiga mo le ata atoa)

KALILAIA

Sami o Kalilaia

Mauga o Karamelu

NUU MAULALO

SAMARIA

Mauga o Iuta

Sami Oona

[Ē Ana le Ata]

NASA photo

[Faafanua i le itulau 4]

(Tagaʻi i le lomiga mo le ata atoa)

Sa avea le Nuu Maulalo ma pa puipui i le va o tagata o le Atua ma o latou fili

MI 0 5 10

KM 0 8 16

Fanua Laugatasi o Filisitia

Nuu Maulalo

Atunuu Maugā o Iuta

Vaomatua o Iuta

Vanu Umī

Sami Oona

Nuu o Amoni ma Moapi

[Faafanua/Ata i le itulau 5]

(Tagaʻi i le lomiga mo le ata atoa)

Le ana o Esekia: 1,749 futu [533 mita] le umi, na eli atu i papa alā

Vanu o Tyropoea

Seloa

AAI A TAVITA

Vanu o Ketarono

Kiona

[Ata i le itulau 6]

I le Vaomatua o Iuta, na saili ai e Tavita se lafitaga mai ia Saulo. Na tofotofoina ai mulimuli ane e le Tiapolo Iesu iina

[Ē Ana le Ata]

Pictorial Archive (Near Eastern History) Est.

[Ata i le itulau 7]

Le Mauga o Karamelu, o iina na faamasiasi ai e Elia perofeta a Paala

[Ē Ana le Ata]

Pictorial Archive (Near Eastern History) Est.

[Ata i le itulau 8]

“O le a faaooina oe e Ieova lou Atua i le nuu lelei, o le nuu o vaitafe, o vaipuna, atoa ma vai tetele e puna mai i vanu ma mauga.”—Teuteronome 8:7