Pe E te Manatua?

Pe sa e talisapaia le faitauina o lomiga lata mai o Le Olomatamata? Ua lelei, seʻi vaai la pe mafai ona e taliina fesili o loo mulimuli mai:

□ Pe o fetalaiga a Iesu, “O i latou uma lava tou te faamagaloina ai a latou agasala, e faamagaloina ia ia i latou,” ua faauiga faapea e mafai e Kerisiano ona faamagalo agasala? (Ioane 20:23)

E leai se faavae faale-Tusi Paia mo le faaiuina ai e faapea o Kerisiano lautele, po o toeaina tofia foi o le faapotopotoga, ua iai le pule mai le Atua e faamagalo ai agasala. I le faamatalaga atoa a Iesu e foliga mai o loo faaalia ai na saunia e aposetolo ia i latou e ala i le agaga se pule tutasi e faamagalo pe lē faamagaloina ai agasala. (Tagai i le Galuega 5:1-11; 2 Korinito 12:12.)—4/15, itulau e 28.

□ O le ā ua tumatilatila ai le faaliliuga a J. J. Stewart Perowne i le tusi a Salamo lea na muai lomia i le 1864?

I lana faaliliuga sa taumafai ai Perowne e “pipiimau atu i faaleoga o i le gagana Eperu, i alagaupu ma le kalama o fuaiupu.” I le faia faapea sa ia fiafia ai i le toe faafoisia mai o le suafa tauatua “Ieova.”—4/15, itulau e 31.

□ O le ā le taʻiala na aaoina atu e Iesu i ona soo i a latou feutagaiga ma malo o le lalolagi?

Na fetalai Iesu e faapea: “O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) Na ia toe fetalai foi e faapea: “Ai se na te tauanau mai lua te o ma ia i le maila e tasi, ina o ia oulua ma ia i maila e lua.” (Mataio 5:41) O iinei ua faataitaia ai e Iesu le mataupu silisili o le gauai atu ma le lotomalie i poloaiga talafeagai, pe o ni poloaiga mai tagata po o ni manaoga mai le malo, o loo ogatusa ma tulafono a le Atua. (Luka 6:27-31; Ioane 17:14, 15)—5/1, itulau e 12.

□ O le ā le uiga o le “savali i le mea moni”? (Salamo 86:11)

E aofia ai le usitaia o mea o faafinagaloina e le Atua ma auauna ia te ia i le faatuatua ma le faamaoni. (Salamo 25:4, 5; Ioane 4:23, 24)—5/15, itulau e 18.

□ O le ā na faataulauina e ala i le aauina atu e Ieova o Iona i Nineva?

O le iuga na oo i ai, o le galuega talaʻi a Iona i Nineva sa faaalia ai le eseesega o tagata Nineva ua salamō ma tagata Isaraelu faauamaaa, o ē na matuā leai se faatuatua ma se lotomaulalo. (Faatusatusa i le Teuteronome 9:6, 13; Iona 3:4-10.)—5/15, itulau e 28.

□ O ai le Gata ma o ai “le fafine” o loo faasino i ai le Kenese 3:15?

O le Gata e lē o se gata masani ae o lē na faaaogaina le gata e tautala atu ai, o Satani le Tiapolo. (Faaaliga 12:9) “O le fafine” e lē o Eva ae o le faalapotopotoga faalelagi a Ieova, le tinā o ana auauna fanauagagaina o i le lalolagi. (Kalatia 4:26)—6/1, itulau e 9.

□ E mafai faapefea e se tagata ona alu ese mai Papelonia le Aai Tele ma mauaina le saogalemu? (Faaaliga 18:4)

E tatau ona matuā vavae ese o ia mai faalapotopotoga o lotu sese atoa foi ma a latou tu masani ma le agaga o loo latou faatupuina, ona tatau ai lea ona ia maua le saogalemu i totonu o le faalapotopotoga faatiokarate a Ieova. (Efeso 5:7-11)—6/1, itulau e 18.

□ Aisea ua taʻua soo ai le aeto i le Tusi Paia?

Sa faasino e tusitala o le Tusi Paia i uiga masani o le aeto e faatusa i ai uiga e pei o le atamai, puipuiga tauatua, ma le faimea vave.—6/15, itulau e 8.

□Pe o iai ea i auauna a le Atua i aso nei o ē e iai le faamoemoe faalelalolagi le tele o le agaga o le Atua e pei foi ona iai i Kerisiano ua faauuina i le agaga?

I se tulaga faavae, o le tali i ai ioe. E tutusa lelei le agaga o le Atua e tuuina atu i vasega e lua, ma o le poto ma le malamalama ua tutusa ona maua e i latou uma.—6/15, itulau e 31.

□Aisea e aogā ai mo i tatou i aso nei ona suesueina le auaunaga paia lea na faatino e ositaulaga Isaraelu i le malumalu i Ierusalema?

O le faia faapea e mafai ai ona tatou talisapaia atoatoa le faatulagaga o le alofa mutimutivale lea ua mafai ai e tagata agasala i aso nei ona maua se leleiga ma le Atua. (Eperu 10:1-7)—7/1, itulau e 8.

□ Na faapefea i le malumalu lona lua na fausia i Ierusalema ona aumaia ai se viiga sili nai lo le malumalu na fausia e Solomona?

Sa faatumauina le malumalu lona lua mo le 164 tausaga nai lo le malumalu o Solomona. E sili atu ona toatele tagata tapuai mai le tele o atunuu na lolofi atu i ona lotoā. Ae e sili ona tāua, o lenei malumalu lona lua na olioli ai i le faaeseesega sili i le iai o le Alo o le Atua, o Iesu Keriso, e aʻoaʻo ai i ona lotoā.—7/1, itulau e 12, 13.

□ O anafea na aumaia ai e le Atua lona malumalu faaleagaga?

Na faataunuuina lenei mea i le 29 T.A. ina ua faaalia e le Atua lana faamaoniga i le tatalo a Iesu i lona papatisoga. (Mataio 3:16, 17) O le faamaoniga a le Atua i le ofoina atu o le tino o Iesu sa uiga, i se tulaga faaleagaga, ua amata faagaoioi le fata faitaulaga e sili atu nai lo lea na iai i le malumalu i Ierusalema.—7/1, itulau e 14, 15.

□ Aisea e ao ai ona fefaamagaloai?

O le faamagaloina o lē ua agasala lea sa faatoese atu e tāua pe afai tatou te taumafai e faatumauina le autasi faa-Kerisiano. O le ita faamoemoe ma le faatagaina o se lē fiafia o le a aveesea ai le filemu mai i o tatou mafaufau. Afai tatou te lē loto faamagalo, atonu o le a iai se aso o le a lē toe faamagaloina ai e Ieova a tatou agasala. (Mataio 6:14, 15)—7/15, itulau e 18.

□ Na mafai faapefea ona avea tagata Isaraelu ma ē paia?

O le tulaga paia e faatoʻā mafai lava e ala i lo latou mauaina o se faiā vavalalata ma Ieova, le Atua paia, ma la latou tapuaiga mamā ia te ia. Na latou manaomia le poto saʻo i ‘Lē Sili ona Paia’ ina ia tapuai atu ai ma le paia ia te ia, i le tulaga mamā faaletino ma mamā faaleagaga. (Faataoto 2:1-6; 9:10)—8/1, itulau e 11.