Pe o le a Faaolaina Oe pe a Gaoioi le Atua?
Pe o le a Faaolaina Oe pe a Gaoioi le Atua?
“A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.”—MATAIO 24:22.
1, 2. (a) Aisea ua avea o se mea e masani ai le naunau atu i lo tatou lumanai? (e) Ona o lagona masani ai o le naunau atu, atonu o ā fesili tāua ua aofia ai?
O LE Ā le tele o lou naunau ia te oe lava? E toatele tagata i aso nei ua soona naunau ia te i latou lava, ua avea ma ē manatu faapito. Peitai, e lē o taʻusalaina e le Tusi Paia le naunau tatau i mea e aafia ai i tatou. (Efeso 5:33) E aofia ai le naunau atu i lo tatou lumanai. O lea, o se mea e masani ai lou fia iloa o mea o loo tuu mai i le lumanai mo oe. Pe o e naunau ea i ai?
2 E mafai ona tatou mautinoa sa iai se naunau faapea i aposetolo o Iesu i lo latou lumanai. (Mataio 19:27) E aliali mai o se tasi lena o mafuaaga na ala ai ona iai le toʻafa o i latou faatasi ma Iesu i le Mauga o Olive. Sa latou fesili atu faapea: “Seʻi e taʻu mai ia te i matou, pe fai afea ia mea? Pe se a foi le faailoga pe a lata ona taunuu o ia mea uma?” (Mareko 13:4) Sa lei teena e Iesu le naunau atu e tusa ma faalogona e masani ai mo le lumanai—le naunau atu o aposetolo faapea ma i tatou. Sa ia toe faamatilatila atu le aafia o ona soo i mea e tutupu i le lumanai ma faapena foi ma iuga mulimuli e oo i ai.
3. Aisea tatou te faafesootaia ai le tali a Iesu ma o tatou taimi?
3 O le tali atu a Iesu ua faatulaga mai ai se valoaga ma sona faataunuuga sili i o tatou taimi. E mafai ona tatou vaaia lenei mea mai taua o le lalolagi ma isi feainaiga i lo tatou senituri, o mafuie ua fano faafuasei ai le tele o ola, o oge ua faapea ona faaoo mai ai faamaʻi ma le oti, ma mala—mai le fulū Sepania lea na pipisi i le 1918 seia oo mai i le faamaʻi o loo iai nei o le AIDS. E ui i lea, o le tali a Iesu sa tele foi ina iai se faataunuuga e tataʻi atu i le faaumatiaga o Ierusalema ma aofia ai ma lona faaumatiaga e autau a Roma i le 70 T.A. Na lapataia e Iesu ona soo e faapea: “Ia outou ia te outou; auā e tuuina atu outou e i latou i fono, ma sasaina outou i sunako; e tutū foi outou i luma o alii ma tupu ona o aʻu, e fai ma molimau ia te i latou.”—Mareko 13:9.
Mea na Valoia e Iesu, ma Mea na Tutupu
4. O ā nisi o lapataiga ua aofia ai i le tali atu a Iesu?
4 Na iai nisi mea e sili atu na aofia ai ina ua valoia mai e Iesu le auala o le a feagai ai isi ma ona soo. Na ia lapataia i latou i le auala e ao ona latou amio ai. Mo se faataitaiga: “Pe a outou iloa le mea e inosia e faatafunaina aʻi, ua fai mai ai e Tanielu le perofeta, ua tu i le mea e le tatau ai, (ina iloa ia e lē faitau), o e o i Iutaia i ia ona po, ia latou sosola i mauga.” (Mareko 13:14) I le faamatalaga tutusa o loo i le Luka 21:20 ua faapea mai: “A iloa e outou ua siosiomia Ierusalema i ʻau o le taua.” Na faapefea ona faamaonia le moni i le faataunuuga muamua o lena mea?
5. O le ā na tupu i tagata Iutaia lava ia i totonu o Iuta i le 66 T.A.?
5 Ua taʻu mai e le International Standard Bible Encyclopedia (1982) ia i tatou e faapea: “Sa faateleina le tetee malosi o tagata Iutaia i le pulega a Roma ma o faipule na fai ma sui o le emeperoa sa faateleina lo latou fasi tagata, faasauā, ma le lē faamaoni. Na aliaʻe mai ai ni fouvalega i le 66 T.A. . . . Na amata ai le taua ina ua faatoilaloina e le ʻau Selote ia Masada ma sosoo ai ma le oo atu i Ierusalema i lalo o le taitaiga a Menahem. I le taimi lava lea e tasi, na matuā fasiotia tagata Iutaia i le aai o le kovana i Kaisareia, ma na salalau atu ai i le atunuu atoa lenei tala matautia o le taua. O tupe siliva fou na tusia ai le Tausaga 1 seia oo i le Tausaga 5 o le fouvalega.”
6. O le fouvalega a tagata Iutaia na faapogaia ai le ā le tali atu a tagata Roma?
6 O le Vaegaʻau Lona Sefululua a Roma i le taitaiga a Cestius Gallus na savavali mai Suria, faatoilalo Kalilaia ma Iuta, ona osofaia ai lea o le laumua, na oo foi lava ina nonofo i le pito i luga o le vaega o “Ierusalema le aai paia.” (Neemia 11:1; Mataio 4:5; 5:35; 27:53) I le aoteleina o taualumaga, ua faapea mai le tusi The Roman Siege of Jerusalem: “E lima aso o taumafai le ʻau a Roma e āʻea le pa, ona o le teena mai lea taimi i lea taimi. Mulimuli ane, na mālōlō ē na tetee mai i le faatimuto atu i ai o auupega na tafana atu. I le fauina o se testudo—o se faiga na faamau ai a latou talita i luga o o latou ulu ina ia fai ma talipupuni mo i latou—na elia ai le pa e fitafita Roma ma taumafai e susunu le ala tatala. Na matuā fememeai ai ē na tetee mai.” Sa mafai e Kerisiano o i totonu o le aai ona manatua fetalaiga a Iesu ma iloa ai e faapea o se mea inosia ua tu i se nofoaga paia. * Ae i le siosiomia o le aai, sa ono mafai faapefea e na Kerisiano ona sosola ese e pei ona fautuaina e Iesu?
7. Ina ua lalata atu lava i le manumalo i le 66 T.A., o le ā na faia e autau a Roma?
7 Ua faamatala mai e le tusitala o talafaasolopito o Flavius Josephus e faapea: “Sa lei iloa e Cestius [Gallus] le loto vaivai o ē na puʻea, faapena foi ma faalogona o tagata sa i totonu o le aai, na faafuasei lava ona ia faatonuina ana fitafita ina ia taofia le osofaiga, lafoai le faamoemoe e manumalo ai e ui sa lei faiaina o ia, ma tuumuli ese mai le Aai e aunoa ma se mafuaaga tatau.” (The Jewish War, II, 540 [xix, 7]) Aisea na tuumuli ai Gallus? E tusa lava po o le ā le mafuaaga, ae o lona toe tuumuli ese na maua ai le avanoa mo Kerisiano ina ia usitaia le poloaiga a Iesu ia sosola atu i mauga ma saogalemu ai.
8. O le ā le vaega lona lua o taumafaiga a autau a Roma faasaga ia Ierusalema, ma o le ā na tofo i ai ē na faasaoina?
8 Sa avea le usiusitai ma faasaoola. E lei umi ae gaoioi loa ʻau a Roma e tafiesea le fouvalega. O le tauiviga i lalo o le taitaiga a le Taitaiʻau o Tito na oo atu lona tumutumuga i le vagaia o Ierusalema mai ia Aperila seia oo ia Aokuso i le 70 T.A. E meia ai se tasi pe a faitau i le faamatalaina e Josephus o le auala na mafatia ai tagata Iutaia. E ese mai ia i latou na fasiotia i le fetauaiga ma Roma, ae o isi Iutaia na toe fasiotia lava e nisi ʻau a Iutaia, ma na oo ai ina ʻai tagata ona o le oge tele. E oo ane i le taimi na manumalo ai Roma, e 1,100,000 tagata Iutaia ua uma ona maliliu. * Mai le 97,000 o ē na faasaoina, o isi o i latou na vave faasalaina i le oti; o isi na fai ma pologa. Ua faapea mai Josephus: “O i latou na silia i le sefulufitu tausaga le matutua na taloka lima ma vae ma tuua e faia galuega mamafa i Aikupito, ae o le toatele na tuuina atu e Tito i itumalo ina ia fano ai i malae mataaga e ala i le pelu po o manufeai.” A o faia foi lenei lava tuueseesega mo lo latou iuga, e 11,000 pagota na feoti i le fia ʻaai.
9. Aisea na lē oo ai i Kerisiano mea ia na oo ia Iutaia, ae o ā fesili e lei taliina?
9 E mafai ona faaalia le loto faafetai o Kerisiano ona sa latou usiusitai i le lapataiga a le Alii ma sosola ese ai mai le aai a o lei toe foi atu autau a Roma. O lea, na faapea ai ona faasaoina i latou mai se vaega o le mea na taʻua e Iesu o le ‘puapuaga tele e lei tupu muamua talu ona faavaeina le lalolagi ma e lē toe tupu foi’ i Ierusalema. (Mataio 24:21) Na faaopoopo mai Iesu e faapea: “A le faapuupuuina foi ia aso, e le faaolaina se tasi; a e faapuupuuina ia aso ona o e ua filifilia.” (Mataio 24:22) O le ā sa uiga atu i ai lenei fetalaiga i lena taimi, ma o le ā e uiga i ai i le taimi nei?
10. Na tatou faamatalaina muamua faapefea le Mataio 24:22?
10 I taimi ua mavae sa faamatalaina faapea o ‘ē faaolaina’ sa faatatau atu lea i tagata Iutaia na sao mai le puapuaga i Ierusalema i le 70 T.A. Ua uma ona sosola Kerisiano, o lea sa tuu atu ai e le Atua ʻau a Roma e faaoo atu se faaumatiaga vave. I nisi faaupuga, ona o le mea moni e faapea o “e ua filifilia” ua ō ese mai i le tulaga e lamatia ai, sa mafai ai ona faapuupuu aso o le puapuaga, ma maua ai le avanoa mo le faasaoina o nisi “tagata” Iutaia. Na iai le manatu faapea o Iutaia na faasaoina na faaatagia ai i latou o ē o le a faasaoina i le puapuaga tele o loo fotuai mai i o tatou aso.—Faaaliga 7:14.
11. Aisea e foliga mai ai e ao ona toe talanoaina le faamalamalamaga o le Mataio 24:22?
11 Ae pe e talafeagai ea lena faamatalaga ma le mea na tupu i le 70 T.A.? Na fetalai Iesu e faapea e tatau ona “faaolaina” ia ‘tagata’ mai le puapuaga tele. Pe e mafai ona e faaaogaina le faaupuga “faaolaina” e faamatala ai i latou e 97,000 na faasaoina, pe a tagai atu i le mea moni e faapea o le faitau afe o i latou na e lei umi ae feoti i le fia ʻaai po o le fasiotia foi i se falemataaga? Ua faapea mai Josephus e faatatau i se tasi falemataaga i Kaisareia: “O le aofaiga o i latou na faaumatia i fetauaiga ma manufeai po o le tau o le tasi ma le isi po o le susunuolaina na sili atu ma le 2,500.” E ui ina sa lei feoti i latou ina ua faatoilaloina, ae mautinoa lava sa lei “faaolaina” i latou. Ma pe na manatu i ai Iesu e faapea o i latou na e talitutusa ma ē fiafia o le a faasaoina i le “puapuaga tele” o loo fotuai mai?
Tagata e Faaolaina—E Faapefea?
12. O ai i le uluai senituri na faatatau i ai “e ua filifilia” o ē na naunau i ai le Atua?
12 E oo ane i le 70 T.A., sa lē toe silasila le Atua i Iutaia moni i la le tino o ni ona tagata ua filifilia. Na faailoa atu e Iesu e faapea ua teena e le Atua lena nuu ma o le a tuu atu lona aai laumua, o le malumalu, ma faiga tau tapuaiga e oo atu i se mutaaga. (Mataio 23:37–24:2) Na filifilia e le Atua se nuu fou, le Isaraelu faaleagaga. (Galuega 15:14; Roma 2:28, 29; Kalatia 6:16) Na faia aʻe i tane ma fafine ua filifilia mai atunuu uma lava ma ua faauuina i le agaga paia. (Mataio 22:14; Ioane 15:19; Galuega 10:1, 2, 34, 35, 44, 45) I ni tausaga a o lei osofaia e Cestius Gallus, na tusi atu ai Peteru i “e ua filifilia e tusa mona muai silafia e le Atua le Tamā, i le faapaiaina e le Agaga.” O i latou na ua faauuina e le agaga sa avea o se “tupulaga ua filifilia . . . o tupu ma ositaulaga, o le nuu paia.” (1 Peteru 1:1, 2; 2:9) O le a aveina e le Atua i latou na i le lagi ina ia pule ma Iesu.—Kolose 1:1, 2; 3:12; Tito 1:1; Faaaliga 17:14.
13. O le ā le uiga atonu na faatatau atu i ai fetalaiga a Iesu o i le Mataio 24:22?
13 O lenei iloaina o ē ua filifilia e aogā, talu ai na valoia e Iesu e faapea o aso o le puapuaga o le a faapuupuuina “ona o e ua filifilia.” O le upu Eleni ua faaliliuina “ona o” e mafai foi ona faaliliu faapenei, ‘mo le lelei o’ po o le ‘mo ni āi.’ (Mareko 2:27; Ioane 12:30; 1 Korinito 8:11; 9:10, 23; 11:9; 2 Timoteo 2:10; Faaaliga 2:3) O lea, sa ono faapea fetalaiga a Iesu, ‘A lē faapuupuuina ia aso, e leai se tagata e faaolaina; ae mo le lelei o ē ua filifilia o le a faapuupuuina ai ia aso.’ * (Mataio 24:22) Pe na iai ea se mea na tupu na faapea ona aogā pe ‘mo le lelei o’ Kerisiano ua filifilia na lē mafai ona sao ese mai i totonu o Ierusalema?
14. Na faapefea ona faasaoina ‘tagata’ ina ua toe solomuli faafuasei ʻau a Roma mai i Ierusalema i le 66 T.A.?
14 Ia manatua foi i le 66 T.A., na agaʻi atu ai ʻau a Roma i le laueleele, nofoia le pito i luga o Ierusalema, ma amata ona eliina le pa. Ua faapea mai le faamatalaga a Josephus: “Pe ana seʻi toe finafinau teisi lava mo sina taimi semanū ua na faatoilaloina le Aai i le taimi lava lena.” Fesili ifo ia te oe lava, ‘Aisea o le a faafuasei ai lava ona toe solomuli le autau malosi a Roma mai le tauiviga “e aunoa ma se mafuaaga tatau”?’ Ua faaopoopo mai Rupert Furneaux, o se tasi e poto faapitoa i le faamatalaina o talafaasolopito faafitafita e faapea: “E leai se tusitala o talafaasolopito ua manuia i le aumaia o so o se mafuaaga talafeagai o le faaiuga uigaese ma le matautia a Gallus.” E tusa lava po o le ā le mafuaaga, ae o le iuga na faapuupuu ai le puapuaga. Na toe solomuli ʻau a Roma, ma na osofaia i latou e Iutaia a o tuumuli ese atu. Ae faapefea Kerisiano faauuina o “e ua filifilia” ua lē mafai ona sao ese mai le aai? O le taofia o le osofaiga na iu ai i le faasaoina o i latou mai le fasiotia o tagata na faamataʻu ane i le taimi o le puapuaga. O lea, o Kerisiano ia na maua aogā ona o le faapuupuuina o le puapuaga i le 66 T.A., o i latou ia o ‘tagata’ sa faaolaina e pei ona taʻua i le Mataio 24:22.
O le ā o Umia e Lou Lumanai?
15. Aisea tatou te faapea atu ai e tatau ona tatou naunau faapitoa i le Mataio mataupu e 24 i o tatou aso?
15 Atonu e fesili faapea se tasi, ‘Aisea e tatau ai ona ou matuā naunau atu i lenei malamalamaga ua faamanino mai o fetalaiga a Iesu?’ Ia, e lava mafuaaga tatou te faia ai se faaiuga e faapea o le valoaga a Iesu e tatau ona iai sona faataunuuga sili, i tua atu o mea na tutupu i le 70 T.A. e aofia ai foi ma lena tausaga. * (Faatusatusa i le Mataio 24:7; Luka 21:10, 11; Faaaliga 6:2-8.) Mo le faitau sefulu o tausaga, ua talaʻia ai e Molimau a Ieova e faapea o le faataunuuga sili o loo tupu i o tatou taimi e faamaonia ai e mafai ona tatou faatalitalia se faataunuuga sili i le “puapuaga tele” ua toe o se aga. I le taimi o lea puapuaga tele, o le a faapefea ona faataunuuina ai upu faavaloaga o loo i le Mataio 24:22?
16. O le ā le mea moni e faalaeiauina ai ua saunia mai e le Faaaliga e faatatau i le lalata mai o le puapuaga tele?
16 Pe ā ma le luasefulu tausaga talu ona mavae le puapuaga i Ierusalema, na tusi ai e le aposetolo o Ioane le tusi o Faaaliga. Na faamautinoa ai e faapea o le puapuaga tele o loo fotuai mai i le lumanai. Ma i le naunau atu i mea e aafia totino ai i tatou, e ono maua ai se mapusaga ona o loo faamautinoaina i tatou e le ata faavaloaga o le Faaaliga e faapea o le a faasaoina tagata pe a oo mai lenei puapuaga tele. Na valoia e Ioane se “motu o tagata e toatele mai atu nuu uma, ma aiga, ma nuu, ma gagana eseese.” O ai i latou na? Na tali mai se leo mai le lagi e faapea: “O i latou ia o e o mai nai le puapuaga tele.” (Faaaliga 7:9, 14) Ioe, o i latou ia o le a faasaoina! Ua aumaia foi e le Faaaliga ia i tatou se utaga poto i le auala o le a tutupu ai mea pe a oo mai le puapuaga tele ma i le auala o le a faataunuuina ai le Mataio 24:22.
17. O le ā le mea o le a aofia ai i le vaega amata o le puapuaga tele?
17 O le vaega amata o lenei puapuaga o le osofaia lea o se fafine talitane faafaatusa e taʻua o “Papelonia le Aai Tele.” (Faaaliga 14:8; 17:1, 2) Ua fai o ia ma sui o le emepaea o lotu sese o le lalolagi, ua avea ai Kerisinetoma ma ona vaega tele ua mataʻuleagaina. E tusa ai ma upu o i le Faaaliga 17:16-18, o le a tuu atu e le Atua i loto o faiga faapolotiki ina ia osofaia lenei fafine talitane faafaatusa. * Mafaufau i le auala o le a foliga atu ai le osofaiga i “e ua filifilia” ma a latou aumea, le “motu o tagata e toatele.” A o agaʻi i luma lenei osofaiga e faatafunaina ai lotu, e ono foliga mai o le a tafiesea uma ai faalapotopotoga lotu uma lava, e aofia ai ma tagata o Ieova.
18. Aisea e foliga mai ai o le a leai se ‘tagata’ e faasaoina i le vaega amata o le puapuaga tele?
18 O le taimi lea e faataunuuina ai i se fua e sili atu fetalaiga a Iesu o loo i le Mataio 24:22. A o foliga mai na iai ē na filifilia i Ierusalema i se tulaga e lamatia ai, atonu e foliga mai ai foi auauna a Ieova o le a iai i se tulaga matautia i le tafiesea i le taimi o le osofaia o lotu, e pei e foliga mai o lea osofaiga o le a matuā aveesea ai ‘tagata’ uma o le Atua. Peitai, sei o tatou manatu i le mea na tupu i tuā i le 66 T.A. O le puapuaga na faapogaia e ʻau a Roma sa faapuupuuina, na lava ai le taimi e sosola ese ai ē na faauuina ma filifilia e le Atua ma faaolaina ai. O lea, e mafai foi ona tatou mautinoa o le osofaiga e faatamaʻia ai lotu o le a lē faatagaina na te tafiesea le faalapotopotoga i le lalolagi aoao o ē tapuai faamaoni. O le a vave tele, e pei “o le aso e tasi.” E ui i lea, o le a faapuupuuina le osofaiga, e lē faatagaina le osofaiga e faataulau lona faamoemoe, ina ia mafai ona “faaolaina” ai tagata o le Atua.—Faaaliga 18:8.
19. (a) Pe a uma le vaega muamua o le puapuaga tele, o le ā le mea o le a matuā manino lelei mai? (e) O le ā le mea o le a taitaiina atu i ai?
19 O isi vaega o le faalapotopotoga faalelalolagi a Satani le Tiapolo o le a iai pea mo se vaitaimi, o loo uio i le lē toe feutagai ma la latou fafine talitane faalelotu lea sa iai. (Faaaliga 18:9-19) I se taimi patino, o le a latou mātauina ai e faapea o loo iai pea auauna moni a le Atua, “o e o fifilemu, o e nonofo faatalanoa, o i latou uma o nonofo ua leai so latou pa” ma ua foliga mai e faigofie ona osofaia. Maeu se mea e matuā faateʻia ai lea ua faatali mai mo ē osofai atu! I le tali mai i se faamataʻuga po o se sauāga moni faasaga i ana auauna, o le a tulai mai ai le Atua e faamasinoina ona fili i le vaega faaiu o le puapuaga tele.—Esekielu 38:10-12, 14, 18-23.
20. Aisea o le a lē faamataʻuina ai tagata o le Atua i le vaega lona lua o le puapuaga tele?
20 O lenei vaega lona lua o le puapuaga tele o le a tutusa lelei ma le mea na tupu i Ierusalema ma ē na nonofo ai i le osofaiga lona lua e ala atu i autau a Roma i le 70 T.A. O le a faamaonia o se “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) Ae e mafai ona tatou mautinoa lelei, o ē ua filifilia e le Atua ma a latou aumea o le a lē iai i le itu matautia, e faapea ona ono fasiotia ai. Ioe, e lē sosola atu i latou i se laufanua patino e tasi o i le laueleele. O uluai Kerisiano sa iai i Ierusalema sa mafai ona sosola ese mai le aai ma ō atu i vaega maugā e pei o Pela i le isi itu o le Ioritana. Ae i le lumanai, o Molimau faamaoni a le Atua o le a iai i itu eseese o le lalolagi, o lea e lē faalagolago le saogalemu ma le malupuipuia i so o se vaipanoa o le lalolagi o iai.
21. O ai o le a tauina le taua i le taua faaiu, ma o le ā le iuga?
21 O le faaumatiaga o le a lē faaauala mai i autau a Roma po o se isi lava faalapotopotoga a tagata. Nai lo lea, ua faamatala mai e le tusi o Faaaliga o autau faaoosala e mai le lagi. Ioe, o lena vaega faaiu o le puapuaga tele o le a faataunuuina, e lē faaauala mai i so o se autau faaletagata, ae “O le Afioga a le Atua,” e ala mai ai, o le Tupu o Iesu Keriso, ua fesoasoani atu i ai ‘ʻau o le lagi,’ e aofia ai Kerisiano faauuina ua toe tutū. “O le Alii ia o alii ma le Tupu o tupu” o le a na faataunuuina le faaumatiaga e sili atu ona maeʻaeʻa nai lo lea na faia e Roma i le 70 T.A. O le a tafiesea ai tagata uma e tetee i le Atua—o tupu, taʻitaʻi o vaegaʻau, o ē saʻoloto atoa ma pologa, o ē faatauvaa ma ē malolosi. E oo foi i faalapotopotoga faaletagata o le lalolagi a Satani o le a fetaiai ma lo latou iuga.—Faaaliga 2:26, 27; 17:14; 19:11-21; 1 Ioane 5:19.
22. O le ā e faauiga atili atu i ai le faasaoina o ‘tagata’?
22 Ia manatua o ‘tagata’ o ē mai le vaega totoe faauuina ma ē mai le “motu o tagata e toatele,” ua uma ona faasaoina i le taimi e faafuasei ai ona faaumatia atoatoa Papelonia le Aai Tele i le vaega amata o le puapuaga. E faapena foi la i le vaega mulimuli o le puapuaga, o ‘tagata’ ua sosola atu i le itu a Ieova o le a faasaoina. Maeu se eseesega o le a iai i lenei mea ma mea na oo i tagata Iutaia fouvale i le 70 T.A.!
23. O le ā e mafai ona tepa taulai atu i ai ‘tagata’ ua faasaoina?
23 I le manatunatu i avanoa lelei mo lou lumanai ma le lumanai o ē pele ia te oe, seʻi mātau le mea ua folafola mai i le Faaaliga 7:16, 17: “Latou te le toe fia aai, e le toe fia inu foi, e lē ogotia i latou i le la, po o se tasi vevela; Auā o le Tamai Mamoe o loo i luma o le nofoālii na te fafaga ia i latou, ma taʻitaʻi ia te i latou i puna o vai ola; e sōloieseina foi e le Atua o loimata uma nai o latou mata.” Ma le mautinoa lava, o le uiga moni lava lena o le “faaolaina” i se uiga matagofie ma le tumau.
[Faaopoopoga i lalo]
^ pala. 8 Ua faapea mai Josephus: “Ina ua ulu atu Tito, na matuā ofo o ia i le malupuipuia o le aai . . . Na alaga leotele o ia e faapea: ‘Ua faatasi le Atua i la tatou itu; o le Atua na faatoilaloina Iutaia mai i o latou ʻolo malolosi; auā o le ā se mea e mafai ona faia e lima o tagata po o meatau faasaga i ʻolo faapenei?’”
^ pala. 13 I se tulaga mataina, ua faaaogā e le tusi a Shem-Tob o le Mataio 24:22 le upu Eperu o le ‘a·vurʹ, o lona uiga “mo le lelei o, mo ni āi o, ina ia mafai ai ona.”—Tagai i le mataupu ua mavae atu i le itulau e 13.
^ pala. 15 Tagai i Le Olomatamata o Fepuari 15, 1994, itulau e 11 ma le 12, ma le siata o i itulau e 14 ma le 15, ua aumaia ai i vaega tutusa le tali faavaloaga a Iesu o loo maua i le Mataio mataupu e 24, Mareko mataupu e 13, ma le Luka mataupu e 21.
^ pala. 17 Tagai i le Revelation—Its Grand Climax At Hand!, itulau e 235-258, lomia i le 1988 e le Watchtower Bible and Tract Society of New York, Inc.
E Faapefea Ona E Taliina?
□ O ā vaega e lua sa iai iina i le osofaia e autau a Roma o Ierusalema?
□ Aisea e foliga mai ai e faapea o le 97,000 o ē na faasaoina i le 70 T.A. e lē o i latou ia o ‘tagata’ na taʻua i le Mataio 24:22?
□ Na faapefea ona faapuupuuina aso o le puapuaga o Ierusalema, ma na mafai faapefea ona faasaoina ai ‘tagata’?
□ I le puapuaga tele ua toe o se aga, o le a faapefea ona faapuupuuina ona aso ma faasaoina ai ‘tagata’?
[Fesili mo le Suʻesuʻega]
[Ata i le itulau 16]
O tupe siliva a Iutaia na faia ina ua uma le fouvalega. O le faaupuga Eperu “Tausaga lua,” o lona uiga o le 67 T.A., le tausaga lona lua o le latou tutoatasi
[Ē Ana le Ata]
Pictorial Archive (Near Eastern History) Est.
[Ata i le itulau 17]
O le tupe siliva a Roma na faia i le 71 T.A. O le itu tauagavale o loo iai le fitafita Roma faaauupegaina; i le itu taumatau o se tamaitai Iutaia o loo faavauvau. O upu “IVDAEA CAPTA” o lona uiga o “Iutaia ua Faapagotaina”
[Ē Ana le Ata]
Pictorial Archive (Near Eastern History) Est.