Se Asiasiga i le Nuu o le Folafolaga
Se Asiasiga i le Nuu o le Folafolaga
SEʻI faapea ua taʻu atu e se uo ia te oe ua uma ona ia faatauina mo oe—e fai ma meaalofa—se fale fou lava i ni siomaga matagofie ma toafilemu. Atonu o le a e tau mānatu, ‘E faapeī foliga o le fale?’ E lē taumatea o le a e naunau e fia vaai oe lava ia i ai, e te savali ai i totonu ma siaki potu taitasi. Ae maise ai, o le fale lea o le a avea ma ou nofoaga fou!
I le 1473 T.L.M., na foaiina atu ai e Ieova i le nuu anamua o Isaraelu se nofoaga fou—le Nuu o le Folafolaga, o se laufanua e tusa ma le 300 maila [500 kilomita] le umi mai mātū agaʻi i saute, ae 35 maila [55 kilomita] le lautele i se fua faatatau. * E tu i le vaipanoa sa taʻua o le Eleele Tamaoaiga, lea sa avea ai le Nuu o le Folafolaga ma nofoaga matagofie tele e soifua ai, ma faatamaoaigaina i mea o loo maua ai.
Ae aisea o le a e naunau ai i aso nei i se “nofoaga” lea na tuuina atu i se isi tagata, ae maise lava o se tasi na soifua i aso ua mavae? Auā o le iloa lelei o lenei nuu o talafaasolopito, e mafai ona faateleina ai lou talisapaia o faamatalaga a le Tusi Paia. Na tusia e se polofesa ua maliu o Yohanan Aharoni e faapea: “I le nuu o le Tusi Paia, ua matuā milosia faatasi laufanua ma talafaasolopito ua lē mafai ai ona malamalama i le tasi seʻi vaganā ua fesoasoani mai le isi.” E lē gata i lea, o lona tulaga sologa lelei ua saunia ai e le Nuu o le Folafolaga se fua itiiti o se faaaoaoga o le tulaga o le Parataiso i le pulega o le Malo a le Atua lea ua lē pine ona aumaia lea mo tagata i le lalolagi aoao!—Isaia 11:9.
I le faagasologa o lana faiva faalelalolagi, sa faaaogā ai e Iesu Keriso vaaiga masani i le Nuu o le Folafolaga e aʻoaʻo atu ai ni lesona aogā. (Mataio 13:24-32; 25:31-46; Luka 13:6-9) E mafai foi e i tatou ona aʻoaʻoina mai ai le tele o mea i se auala aogā mai le iloiloina o ni vaega patino o Palesitina anamua. Seʻi o tatou savalivali atu i nisi o ona vaipanoa, ma asiasia nisi o nofoaga mataina o lenei nuu na avea ma aiga o tagata o le Atua mo le tele o senituri. O le a tatou iloa ai, e anoanoai mea e mafai ona tatou aʻoaʻoina mai le Nuu o le Folafolaga.
[Faaopoopoga i lalo]
^ pala. 3 O le faaaogaina o le taʻu “Nuu o le Folafolaga” i nei mataupu, o loo tagai ai i tulaga e tusa ma aso anamua, e pei ona folasia i le Tusi Paia, ma e lē o aafia ai faiga faapolotiki ma faalotu e pei ona iai i lea nofoaga i ona po nei.
[Ē Ana le Ata i le itulau 2]
Cover: Pictorial Archive (Near Eastern History) Est.
[Ē Ana le Ata i le itulau 3]
Garo Naibandian