Se “Faupuega o Molimau” i le Atunuu o le “Mauga o le Atua”

A E VAAI i se faafanua o le konetineta ma e mulimuli faasolo i le talafatai o Aferika i Sisifo ma agaʻi atu ai i sasaʻe i le Fagaloa o Guinea, i le tulaga tonu lava e piʻo ai le talafatai agaʻi i saute, o le a e maua ai Cameroon. Afai e faaauau lau vaai agaʻi i saute o le talafatai, o le a e oo atu ai i se ogasami matuā telē o matafaga o le oneone uliuli. O le oneone uliuli na tafia mai e le mauga mu o Mount Cameroon.

O lenei tumutumu mauga e matuā maualuga ma e tusaʻo, e 13,353 futu [4,070 mita], e matuā maluia ai lena vaipanoa atoa. Pe a suluia e ave malamalama o le la goto auvae mauga o Mount Cameroon, e aumaia ai se vaaiga e maofa ai o lanu malolosi—o le lanu viole vaivai, lanu moli, lanu auro, ma le lanu mūmū. E atagia mai i le sami ma vailepa e latalata ane nei lanu uma e pei o se fāʻata, e toetoe lava a lē mafai ona iloa ai le eseesega o le lagi ma le laueleele. Ua malamalama nei la i le mafuaaga ua faaigoaina ai e ituaiga o tagata o le atunuu ia e talitonu e iai le ola i mea uma lava, le mauga, o Mongo Ma Loba, lea ua faaliliuina o le “Kariota o atua,” po o le taʻu ua sili ona lauiloa o le “Mauga o le Atua.”

I le agaʻi atili atu i saute, o loo taatia ai le faitau maila o matafaga lauoneone papaʻe, e laina ai atu niu. E ese ai mai le talafatai matagofie, e ufitia ai le tele o le atunuu i se vaomatua o le ekueta e taatia ai e oo atu i le tuaoi o le Congo ma le Malo o Aferika Tutotonu ma agaʻi atu ai i le itu i mātū i Nigeria ma le itu i saute o Sahara o Chad. E maugā le itu i sisifo o le atunuu, e faamanatu atu ai i le tagata faimalaga vaega o Europa. Ae peitai, o le vevela o le tau, o le a lē galo ai ia te oe o loo e latalata i le ekueta. O foliga eseese o laufanua o le atunuu ua faamatalaina ai e le toatele o tagata e tautuaina tagata tafafao maimoa i Cameroon e faapea, o se ata laitiiti lea o le konetineta o Aferika. Ua faamalosia atili lenei lagona e le tele o vaega o tagata o atunuu eseese o loo iai, faapea ma le sili atu i le 220 gagana eseese.

Afai la e te asiasi i Cameroon, atonu o le a e nofo i se tasi o faletalimalo tetele i le aai tulata i le uafu o Douala, po o le aai laumua, o Yaoundé. Ae e ono e misia ai le avanoa e te iloaina ai se mea e uiga i olaga o tagata, ae maise lava le sili atu i le 24,000 Molimau a Ieova, o ē o loo pisi i le atiaʻeina o le “faupuega o molimau” i lenei atunuu atoa o le “Mauga o le Atua.” * Aisea e te lē malaga atu ai e asiasi i le isi itu o le atunuu e faafeiloai ia i latou? O lou suesueina o lenei atunuu o Aferika i Sisifo, e mautinoa o le a matuā tauia.

Malaga i le Paopao, Tamai Pasi, po o le Uila Vili Vae?

I le mulivai o le vaitafe aupito umī i Cameroon o le Sanaga, e tafe atu ai i le sami, ua tupu aʻe ai iina se fanua laugatasi maualalo lafulemu o le eleele pala. Ina ia oo atu i tagata uma o loo aināina lenei laufanua tele, e masani lava ona faimalaga ai Molimau a Ieova i paopao e ta i laau. O le mea lena e faia e tagata talaʻi e toaiva o le Malo o se vaega toaitiiti i Mbiako. O le toalua o i latou, e nonofo i le nuu e 16 maila [25 kilomita] le mamao, e igoa ia Yoyo. Ina ia la taunuu i Mbiako, e manaomia ona la malolosi e taualo le paopao, ma e auai pea lava i laua i sauniga faa-Kerisiano. A o asiasi atu i lenei vaega, na manatu ai le ovasia faimalaga e faaali le  vitiō, Jehovah’s Witnesses—The Organization Behind the Name. Ae e tusa ai o lenei mea, e faigata ona faataunuuina. I se nuu maotua faapenei, o fea o le a maua ai se masini vitiō (VCR), se televise, faapea ma se eletise e faaali ai le ata?

I le vaiaso o le asiasiga, na asiasi atu ai ni tagata talaʻi i le faifeau o se lotu i le nuu. Na ofo i laua ina ua talileleia ma le māfana i laua e le faifeau, ma faia ai se talanoaga fiafia faale-Tusi Paia ma ia. I le mātauina e lē gata ina iai se masini VCR, ae e iai foi se afi eletise a le faifeau, sa maua e uso le lototele e talosaga atu ai pe mafai ona latou faaaogaina lana masini. I le olioli tele i le talanoaga i le taimi muamua, na malie ai le faifeau e fesoasoani atu. I le po o le Aso Toonai e 102 tagata na ō atu i le faaaliga o le ata, e aofia ai ma le faifeau faapea le toatele o lana aulotu. Na aumaia foi e Molimau e toalua mai Yoyo se vaega tele o tagata loto fiafia i ni paopao se lua. Sa lē manatu mamafa i laua i le taualoga o vaa faasaga i le āu o le tai fanaʻe. Ina ua uma ona maimoaina le vitiō, sa matuā uunaia ai ma faamalosiauina ai i latou, ma sa mitamita i latou ona ua avea o se vaega o se faalapotopotoga maoaʻe ua faapea ona iai, o lona sini o le faamamaluina o Ieova.

Ina ia oo atu i mea e lē ausia e paopao, e mafai e se tasi ona oo atu i ai i se tamai pasi. E pisi pea lava nofoaga e faatali ai nei tamai pasi mo pasese. E oo ai lava ina matuā feleilogai ia te oe le ʻau faatau vai mālūlū, le ʻau faatau faʻi, ma tama e laʻuina uta a pasi. O le galuega a tama e laʻuina uta a pasi, o le ave o pasese i totonu o pasi o loo faatali, ma ua latou faapea mai, “ua sauni e ō.” Ae peitai, o le upu “sauni” e lē o le sauni i le taimi tonu. E faatali tagata faimalaga mo ni itula, i nisi taimi e faatali ai mo ni aso ona faatoʻā faimalaga lea. O le taimi lava e matuā patutuʻi ai le pasi, ma uma ona teu e le avetaavale ia ato paʻu, taga o fua o faatoaga, ma i nisi taimi e oo lava i moa ola ma ʻoti, e faaee i luga o le fale o le pasi, ona alu ese atu loa lea i le auala omoomo, ma le pefua i le togavao.

O se tasi faifeau talaʻi na fiu i lenei ituaiga o femalagaaiga, na filifilia ai loa lana lava auala e femalagaai ai. Ua ia faia nei ana femalagaaiga uma lava i se uila vili vae. Fai mai a ia: “Talu mai lava ona ou filifili ou te faimalaga mai lea faapotopotoga i lea faapotopotoga i le uila vilivae, ou te taunuu pea lava i le taimi tonu mo le asiasiga. E moni, e faaalu ai ni nai itula i le malaga, ae o le mea sili, ou te lē o faaaluina se aso se tasi po o se lua e faatali ai mo le tamai pasi. I le vaitau o timuga, e toetoe lava tafia uma nisi o auala ona o lologa. E manaomia ona ave ese ou seevae pe a asā nei ogapalapala ma vai. I se tasi aso, na paʻū ai se tasi o oʻu seevae i le vaitafe ma e lei toe maua seia mavae ni nai vaiaso mulimuli ane, ina ua faafuasei ona tau ane i ai le  afafine o se tasi Molimau a o fagota! Ua ou fiafia ina ua mafai ona toe faaaogā lenei pea seevae ona ua umi se taimi o i le vai le tasi seevae. I nisi taimi, ou te alu ai i vaipanoa e lei talaʻia muamua e Molimau a Ieova. E fesili mai pea tagata o le nuu ia te au po o ā mea ia ou te alu atu ma aʻu. O lea ou te tauaveina mekasini ma polosiua i taimi uma. I taimi taitasi ou te mālōlō ai, ou te ofoina ai nei lomiga faale-Tusi Paia ma fai atu se molimau puupuu. Ou te talitonu o le a faatupuina e Ieova nei fatu o le upu moni.”

I le Lotolotoi o le Togavao

E tauivi Molimau a Ieova e tufa atu le tala lelei o le Malo i isi e oo lava i le lotolotoi o Cameroon, i nuu e lē o iloa atu i totonu o le togavao. E manaomia ai i lenei mea se tauiviga fitā, ae o iuga, e faamafanafana loto.

O Marie, o se faifeau faataimi atoa, na amataina se suesuega faale-Tusi Paia ma se teine talavou e igoa ia Arlette. I le faaiuga o le uluai suesuega, na fesili ai Marie ia Arlette pe mafai ona la savavali faatasi i le fale, auā o le tū lea a lenei vaega o Aferika. Ae peitai, na faamatala atu e le teine talavou e faapea e faigata ona ia savali ona e tiga ona vae. Na afaina vae o Arlette i se ituaiga o utufiti e ʻati e ʻutu fafine le aano, ma fulafula ai. Na aveesea ma le lototele e Marie utufiti taitasi. Sa ia iloa foi mulimuli ane e faapea, i le po, e faapuapuagatia ai lenei teine talavou e temoni. Sa faamatala ma le onosai e Marie le auala e faatuatua atu ai se tasi ia Ieova, ae maise lava i le valaau leotele i lona suafa i le tatalo.—Faataoto 18:10.

Na vave lava ona agaigai i luma Arlette. I le taimi muamua, sa iloa ai e lona aiga le leai o se mea o faaletonu i le suesuega ona o le mataina o lona agaigai i luma i le itu faaletino ma le faalemafaufau. Ae ina ua latou iloa lona manao e fia avea o se tasi o Molimau a Ieova, sa latou faasaina o ia ina ia aua neʻi toe faia le suesuega. I le tolu vaiaso mulimuli ane, na iloa ai e le tinā o Arlette, pagā le matuā mafatia o lana tama, na toe faafesootai Marie ma talosaga atu ia te ia ina ia toe faaauau le suesuega.

Ina ua oo i le taimi e alu atu ai i se fonotaga matagaluega, na totogi ai e Marie se ave taavale o se taavale laʻu pasese e ave ai Arlette mo se malaga e lua aso i le fonotaga. Ae peitai, sa musu le ave taavale e alu i luga i le fale o Arlette, ona sa manatu e leaga le auala e alu i le fale o Arlette, e lē mafai ona uia. O lea, sa mafai ona aumai e Marie le teine i le auala tele. E mautinoa sa faamanuia e Ieova nei taumafaiga. I aso nei, ua auai Arlette i sauniga uma a le faapotopotoga. I le fesoasoani ia te ia e faia faapea, e alu atu ai ma le lē faavaivai Marie i lona fale e ave o ia. E la te savavali faatasi mo le 75 minute i malaga taitasi. Talu ai o le sauniga i le Aso Sa e amata i le 8:30 i le taeao, e tuua ai e Marie lona aiga i  le 6:30; ae e mafai lava ona la taunuu i le taimi tonu. Ua faamoemoe Arlette e lē o toe umi se taimi ona faatinoina lea o lona tuuina atu i le papatisoga i le vai. Ua taʻua e Marie e faapea: “So o se tasi e lei vaai muamua ia te ia ina ua faatoʻā amata ona suesue, e lē mafai ona iloa le tele o le suiga ua ia faia. Ou te matuā faafetai ia Ieova i le auala ua ia faamanuiaina ai o ia.” O le mea moni, o Marie o se faaaoaoga lelei o le alofa faataulagaina totino.

I Mātū Mamao i le Pito i Luga

I Cameroon i Mātū, e tumu i mea eseese ma mea e faateʻia ai. I le taimi o timuga, e liua ai le laufanua i se faatoaga telē lauusiusi. Ae a oo ina susulu mai le la vevela, e magumagu le mutia. I le aoauli pe a oo ina tutonu le la, ma ua lē mafai ai ona maua se paolo, e faaofiofi ai mamoe i talane o le puipui o fale e faia i le eleele mūmū. E faatasi ma le oneone ma vao mamago, e na o le pau lava le vao lanumeamata e tuputupu mai ai, o nai lau o laau o le baobab. E ui lava o nei laau e lē tetelē e pei o isi laau o lo latou ituaiga i vaomatua o le ekueta, ae e matuā malolosi lava e tatali nei tulaga. O lo latou mafai ona tumau i siomaga faigata, ua fai ma faataitaiga lelei o le maelega ma le loto tetele o Molimau toaitiiti o ē na ō atu e mau i lena vaega ina ia mafai ai ona faasusulu atu le malamalama o le upu moni.

O nisi o faapotopotoga i lenei vaipanoa, e matuā vavamamao pe tusa ma le 300 i le 500 maila [500 i le 800 kilomita], ma e lagona moni ai e pei ua tuua toatasi. Ae e matuā anoanoai tagata loto fiafia o loo iai. Ua siitia mai iinei Molimau mai isi vaipanoa ina ia fesoasoani mai. Ina ia uigā i le faiva, e manaomia ona latou aʻoaʻoina le faa-Foufouldé, o se gagana masani a le atunuu.

Na filifili se Molimau mai Garoua e talaʻi mo ni nai aso i lona nuu moni, e tusa ma le 100 maila [160 kilomita] le mamao. Sa ia maua ni tagata fiafia, ae ona o le taugata o pasese, na lē mafai ai ona ia toe foi atu e lē aunoa. I ni nai vaiaso mulimuli ane, na maua ai e le Molimau se tusi mai se tasi o tagata loto fiafia e aioi atu ia te ia ina ia sau e toe asiasi mai ia i latou. Ona o le leai pea o se tupe mo lona pasese, sa lē mafai ai e le Molimau ona alu. Seʻi manatunatu i le ofo tele o le Molimau ina ua alu atu se tagata i lona aiga i Garoua e faailoa atu ia te ia e faapea, e toasefulu tagata i le nuu sa faatali mai mo lana asiasiga!

I le isi nuu, e latalata i le tuaoi ma Chad, ua faamaopoopoina ai e se vaega o tagata loto fiafia e toʻa limasefulu la latou lava suesuega faale-Tusi Paia. Na latou fuafuaina mo le toatolu o i latou e auai i sauniga i le faapotopotoga i Chad e lata ane. Pe a foi atu, ona faia lea e i latou nei suesuega faale-Tusi Paia ma le vaega atoa. O le mea moni, ua matuā tatau lelei ai lava iinei upu a Iesu e faapea: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”—Mataio 9:37, 38.

Molimau Atu i Totonu o Aai

Ina ua mavae le tele o tausaga o leai ni lomiga, ae i le lua tausaga ua mavae, na oo ai ina saʻoloto le aumaia o mekasini o Le Olomatamata ma le Ala Mai! i Cameroon. Sa tele le naunau ma le fiafia mo nei mekasini ona o le toatele  o tagata, o le uluai taimi lea ua latou faitau ai i ai. O se ulugalii paeonia talavou na tofia i se tasi o aai, na la tufaina atu le 86 mekasini i la la uluai talaʻiga i le taeao i la oganuu fou. O nisi tagata talaʻi e latou te tufaina atu le 250 mekasini i le masina e tasi! O le ā le mafuaaga mo lo latou taulau manuia? O le ofoina o mekasini i tagata uma lava.

O se Molimau e galue i se ofisa e tatala mo le lautele, e masani ona ia tuuina mekasini i se mea e iloa uma ai e tagata. O se tasi fafine sa na ona vaavaai i mekasini ae lei aveina se kopi. Na iloa e le Molimau lona naunau ma ofo i ai se kopi lea na ia talia. Sa faateʻia o ia ina ua vaai atu i le aso na sosoo ai, ua toe sau le fafine. Sa lē gata ina manao o ia e fai se foai tauofo mo le mekasini na ia ave, ae na ia talosaga foi mo nisi mekasini. Aisea? Ona sa tosoina faamalosi o ia, na ia filifilia ai le mekasini e uiga i lena mataupu. Sa ia faaaluina le po atoa e faitau ai ma toe faitau le fautuaga na tuuina mai. I le mauaina o se mapusaga, sa ia fia iloa atili ai e uiga i Molimau a Ieova.

E oo lava i tamaiti laiti e mafai ona faia ni sao i le faasalalauina atu o le feau a le Tusi Paia e uiga i le faamoemoe. Ina ua faatonuina se teine Molimau e ono tausaga le matua e lona faiaʻoga ina ia usuina se pese lotu a le Katoliko, sa teena e ia i lona faapea atu, o ia o se tasi o Molimau a Ieova. Ona fai atu lea i ai o le faiaʻoga e usu se pese a lana lava lotu ina ia mafai ai ona ia tuuina atu ni togi mo ia. Sa ia filifilia le pese o lona matua e faapea “Le Folafolaga a le Atua i le Parataiso” ma usu tauloto mai lona mafaufau. Sa fesiligia o ia e le faiaʻoga, i le faapea atu: “Na e taʻua i lau pese se parataiso. O fea o iai lena parataiso?” Na faamatala atu e le teine, o le fuafuaga a le Atua e faavaeina le Parataiso i le lalolagi, ua matuā lata mai lava. I le maofa i lana tali, na fesili atu ai le faiaʻoga i mātua o le teine mo le tusi sa ia suesueina. Sa manao o ia e tuuina atu ni togi ia te ia e ala i mea na ia aʻoaʻoina mai lenei tusi, nai lo o mea na aʻoaʻoina ai o ia i le taimi o lesona faalelotu. Na fautuaina e mātua le faiaʻoga e faapea, afai e manao o ia e tuuina atu ni togi saʻo ia te ia, e tatau ona muai faia sana suesuega. Ma na amata ai loa se suesuega faale-Tusi Paia ma ia.

Fuafuaina se Asiasiga?

I le tele o vaega o le lalolagi i aso nei, e lē o manatu mamafa ai tagata i le tala lelei o le Malo. Ua lē o le Atua, ua lē o le Tusi Paia e naunau i ai latou. Ua taofia isi ona o le mataʻu, ua matuā mumusu ai lava e tatala mai le faitotoa i se tagata ese e tuʻituʻi atu. O nei mea uma, o se luʻi moni i le faiva a Molimau a Ieova. Ae maeu se eseesega ma Cameroon!

O le talaʻi mai lea fale i lea fale o se mea e matuā faafiafiaina ai iinei. Nai lo le tuʻituʻi i le faitotoa, o le tū masani le valaau atu, “Kong, kong, kong.” Ona tali mai lea o se leo mai totonu, “O ai?” pe a uma lea, ona ma faailoa atu lea, o i maʻua o ni Molimau a Ieova. E masani lava ona faatonu e mātua a latou fanau ina ia aumai ni nofoa uumi ma tuu i lalo o le paolo o se laau, po o se mago. Ona faaalu loa lea o se taimi manaia e faamatala ai e uiga i le Malo o le Atua ma le mea o le a ia faia e aumaia ai le mapusaga i tulaga faanoanoa o tagata.

Mulimuli ane ina ua uma lea talanoaga, na faaalia ai e se tasi tamaitai ona faalogona i le faapea mai: “Ua ou faanoanoa lava e vaai atu, o le upu moni lea na ou sailia e lē o maua i le lotu lea na ou fanau mai ai ma ua oo ina ou loomatua lava o oʻu iai. Ou te faafetai ia Ieova ua ia faaalia ia te au le upu moni. Sa avea aʻu ma tiakono i laʻu lotu. E tasi le vaiaso e tuu ai le faatusa o le Taupou o Maria i fale o tiakono taitasi ina ia faailoa atu ai ia te ia o latou manaoga. A o aʻu, ou te talosaga pea ia Maria ina ia fesoasoani mai ia te au ina ia ou iloa le upu moni. O lea la ua faailoa mai e le Atua ia te au e faapea, o le upu moni, e lē o ia Maria. Ou te faafetai ai ia Ieova.”

O lea, afai e oo i se aso ae ua e lagona le manaomia ona mauaina o le olioli tele mai le talaʻiina o le tala lelei o le Malo o le Atua, aisea e te lē asiasi ai i lenei vaega o Aferika i Sisifo? E lē gata i le suesueina “o Aferika laitiiti” pe ala i se paopao, tamai pasi, po o se uila vili vae, ae o le a e saosaolaumea ai foi i le “faupuega o molimau” ua faavaeina i le laueleele o le “Mauga o le Atua.”

[Faaopoopoga i lalo]

[Ē Ana le Ata i le itulau 22]

Faafanua: Mountain High Maps® Copyright © 1995 Digital Wisdom, Inc.