Lipoti a Ē Faalauiloa le Malo

Fesoasoani mo Ē “Fia Inu” i Rusia

“AMUIA ē fia aai ma fia inu i le amiotonu; auā e maoona i latou,” o le fetalaiga lena a Iesu. (Mataio 5:6) Ua faataitaia mai e tala i mea na tutupu o loo mulimuli mai, le pogai ua fesoasoani ai Molimau a Ieova i le faamalieina o le toatele o ē o fia feinu faaleagaga o i Rusia, o iina lea na taofiofia ai le saʻolotoga faaletapuaiga mo le sili atu i le 70 tausaga.

▪ Mo le tele o tausaga, sa lei mafai ona maua tali i fesili tāua faale-Tusi Paia a se fafine e igoa ia Valenitina. Mo se faaaoaoga, na manatunatu o ia: ‘O ai na tatalo i ai Iesu?’ Na ia mafaufau faapea atonu na tatalo atu Iesu i se tasi e maualuga aʻe ia te ia ma sa fiailoa po o ai le suafa o Ia lenei.

Na asiasi atu o ia i le Lotu Orthodox i Rusia. Ae peitai, i lena lotu na te lei mauaina ai tali i ana fesili. Ona o le lē faamalieina, na alu ai o ia i le Lotu Porotesano ae e lei maua ai lava ni tali manino. I le lē iloaina po o fea a alu i ai, sa amata loa ona faitauina e Valenitina le Tusi Paia, ma taumafai e sueina tali mo ia lava—ae sa lē taulau. Na tatalo o ia mo se fesoasoani.

I se taimi mulimuli ane ai na tuʻituʻi atu Molimau a Ieova i lona faitotoa. Na latou faaali atu ia te ia mai le Tusi Paia o le suafa o le Atua, o Ieova. Ona faatoʻā iloa ai lea e ia lē na tatalo i ai Iesu! Na amata ona ia suesue e lē aunoa le Tusi Paia ma Molimau. E masani ona ia faitauina i le po atoa lomiga ua lomia e le Sosaiete o le Olo Matamata ma suʻe i mau o le Tusi Paia. E lei umi ae faapea mai Valenitina ua ia mauaina le upu moni. Na amata auai o ia i le galuega talaʻi i totonu o le tolu masina, ma i le lua masina mulimuli ane, na papatisoina ai. O ana sailiiliga ma tatalo mo le upu moni sa faamanuiaina.

▪Sa malaga atu se Molimau i se pasi e talaʻi i se nuu mamao ese. A o alu le faigamalaga na ia talanoa atu ai i se tamaitai talavou e uiga i folafolaga a le Tusi Paia, ae sa lei fiafia le tamaitai talavou. I le lua masina na mulimuli ane ai, na toe malaga ai le Molimau i le oganuu lava lea e tasi e fai ai sana lauga lautele. Ina ua uma le lauga na ia faalatalata atu i se tagata asiasi ma fesili atu ia te ia: “Na talanoa atu se tasi ia te oe e uiga i le tala lelei mai le Tusi Paia?” Na tali le tamaloa, “Ioe, o oe.” Na manatu le Molimau ua na o sana tala faaulaula. Ae na faamatala e le tamaloa e faapea i le lua masina talu ai, na ia faalogo ai a o faia le talanoaga a le Molimau ma se tamaitai talavou a o alu la latou faigamalaga. “Sa ou manao e iloa atili, ae na e alu ese mai le pasi, ma sa ou mafaufau ai ailoga a ou toe vaai i se Molimau a Ieova. Ae i loʻu fale faigaluega na ou fetaui ai i se tamaloa o lē o loo suesueina le Tusi Paia ma Molimau. Ma o lea la ua ou iai iinei!”

Na amata le suesuega faale-Tusi Paia a le tamaloa ma lana avā. Ina ua mavae sina taimi puupuu, na ia iloa ai o loo feteenai lana galuega ma mataupu silisili a le Tusi Paia. Ona o lona manao e tausia se loto fuatia ifo lelei i luma o le Atua, na suia ai lana galuega. I so o se avanoa, ua ia taʻu atu ai nei i isi e uiga i le Malo o le Atua. Ua agaigai foi i luma lana avā i lana suesuega faale-Tusi Paia.

Ua fiafia Molimau a Ieova o loo i oganuu tetele o Rusia e faia so latou sao i lo latou fai atu i tagata loto faamaoni uma lava e faapea: “‘Ina sau ia’”; o lē fia inu, ina sau ia, atoa ma lē manao i ai, ina ave fua ia le vai o le ola.”—Faaaliga 22:17.