Ola e Tusa ai ma le Tulafono a Keriso

“Ia outou fesui i a outou avega e ave, ma ia faapea ona outou faia le tulafono a Keriso.”—KALATIA 6:2.

1. Aisea e ono faapea atu ai o le tulafono a Keriso o se matuā uunaiga malosi mo le faia o mea lelei i aso nei?

I RWANDA, sa lamatia ai ola o Molimau a Ieova mai ituaiga o Hutu ma Tutsi ina ia puipuia e le tasi le isi mai le fasiotiga tagata tele e māfua i feteenaiga i le va o ituaiga, lea na matuā faatamaʻia ai talu ai nei lena atunuu. O Molimau a Ieova i Kobe, i Iapani, o ē na maliliu tagata o o latou aiga i se mafuie matautia sa matuā mafatia foi i latou. Peitai, na vave ona latou gaoioi e laveai isi tagata na afaina. Ioe, o faaaoaoga faamafanafanaloto mai itu eseese o le lalolagi ua faataitaia ai le aogā i aso nei o le tulafono a Keriso. O se matuā uunaiga malosi mo le faia o mea lelei.

2. Ua faapefea ona lē malamalama Kerisinetoma i le aano moni o le tulafono a Keriso, ma ua faapefea ona tatou faataunuuina lena tulafono?

² Ae i le taimi lava e tasi, ua faataunuuina ai se valoaga a le Tusi Paia e faatatau i nei aso faigata o “aso e gata ai.” E toatele ua “peiseai ua amio Atua” ae ua latou ‘teena lona mana.’ (2 Timoteo 3:1-5, LT) Ae maise lava i Kerisinetoma, ua masani ai ona avea lotu o se gaoioiga e tau ina fai, ae lē o se gaoioiga e sau mai le loto. Pe o le tulaga ea lena ona ua faigata naʻuā le ola e tusa ai o le tulafono a Keriso? E leai. E lē tuuina mai e Iesu ia i tatou se tulafono e lē mafai ona usitaia. Ua lē o malamalama Kerisinetoma i le aano moni o lena tulafono. Ua lē taulau ona latou utagia nei upu faagaeeina: “Ia outou fesui i a outou avega e ave, ma ia faapea ona outou faia le tulafono a Keriso.” (Kalatia 6:2) Tatou te “faia le tulafono a Keriso” e ala i le tauaveina o avega a isi, ae lē o le faataitai i le ʻau Faresaio ma faaopoopo atili atu ma le lē tonu i avega a o tatou uso.

3. (a) O ā nisi o poloaiga e aofia ai i le tulafono a Keriso? (e) Aisea o le a sese ai pe a iai se manatu faapea e lē tatau i le faapotopotoga Kerisiano ona iai nisi a latou faatonuga e ese mai poloaiga tuusaʻo a Keriso?

³ O le tulafono a Keriso e aofia ai poloaiga uma a Keriso Iesu—pe o ni poloaiga e aofia ai le talaʻi ma le aʻoaʻo atu, le mamā ma le  faafaigofieina o le vaai, le taumafai e tausia le filemu ma o tatou tuaoi, po o le aveesea o ni mea lē mamā mai le faapotopotoga. (Mataio 5:27-30; 18:15-17; 28:19, 20; Faaaliga 2:14-16) Ioe, ua iai i Kerisiano le avega tauave ina ia usitaia poloaiga uma o loo i le Tusi Paia na e faasino saʻo mai i soo o Keriso. Ma e iai ma nisi mea. E tatau i le faalapotopotoga a Ieova, faapea ma faapotopotoga taitasi, ona faavaeina ni faatonuga ma ni taualumaga talafeagai ina ia mafai ai ona faatumauina se maopoopoga lelei. (1 Korinito 14:33, 40) Ioe, na semanū e lē mafai e Kerisiano ona feiloai faatasi pe ana fai e leai ni a latou faatonuga i le pe o afea, o fea, ma e faapefea ona faia na sauniga! (Eperu 10:24, 25) O le felagolagomai ma taʻiala talafeagai ua faataatitia e i latou o loo iai i le tulaga pule i le faalapotopotoga o se vaega foi o le faataunuuina o le tulafono a Keriso.—Eperu 13:17.

4. O le ā le malosi o loo uunaia ai le tapuaiga mamā?

⁴ Ae ui i lea, e lē faatagaina e Kerisiano moni la latou tapuaiga e avea o se faiga tau tulafono e leai se uiga. Latou te lē o tau ina auauna atu ia Ieova ona ua faatonuina i latou e se faalapotopotoga po o se isi ia faia faapea. Nai lo lea, ua avea le alofa ma malosi o loo uunaia ai la latou tapuaiga. Na tusi mai Paulo: “Ua pulunaunauina i matou i le alofa o Keriso.” (2 Korinito 5:14) Na poloaia e Iesu ona soo ina ia latou fealofani. (Ioane 15:12, 13) O le alofa faataulagaina totino o le faavae lea o le tulafono a Keriso, ma e pulunaunauina pe uunaia ai Kerisiano moni i so o se mea lava, i le aiga ma i le faapotopotoga. Seʻi o tatou tilofaia pe faapefea.

I le Aiga

5. (a) E mafai faapefea e mātua ona faataunuuina le tulafono a Keriso i le aiga? (e) O le ā le mea o loo manaomia e le fanau mai o latou mātua, ma o ā toʻatugā e ao i mātua ona foia ina ia mafai ai ona latou avatu lena mea?

⁵ Na tusi mai le aposetolo o Paulo: “O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai o ia e ia e fai mona sui.” (Efeso 5:25) Pe a faataitai se tane ia Keriso ma tausia ai lana avā i le alofa ma i se uiga malamalama, na te faataunuuina ai se vala tāua o le tulafono a Keriso. E lē gata i lea, na faaalialia atu i le lautele e Iesu ona lagona alofa mo le fanau laiti, e ala i le sii aʻe o i latou i ona aao, tuu atu ona aao i o latou ulu, ma faamanuia atu ia i latou. (Mareko 10:16) O mātua e faataunuuina le tulafono a Keriso latou te faaalia foi lagona alofa mo a latou fanau. E moni, e iai mātua ua avea o se luʻi ia i latou le faataitai atu i le faaaoaoga a Iesu i lenei itu. O nisi e lē masani e faaaliali atu i le lautele na uiga. Mātua e, aua le avea na manatu e taofia ai outou mai le faaali atu i a outou fanau le alofa lena o loo tou lagonaina mo i latou! E lē lava le na o lo outou iloa faapea e tou te alolofa i a outou fanau. E tatau foi ona latou iloa lena mea. Ma o le a latou lē iloaina seʻi vaganā ua tou saunia ni auala e faaali atu ai lo outou alofa.—Faatusatusa i le Mareko 1:11.

6. (a) Pe manaomia ea e le fanau ni faatonuga mai mātua, ma aisea ua e tali mai ai faapena? (e) O le ā le pogai mo le faia o faatonuga mo le auaiga e manaomia ona malamalama i ai le fanau? (i) O ā lamatiaga e alofia pe a olaola le tulafono a Keriso i se auaiga?

⁶ Ae i le taimi lava e tasi, e manaomia e le fanau ni taʻiala, o lona uiga e manaomia e o latou mātua ona faataatitia ni faatonuga ma i nisi taimi ia faamalosia na faatonuga e ala i aoaiga. (Eperu 12:7, 9, 11) E tusa lava foi po o le tulaga lena, ae tatau lava ona fesoasoani atu pea i le fanau ina ia latou iloa le pogai ua māfua ai ona fai nei faatonuga: e alolofa o latou mātua ia i latou. Ma e tatau ona latou iloa o lena alofa o le mafuaaga sili ona lelei lea mo i latou e usiusitai ai i o latou mātua. (Efeso 6:1; Kolose 3:20; 1 Ioane 5:3) O le sini o se matua malamalama ia aʻoaʻoina le fanau laiti e faaaogā o latou ‘tomai e mafaufau ai’ ina ia mafai mulimuli ane ona faia e i latou lava ni faaiuga lelei. (Roma 12:1; faatusatusa i le 1 Korinito 13:11.) I le isi itu, e lē tatau ona tetele naʻuā faatonuga pe mamafa naʻuā aoaiga. Ua faapea  mai Paulo: “O outou tamā, aua neʻi faaita i a outou fanau, ina neʻi faapalapala i latou.” (Kolose 3:21; Efeso 6:4) Pe a olaola le tulafono a Keriso i se auaiga, e leai la se mafuaaga o le a avatu ai ni aoaiga i se uiga ita lē pulea po o ni faaupuga faaitaita e faatiga ai. I se aiga faapena, e lagona ai e fanau le saogalemu ma le faalaeiauina, ae lē o le mafatia pe lotovaivai.—Faatusatusa i le Salamo 36:7.

7. I ā itu ua saunia ai e aiga Peteli se faaaoaoga pe a oo i le mataupu o le faataatitiaina o faatonuga mo se aiga?

⁷ O nisi o ē ua asiasi atu i aiga Peteli i le lalolagi aoao ua latou faapea mai o na aiga o ni faaaoaoga lelei o le paleni i mataupu tau i faatonuga mo se aiga. E ui e na o tagata matutua o loo iai, ae o na faatulagaga ua faatinoina e pei lava o ni aiga. * E tele lavelave o le faatulagaga i Peteli ma e manaomia ai le faia o ni faatonuga talafeagai—e mautinoa lava e sili atu nai lo faatonuga a se aiga masani. E ui i lea, o toeaina o loo taʻimua i aiga Peteli, i ofisa, ma le faagaoioiga o falegaosimea o loo latou taumafai e faatatauina le tulafono a Keriso. Latou te vaai i ai o so latou tofiga e lē i le na ona faamaopoopoina o le galuega ae ia faatuputeleina ai le agaigai i luma faaleagaga ma “le fiafia ia Ieova” o o latou uso galulue. (Neemia 8:10) O le mea lea, latou te taumafai ai e faia mea i se auala lelei ma le faalaeiauina ma tauivi ina ia latou magafagafa. (Efeso 4:31, 32) E lētioa ona lauiloa aiga Peteli i o latou uiga fiafia!

I le Faapotopotoga

8. (a) O le ā e tatau ona avea pea ma o tatou sini i le faapotopotoga? (e) I ā tulaga ua fesili atu ai nisi mo ni tulafono pe ua taumafai e faia ni tulafono?

⁸ O lo tatou sini foi lena i le faapotopotoga, ia atiina aʻe e le tasi le isi i le agaga o le alofa. (1 Tesalonia 5:11) E tatau ai la i Kerisiano uma ona faaeteete ina ia lē faamamafa atili atu i avega tauave a isi e ala i le tau faaofi atu o ni o latou lava manatu i mataupu o loo fitoitonu i filifiliga a le tagata lava ia. E iai taimi, ua tusi atu ai nisi i le Sosaiete o le Olo Matamata e fesili atu i ai mo ni faatonuga i mataupu e pei o le po o ā ni o latou manatu e tatau ona iai i nisi o ata tifaga, o ni tusi, e oo lava i ni meataalo. Peitai, ua lē o iai i le Sosaiete se pule e vaʻili uma ai na mea ma avatu ai ni faaiuga. I le tele o tulaga, o mataupu nei e tatau i tagata taitoatasi po o ulu o aiga ona faia i ai se faaiuga, e faavae aʻe i lona alofa mo mataupu silisili o le Tusi Paia. O isi ua mātele e suia fautuaga ma taʻiala a le Sosaiete ina ia avea ma tulafono. Mo se faaaoaoga, i le lomiga o Le Olomatamata o Mati 15, 1996, sa iai se mataupu matagofie o loo faalaeiauina ai toeaina ina ia faia ni asiasiga faaleoleo mamoe e lē aunoa i tagata o le faapotopotoga. Pe sa iai ea se fuafuaga ina ia faavae ai ni tulafono? E leai. E ui sa tele ni aogā na maua ai e i latou o ē na faaaogaina na fautuaga, ae ua lē o mafaia e nisi toeaina ona latou faia faapea. E faapena foi, i le mataupu o “Fesili Mai le Au Faitau” i le lomiga o Le Olomatamata o Aperila 1, 1995, na lapatai mai ai i le faaleagaina o le mamalu o le sauniga o le papatisoga e ala i le sasalu naʻuā, e pei o le faia o ni patī lē pulea po o le matuā faamaopoopoina o ni faatasiga tetele e sami ai. Ua matuā faamamafa lava e nisi lenei fautuaga paleni, ua oo ai ina faia se faatonuga e faapea o le auina atu o se tusi e faalaeiau ai i lenei laasaga o se measese!

9. Aisea e tāua ai lo tatou alofia o le soona faitio ma le faamasinosino atu o le tasi i le isi?

⁹ Seʻi manatu foi, pe afai e manaomia ona olaola ia i tatou “le tulafono o le saʻolotoga ua atoatoa ona lelei,” e tatau ona tatou talia ai e lē o loto fuatia ifo uma faa-Kerisiano e tutusa pau. (Iakopo 1:25) Pe tatau ea ona tatou soona lē malilie pe a faia e tagata a latou lava filifiliga e lē o solia ai ni mataupu silisili faale-Tusi Paia? E leai. O lo tatou faia faapena o le a fevaevaeai ai. (1 Korinito 1:10) Ina ua lapatai  mai Paulo ia i tatou e uiga i le faamasinosino atu i le isi uso Kerisiano, na ia faapea mai: “E tumau ia pe paū i lona lava alii; a e faatumauina lava ia, auā e mafaia e le Atua ona faatumau ia te ia.” (Roma 14:4) O le a tatou faatiga i le Atua pe afai tatou te tautatala faasagatau i le isi tagata e uiga i ni mataupu sa tatau ona tuu faitalia atu i le loto fuatia ifo o le tagata lava ia.—Iakopo 4:10-12.

10. O ai ua tofia e leoleoina le faapotopotoga, ma e tatau faapefea ona tatou lagolago atu ia i latou?

¹⁰ Seʻi o tatou manatua foi, ua tofia le ʻau toeaina ina ia leoleoina le lafu mamoe a le Atua. (Galuega 20:28) Ua latou iai iina ina ia fesoasoani mai. E tatau ona ia i tatou le lagona saʻoloto e faalatalata atu ia i latou mo se fautuaga, auā o i latou o ni tagata aʻoga o le Tusi Paia ma o loo masani foi i mea sa talanoaina i lomiga a le Sosaiete o le Olo Matamata. Pe a vaaia e toeaina ni amioga o le a ono taitaia atu ai i le solia o mataupu silisili o le Tusi Paia, latou te lē fefefe e avatu ni fautuaga manaomia. (Kalatia 6:1) Ua usitaia e tagata o le faapotopotoga le tulafono a Keriso e ala i lo latou felagolagomai ma nei leoleo mamoe pele, o ē o loo taʻimua ia i latou.—Eperu 13:7.

E Faatatauina e Toeaina le Tulafono a Keriso

11. Ua faapefea ona faatatauina e toeaina le tulafono a Keriso i le faapotopotoga?

¹¹ E naunautai toeaina ina ia faataunuu le tulafono a Keriso i le faapotopotoga. Latou te taʻimua i le talaʻia o le tala lelei, le aʻoaʻo atu mai le Tusi Paia ina ia pāʻia ai loto, ma ona o ni leoleo mamoe e alolofa ma faapelepele, latou te tāutala faamafanafana atu ai i “e loto iti.” (1 Tesalonia 5:14) Latou te alofia uiga lē faa-Kerisiano na ua iai i le tele o lotu a Kerisinetoma. E moni, ua matuā vave le goto ifo o tulaga masani o lenei lalolagi, ma i le pei o Paulo, atonu e lagona e toeaina le popole i le lafu mamoe; peitai latou te tausisia pea le uiga paleni lelei a o gaoioi e tusa ai ma na popolega.—2 Korinito 11:28.

12. Pe a faalatalata atu se Kerisiano i se toeaina mo se fesoasoani, o le a mafai faapefea ona tali mai i ai le toeaina?

¹² Mo se faaaoaoga, atonu e fia talanoa atu se Kerisiano i se toeaina e faatatau i se mataupu tāua e lē o talanoaina maʻoti i le Tusi Paia pe o ni mea e manaomia ai ona faapaleniina ni mataupu silisili eseese faa-Kerisiano. Atonu pe ua ofoina atu ia te ia le siitia o lona tulaga i le galuega e na te maua ai se totogi tele ae tele ai ma ona tiute tauave. Pe atonu ua faia e se tamā lē talitonu o se talavou Kerisiano ni faatonuga i lona atalii e ono aafia ai lana faiva. I na tulaga e faaeteete ai le toeaina ina ia taumamao mai lona avatuina o ni ona lava manatu. Nai lo lea, atonu o le a ia suʻe i le Tusi Paia ma fesoasoani i le tagata ina ia fefulifulisai i ni mataupu silisili o loo talafeagai. E mafai ona ia faaaogā le Watch Tower Publications Index, pe afai o maua, ina ia saili i ai po o ā fa a “le auauna faamaoni ma le mafaufau” e faatatau i lea mataupu i itulau o Le Olomatamata ma isi lomiga. (Mataio 24:45) Ae faapefea pe a uma ane ua fai e le Kerisiano se faaiuga e foliga e lē o atamai e tusa ai ma le manatu o le toeaina? Pe afai e lē o matuā solia e le faaiuga ni mataupu silisili po o ni tulafono a le Tusi Paia, o le a iloa ai e le Kerisiano le amanaia e le toeaina o le aiā a le tagata lava ia e faia ai lena faaiuga, i lona iloaina e “taitasi ma ave i lana lava avega.” Peitai ane, e tatau i le Kerisiano ona manatua, “o le mea e luluina e le tagata, o le mea lava lea e seleseleina mai ai e ia.”—Kalatia 6:5, 7.

13. Nai lo le avatu o ni tali tuusaʻo i ni fesili pe faaali o latou lava manatu, aisea e fesoasoani atu ai toeaina i isi ina ia fefulifulisai o latou manatu i mataupu?

¹³ Aisea ua gaoioi ai faapea le toeaina o lē ua iai le poto masani? Pe ā ma ni mafuaaga se lua. Muamua, na taʻu atu e Paulo i le faapotopotoga e faapea e lē o ia o ‘le pule i lo latou faatuatua.’ (2 Korinito 1:24) A o fesoasoani atu le toeaina i lona uso ina ia fefulifulisai i le Tusi Paia ma faia ai lana lava faaiuga atamai, ua faapena ona ia faataitaia ai le uiga sa ia Paulo.  Na te amanaia e iai tapulaa i lana pule, e pei lava o Iesu sa ia amanaia e iai tapulaa i lana pule. (Luka 12:13, 14; Iuta 9) Ae i le taimi lava e tasi, e nofo sauni toeaina e fesoasoani atu, e oo lava ina avatu ni fautuaga faale-Tusi Paia e tuusaʻo ma malolosi pe afai ua manaomia. Lona lua, o loo ia toleniina lona uso Kerisiano. Na faapea mai le aposetolo o Paulo: “O mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) O lea, ina ia taʻumatuaina, e tatau ona faaaogā o tatou tomai e mafaufau ai, ae lē o le faalagolago atu lava i taimi uma i se tasi na te fai maia ni faaiuga mo i tatou. Pe a faasino atu e le toeaina i lona uso Kerisiano le auala e fefulifulisai ai i le Tusi Paia, ua faapena ona ia fesoasoani atu ai ia te ia ina ia agaigai i luma.

14. E mafai faapefea e i latou ua taʻumatuaina ona faaalia lo latou faatuatua atu ia Ieova?

¹⁴ E mafai ona tatou faatuatua o le a uunaia e Ieova le Atua, e ala i lona agaga paia, loto o ē tapuai moni atu ia te ia. O lea, ua faalaeiau ai Kerisiano taʻumatuaina i loto o o latou uso, i le aioi atu ia i latou, e pei ona sa faia e le aposetolo o Paulo. (2 Korinito 8:8; 10:1; Filemoni 8, 9) Sa iloa e Paulo e mātele atu i ē amioletonu, ae lē o ē amiotonu, sa latou manaomia ni tulafono auiliili ina ia tumau ai ona amioai ma le talafeagai. (1 Timoteo 1:9) Sa ia faaalia mai, e lē o ni uiga masalosalo pe lē talitonu, ae o ni uiga faatuatuaina i ona uso. Sa ia tusi atu i se tasi faapotopotoga: “Matou te faatuatua foi i le Alii ia te outou.” (2 Tesalonia 3:4) O le faatuatua, le faamaoni, ma le mautinoa o Paulo sa tele moni sona aogā i le uunaia ai o na Kerisiano. Ua iai foi i toeaina ma ovasia faimalaga i aso nei na lava sini. Maeu se faafouina ai i nei tane faatuatua, a o latou leoleoina ma le alofa le lafu mamoe a le Atua!—Isaia 32:1, 2; 1 Peteru 5:1-3.

Le Ola e Tusa ai ma le Tulafono a Keriso

15. O ā nisi o fesili e mafai ona tatou fesiligia ai i tatou lava ina ia iloa pe o tatou faatatauina le tulafono a Keriso i a tatou faiā ma o tatou uso?

¹⁵ E manaomia e i tatou uma ona iloilo ifo ia i tatou lava e lē aunoa ina ia iloa pe o tatou tausisia ma faasilisilia pea le tulafono a Keriso. (2 Korinito 13:5) O le mea moni, tatou te maua uma aogā pe a fesili ifo: ‘Pe o oʻu faalaeiau ea po o oʻu faitio? Pe o oʻu paleni ea pe ua ou soona faamamafa naʻuā? Pe o oʻu faaalia ea le manatunatu mo isi pe o oʻu faauliulitō  lava i aʻu aiā tatau?’ E lē taumafai se Kerisiano e taʻu atu i taimi uma laasaga e tatau pe lē tatau i lona uso ona faia i mataupu na e lē o matuā talanoaina patino mai i le Tusi Paia.—Roma 12:1; 1 Korinito 4:6.

16. E mafai faapefea ona tatou fesoasoani atu ia i latou o loo iai ni a latou vaaiga sese ia i latou lava, ma faataunuuina ai se vala tāua tele o le tulafono a Keriso?

¹⁶ I nei taimi faigata, e tāua ai mo i tatou ona sailia ni auala e faalaeiau ai le tasi i le isi. (Eperu 10:24, 25; faatusatusa i le Mataio 7:1-5.) Pe a tatou tagai atu i o tatou uso ma tuafāfine, pe lē sili ea ona tāua ia i tatou o latou uiga lelei nai lo o o latou vaivaiga? E tautele ia Ieova tagata taitoatasi uma. O se tulaga lē fiafia, ona e lē o le auala lena o loo lagona ai tagata uma, ua oo lava ina iai ni a latou vaaiga sese ia i latou lava. E toatele ua māfuli e mātau na o o latou masei ma o latou lē lelei atoatoa. Ina ia faalaeiau atu i na tagata—ma isi foi—pe mafai ea ona tatou taumafai e talanoa atu i se tagata e toatasi pe toalua i sauniga taitasi, ia la iloa le mafuaaga tatou te faatāuaina ai lo la auai mai ma le sao tāua o loo la faia i le faapotopotoga? Maeu se olioli i le faamāmāina o la la avega mamafa i lenei auala ma faataunuuina ai le tulafono a Keriso!—Kalatia 6:2.

O Loo Aogā Pea le Tulafono a Keriso!

17. I ā auala eseese o loo e vaaia ai le aogā pea o le tulafono a Keriso i la outou faapotopotoga?

¹⁷ O loo aogā pea le tulafono a Keriso i le faapotopotoga Kerisiano. Tatou te vaaia lea i aso taitasi—a o naunautai o tatou uso Molimau e tufa atu le tala lelei, a o latou faamafanafanaloto ma faalaeiau le tasi i le isi, a o latou tauivi e auauna atu ia Ieova e ui i faafitauli e sili ona faigata, a o taumafai malosi mātua e tausi aʻe a latou fanau ina ia alolofa ia Ieova mai o latou loto olioli, a o aʻoaʻo atu e ovasia le Afioga a le Atua i le alofa ma le māfana, i le uunaia o le lafu mamoe ina ia iai so latou maelega aasa e auauna atu ai e faavavau ia Ieova. (Mataio 28:19, 20; 1 Tesalonia 5:11, 14) Pe afai e faaaogā pea e i tatou taitoatasi le tulafono a Keriso i o latou lava olaga, maeu le faafiafiaina ai o le finagalo o Ieova! (Faataoto 23:15) E finagalo o ia ina ia ola e faavavau i latou uma o ē alolofa i lana tulafono lelei atoatoa. I le Parataiso o loo fotuai mai, o le a tatou vaaia ai se taimi o le a lelei atoatoa tagata, se taimi o le a aunoa ma ni tagata solitulafono, ma se taimi o le a pulea lelei ai faanaunauga uma o o tatou loto. Maeu se taui mamalu ona o le ola e tusa ai ma le tulafono a Keriso!

[Faaopoopoga i lalo]

O le ā Sou Manatu?

□ Aisea ua lē malamalama ai Kerisinetoma i le aano moni o le tulafono a Keriso?

□ E mafai faapefea ona tatou faatatau ina le tulafono a Keriso i le aiga?

□ Ina ia faatatauina le tulafono a Keriso i le faapotopotoga, o le ā e ao ona tatou alofia, ae o le ā e ao ona tatou faia?

□ E mafai faapefea ona usitaia e toeaina le tulafono a Keriso i a latou feutagaiga ma le faapotopotoga?

[Fesili mo le Suʻesuʻega]

[Ata i le itulau 23]

O loo manaomia tele e lau tamaitiiti le alofa

[Ata i le itulau 24]

Maeu se faafouina ai i o tatou leoleo mamoe alolofa!