Pe Fiafia le Atua i Lotu Uma?

Pe e te manatu ea e fiafia le Atua i lotu uma? Atonu o so o se ituaiga o tapuaiga o loo e silafia e faamalosia ai sina amio lelei. Ae pe ua lava ea lea e fiafia i ai le Atua?

UA FAAPEA mai nisi, ‘Ia tau lava o le toaga i lau lotu, ona faamalieina ai lea o le Atua. E lelei lotu uma.’ Mo se faaaoaoga, ua manatu le Faatuatuaga Bahai na te faaaogaina i ona talitonuga ia talitonuga a lotu autū e iva o le lalolagi. E talitonu lenei vaega faalotu e faapea o nei lotu uma e mai se amataga tauatua ma o tafa eseese ia o le upu moni e tasi. E mafai faapefea lenei mea?

E lē gata i lea, ua ia te oe le aiā e tomānatu ai i le auala e mafai ai e se lotu ona faamalieina le Atua pe afai na te faatonuina ona tagata e faasalalau le kasa oona i nofoaga faitele, ma le faamoemoe e faaumatia ai le toatele o tagata. O lena tuuaʻiga ua faasino atu i se tasi o vaega faalotu i Iapani. Pe e faamalieina ea le Atua i se lotu na te faapogaia ona sui ina ia pule i o latou ola? I nai tausaga ua mavae atu, na tupu ai lena mea i ē na mulimuli i se taʻitaʻi lotu e igoa ia Jim Jones.

Pe a toe tepa i tua i uluai taimi, atonu tatou te fesili ifo, Pe e mafai e lotu ona faamalieina le Atua pe afai o loo tausolomua i fetauaiga, e pei o le tulaga o le Taua i le Faagasologa o le Tolusefulu Tausaga, ia na tauina i le 1618 seia oo i le 1648? E tusa ai i le Universal History of the World, ua faapea mai o feteenaiga faalotu i le va o Katoliko ma Porotesano sa o se “tasi lea o taua na sili ona matautia i taua uma o le talafaasolopito i Europa.”

Sa iu foi Taua Paia faalotu na amata mai i le 11 i le 13 senituri i ni faamasaa toto matautia. Mo se faaaoaoga, i le uluai Taua Paia, o i latou o ē na faapea mai o tagatatau Kerisiano mo ia taua na latou matuā fasiotia tagata Musalimi ma tagata Iutaia o ē na aumau i Ierusalema.

Seʻi manatunatu foi, i le mea na tupu a o faagasolo le Faamasinoga  Faalotu, lea na amata i le senituri lona 13 ma faaiuina ai pe ā ma le 600 tausaga mulimuli ane ai. E faitau afe ē na faataugaina ma susunuina seia feoti ona o faatonutonuga a taʻitaʻi lotu. I lana tusi o le Vicars of Christ—The Dark Side of the Papacy, na taʻua ai e Peter De Rosa e faapea: “Ona o le pule mai le pope, na māfua ai mai i [le ʻau faamasino faalotu] se osofaiga ogaoga e sili ona leaga i aiā tatau i le talafaasolopito o ituaiga o [tagata] uma.” E tusa ai i le faamasinoga o faiga lotu o le Dominican Torquemada i Sepania, ua faapea mai De Rosa: “Na tofia i le 1483, ma sa pule o ia ma le sauā mo le sefululima tausaga. O i latou na maliliu fua i lalo o ona lima e silia ma le 114,000 ma e 10,220 i latou na susunuina.”

O le mea moni, e lē na o lotu a Kerisinetoma ua nofosala i le toto. I lana tusitusiga e taʻua o le Pensées, na mātauina e Blaise Pascal, o se faifilosofia Falani e faapea: “E lē tāitai ona matuā faia e tagata ni mea leaga i se auala atoatoa ma le fiafia e pei ona faia a o uunaia i latou e talitonuga faalotu.”

E Iloa i o Latou Fua

O se tapuaiga e taliaina i le silafaga a le Atua, e lē faavaea i se vala e tasi. Ina ia taliaina e ia se tapuaiga, e tatau ona ogatusa ana aʻoaʻoga ma gaoioiga i lana Afioga tusia le upu moni, le Tusi Paia. (Salamo 119:160; Ioane 17:17) O fua o le tapuaiga e faamaonia e le Atua e tatau ona ogatusa ma tapulaa a Ieova le Atua.

I lana Lauga i Luga o le Mauga, na faamatilatila ai e Iesu Keriso e faapea o le a iai perofeta pepelo o ē latou te faapea ane o i latou o sui o le Atua. Na fetalai Iesu e faapea: “Ia outou ma perofeta pepelo, o e o mai ia te outou i ofu faamamoe, a o totonu o luko feai lava i latou. Tou te iloa i latou i o latou fua. Pe tau mai ea e tagata se fuifui vine mai le laau tuitui, po o mati mai le laau talatala? E faapea foi laau lelei taitasi ma fua mai i fua lelei; a o le laau leaga e fua mai i fua leaga. E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei. O laau uma e le fua mai i fua lelei, e taia ia ma lafoina i le afi. O lea foi tou te iloa ai i latou i o latou fua.” (Mataio 7:15-20) O nei upu ua faaalia ai e faapea e manaomia ona tatou mataalia faaleagaga. Atonu e tatou te manatu faapea o se taʻitaʻi lotu po o se vaega faalotu e taliaina e le Atua ma Keriso, ae e ono faaseseina i tatou i lea manatu.

Se Manaoga Ina ia Faaeteete

E ui ina faapea mai se lotu ua maua le faamaoniga a le Atua ma o loo faitau mai e ana faifeau fuaitau o le Tusi Paia, ua lē faapea ai o sea ituaiga o tapuaiga ua faamalieina ai le Atua. Atonu e mafai e ona taʻitaʻi ona faatino ni mea ofoofogia e foliga mai ai o loo gaoioi le Atua e ala ia i latou. Ae ui i lea, e ono mafai ona sese le lotu, na te lē o fuaina mai fua e taliaina e le Atua. Sa mafai e faitaulaga faataulaitu i ona po o Mose ona faia mea e ofo ai, ae sa lei iai ia i latou le faamaoniga a le Atua.—Esoto 7:8-22.

 I aso nei e pei lava ona faia i aso ua mavae, e toatele lotu ua latou faamaualugaina manatu faaletagata ma filosofia nai lo le piiama atu i mea ua fetalai le Atua o upu moni. Ua sili ai ona talafeagai, le lapataiga a le Tusi Paia e faapea: “Ia outou, neʻi faapologaina outou e se tasi i le poto le aoga e faasese ai, e tusa ma le uputuu a tagata, e tusa ma aitu o le lagi ma le lalolagi, a e le tusa ma Keriso.”—Kolose 2:8.

Ina ua mavae le fetalai atu e uiga i fua lelei ma fua leaga, na faapea atu Iesu: “E le sao atu i le malo o le lagi i latou uma o e fai mai ia te au, Le Alii e, le Alii e; na o le na te faia le finagalo o loʻu Tamā o i le lagi. E toatele latou te fai mai ia te au i lea aso, Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te au, o outou o e fai amio leaga.”—Mataio 7:21-23.

Iloiloina o Fua

Ma le manino lava, e tāua tele le vaavaai i fua e fuaina e se tapuaiga a o lei manatu e faapea ua taliaina e le Atua. Mo se faataʻitaʻiga, pe o aafia lea tapuaiga i faiga faapolotiki? Ia mātau la upu nei, ua faamauina i le Iakopo 4:4 e faapea: “O sē fia uo ma le lalolagi, ua avea o ia ma ita i le Atua.” E lē gata i lea, na fetalai Iesu i ona soo moni e faapea: “E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:16) O le lotu e lelei i le silafaga a le Atua e lē aafia i faiga faapolotiki a lenei lalolagi, lea “o loo nofo toilalo i loo leaga,” le foafoaga agaga e lē vaaia o Satani le Tiapolo. (1 Ioane 5:19) Nai lo lea, o le lotu e faamaonia e le Atua e lagolago ma le alofa faamaoni i lona Malo e ala ia Iesu Keriso ma faalauiloaina le tala lelei e uiga i lena pulega faalelagi.—Mareko 13:10.

Pe e taliaina ea e le Atua se lotu pe afai na te fautuaina le lē usiusitai i malo? E manino le tali pe afai tatou te utagia le fautuaga a le aposetolo o Paulo e faapea: “Ia e faamanatu atu ia i latou ia latou usiusitai i alii sili ma faipule, ia gauai, ia nofo sauniuni foi i latou i galuega lelei uma lava.” (Tito 3:1) O le mea moni, na faaalia e Iesu i ona soo e faapea ia  “avatu ia o mea a Kaisara ia Kaisara; ia avatu foi mea a le Atua i le Atua.”—Mareko 12:17.

Seʻi faapea la ua faamalosia e se lotu le auai atu i taua a atunuu. I le 1 Peteru 3:11 ua uunaia ai i tatou “ia fai mea lelei” ma “ia saili i le filemu ma tausisi i ai.” E mafai faapefea e se lotu ona faamalieina le Atua pe afai o loo naunau ona sui e fasiotia isi o latou tagata lotu ia o loo tau mai le itu taua a le isi atunuu? O sui o le lotu e faamaonia e le Atua e atagia mai ai lona uiga sili—o le alofa. Na fetalai Iesu e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) E lē mafai e lena alofa ona faia sana vaega i faiga sauā feitagai ia e faia e taua a atunuu.

O le lotu moni na te suia tagata fetauai i ē alolofa i le filemu. Na valoia mai lenei mea i upu nei e faapea: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:4) Nai lo le soona lafo o upu ʻinoʻino, o ē latou te faatino le tapuaiga moni e usiusitai i le faatonuga e faapea: “E te alofa atu i lē lua te tuaoi, ia pei o oe lava ia te oe.”—Mataio 22:39.

O i latou o ē faatino le lotu moni e taumafai malosi e ola aʻe i tapulaa maualuluga a Ieova le Atua, i le teena o le faia o amioga lē mamā. Ua faapea mai le Afioga a le Atua: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso, i le Agaga foi o lo tatou Atua.”—1 Korinito 6:9-11.

Se Taimi mo Gaoioiga Mautinoa

E tāua tele le uta mamao i le eseesega o le tapuaiga sese ma le lotu moni. I le tusi o le Tusi Paia o le Faaaliga, ua faailogaina ai le emepaea o lotu sese o “Papelonia le Aai Tele,” o se fafine talitane faafaatusa “ua faitaaga ma ia o tupu o le lalolagi.” Ua nofosala o ia i le toto ma ua i lona lima se ipu auro “ua tumu i mea e inosia ma le leaga o lana faitaaga.” (Faaaliga 17:1-6) E leai se mea e uiga i lenei fafine e taliaina e le Atua.

O le taimi lenei mo gaoioiga mautinoa. Mo tagata loto faamaoni o loo iai pea i totonu o Papelonia le Aai Tele, ua tuuina mai e Lē na Foafoaina ma le alofa ia i tatou le valaau lenei e faapea: “Ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.”—Faaaliga 18:4.

Afai e te manao e faatino le lotu e faamalieina ai le Atua, aisea la e te lē faamasani lelei ai ma Molimau a Ieova? O le isi itulau o sosoo ai ua lisiina faasolosolo mai ai o latou talitonuga, faatasi ai ma mafuaaga faale-Tusi Paia mo nei manatu. Ia saili i lau Tusi Paia ma tagai i ai pe o ogatasi talitonuga o Molimau ma le Afioga a le Atua. Suesue ma sailiili i la latou tapuaiga po o fuaina mai ai fua o loo e faatalitalia mai le tapuaiga moni. Afai e te mauaina o loo faia faapea, o le a e mauaina ai le lotu e fiafia i ai le Atua.

 [Pusa i le itulau 5]

MEA O TALITONU I AI MOLIMAU A IEOVA

TALITONUGA FAAVAE FAALE-TUSI PAIA

O le suafa o le Atua o Ieova Esoto 6:3; Salamo 83:18

O le Tusi Paia o le Afioga a Ioane 17:17; 2 Timoteo 3:16, 17

le Atua

O Iesu Keriso o le Alo o le Atua Mataio 3:16, 17; Ioane 14:28

E lei tupuga mai le tagata i Kenese 1:27; 2:7

se manu ae na foafoaina

O le oti na māfua mai i le Roma 5:12

agasala a le uluai tagata

Pe a oti, e uma foi le solu Failauga 9:5, 10; Esekielu 18:4

O seoli o le tuugamau o tagata Iopu 14:13; Faaaliga 20:13

O le toetu o le faamoemoe mo ē Ioane 5:28, 29; 11:25;

ua maliliu Galuega 24:15

Na tuuina atu e Keriso lona Mataio 20:28; 1 Peteru 2:24;

soifua faalelalolagi e fai ma 1 Ioane 2:1, 2

togiola mo tagata usiusitai

O tatalo e tatau ona tuusaʻo tau Mataio 6:9; Ioane 14:6, 13, 14

lava o Ieova e ala atu ia Keriso

E ao lava ona usitaia tulafono a 1 Korinito 6:9,10

le Tusi Paia e faatatau i

amioga tatau

E lē tatau ona faaaogaina tupua Esoto 20:4-6; 1 Korinito 10:14

i tapuaiga

O faiga faaagaga e tatau ona Teuteronome 18:10-12;

alofia Kalatia 5:19-21

E lē tatau ona aveina se toto i Kenese 9:3, 4; Galuega 15:28,29

totonu o le tino o se tasi

O soo moni o Iesu e ao ona vavae Ioane 15:19; 17:16;

ese mai le lalolagi Iakopo 1:27; 4:4

O loo molimau Kerisiano, latou Isaia 43:10-12; Mataio 24:14;

te faalauiloaina le tala lelei 28:19, 20

O le papatisoga e ala i le Mareko 1:9,10; Ioane 3:22;

faatofuina atoatoa i le vai Galuega 19:4, 5

o le faailoga lea o le tuuina atu i le Atua

O faalupega faalotu e lē Iopu 32:21, 22; Mataio 23:8-12

faale-Tusi Paia

Ua tatou ola i “ona po o le Tanielu 12:4; Mataio 24:3-14;

iuga” 2 Timoteo 3:1-5

O le faatasi mai o Keriso e Mataio 24:3; Ioane 14:19;

lē vaaia 1 Peteru 3:18

O Satani o le pule lē vaaia o Ioane 12:31; 1 Ioane 5:19

lenei lalolagi

O le a faaumatia e le Atua lenei Tanielu 2:44; Faaaliga 16:14,16; 18:1-8

faiga amioleaga o mea

O le Malo o le Atua e ala ia Isaia 9:6, 7; Tanielu 7:13, 14;

Keriso o le aia pulea le Mataio 6:10

lalolagi i le amiotonu

O se “lafu mamoe itiiti” e pule Luka 12:32; Faaaliga 14:1-4; 20:4

faatasi ma Keriso i le lagi

O isi ua faamaonia e le Atua o Luka 23:43; Ioane 3:16;

le a latou mauainale ola e Faaaliga 21:1-4

faavavau i luga o le lalolagi

parataiso

[Ata i le itulau 4]

E faitau afe ē na fasiotia a o faagasolo le Faamasinoga Faalotu

[Ata i le itulau 6]

O Taua Paia Faalotu na iu i faamasaaga toto matautia

[Ata i le itulau 7]

E iloa le lotu moni i ona fua lelei

 [Ē Ana le Ata i le itulau 2]

Cover: Garo Nalbandian