Pe e Manaomia Moni Ona e Faatoese Atu?

‘E LĒ tāitai ona ou faatoese,’ o le tusi atu lena a George Bernard Shaw. Atonu e faapea mai nisi, ‘o le mea ua tupu e leai se vaifofo e toe mafai ona faia i ai.’

Atonu tatou te faatalatu i le taʻuina atu o se sese ona o le fefe ina neʻi lē toe faaaloalogia. Atonu tatou te manatu faapea o le faafitauli e māfua i le isi tagata. Pe atonu foi ua tatou fuafua e faatoese ae ua tolopoina seia oo lava ina ua tatou manatu ua galo le mataupu.

O lea la, pe e tāua le faia o ni faatoesega? Pe e mafai moni ona aogā?

O le Alofa e Uunaia ai i Tatou e Faatoese Atu

O le alofa faaleuso ua o se faailoga e mātaulia ai soo moni o Iesu Keriso. Na ia fetalai e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ua uunaia Kerisiano e le Tusi Paia ina “ia matuā fealofani ai outou ai le loto naunau.” (1 Peteru 1:22) O le alofa naunau e uunaia ai i tatou e faatoese atu. Aisea? Ona o le tino augavale o le tagata e faigata ai ona alofia le faatupuina o faalogona tiga lea e faapea ona aveesea ai le alofa pe a lē foiaina.

Mo se faaaoaoga, ona o feeseeseaiga totino ma se tasi i le faapotopotoga Kerisiano, atonu e sili ai ia i tatou ona lē toe talanoa ia te ia. Afai ua tatou faatupuina se mea e tautevateva ai, e mafai faapefea ona toe faafoisia se faiā māfana? I le tele lava o tulaga, e ala i se faatoesega ona faia lea o se taumafaiga e fetalanoaai i se tulaga māfana. O loo tatou aitalafu i o tatou uso talitonu i le alofa, ma pe a tatou fai atu ua tatou sese ona o le faatupuina o se mea ua tautevateva ai, ua tatou faamatuu atu ai se vaega o lena aitalafu.—Roma 13:8.

Ina ia faataitai: Sa umi tele le faigauo a ni tuafāfine Kerisiano se toalua o Mari Carmen ma Paqui. Ae peitai, ona ua talitonu ia Mari Carmen i nisi o tala taufaaleaga, na māfua ai ona lē toe māfana le la faigauo ma Paqui. E aunoa ma se faamatalaga, na ia matuā alofia lava Paqui. E toetoe atoa le tausaga mulimuli ane ai, na iloa ai e Mari Carmen e lē moni na tala taufaaleaga. O le ā la lana gaoioiga? O le alofa na uunaia ai o ia e alu atu ia Paqui ma faamatala atu ma le loto maulalo lona salamō ona o le lē lelei o lana amio na faaalia. Na matuā fetagisi i laua uma, ma atili faatumauina ai le la faigauo talu mai lena taimi.

E ui ina tatou manatu e tatou te lei faia se mea sese, ae o se faatoesega atonu e foia ai se feeseeseaiga. Na toe taʻu mai e Manuel e faapea: “I le tele o tausaga ua tuanai, sa ma nonofo ai ma laʻu avā i le fale o se tasi o ma tuafafine faaleagaga a o taofia o ia i le falemaʻi. Na ma faia taumafaiga uma e fesoasoani ai ia te ia ma lana fanau i le taimi o lona maʻi. Ae ina ua foi ane i lona fale, na faitio ai i sana uo e faapea e ma te lei vaavaaia faalelei le tulaga o tupe faaalu a lona aiga.

“Sa ma asiasi i ai ma faamatala atu faapea atonu ona o lo ma tulaga talavou ma le leai o se poto masani, ua lē lelei ai ona ma tausia mea uma e pei ona sa ia faia. Na vave lava lana tali mai i lona taʻua faapea, o ia o loo nofo aitalafu ia i maʻua ma ua ia loto faafetai moni i mea uma ua ma faia mo ia. Na foia le faafitauli. O lena mea na tupu ua aʻoaʻoina ai aʻu i le tāua o le talosagaina ma le loto maulalo o le faamagaloga pe a tulai mai feeseeseaiga.”

Na faamanuia e Ieova lenei ulugalii ona o le faaalia o le alofa ma ‘tausisi i le faatupuina o le filemu.’ (Roma 14:19) O le alofa e aofia ai foi  le nofouta i faalogona o isi. Ua fautua mai Peteru ia i tatou ia faaalia le “malamalama i faalogona o isi.” (1 Peteru 3:8, NW) Afai tatou te malamalama i faalogona o isi, atonu o le a vave ona iloa le tiga ua tatou faatupuina ona o se upu po o se gaoioiga lē lelei ua faia sa lei mafaufauina, ma o le a uunaia ai i tatou e faatoese atu.

“Ia Oofu Outou Uma Lava i le Loto Maulalo”

E oo lava i toeaina Kerisiano faamaoni, atonu e iai taimi e faia ai ni a latou feupuaiga aasa. (Faatusatusa i le Galuega 15:37-39.) O tulaga faapenei e aogā tele i ai se faatoesega. Ae o le ā e fesoasoani i se toeaina po o se isi lava Kerisiano o loo faafaigata ona ia faatoese atu?

O le loto maulalo o le ki lea. Na fautua mai le aposetolo o Peteru e faapea: “Ia oofu outou uma lava i le loto maulalo o le tasi i le tasi.” (1 Peteru 5:5) E ui lava ina moni le tuuaʻia o itu uma e lua i le tele o fefinauaiga, peitai o le Kerisiano e loto maulalo e manatunatu i ona lava vaivaiga ma e lotomalie e galue i ai.—Faataoto 6:1-5.

O lē e avatu i ai le faatoesega e tatau ona taliaina ma le uiga maulalo. E mo se faataitaiga, faapea la o ni tamaloloa se toalua o loo manaomia ona fesootai ma o loo tutū i tumutumu o ni mauga eseese se lua. E mautinoa le faigata ona faia se talanoaga i luga aʻe o le vanu o loo va aʻi i laua. Ae peitai, afai e alu ifo le tasi o i laua i lalo o le vanu ma faapena ona mulimuli ifo ai le isi i lana faaaoaoga, ona mafai lea ona faigofie le la talanoaga. I se uiga talitutusa, afai e manaomia e ni Kerisiano se toalua ona foia se feeseeseaiga i lo la va, ia taitasi ma faaalia le lotomaulalo, ma fefaatoeseai ai.—1 Peteru 5:6.

O Faatoesega e Tāua Tele i le Faaipoipoga

O le faaipoipoga a tagata lē lelei atoatoa se toalua e tulai mai ai avanoa lē maalofia e faatoese ai. Ma afai e iai i le avā ma le tane le malamalama i faalogona o isi, o le a uunaia ai i laua e faatoese atu ona o ni upu po o ni gaoioiga ua lē logoleleia. Ua faapupula mai e le Faataoto 12:18 e faapea: “O i ai lē soona tautala, e pei o tutuʻi i le pelu; a o laulaufaiva o e popoto e malolo ai.” O le “soona tautala” e lē mafai ona toe faafoiina, ae e mafai ona faaleleia e ala i se faatoesega ma le loto faamaoni. E moni, e manaomia ai e lenei tulaga le mataala ma taumafaiga faifai pea.

E tusa ai ma lana faaipoipoga, ua fai mai  Susana: * “Ua atoa nei le 24 tausaga talu ona ma faaipoipo ma Siaki, * ae o loo ma aʻoaʻoina pea mea fou e uiga ia i maʻua uma. E faanoanoa ai ona i se tasi taimi ua mavae, na ma teteʻa ai ma nonofo valavala mo ni nai vaiaso. Ae peitai, na ma utagia fautuaga a le Tusi Paia mai toeaina ma ma toe faatasia ai. Ua ma iloaina nei e faapea, talu ai e eseese tele o ma uiga totino, e faigofie tele ona tutupu aʻe feeseeseaiga. Pe a tupu lenei mea, e vave lava ona ma fefaatoeseai ma taumafai atili ia malamalama i manatu o le isi tagata. Ou te fiafia e faapea atu ua faasolosolo lava ina matuā faaleleia la ma faaipoipoga.” Ua faaopoopo mai Siaki e faapea: “Ua ma aʻoaʻoina foi le mataala i taimi ia e oso aʻe ai le ita. O taimi faapena, ma te feutagai ai ma le faaeteete.”—Faataoto 16:23.

Pe e tatau ona e faatoese atu pe afai o e mafaufau e lē o oe e sese? Pe a aafia ai faalogona loloto, e faigata tele ona tusitusi lima po o ai e tuuaʻia. Ae o le mea tāua o le iai o le filemu i le faaipoipoga. Seʻi mafaufau ia Apikaila, o se fafine Isaraelu o lē o lana tane sa agaleaga ia Tavita. E ui sa lē tuuaʻia o ia ona o le valea o lana tane, ae na faatoese atu. Na ole atu o ia e faapea: “Ia e faamagalo le agasala a lau auauna fafine.” Na tali atu Tavita e ala i le feutagai ma ia ma le magafagafa, i le taʻuina atu ma le lotomaulalo e faapea ana leai o ia, semanu ua na faamasaaina le toto o e lē sala.—1 Samuelu 25:24-28, 32-35.

Ua faapena foi se fafine Kerisiano e igoa ia Iuni, o lē sa faaipoipo mo le 45 tausaga, na ia lagona e faapea o se faaipoipoga e taulau manuia e manaomia ai le muai sauni e faatoese atu. Ua ia faapea mai: “Sa ou faapea ifo ia te au lava e sili atu ona tāua la ma faaipoipoga nai lo o oʻu lava faalogona. O lea pe a ou faatoese atu, ou te lagona ai loʻu saosaolaumea i le faaipoipoga.” Na fai mai se tamaloa matua e igoa ia Simi e faapea: “Ou te faatoese atu i laʻu avā e oo lava i mea faatauvaa. Talu mai lava le taimi na faia ai lona taotoga matuia, e faigofie lava ona mafatia lona mafaufau. O lea ou te opoina ai o ia i taimi uma ma fai atu, ‘Ou te faamalie atu, Laʻu Pele. Ou te lei mafaufau e faatiga ia te oe.’ E pei o se laau ua faasūsūina le vave ona vaaia o ona foliga tiotio.”

Afai ua tatou faatiga i se tagata e pito sili ona tatou alofa i ai, o se faatoesega e vave ona faia e matuā uigā tele. Na malie atoatoa Milagros i lona fai mai e faapea: “Ou te mafatia mai le leai o se mautinoa ia te au lava, ma o se upu pāʻopapa e faia e laʻu tane ou te lē fiafia ai tele. Ae a ia faatoese mai, e vave lava ona toe lelei oʻu faalogona.” Ua taʻuina mai ma le tonu e le Tusi Paia ia i tatou e faapea: “O upu matagofie, o le meli ua sisina ifo ia; e suamalie i le loto, ma le mea e malolo ai ivi.”—Faataoto 16:24.

Faamasani i le Faia o Faatoesega

Afai e avea ma a tatou masani le faia o faatoesega pe a manaomia, o le a faigofie ona tatou iloaina le tali mai o tagata ma le fiafia. Ma atonu o le a faatoese ai foi ma i latou. Afai ua tatou masalomia faapea ua tatou faatiga i se tasi, aisea e lē fai ai ma masani le faatoese atu nai lo le faaaluina o se taimi umi e alofia ai le taʻuina atu o se sese? Atonu e talitonu le lalolagi o faatoesega o se faailoga o le vaivai, ae o se faamaoniga lena o le taʻumatuaina faa-Kerisiano. Ioe, tatou te lē mananao e pei o i latou o ē ua ioe e iai sina o latou sese ae ua faaitiitia pea le tuuaʻia o i tatou. Mo se faaaoaoga, pe tatou te fai atu ea ua tatou salamō ae lē o ni o tatou lagona moni na? Afai ua tatou tuai taunuu ma faia ni faatoesega, pe tatou te maumauai ea ia faaleleia la tatou tausiaina o le taimi?

O lea la, pe e manaomia ea ona tatou faatoese atu? Ioe, e tatau. O loo tatou nofo aitalafu ai ia i tatou lava ma isi i le faia faapea. O se faatoesega e mafai ona fesoasoani ai e faaitiitia se tiga ua māfua ona o le lē lelei atoatoa, ma e mafai ona faaleleia ai faiā. O faatoesega uma tatou te faia o se lesona lea o le lotomaulalo ma toleniina ai i tatou ina ia sili atu ona magafagafa mo faalogona o isi. O le iuga, o le a vaai mai uso talitonu, o paaga faaipoipo, ma isi ia i tatou o nisi ua tatau i ai lo tatou alofa ma le maufaatuatuaina. O le a maua ai e i tatou le filemu o le mafaufau, ma o le a faamanuia mai Ieova le Atua ia i tatou.

[Faaopoopoga i lalo]

[Ata i le itulau 23]

O faatoesega ma le loto faamaoni e faatupuina ai le alofa faa-Kerisiano