Tau Ina Ia Finagalo Malie Mai Ieova i Lau Tali Atu
Tau Ina Ia Finagalo Malie Mai Ieova i Lau Tali Atu
“Loʻu Atua e, ia e manatu mai ia te au ona o lenei mea foi, . . . Loʻu Atua e, ia e manatu mai ia te au, ia ou manuia ai.”—NEEMIA 13:22, 31.
1. O le ā ua fesoasoani i ē ua tuuina atu i le Atua ina ia latou tuuina atu ai se tali lelei ia Ieova?
UA MAUA e auauna a Ieova fesoasoani uma latou te manaomia mo le tuuina atu o se tali lelei ia te ia. Aisea? Auā ua iai sa latou faiā māfana ma le Atua i le avea o i latou ma vaega o lana faalapotopotoga i le lalolagi. Ua ia faaalia ana fuafuaga ia i latou, ma ua ia foaiina atu ia i latou le fesoasoani ma le malamalama faaleagaga e ala i lona agaga paia. (Salamo 51:11; 119:105; 1 Korinito 2:10-13) E tusa ai ma nei tulaga faapitoa, ua talosagaina ai ma le alofa e Ieova ana auauna i le lalolagi ina ia tali atu ia te ia pe faatinoina o latou tiute tauave i lo latou tulaga o loo iai ma mea ua latou faataulauina ona o lona malosi ma le fesoasoani a lona agaga paia.
2. (a) I ā auala na tali lelei atu ai Neemia i le Atua? (e) O le ā le augani atu na faaiu ai e Neemia le tusi o le Tusi Paia lea e faaigoa i lona igoa?
2 O se tasi o tagata na ia tali lelei atu i le Atua, o Neemia, o le tautū uaina a le tupu o Peresia o Aretaseta (Longimanus). (Neemia 2:1) Na avea Neemia ma kovana o tagata Iutaia ma ia toe fausia ai pa o Ierusalema a o fetaiai ma fili ma lamatiaga. Ona o le maelega mo le tapuaiga moni, na ia toe uunaia le usitaia o le Tulafono a le Atua ma faaalia lona manatu mamafa mo ē sa mafatia. (Neemia 5:14-19) Na faalaeiau atu Neemia i le ʻau sa Levī ina ia latou faamamā e lē aunoa, ia leoleomalu i faitotoa o le aai, ma faapaiaina le aso Sapati. O lea na mafai ai ona ia tatalo atu: “Loʻu Atua e, ia e manatu mai ia te au ona o lenei mea foi, ma ē faasao ia te au e tusa ma le tele o lou alofa.” Sa talafeagai ai la, ona faaiuina e Neemia lana tusi faagaeeina i le augani atu: “Loʻu Atua e, ia e manatu mai ia te au, ia ou manuia ai.”—Neemia 13:22, 31.
3. (a) E faapeī ona e faamatalaina se tagata na te faia mea lelei? (e) O le toe mānatu i le olaga o Neemia e ono tatau ai ona tatou fesili ifo ia i tatou lava i ā fesili?
3 O le tagata na te faia mea lelei e amiolelei ma ia faatinoina gaoioiga saʻo e aogā mo isi. O le ituaiga tagata lena sa iai Neemia. Sa iai sona mataʻu faaaloalo i le Atua, ma se maelega sili mo le tapuaiga moni. E lē gata i lea, sa ia loto faafetai mo ona faaeaga i le auaunaga a le Atua ma sa ia tali lelei atu ia Ieova. O le toe mānatu i ana mea na faia e ono tatau ai ona tatou fesili ifo ia i tatou lava, ‘O faapeī ona ou manatu i oʻu faaeaga ma tiute tauave ua foaiina mai e le Atua? O le ā le ituaiga o tali o loo oʻu avatua mo aʻu lava ia Ieova le Atua ma Iesu Keriso?’
O le Poto Faale-Tusi Paia ua Mafai ai Ona Tatou Tali Atu
4. O le ā le poloaiga na tuu atu e Iesu i ona soo, ma o le ā na faia e i latou o ē na “saunia i le ola faavavau”?
4 Na tuu atu e Iesu i ona soo lenei poloaiga: “Ia outou o atu e fai nuu uma lava ma soo, ma papatiso atu ia te i latou . . . ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) E tatau ona faia ni soo e ala i le aʻoaʻo atu ia i latou. O i latou e aʻoaʻoina ma “saunia i le ola faavavau” e papatisoina, e pei ona faia e Iesu. (Galuega 13:48; Mareko 1:9-11) O o latou faanaunauga ina ia usitaia mea uma na ia poloai ai e tatau ona sau mai le loto. E latou te oo atu i le tulaga o le tuuina atu e ala i le faagoto ifo ma faatatauina le poto saʻo o le Afioga a le Atua.—Ioane 17:3.
5, 6. O le ā lo tatou malamalama i le Iakopo 4:17? Ia faataitai mai lona faatatauga.
5 A loloto lo tatou poto faale-Tusi Paia, o le lelei foi lena o le faavae mo lo tatou faatuatua. I le taimi lava e tasi, e faateleina ai mea e tatau ona tatou faia mo le Atua. Ua faapea mai le Iakopo 4:17: “O le ua iloa e fai le mea lelei, a e le faia, o le agasala lea ia te ia.” O lenei faaupuga ua mautinoa o se faamaoniga lea o le mea na faatoʻā taʻua e le soo o Iakopo e faatatau i le mitamita ae ua lē faalagolago atoatoa atu i le Atua. Pe afai e iloa e se tagata e lē mafai ona manuia se mea na te faataunuuina pe a aunoa ma le fesoasoani a Ieova ae lē o gaoioi e tusa ai, o se agasala lena mea. Ae mafai foi ona faatatau atu upu a Iakopo i agasala o le faafitia o le faia o se mea. Mo se faataitaiga, i le faataoto a Iesu i mamoe ma ʻoti, ua taʻusalaina ai ʻoti, e lē ona o ni gaoioiga leaga, ae ona o le lē fesoasoani atu i uso o Keriso.—Mataio 25:41-46.
6 O se tasi tamaloa na faia sana suesuega faale-Tusi Paia ma Molimau a Ieova sa itiiti lava sina agaigai i luma faaleagaga na ia faia, e foliga mai ona sa lē taofia lana ulaula, e ui na ia iloa o se mea lea e tatau ona ia faia. Na talosaga atu ia te ia se toeaina ina ia faitau le Iakopo 4:17. Ina ua uma ona faia ni manatu i le uiga tāua o lenei mau, na faapea atu le toeaina: “E ui lava e te lei papatiso, ae e mafai ona faamasinoina oe ma e tatau ona e tali atu mo lau filifiliga.” O se fiafiaga, auā na talia e le tamaloa, sa taofia lana ulaula, ma e lei umi ae agavaa loa mo le papatisoga e faailogaina ai lona tuuina atu ia Ieova le Atua.
E Tali Atu mo la Tatou Faiva
7. O le ā se tasi o auala e faaalia ai lo tatou loto faafetai mo ‘le poto e uiga i le Atua’?
7 E ao ona avea ma o tatou faanaunauga mai le loto le faafiafiaina o Lē na Foafoaina i tatou. O se tasi o auala e faaalia ai lo tatou loto faafetai mo ‘le poto e uiga i le Atua’ o le faataunuuina lea o le tofiga ina ia faia ni soo o lona Alo, o Iesu Keriso. O le auala foi lenei e faaalia ai lo tatou alofa mo le Atua ma o tatou tuaoi. (Faataoto 2:1-5; Mataio 22:35-40) Ioe, o lo tatou poto e uiga i le Atua ua mafai ai ona tatou tali atu ia te ia, ma e manaomia ona tatou manatu i o tatou uso a tagata o ni ē e ono avea ma soo.
8. Aisea e mafai ai ona tatou faapea atu na lagona e Paulo le tatau ona ia tali atu i le Atua mo lana faiva?
8 Na iloa e le aposetolo o Paulo, o le taliaina ma le loto atoa ma le usiusitai i le tala lelei e iu ai i le faaolataga, ae o le tetee i ai e mafai ona aumaia ai le faaumatiaga. (2 Tesalonia 1:6-8) O lea na ia lagona ai le tatau ona ia tali atu ia Ieova mo lana faiva. O le mea moni, sa matuā talisapaia e Paulo ma ana aumea la latou faiva, ma na latou faaeteete ai ia alofia le foliga atu i tagata e pei o loo suʻeina ai ni a latou tupe. E lē gata i lea, na uunaia Paulo e lona loto e faapea mai: “Auā afai ou te folafola le tala lelei, e le se mea lea ou te mitamita ai, auā ua leai saʻu faitalia i lea mea. Oi talofa foi ia te au, pe a ou le folafolaina le tala lelei!”—1 Korinito 9:11-16.
9. O le ā le aitalafu tāua e ao i Kerisiano uma lava ona latou totogia?
9 Talu ai o i tatou o auauna tuuina atu a Ieova, ‘ua tatau ai ona tatou faalauiloa atu le tala lelei.’ O lo tatou tofiga ia talaʻi atu le feau o le Malo. Ua tatou talia lena tiute tauave ina ua tuuina atu i tatou i le Atua. (Faatusatusa i le Luka 9:23, 24.) E lē gata i lea, e iai sa tatou aitalafu e tatau ona totogia. Na faapea mai Paulo: “Ua ia te au mea a Eleni atoa ma nuu ese, o e popoto atoa ma e valelea; o le mea lea ou te naunau ai, ia ou folafola le tala lelei ia te outou foi o i Roma.” (Roma 1:14, 15) Sa avea Paulo o se tagata nofoaitalafu talu ai sa ia iloa o lona tiute le talaʻi atu ina ia mafai e tagata ona faalogo i le tala lelei ma faasaoina ai. (1 Timoteo 1:12-16; 2:3, 4) O lea na ia galue mamafa ai ina ia faataunuuina lona tofiga ma totogi lana aitalafu i ona uso a tagata. I lo tatou avea o ni Kerisiano, ua iai foi ia i tatou se aitalafu e totogia. O le talaʻia o le Malo o se auala autū foi lena e faailoa ai le alofa mo le Atua, mo lona Alo, ma o tatou tuaoi.—Luka 10:25-28.
10. O le ā ua faia e nisi mo le faalauteleina atu o la latou faiva?
10 O se tasi o auala e tuuina atu ai se tali e talileleia i le Atua o le faaaogā lea o o tatou tomai e faalautele ai la tatou faiva. O se faataitaiga: I tausaga e lei leva tele atu, sa gasolo ane ai i Peretania le anoanoai o ituaiga o tagata eseese mai le tele o atunuu. Ina ia oo atu la i na tagata le tala lelei, e silia i le 800 paeonia (tagata talaʻi faataimi atoa o le Malo) ma le faitau selau o isi Molimau o loo latou aʻoaʻoina gagana eseese. Ua iu lenei i se uunaiga lelei i le faiva. Na faapea mai se tamaitai paeonia e faiaʻoga i le vasega o le gagana Saina: “Sa lei iai soʻu manatu e mafai ona ou aʻoaʻoina atu laʻu gagana i isi Molimau, ina ia mafai ai ona latou tufa atu le upu moni i isi i lenei auala. O se matuā faamalie loto!” Pe mafai ea ona e faalautele atu lau faiva i se auala faapena?
11. O le ā na iu i ai ina ua molimau atu lē fuafuaina se tasi Kerisiano?
11 E foliga mai, e taitoatasi i tatou ma faia lava le mea tatou te mafaia ina ia laveai ai se tagata ua malemo. Ua faapena foi le naunau o auauna a Ieova e faaaogā o latou tomai e molimau atu ai i avanoa taitasi. Talu ai nei lava, na nonofo faatasi ai se tamaitai Molimau ma se isi tamaitai i totonu o se pasi, ma sa ia talanoa atu ia te ia e uiga i le Tusi Paia. Ona o le faagaeetia i mea na ia faalogo i ai, na tele ai ni fesili a le tamaitai na fai. Ina ua latalata o le a nofo le Molimau, sa aioi ane i ai le tamaitai pe mafai ona alu atu i lona aiga, auā o loo tele pea isi ana fesili. Na malie i ai le Molimau. O le ā le iuga? Na amataina se suesuega faale-Tusi Paia, ma i le ono masina mulimuli ane, na avea ai loa lea tamaitai o se tagata talaʻi e lei papatisoina o le Malo. E lei umi, ae faia foi e ia ni ana lava suesuega faale-Tusi Paia se ono i ni aiga. Maeu se taui faagaeetia mo le faaaogaina e se tasi o ona tomai i le auaunaga o le Malo!
12. E mafai faapefea ona faaaogaina ma le uigā o tatou tomai o ni faifeau i le auaunaga i le fanua?
12 O o tatou tomai o ni faifeau e mafai ona faaaogaina ma le uigā i le fanua e ala i le faaaogā o lomiga e pei o le tusi e 192 itulau o Le Poto e Taʻitaʻia ai i le Ola e Faavavau. Ia Aperila o le 1996, na ioeina ai e le Komiti o Tusitusiga a le Vaega Pule o Molimau a Ieova le lomiaina o le tusi o Le Poto i le silia i le 140 gagana, ma e oo ane ia Mati i le 1996, ua 30,500,000 kopi ua uma ona lomia i le 111 gagana. Sa tusia lenei tusi ma le faamoemoe e fesoasoani atu ai i tagata aʻoga o le Tusi Paia ia lava so latou iloa i le Afioga a le Atua ma ana fuafuaga ina ia tuuina atu ai ia Ieova ma papatisoina. Talu ai o le a lē faaauau pea ona suesue tagata talaʻi o le Malo ma le tagata aʻoga lava e tasi mo le tele o tausaga, e mafai ai ona latou faia ni suesuega ma nisi tagata pe faateleina lo latou sao i le galuega mai lea fale i lea fale ma isi vala o le faiva. (Galuega 5:42; 20:20, 21) Ona o lo latou nofouta i le tatau ona latou tali atu i le Atua, ua latou uaʻi atu ai i lapataiga tauatua. (Esekielu 33:7-9) Ae o la latou fuafuaga autū o le faamamaluina o Ieova ma fesoasoani atu i le toatele o tagata e mafai ai, ina ia latou aʻoaʻoina le tala lelei i le taimi puupuu o loo totoe o lenei faiga amioleaga o mea.
Le Tali Lelei Atu o ni Aiga
13. Aisea e tatau ai i aiga faale-Atua ona faia e lē aunoa se suesuega faale-Tusi Paia a le aiga?
13 O tagata ma aiga taitasi ua latou taliaina le Faa-Kerisiano moni ua mafai ona latou tali atu i le Atua ma tatau ai ona latou “faaoo atu i le faaatoatoaga [“taʻumatuaina,” NW]” ma oo ina “mausali . . . i le faatuatua.” (Eperu 6:1-3; 1 Peteru 5:8, 9) Mo se faaaoaoga, o i latou sa suesue i le tusi o Le Poto ma ua papatisoina e manaomia ona faaatoatoa lelei lo latou poto faale-Tusi Paia e ala i le auai e lē aunoa i sauniga ma le faitauina o le Tusi Paia ma isi lomiga faa-Kerisiano. E tatau foi ona iai se suesuega faaleaiga e faia e lē aunoa i totonu o aiga faale-Atua, auā o se auala tāua lea e ‘mataala ai, e tumau ai i le faatuatua, ma faaauau ai ona faatamatane ma faamalolosi.’ (1 Korinito 16:13) Pe afai o oe o le ulu o le aiga, ua fetaui lelei ona e tali atu i le Atua ina ia faamautinoa o loo lelei ona fafagaina faaleagaga lou aiga. E pei lava ona aogā meaʻai lelei faaletino mo le maloloina faaletino, ua faapena foi i le anoanoai ma le lē aunoa ona iai o meaʻai faaleagaga ona manaomia e oe ma lou aiga pe afai tou te fia tumau i le “maloloina i le faatuatua.”—Tito 1:13, NW.
14. O le ā na iu i ai le molimau atu a se teine Isaraelu na lelei ona aʻoaʻoina?
14 Pe afai o iai ni fanau i lou aiga, o le a faamanuia le Atua ia te oe ona o lou tuuina atu ia i latou o faatonuga saʻo faaleagaga. O le a aogā na aʻoaʻoga ia i latou, e pei ona sa aogā i le teineitiiti Isaraelu lea na puʻeina e ʻau a Suria i aso o le perofeta a le Atua o Elisaia. Na avea o ia ma auauna fafine a le avā a le taʻitaʻiʻau o Suria lea na lepela, o Naamanu. E ui i le laitiiti o le teine, ae na ia taʻu atu i lona matai: “Se anoa! ana i ai loʻu alii i le perofeta o i Samaria, po ua faateaina e ia lona lepela.” Ona o lana molimau, na alu atu ai Naamanu i Isaraelu, ma iu ai lava ina usiusitai i le faatonuga a Elisaia ina ia taele faafitu i le Vaitafe o Ioritana, ma faamamāina ai loa lona lepela. E lē gata i lea, na iu ina avea Naamanu ma tagata tapuai a Ieova. Atonu e maeu le faafiafiaina ai o le teineitiiti i lena mea!—2 Tupu 5:1-3, 13-19.
15. Aisea e tāua ai mo mātua ona avatu i a latou fanau se aʻoaʻoga lelei faaleagaga? Ia faataitai.
15 E lē faigofie ona tausia aʻe ni fanau e matataʻu i le Atua i lenei lalolagi ua matuā leai ni amioga tatau o iai, ma o loo i lalo o le pulega a Satani. (1 Ioane 5:19) Peitai, mai lava a o tamameamea Timoteo, na taulau manuia ai Loi le tinā o lona tinā, ma Eunike lona tinā, i le aʻoaʻoina o ia i le Tusi Paia. (2 Timoteo 1:5; 3:14, 15) O le suesueina o le Tusi Paia faatasi ma lau fanau, le ave o i latou e lē aunoa i sauniga faa-Kerisiano, ma mulimuli ane tou ō faatasi ma i latou i le faiva, o vaega uma na o le faatulagaga tau aʻoaʻoga lea e tatau ona e tuuina atu ai se tali i le Atua. E manatua e se tasi Kerisiano i Uelese, ua silia ma le 80 tausaga o lona soifuaga, e faapea i uluai tausaga mai le 1920, sa ave ai o ia e lona tamā ma la savavali i le 6 maila [10 kilomita] i luga o se mauga (o le malaga atoa e tusa e 12 maila [20 kilomita]) ina ia tufatufaina sāvali faale-Tusi Paia i tagata o le nuu o loo i le isi vanu e sosoo atu. Na ia faapea mai ma le loto faafetai: “O savaliga na sa faamausalīina ai e loʻu tamā le upu moni i loʻu loto.”
E Tali Atu Toeaina—Faapefea?
16, 17. (a) O ā faaeaga na olioli ai tane matutua sa taʻumatuaina faaleagaga i Isaraelu anamua? (e) Pe a faatusatusa atu i le tulaga i Isaraelu anamua, aisea e sili atu ai nisi mea e manaomia mai toeaina Kerisiano i aso nei?
16 Na faapea mai le tagata poto o Solomona: “O le pale matagofie le ulusinā, pe a ua i ai i le ala o le amiotonu.” (Faataoto 16:31) Ae ua lē na o le matua faaletino i tausaga e faaauupegaina ai se tagata mo tiute tauave i le faapotopotoga o tagata o le Atua. O tane matutua sa taʻumatuaina i le Tusi Paia i Isaraelu anamua na latou auauna o ni faamasino ma faipule mo le avatuina o faamasinoga tonu ma le tausisia o le filemu, le maopoopo lelei, ma le maloloina faaleagaga. (Teuteronome 16:18-20) E ui o le tulaga moni foi lena i le faapotopotoga Kerisiano, ae e sili atu nisi mea e manaomia mai toeaina a o latalata mai le iuga o lenei faiga o mea. Aisea?
17 Sa avea tagata Isaraelu ma ‘nuu filifilia’ na faasaoina e le Atua mai Aikupito anamua. Talu ai sa latou mauaina le Tulafono e ala mai i lo latou puluvaga, o Mose, na fananau mai a latou fanau i totonu o se nuu ua tuuina atu ma sa latou masani i tulafono a Ieova. (Teuteronome 7:6, 11) Ae peitai, ua leai se tasi o toe fanau mai faapena i se nuu ua tuuina atu i aso nei, ma e toaitiiti ē o loo ola aʻe i ni aiga faale-Atua o loo masani lelei ma upu moni o le Tusi Paia. Ae maise lava ia i latou e lei leva tele talu ona amata “savavali . . . i le upu moni,” latou te manaomia faatonuga i le auala e ola ai e tusa ma mataupu silisili o le Tusi Paia. (3 Ioane 4) Maeu la se tiute tauave ua paʻū atu i toeaina faamaoni a o latou ‘taofi mau i upu e ola ai’ ma fesoasoani atu i tagata o Ieova!—2 Timoteo 1:13, 14.
18. O le ā le ituaiga o fesoasoani e tatau i toeaina o le faapotopotoga ona sauniuni e avatu, ma aisea?
18 O se tamaitiiti o loo tau aʻoaʻo e savali atonu e tau lavelavea solo ma iu ina paʻū. Na te lagona le lē mautonu ma manaomia le fesoasoani ma le faamalosiau mai ona mātua. E mafai foi ona tau tevateva faapena ma iu ina paʻū faaleagaga se tagata ua tuuina atu ia Ieova. E oo lava i le aposetolo o Paulo sa ia iloa le manaomia ona tauivi e faia le mea saʻo i le silafaga a le Atua. (Roma 7:21-25) E manaomia i leoleo mamoe o le lafu a le Atua ona avatu se fesoasoani alofa i Kerisiano o ē ua sese ae ua salamō moni. Ina ua asiasi atu toeaina i se tasi tamaitai tuuina atu ua ia faia se measese matuia, na ia faapea mai a o iai lava lana tane tuuina atu: “Ou te iloa o le a tou faateʻaina aʻu!” Ae na matuā tagi auēuē ina ua taʻu atu i ai e fia iloa e toeaina po o le ā se fesoasoani e manaomia ina ia toe faafoisia ai le tulaga faaleagaga o le aiga. I le iloaina e toeaina e tatau foi ona latou tuuina atu se tali, sa latou fiafia ai e fesoasoani atu i se tagata talitonu ua toe salamō.—Eperu 13:17.
Ia Faaauau Pea Ona Tali Lelei Atu
19. E mafai faapefea ona tatou faaauau pea i le tuuina atu o se tali lelei mo i tatou lava i le Atua?
19 E manaomia e toeaina o le faapotopotoga ma isi uma auauna a le Atua ona faaauau pea i le tuuina atu o se tali lelei mo i latou lava ia Ieova. E mafaia lenei mea pe afai tatou te pipii mau atu i le Afioga a le Atua ma faia lona finagalo. (Faataoto 3:5, 6; Roma 12:1, 2, 9) E sili ona tatou mananao e faia mea lelei ia i latou o ē tatou te aiga i le faatuatua. (Kalatia 6:10) Ae peitai, o loo telē pea le seleselega, ae o loo toalaiti pea le aufaigaluega. (Mataio 9:37, 38) O lea seʻi o tatou faia ai mea lelei i isi e ala i le filigā e folafola atu le feau o le Malo. O le a faamanuia mai Ieova ia i tatou pe afai tatou te faataunuuina lo tatou tuuina atu, ia faia lona finagalo, ma folafola ma le faamaoni le tala lelei.
20. O le ā tatou te aʻoaʻoina mai le manatunatu i le olaga o Neemia?
20 O lea, seʻi o tatou faaauau ai ona faateleina mea tatou te faia i le galuega a le Alii. (1 Korinito 15:58) Ma e lelei pe a tatou manatunatu ia Neemia, o lē na toe fausiaina pa o Ierusalema, na uunaia le usitaia o le Tulafono a le Atua, ma maelega e uunaia atili le tapuaiga moni. Sa ia tatalo ina ia manatua mai o ia e Ieova le Atua mo mea lelei na ia faia. Tau ina ia faapena foi lou tuuina atu ia Ieova, ma tau ina ia finagalo malie o ia i lau tali atu.
O ā Au Tali?
□ O le ā le faaaoaoga na faataatia mai e Neemia?
□ Aisea ua mafai ai e le poto ona tatou tali atu i le Atua?
□ E mafai faapefea ona tatou tuuina atu se tali e taliaina mai e Ieova i la tatou faiva?
□ O le ā e mafai e aiga ona faia ina ia tuuina atu se tali lelei i le Atua?
□ Ua faapefea ona tuuina atu e toeaina Kerisiano se tali atu?
[Fesili mo le Suʻesuʻega]
[Ata i le itulau 18]
I lo tatou pei o Paulo, e mafai ona tatou tuuina atu se tali lelei i le Atua i le avea o ni ē folafolaina le Malo
[Ata i le itulau 19]
Po o malolosi ea lau fanau i le faatuatua e pei o le teineitiiti Isaraelu lea sa i le aiga o Naamanu?