Toe Foi Atu i le Efuefu—E Faapefea?

“O LE efuefu oe, e te toe foi atu lava i le efuefu.” Ina ua faalogo atu le uluai tamaloa o Atamu i na upu, sa ia iloa le mea o le a ia faatalitalia. O ia sa faia mai i le efuefu o le eleele, ma o le a ia toe foi atu lava i le efuefu. O le a ia oti ona ua lē usiusitai i Lē na Foafoaina o ia, o Ieova le Atua.—Kenese 2:7, 15-17; 3:17-19.

Ua faaalia e le Tusi Paia faapea, o tagata ua faia mai i le efuefu. Ua ia faapea mai foi:  “O le tagata e agasala e oti ia.” (Esekielu 18:4; Salamo 103:14) Ua aumaia e le oti faanoanoaga i le faitau miliona o tagata, ma ua saga lagā ai pea fesili e faatatau i le auala e teu ai tino o tagata oti.

Aganuu Anamua ma Aso Nei

Na faapefea ona teua tino oti o tagata o le Atua i aso anamua? I uluai vaega o le Tusi Paia, o loo taʻua ai auala eseese e teuina ai tagata oti, e aofia ai le tanumia i le eleele. (Kenese 35:8) O le augatamā o Aperaamo ma lana avā o Sara, faapea foi ma le la tama o Isaako ma le atalii o le la tama o Iakopo sa tanumia i le ana o Makapelu. (Kenese 23:2, 19; 25:9; 49:30, 31; 50:13) O faamasino Isaraelu o Kitiona ma Samasoni sa tanumia i laua i ‘tuugamau o o la tamā.’ (Faamasino 8:32; 16:31) E taʻu mai ai faapea, o le iai o fanuatanu o aiga sa manaomia e tagata o le Atua i aso anamua. Ina ua maliu Iesu Keriso i le uluai senituri T.A., sa tuuina lona tino i lona tuugamau fou na foa i le papa. (Mataio 27:57-60) E masani lava la, o tagata oti a lē o le tanumia i le palapala, e teua i tuugamau. O loo avea pea lea, o le faiga masani i le tele o vaega o le lalolagi.

Ae ui i lea, i nisi o vaega o le lalolagi i aso nei, o tulaga faigata o le tau lē lava o fanua ma le taugata o fanua ua faaopoopo atu i le faigata ona maua ni fanuatanu. O lea la, o nisi o tagata ua latou manatunatu ai i nisi o auala e aveesea ai tino o tagata oti.

O le faasalalauina solo o le lefulefu pe a uma ona susunuina le tino maliu, ua avea o se mea e masani ai. I Egelani pe ā ma le 40 pasene o tagata maliliu ua faia i ai lenei tulaga. I Suetena, i nofoaga i le taulaga, e sili atu i le 80 pasene o tino maliu ua susunuina, o nisi o togavao patino ua fuafuaina mo le faasalalau solo ai o le lefulefu. Ma i Shanghai ma nisi o taulaga i le talafatai o Saina, ua iai le faatagaga a pulega o loo vaaia taulaga, o le faasalalauina o lefulefu e tagata lautele e faia i le sami i isi vaitaimi o le tausaga.

O fea e mafai ona faasalalau ai lefulefu? E lē faia i so o se nofoaga. O nisi ua popole faapea o le faasalalauina o lefulefu, o se faaleagaina lea o le siosiomaga. O le mea moni lava, so o se lamatiaga e ono aumaia e ni faamaʻi ua taofia lea e ala i le susunuina. O nisi o fanuatanu patino i Egelani ma paka ua avea ma fanuatanu, lea e faailogaina i sina faailoilo e tau lē iloa atu, i le Iunaite Setete ua latou tuuesea se fasi fanua po o togalaau matagofie e avea o fanua e faasalalau ai lefulefu. O le mea moni, o Kerisiano ua latou manatu mamafa i le vaaiga a le Tusi Paia i le susunuina ma le faasalalauina o lefulefu.

O le ā le Vaaiga Faale-Tusi Paia?

I se faasalaga na fofogaina atu faasaga i “le tupu o Papelonia,” sa taʻua faapea e le perofeta o Isaia: “A o oe, ua lafoaiina oe, ua leai sou tuugamau.” (Isaia 14:4, 19) Pe e faatusaina ea le faasalalauina o lefulefu i sea ituaiga o faalumaina? E leai, o iina e lē o iai se faamaumauga o le susunuina ma le teuina po o le faasalalauina o lefulefu o ē ua feoti.

Sa fetalai Iesu Keriso i le toetu faalelalolagi o ē ua oti lea o le a faataunuu a o faagasolo le Pulega o le Afe Tausaga ina ua ia fetalai e faapea: “E faalogo ai i [loʻu] leo o i latou uma ua i tuugamau, ma latou o mai ai.” (Ioane 5:28, 29) Peitai ane, ua faailoa mai i  se isi o valoaga o loo faamatalaina ai le toetu, o le a lē manaomia se tuugamau patino ina ia faatūina mai ai se tagata. Ua taʻua i le Faaaliga 20:13 e faapea: “Ua avae foi e le sami e na oti sa i ai, ua avae foi e le oti ma seoli e na oti sa i ai.” O lea, o le mea sili ona tāua e lē o fea po o le faapefea e se tagata ona ‘toe foi atu i le efuefu.’ Nai lo lena, po o manatua o ia e le Atua ma toe faatūina. (Iopu 14:13-15; faatusatusa i le Luka 23:42, 43.) E lē manaomia e Ieova tuugamau mataina e fesoasoani ia te ia e manatua ai tagata. O le susunuina o le a lē taofia ai le toetu o se tagata. Ma pe afai o le faasalalauina o lefulefu o loo faia i se uunaiga saʻo ma ia aunoa ma sauniga sese faalotu, o le a lē feteenai la lea ma le Tusi Paia.

O i latou e filifili e faasalalauina o le lefulefu o le a manaomia ona uaʻi totoʻa atu i tulafono a le atunuu. O le a talafeagai foi mo i latou ona manatunatu i faalogona o i latou o faanoanoa faapea foi ma isi. E lelei i auauna a Ieova ona latou faaeteete i le faaaogaina o lo latou saʻolotoga faale-Tusi Paia i lenei tulaga ina neʻi aumaia ai le faalumaina i le igoa lelei o loo tauaveina e Kerisiano. E tāua faapitoa lenei mea i atunuu ia e faatagaina ai faaletulafono le susunuina ma le faasalalauina o lefulefu ae lē o taliaina atoatoa e tagata lautele. O le mea moni, o se Kerisiano o le a ia alofia so o se sauniga po o aganuu e faavae i talitonuga o le lē mafai ona oti o le solu o le tagata.

Le Saʻolotoga Atoatoa Mai le Tuugamau!

O nisi e lagolagoina le luluina o le lefulefu ua faapea mai o le uiga o lenei mea o le saʻoloto lea mai le tanumia i tuugamau. Peitai ane, o le aumaia o le saʻolotoga sili, o le faataunuuina lea o le folafolaga a le Tusi Paia e faapea “o le toe fili e faaumatia, o le oti lea.”—1 Korinito 15:24-28.

O le uiga o lenei mea o tuugamau, tia, e oo lava i le susunu ma le faasalalauina o lefulefu, o le a avea ma mea o taimi ua tuanai. Ioe, o le a lē toe iai le oti. E ala i le faagaeega tauatua na tusi ai le aposetolo o Ioane e faapea: “Na ou faalogo foi i le leo tele mai le lagi, ua faapea mai, ‘Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.’”—Faaaliga 21:3, 4.

O nei mea uma o le a faataulauina pe a aveesea atoatoa le oti, na māfua mai i le agasala a Atamu, e ala i le Malo o le Atua. I lena taimi o tagata usiusitai o le a lē toe fesagai ma le avanoa e toe foi atu ai i le efuefu.

[Ata i le itulau 29]

Auala masani e faia i tino o tagata oti

[Ata i le itulau 31]

Faasalalauina o le lefulefu i Sagami Bay, i Iapani

[Ē Ana le Ata]

Courtesy of Koueisha, Tokyo