Na Latou Faia le Finagalo o Ieova

Ua Talaʻi Peteru i le Penetekoso

O SE taeao mafanafana o le tau e totogo ai mea o le tausaga e 33 T.A. Na faatumulia tagata i faalogona faatalitali i se mea e tupu. O se motu o tagata Iutaia ma tagata liulotu Iutaia ua feomaʻi i magaala o Ierusalema. Na malaga mai i latou mai nofoaga e pei o Elama, Mesopotamia, Kapatokia, Aikupito, ma Roma. Maeu le matalasi o le vaai atu ia i latou o laeiina mai o latou laei e masani ai ma le faalogo atu i le eseese o a latou gagana! O nisi e silia ma le afe maila na faimalaga ai [toeitiiti lava lua afe kilomita] ina ia auai i lenei faatasiga faapitoa. O le ā lea faatasiga? O le Penetekoso—o se faigaai olioli faa-Iutaia e faailoga ai le faaiuga o le seleselega o karite.—Levitiko 23:15-21.

Na taʻai le asu mai taulaga mu na ofo i le fata faitaulaga o le malumalu, ma na pepese le ʻau sa Levī i le Aleluia (Salamo 113 e oo i le 118). A o lei taina le iva i le taeao, na iai se mea e faateʻia ai na tupu. Na taalili mai le lagi, se leo “peiseai o le matagi ua agi tele mai.” Na faatumulia uma ai le fale lea na potopoto ai le tusa ma le 120 soo o Iesu Keriso. Ua faapea mai le tala a le Tusi Paia: “Ua iloa foi e i latou o laulaufaiva peiseai o le afi ua vaevaeina, ua nofo i o latou luga taitoatasi. Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.”—Galuega 2:1-4.

Ua Faalogoina e Tagata Taitoatasi Lana Lava Gagana

E lei umi, ae lolofi atu i fafo o le fale le toatele o le ʻau soo. O le mea mataina, na mafai ona latou tāutala i gagana eseese a le motu o tagata! Seʻi vaai faalemafaufau i le faateʻia na iai i se tagata asiasi mai Peresia ma se tagatanuu o Aikupito ina ua faalogo atu i a la gagana o tāutala mai ai tagata Kalilaia. E faigofie ona iloa atu le maofa o le motu o tagata. Na latou fesili ane e faapea: “Se a le uiga o lenei mea?” O nisi na faatauemu i le ʻau soo i le faapea ane: “Ua onā nei tagata i le uaina fou suamalie.”—Galuega 2:12, 13.

Na sosoo ai ma le tulai atu o le aposetolo o Peteru ma lauga atu i le motu o tagata. Na ia faamatalaina atu e faapea o lea meaalofa ofoofogia o le tāutala i gagana eseese o se faataunuuga lea o le folafolaga a le Atua na ala mai i le perofeta o Ioelu e faapea: “E iu ina ou liligi ifo ai loʻu Agaga i luga o tagata uma lava.” (Galuega 2:14-21; Ioelu 2:28-32) Ioe, na faatoʻā liligiina ifo lava e le Atua lona agaga paia i luga o soo o Iesu. Na avea lenei mea ma faamaoniga manino e faapea ua faatūina aʻe Iesu mai le oti ma ua afio i le lagi i le itu taumatau o le Atua. “O lenei foi,” o le tala lea a Peteru, “ia matuā iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.”—Galuega 2:22-36.

Na faapefea ona tali atu le ʻau faalogologo? “Ona tuia lea o latou loto,” ua faaauau mai le tala e faapea, “ua latou fai mai ia Peteru ma le au aposetolo uma, ‘Sema e, le au uso e, se a se mea matou te faia?’” Ona tali atu lea o Peteru e faapea: “Ina salamo ia, ma ia taitasi ma papatisoina outou uma.” E tusa ma le 3,000 i latou na faia faapena! Mulimuli ane, “ua tumau pea i latou i le aʻoaʻoga a le au aposetolo.”—Galuega 2:37-42.

E ala i le avea ma taʻimua i lenei faatasiga uigaese, na faaaogā ai e Peteru le uluai “ki o le malo o le lagi” lea na folafola atu e Iesu na te avatua ia te ia. (Mataio 16:19) O nei ki na tatalaina ai ni faaeaga faapitoa i ni vaega eseese o tagata. O le uluai ki na mafai ai e tagata Iutaia ona avea ma Kerisiano faauuagagaina. Mulimuli ane, o le ki lona lua na muai tatalaina ai lea lava avanoa i Samaria ma le ki lona tolu na tatalaina  ai le avanoa lava lea e tasi i tagata o Nuu Ese.—Galuega 8:14-17; 10:44-48.

Lesona mo i Tatou

E ui lava o lenei motu o tagata Iutaia ma tagata liulotu Iutaia na tuuaʻia i latou o se nuu i le fasiotia o le Alo o le Atua, ae na tautala ma le faaaloalo Peteru i a i latou, i le taʻua lea o i latou o “le au uso.” (Galuega 2:29) O lona sini o le uunaia lea o i latou e salamō, ae lē o le taʻusalaina o i latou. O lea la, sa mautinoa le auala na ia talanoa atu ai. Na ia tuuina atu mea moni ma lagolago foi ona manatu i mau mai le Tusi Paia.

O i latou o ē talaʻia le tala lelei i aso nei e lelei foi ona mulimuli i le faataitaiga a Peteru. E ao ona latou taumafai e faavae talanoaga ma la latou ʻau faalogologo i tulaga masani, ona fefulisai lea ma le faautauta manatu ma i latou i le Tusi Paia. Afai e tuuina atu upu moni o le Tusi Paia i se uiga mautinoa, o le a tali lelei mai ē loto naunau.—Galuega 13:48.

O le maelega ma le lototele o Peteru i le aso Penetekoso na matuā matilatila lona tuufaafeagai ma lona faafitia o Iesu i le fitu vaiaso na muamua atu. I lena mea na tupu sa leai se malosi o Peteru ona o lona mataʻu i tagata. (Mataio 26:69-75) Peitai na faatoga atu Iesu mo Peteru. (Luka 22:31, 32) E mautinoa, o le toe faaali atu o Iesu ia Peteru ina ua toetu sa faalaeiauina ai le aposetolo. (1 Korinito 15:5) O le iuga, na lē vaivai le faatuatua o Peteru. E lei umi, ae talaʻi atu o ia ma le lototele. O lea la, na ia talaʻi e lē gata i le Penetekoso ae na faaauau ai lava i lona soifuaga atoa.

Ae faapefea pe afai e iai se taimi e tatou te sese ai, e pei ona faia e Peteru? Seʻi o tatou faaalia le salamō, tatalo mo le faamagaloga, ma faia ni laasaga ina ia maua ai fesoasoani faaleagaga. (Iakopo 5:14-16) Ona mafai ai lea ona tatou agaʻi i luma ma le mautinoa ua talia la tatou auaunaga paia e lo tatou Tamā faalelagi o Ieova, o lē alofa mutimutivale.—Esoto 34:6.