Auauna ia Ieova o se Aiga Autasi

E PEI ONA FAAMATALAINA E ANTONIO SANTOLERI

E 17 tausaga o loʻu tamā ina ua ia tuua Italia i le 1919. Na siitia atu o ia i Pasili e sailia ai se olaga e sili atu ona lelei. Ina ua mavae se taimi, na ia faia ai se fale ʻoti ulu i se aai laitiiti maouta i le setete o São Paulo.

I SE tasi aso i le 1938, ina o fitu oʻu tausaga, na maua ai e tamā se kopi o le Tusi Paia o le Brasileira i le gagana Potukali mai se tamaloa na ui ane i lona fale ʻoti ulu. I le lua tausaga mulimuli ane, na maʻi tigaina ai Tinā ma oo ai lava ina maliu o ia. Na oo foi ina maʻi Tamā, o lea na matou ō atu uma ai lava—o Tinā, Tamā, o loʻu tuafafine o Ana, ma aʻu—ma matou nonofo ma o matou tauaiga i le aai o São Paulo.

I le taimi a o oʻu aʻoga i São Paulo, sa ou naunau ai e faitau, ae maise lava tusitusiga o le tala faasolopito. Sa ou fiafia ona sa taʻua soo ai le Tusi Paia i na tusitusiga. O se tusi o tala na ou nonoina mai i le faletusi mo le lautele i São Paulo, o loo tele ina taʻua ai le Lauga i luga o le Mauga. O iina na ou mafaufau ai e fia maua saʻu Tusi Paia ou te faitau ai aʻu lava i lena lauga. Sa ou saili mo le Tusi Paia na ia Tamā mo le tele o tausaga ua mavae, ma iu ina maua i le taʻele o se pusa, na taatia ai mo le fitu tausaga.

O lo matou aiga, o ni tagata Katoliko, o lea, sa lei faalaeiauina lava aʻu e faitau le Tusi Paia. I le taimi la lenei, ua ou iloa ai e aʻu lava suʻe mataupu ma fuaiupu. Sa ou faitauina ma le fiafia tele e lē na o le Lauga i luga o le Mauga, ae o le tusi atoa a Mataio faapea foi ma isi tusi o le Tusi Paia. O le mea sa sili ona faamalosia ai aʻu, ona o le moni o aʻoaʻoga ma vavega na faia e Iesu.

I le iloaina o le matuā ese o le lotu Katoliko mai mea na ou faitauina i le Tusi Paia, na amata ai loa ona ou auai i le Lotu Perepereane, ma na ma aufaatasi ai ma Ana. Ae peitai, sa lei faamalieina ai loʻu loto. Mo le tele o tausaga na ou saili ai ma le naunau i le Atua. (Galuega 17:27) I se tasi po maninoa, a o faasolo oʻu mafaufauga, sa ou tau mānatu ai, ‘Pe aisea ua ou iai ai iinei? O le ā le fuafuaga o le  olaga?’ Sa ou saili se nofoaga tuese i le fanua i tuāfale, tootuli, ma tatalo e faapea, ‘Le Alii e, le Atua! O ai ea oe? E mafai faapefea ona ou iloa oe?’ E lei pine mulimuli ane ae maua le tali.

Aʻoaʻoina Upu Moni o le Tusi Paia

I le tasi aso i le 1949, na faalatalata atu ai se tamaitai talavou ia Tamā a o oso ese mai se taavale. Sa ia ofo atu ia te ia mekasini o Le Olomatamata ma le Ala Mai! Sa fai se tusiga a Tamā i Le Olomatamata ma talosaga atu i le tamaitai ina ia asiasi atu i lo matou aiga, i le faamatala atu i ai e faapea e toalua lana fanau o loo ō i le Lotu Perepereane. I le asiasiga a lea tamaitai, na ia tuua ai le tusi Children ia Ana ma amata ai se suesuega faale-Tusi Paia ma ia. Mulimuli ane sa ou auai foi i le suesuega.

Ia Novema 1950 na ma ō atu ai i la ma uluai tauaofiaga a Molimau a Ieova. O iina na tatalaina ai le tusi “Let God Be True” ma na faaauau ai pea la ma suesuega e faaaogā ai lena tusi e fai ma taʻiala. E lei pine ae ma iloa e faapea ua ma maua le upu moni, ma ia Aperila 1951 na papatisoina ai i maʻua e faatinoina ai lo ma tuuina atu ia Ieova. I tausaga mulimuli ane, na tuuina atu ai Tamā ma na maliu o ia i le 1982 a o faamaoni pea o ia i le Atua.

Fiafia i le Auaunaga Faataimi Atoa

Ia Ianuari 1954, ina o na o le 22 oʻu tausaga, na talia ai aʻu mo le auaunaga i le ofisa o le lālā o Molimau a Ieova, lea e taʻua o Peteli. Ina ua ou taunuu iina, sa faateʻia aʻu ina ua ou iloa o le tamaloa e igoa ia Richard Mucha, e na o le lua tausaga e matua ai ia te au, sa avea ma ovasia o le lālā. I le 1955, ina ua mapuna aʻe se manaoga mo ni auauna o le matagaluega, e pei ona taʻua ai ovasia faimalaga i na taimi, na aofia ai aʻu i tane e toalima ia na valaauliaina e auai i lenei auaunaga.

O loʻu tofiga, o le setete o Rio Grande do Sul. Sa na o le 8 faapotopotoga o Molimau a Ieova ina ua amata ona ou galue ai, ae i totonu o le 18 masina na faavaeina ai ni faapotopotoga fou se 2, ma le 20 o vaega e tu mamao ese. I lena vaipanoa i aso nei, ua iai matagaluega e 15 o Molimau a Ieova, e taʻi 20 faapotopotoga i matagaluega taitasi! I le faaiuga o le tausaga e 1956, na faailoa mai ai ia te au e faapea, ua vaefāina laʻu matagaluega i ni matagaluega laiti ma o le a auauna ai ni auauna matagaluega se toʻafā. O le taimi lena na faatonuina ai aʻu ou te toe foi atu i Peteli mo se tofiga fou.

Na faateia aʻu ma sa lagona le fiafia tele ina ua tofia aʻu i Pasili i mātū e avea o se ovasia itumalo, o se faifeau faimalaga e auauna mo nisi o matagaluega. I Pasili la, sa iai le 12,000 o faifeau Molimau a Ieova, ma e lua itumalo i le atunuu. O Richard Wuttke sa auauna i le itu i saute, ae sa ou auauna i le itumalo i mātū. I Peteli, sa toleni ai i matou i le faagaoioia o se masini e faaali ai ata na saunia e Molimau a Ieova, The New World Society in Action ma le The Happiness of the New World Society.

Sa matuā faigata lava femalagaaiga i na aso. E leai se tasi o Molimau na iai se taavale, o lea, sa ou malaga ai i paopao, vaaālo, taavale toso e povi, solofanua, taavale solofanua, loli, ae faatasi i le vaalele. Sa avea o se fiafiaga le lele i luga aʻe o vaomatua o le Amasone ma tu laueleele ai i Santarém, o se aai i le totonugalemu o le va o Belém i le mulivai o le Amasone ma  Manaus, o le laumua o le setete o Amasone. I na aso, e laitiiti ni fonotaga matagaluega na auauna i ai ovasia itumalo, i lea na ou faaalu ai le tele o loʻu taimi i le faaalia o ata a le Sosaiete. E faitau selau tagata i aai tetele na auai.

O le mea na sili ona faafiafiaina ai aʻu i Pasili i mātū, o le vaega o Amasone. A o oʻu auauna ai iina ia Aperila 1957, na oso ai le Vaitafe o Amasone ma ona ālia i luga o ona auvai. Sa o se faaeaga ia te au le mafai ona ou faaalia se tasi o ata i le vaomatua, i le tautauina o se ie lautele i le va o ni laau se lua. O le malosi faaeletise na faaaogā mo le masini na sau mai i se vaaafi na taula i le vaitafe e lata ane. O le uluai ata lea na mafai ona maimoaina e le toatele o le aofia.

E lei pine mulimuli ane, ae ou toe foi mo le auaunaga i Peteli, ma i le tausaga na sosoo ai, i le 1958, na ou maua ai se faaeaga e auai i le Tauaofiaga Faavaomalo iloga a Molimau a Ieova, o le “Finagalo Tauatua” i le aai o Niu Ioka. O sui usufono mai atunuu e 123 sa auai faatasi ma le 253,922 o ē na faatumuina ai malae taalo o Yankee Stadium ma Polo Grounds i le aso faaiu o aso e valu o lena tauaofiaga.

Olioli i Suiga i Loʻu Olaga

E lei umi lava talu ona ou foi i Peteli, ae ma masani loa ma Clara Berndt, ma na faaipoipo ai ia Mati 1959. Na tofia i maʻua i le galuega matagaluega i le setete o Bahia, o iina pe tusa ma le tausaga o ma auauna ai. E manatua pea ma le olioli e i maʻua ma Clara le agamalu,  talimalo, maelega, ma le alofa o uso iina; na matitiva i latou i mea faitino ae tamaoaiga i fua o le Malo. Ona siitia atu lea o i maʻua i le setete o São Paulo. O iina i le 1960, na oo ai ina maitaga laʻu avā, na ma tuua ai loa le faiva faataimi atoa.

Na ma filifili ma te siitia atu i se vaipanoa i le setete o Santa Catarina, o iina na fanau ai laʻu avā. O la ma tama tama o Gerson, o le ulumatua o la ma fanau e toalima. Na pito mai ia te ia Gilson i le 1962, o Talita i le 1965, o Tárcio i le 1969, ma Janice i le 1974. E faafetaia Ieova ona o fautuaga lelei ua ia saunia, na mafai ai ona ma faafesagaia le luʻi o le tausia aʻe o fanau “i aoaiga ma tulafono a Ieova e suia ai le mafaufau.”—Efeso 6:4, NW.

E tāua tele i o ma manatu la ma fanau taitoatasi. Na matuā lelei ona faamatalaina e le faisalamo o ma faalogona e faapea: “Faauta, o le fanau, o le tofi lea mai ia Ieova.” (Salamo 127:3) E ui lava i faafitauli, ae ma te tausia pea la ma fanau e pei o se “tofi mai ia Ieova,” i le manatuaina o faatonuga o loo i lana Afioga. E tele lava ni taui. Na ma maua ai se olioli e lē mafaamatalaina ina ua auauai ona taulau manuia i latou uma e toalima i vala eseese, ma o a latou lava filifiliga ua faaalia ai o latou faanaunauga ina ia papatisoina e faatinoina ai lo latou tuuina atu ia Ieova.—Failauga 12:1.

O Filifiliga a la Ma Fanau

Na sili atu lo ma olioli ina ua faapea mai Gerson i le iuga o lana aʻoga i mea tau komepiuta, ua manao o ia e auauna i Peteli, i le filifilia o le faiva faataimi atoa nai lo o le galuega totogi. Peitai, o le olaga i Peteli i le taimi muamua, sa lei faigofie mo Gerson. Ina ua mavae la ma asiasiga ia te ia ina ua faatoʻā fa masina talu ona iai i Peteli, sa ou lagona lava le mafatia ina ua ou vaaia i ona foliga le faanoanoa ina ua ma ō ese mai. I le faata lea e i autafa o la ma taavale, sa ou iloa atu ai o loo ia tulimatai mai lava i maʻua seia oo ina ma pasia le uluai pioga o le auala. Sa tumu aʻu i loimata o lea na ou faatū ai le taavale i autafa o le auala, a o lei faaauauina la ma malaga e 430 maila (700 kilomita) i lo ma aiga.

Na oo lava ina fiafia moni Gerson i Peteli. Ina ua mavae le toetoe lava ono tausaga iina, na ia faaipoipo atu ai ia Heidi Besser, ma na la auauna faatasi ai i Peteli mo le isi lua tausaga. Na oo ina maʻitaga Heidi, ma tuua ai loa Peteli. O la la tama teine, o Cintia, ua ono nei tausaga le matua, ua ō atu faatasi ma i laʻua ia la latou galuega o le Malo.

E lei umi lava talu la ma uluai asiasiga ia Gerson i Peteli, ae faapea mai foi Gilson, o lē na seʻi faatoʻā faamaeʻaina lona tausaga muamua i le aʻoga i mea faapisinisi e faapea, ua manao foi o ia e auauna ai iina. O lana fuafuaga e faapea, a mavae se tausaga se tasi i Peteli, ona toe faaauau lea o lana aʻoga faapisinisi. Ae na suia ana fuafuaga, ma na tumau ai pea o ia i le auaunaga i Peteli. I le 1988, na faaipoipo atu ai o ia ia Vivian Gonçalves, o se paeonia, e pei ona taʻua ai faifeau faataimi atoa. Ma talu mai lena taimi, ua la auauna faatasi ai pea i Peteli.

Na faaauau lo ma olioli ina ua filifilia e la ma tama lona tolu o Talita le ulu atu i le auaunaga faapaeonia i le 1986 ina ua uma lana aʻoga i mea mea tau tusiata. I le tolu tausaga mulimuli ane, na valaaulia ai foi o ia i Peteli. I le 1991 na faaipoipo atu ai o ia ia José Cozzi, o lē sa auauna i Peteli mo le sefulu tausaga. O loo la faaauau ai iina o se ulugalii faaipoipo.

Sa ma toe olioli foi ma laʻu avā ina ua toe faia foi e Tárcio, o lē na sosoo mai ai le fuaiupu lava lea e tasi ua faatolu ona ma faalogo i ai e faapea, “Tamā, ua ou fia alu i Peteli.” Na talia lana tusi talosaga, ma i le 1991 na amata ai foi ona ia auauna i Peteli, ma na tumau ai pea o ia iina seia oo i le 1995. Ua ma fiafia ona sa ia faaaogaina lona maelega faatalavou e faaauiluma ai manaoga o le Malo o Ieova i lenei auala mo le sili atu i le tolu tausaga.

Na faia foi e la ma tama aupito laitiiti o Janice lana filifiliga e auauna ia Ieova ma na papatisoina o ia ina ua 13 ona tausaga. A o aʻoga pea o ia, sa auauna o se paeonia lagolago mo se tausaga. Ona oo lea ia Setema 1, 1993,  na amata ai loa ona paeonia sauatoa o ia i la matou faapotopotoga iinei i le aai o Gaspar.

Le Auala o le Taulau Manuia

O le ā le ki i le faatumauina o le autasi o se aiga i le tapuaiga ia Ieova? Ou te lē talitonu e na o le tasi se faiga faaletulafono faapitoa e foia ai faafitauli uma. Ua saunia e Ieova fautuaga i lana Afioga mo mātua Kerisiano e mulimuli ai, o lea e tatau ai ona tuuina atu le viiga uma ia te ia ona o iuga lelei ua matou olioli ai. Sa na ona matou taumafai lava e mulimuli i ana taʻiala. (Faataoto 22:6) Na tuufaasolo atu i la ma fanau uma lava se uiga o le iai o faalogona māfana ma le alofa lea e taatele i tagata Latina mai ia te au, ma se uiga masani o tagata Siamani o le faia o filifiliga poto mai lo latou tinā. Ae o le mea e aupito sili ona tāua na latou maua mai ia i maʻua o se tofi faaleagaga.

O lo matou olaga faaleaiga sa faaautū lava i manaoga o le Malo. O le faamuamua la o nei manaoga, sa lei faigofie. Mo se faataitaiga, sa faafaigata pea lava ia i matou ona tausisia se suesuega faale-Tusi Paia e lē aunoa a le aiga, ae peitai e matou te lei faavaivai ai. E mai lava i o latou uluai aso o le olaga, na avatu ai tamaiti taitoatasi i sauniga faa-Kerisiano faapea ma fonotaga ma tauaofiaga. E na o maʻi lava po o se isi faalavelave faafuasei na taofia ai i matou mai le auai. E faaopoopo i lea, i o latou tausaga talavou, sa matou ō faatasi ma tamaiti i le faiva faa-Kerisiano.

Ina ua tusa ma le taʻi sefulu o latou tausaga, na amata ai ona faia lauga a tamaiti i le Aʻoga o le Faiva Faatiokarate. Sa ma fesoasoani ia i latou e sauniuni a latou uluai lauga, i le faalaeiauina o i latou e faaaogā se auivi nai lo o se lauga faitau. Mulimuli ane, sa sauniuni ai e le tamaitiiti lava ia lana lava lauga. E lē gata foi i lea, ina ua i le va o le 10 ma le 12 tausaga, na amata ai ona latou auai taitoatasi e lē aunoa i le faiva. Ona pau lava lenei o le auala o le olaga na latou iloa.

Sa faia e laʻu avā o Clara se vaega sili ona tāua i le tausia o la ma fanau. I po uma lava, a o laiti lava i latou—o le taimi lea e mitiia uma ai i le mafaufau o se tamaitiiti e pei o se omomi mea na aʻoaʻoina ai—e faitau ai e Clara se tala mai le Tusi Paia ia i latou ma tatalo faatasi ma i latou taitoatasi. Sa ia faaaogā lelei tusi, From Paradise Lost to Paradise Regained, Listening to the Great Teacher, ma Laʻu Tusi o Tala o Le Tusi Paia. * Ina ua amata ona maua lipine pueleo ma vitiō na saunia e Molimau a Ieova, na matou faaaogaina foi na fesoasoani.

O le mea na oo ia i maʻua i le avea o ni mātua Kerisiano, ua faamautinoa ai e faapea, e manaomia e tamaiti le uai totoʻa atu i ai i aso taitasi. O le alofa loloto, naunau totino, ma le lava o taimi e faaaluina ma i latou, o nisi na o manaoga autū o le ʻau talavou. Sa lē gata ina ma vāai i na mea o lo ma tiute tauave faamātua e faamalie ai nei manaoga i le mea aupito sili ua ma mafaia e tusa ai ma lo ma tomai, ae na maua ai foi le fiafia tele i le faia faapea.

E moni, o se fiafiaga mo mātua le iloa o le faataunuuina o nei upu i le Salamo 127:3-5: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia. E pei o u fanafana i le lima o le toa, e faapea lava atalii o taulelea. Amuia le tagata ua tumu ai lana utu.” O le auauna ia Ieova o se aiga autasi ua māfua moni ai lo matou olioli!

[Faaopoopoga i lalo]

[Ata i le itulau 26]

O Antonio Santoleri ma lona auaiga vavalalata