E Tatau Ona fai a Tatou Miti

E FAI ea ni au miti? O le a lē afaina pe a e tali mai ioe, auā tatou te miti uma lava a o tatou momoe, e tusa lava foi pe tatou te faapea atu e leai. E matauina faapea pe ā ma le sili atu i le 95 pasene o miti uma lava e lē manatuaina. O fea miti e te manatuaina? O le tulaga masani, o miti tatou te manatuaina o miti ia e fai ae tatou ala mai loa.

Ua mātauina e i latou e suesueina miti e faapea o le moe o se faiga e faasolosolo loloto i itula amata, ona faasolosolo atu ai lea i le tulaga ua teʻiteʻi gofie. O le vaitaimi e masani ona fai ai miti o le taimi e topetope ai le gaoioi o mata, e taʻua o le REM. O faagasologa taitasi e lē topetope ai le gaoioi o mata (non-REM) ma topetope ai le gaoioi o mata (REM), pe ā ma le taʻi 90 minute le umi, ma o nei faagasologa e oo atu i le faalima po o le faaono ona fai i le po, o le taamilosaga mulimuli lava ae tatou feala loa.

E matuā sese pe a e manatu e faapea ua faaitiitia galuega a lou faiʻai a o e moe. Ua mātauina le sili atu ona ala le faiʻai i le taimi e miti ai le tagata nai lo nisi taimi a o ala, vaganā ai ni neroni faapitoa o le faiʻai lea e fesootai atu i le manatuaina o mea ma le uaʻi atu. O le vaega lea o le faiʻai e mālōlō i le vaitaimi o le moe lea e taʻua o le REM. Peitai o le tulaga masani lava ia, o sela neura i le faiʻai e faaauau pea ona fesootai i latou.

O o tatou faiʻai o se vaega lavelave e maofa ai, o o tatou tino, o loo iai le faitau piliona o vaega eseese e latou te avatua faailoilo pe ā ma le selau i le lua selau po o le tolu selau i le sekone. E sili atu le tele o vaega eseese ia o le faiʻai o le tagata e toatasi nai lo tagata o i le lalolagi. O isi tagata suesue e latou te fuafuaina e faapea e mai le 20 piliona agaʻi i le sili atu i le 50 piliona o nei vaega eseese. O lenei lavelave ua faamautuina ai le mea na fai mai ai le tusitala o le Tusi Paia o Tavita e faatatau i le tino o le tagata: “Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia.”—Salamo 139:14.

O le Lalolagi o Miti

A o tatou feala, e faaauau ona avatu e lagona e lima o o tatou tino ia faamatalaga ma faatusa o mea i o tatou faiʻai, ae e lē faia faapea i le taimi tatou te momoe ai. E fai aʻe e le faiʻai ana lava faatusa o mea e aunoa ma se fesootaiga ma o tatou lagona e lima o le tino. O le mea lea, o mea tatou te vaai i ai ma tutupu i le taimi o le miti ua na o ni ata faalemafaufau ae lē saʻo. O le pogai lena e mafai ai ona tatou faia mea e feteenai i tulafono o le kalave, e i ai le lele e pei o se tama lele po o le paʻū mai i se tofē e aunoa ma le manuʻa ai. E ono suia foi le taimi, o mea ua leva ona teʻa ae ua foliga mai o loo tutupu i le taimi nei lava. Ia po o tatou taumafai foi e tamomoe ese atu, ae foliga mai e lē mafai ona tatou faia se gaoioiga—e lē o fia gaoioi o tatou vae. E oo foi i o tatou lagona malolosi ma mea e oo ia i tatou i taimi a o tatou feala, e mafai foi ona aafia i a tatou miti. O le toatele o i latou e oo i ai mafatiaga e mataʻu ai ona o taua, e lē faigofie ona galo ia i latou na mea, e lē faigofie foi i se tasi ona galo le osofaia o ia e se tagata solitulafono. O mea e tutupu faapena i taimi a o tatou feala e mafai ona tatou toe miti i ai, e tupu ai le fefe. O mea lava e masani ai, afai tatou te  mafaufau i ai a o le a tatou momoe e mafai ona toe miti i ai.

O nisi taimi a o tatou taumafai e foia se faafitauli, ae oo mai le vaifofo ia i tatou i le taimi o tatou momoe. E ono faaalia ai i lenei tulaga e faapea e lē o le taimi atoa lea e moe ai e miti ai foi. E iai foi se vaega e manatunatu ai.

Na mātauina e se tusi e uiga i miti ma o tatou faiʻai e faapea: “O le gaoioiga e masani ai a le mafaufau pe a moe e lē o le miti ae o le manatunatu. O le manatunatu a o moe e lē o uunaia e lagona o le tino ma e lē o se tulaga e lē masani ai. E agaʻi i mea masani, e masani lava e faatatau i mea tutupu o le olaga a lē o le taimi ua teʻa, ia o le lumanai, ma e masani lava o mea e masani ai ma fai soo.”

E manatu nisi tagata o mea o latou miti i ai o loo iai ni feau faapitoa mo i latou. Ina ia mafai ona faamatalaina a latou miti, latou te teuina se tamai api ina ia tusia ai a latou miti i le taimi lava latou te feala mai ai. Na tusia e Ann Faraday i lana tusi e taʻua o le Dream Game se faamatalaga e faatatau i tusi o loo taumafai e faamatala uiga o miti, fai mai a ia: “O tusi e faatatau i miti, lea o loo suʻe atu i ai ina ia iloa le uiga o miti e matuā lē aogā lava, e tusa lava pe o faiga masani ia po o le faavae foi i talitonuga i ona po nei i mea tutupu i le amio ma le mafaufau.”

Ona e foliga mai o miti e pogai faapitoa lava mai le faiʻai, o se tulaga lē fetaui la pe a manatu o loo iai ni feau faapitoa mo tatou. E ao ona tatou vaai i ai o se gaoioiga e masani ai o le faiʻai, o loo fesoasoani ina ia faatumauina i se tulaga lelei.

Peitai, e faapefea i latou e fai mai sa miti ua maliu se tasi o lona aiga ia po o se uo foi ae oo ane i le aso e sosoo ai ua oti lena tagata? Pe ua faaalia ai ea le mafai e miti ona valoiaina le lumanai? I le mataupu o le a sosoo mai, o le a tatou talanoaina ai po o le ā o i tua o miti faavaloaga.