Lipoti a Ē Faalauiloa le Malo

Faaauau Ona Talaʻia Upu Moni o le Tusi Paia i Aialani

I TAUSAGA talu ai nei, na oo ai i le atunuu matagofie o Aialani ni vevesiga se tele. I le taimi lava e tasi, na tali atu ai ma le naunau tagata Aialani i le feau o le faamoemoe mai le Tusi Paia na avatua ia i latou e Molimau a Ieova. Ua faamaonia mai lena tulaga i tala o loo mulimuli mai i mea na tutupu i Aialani.

■ I Dublin na auai atu ai se tasi o Molimau a Ieova ma sona afafine laitiiti i le galuega talaʻi mai lea fale i lea fale. Na latou feiloai ai ma se fafine e igoa ia Cathy o lē na pisi tele ona o lana fanau toatele. Na fesili le Molimau pe mafai e lona afafine, o lē o loo tau aʻoaʻo le auala e talaʻi ai, ona faamatala atu se feau puupuu ia te ia. Na ioe i ai Cathy, ma sa avatu loa e lenei teineitiiti se taulimaga manino, ma le saunia lelei. Na matuā ofo Cathy ona o le talanoa faamaoni ma le faaaloalo o lenei talavou, ma sa ia talia loa le ofo o le sāvali faale-Tusi Paia.

Mulimuli ane, na toe manatunatu Cathy i sauniuniga ma le amio lelei a le teineitiiti laitiiti na asia o ia. “Sa faateʻia aʻu ona ua mafai ona auai se teineitiiti i sea ituaiga o feau matagofie e aunoa ma le manatu ifo ia te ia lava,” o lana faamatalaga lea. “Sa ou mafaufau ai loa o le isi taimi e toe asiasi mai ai Molimau a Ieova o le a ou faalogo atu ia i latou.”

O le taimi lena ua siitia atu Cathy i se nuu laititi i le itu i saute i sisifo o Aialani e latalata i tuaoi o itumalo o Cork ma Kerry. I se taimi mulimuli ane, na tuʻituʻi atu ai Molimau a Ieova i lona faitotoa, ma sa ia valaauliaina loa i latou i totonu. Na ia taliaina se suesuega faale-Tusi Paia faifai pea ma ua auai atu nei i sauniga a le faapotopotoga ma nisi o lana fanau. Ua talisapaia e Cathy le faanaunauga moni o lenei teineitiiti i le tufaina atu o le tala lelei ia te ia.

■ I le vaipanoa o Tullamore, na faia ai ni talanoaga faale-Tusi Paia a Molimau ma se fafine e igoa ia Jean i le sili aʻe ma le fitu tausaga. I nisi o taimi na te faaalia ai le fiafia ma talia lomiga, ae i nisi o taimi e mou atu ai lona fiafia. I se tasi aso, ina ua asiasi ane se Molimau e igoa ia Falanisisi ma lana uo ia Jean, na la mātaulia ai lona uiga faatautee. “E tusa lava po o le ā sa ma tala na fai atu, ae na atili ai lona ita,” o le lipoti mai lea a le Molimau. “Mulimuli ane, na ia faapea mai ma te ō ese i se uiga lē migao ma tapuni mai le faitotoa.”

Na tau mānatu Falanisisi pe faamata o le tulaga foi lea o le a tupu i isi asiasiga. ‘Atonu ua lē tatau ona toe asiasi atu ia te ia pe afai e lē fiafia moni o ia i le feau,’ o mafaufauga ia o Falanisisi. Ae peitai, na la talanoaina le mataupu ma lana tane, o Tomasi, ma sa ia te ia se faalogona mautinoa. O le isi taimi na ō atu ai i le vaipanoa lava lea, na toe asia ai foi Jean. Na faaleuo ane o ia ma talia kopi o le mekasini o Le Olomatamata ma le Ala Mai! Sa taulau isi asiasiga, ma na amata ai loa e Tomasi ma Falanisisi se suesuega faale-Tusi Paia faifai pea ma ia i lona aiga.

O le ā le mafuaaga o le suiga? Ua faamatala e Jean e faapea i le taimi sa faaalia ai lona lē faaaloalo i Molimau, na faatoʻā uma ai ona fanau ma e lei leva ona teʻa mai le falemaʻi. Ona sa susu ia te ia lana pepe fou a o loo fafaga le isi ana pepe, sa na o le itula ma le ʻafa e moe ai i le po. “Sa leai soʻu fiafia e talanoa i ni tapuaiga,” o le tala mai lea a Jean.

I totonu o le lua masina ae ua auai atu Jean i sauniga uma a le faapotopotoga, ma i le fa masina na sosoo ai na auai ai i le faiva i le fanua. I le sefulu masina mai le taimi na amata ai lana suesuega faale-Tusi Paia, sa papatisoina ai. O lea, o le mea na tupu ia Jean lava ia, ua fesoasoani ia te ia i lana faiva. Ua ia faamatala mai e faapea: “Afai ou te feiloai i se tasi e lē migao, ou te taumafai ia ou malamalama. E masani ona ou faamaumauina i lalo. Atonu e suia le tulaga i se isi taimi ou te toe foi ane ai; atonu ua lelei ai faalogona o le tagata ma sili atu ona tali lelei mai.”