Le Talimalo Faa-Kerisiano i Totonu o se Lalolagi Fevaevaeai
Le Talimalo Faa-Kerisiano i Totonu o se Lalolagi Fevaevaeai
“O lea e tatau ai ona tatou talimalo i tagata faapea, ina ia avea ai i tatou o se aufaigaluega faatasi i le upu moni.”—3 IOANE 8, NW.
1. O ā meaalofa e sili ona moomia ua tuuina mai e Lē na Foafoaina Mea i tagata?
“UA LEAI se mea lelei i le tagata i lalo o le la, na ona ia ʻai, ma inu, ma olioli; auā e tumau lea ia te ia mai lana galuega, i aso o lona ola, ua foaiina mai e le Atua ia te ia i lalo o le la.” (Failauga 8:15) O upu na ua taʻu mai ai ia i tatou e le failauga anamua mai Eperu e faapea, e lē gata ina finagalo Ieova le Atua ia olioli ma fiafia lana foafoaga faaletagata ae ua ia saunia foi mea mo i latou ina ia faia ai faapea. I le gasologa o talafaasolopito o le tagata, e foliga mai e tasi le faanaunauga e tutusa uma ai tagata i so o se vaipanoa, o le manaoga lea ina ia faafiafia i latou.
2. (a) Ua faapefea ona faaaogā sese e tagata le mea na fuafuaina e Ieova mo i latou? (e) O le ā le iuga?
2 I aso nei, ua tatou ola ai i se soifuaga masani ua sili atu ona faatāua e tagata mea faafiafia, lea ua matuā sulu ma le ulu ai i le sailia o faafiafiaga. Ua oo ina avea le toatele o tagata ma “e alolofa i latou ia i latou, . . . o e ua tele le manao i mea faafiafia a e leai se manao i le Atua,” e pei ona valoia mai e le Tusi Paia. (2 Timoteo 3:1-4) O le mea moni, o lenei mea ua matuā ese mamao mai le mea na fuafuaina e Ieova le Atua. Pe a oo ina avea le sailia o le faafiafiaina o se sini autū, pe avea le faamalieina o le tagata lava ia ma taulaʻiga e tasi, ona leai lea o se faamalieina moni, ma ‘avea ai mea uma o ni mea faatauvaa ma le ʻai a le matagi.’ (Failauga 1:14; 2:11) O le iuga, ua tumu le lalolagi i tagata ua lagona le tuua toatasi ma lagona fiu, lea ua iu ina taʻitaʻiina ai i le tele o faafitauli i tagata. (Faataoto 18:1) Ua femasalosaloai tagata, ma ua fevaevaeai le va o lanu, o ituaiga, o tulaga i le soifuaga, ma i itu tau tamaoaiga.
3. E mafai faapefea ona tatou maua le olioli ma le faamalieina moni?
3 Maeu le ese na semanū e iai mea pe ana fai e faataitai tagata i ala o loo feutagai ai Ieova ma isi—i le agalelei, le aaomafola, le talimalo! Sa ia faamanino mai e faapea o le ki i le fiafiaga moni e lē faalagolago atu i lo tatou taumafai e faamalie o tatou lava faanaunauga. Ae o le ki lenei: “E sili le manuia o le na te foai atu, i lo le na te talia mai.” (Galuega 20:35) Ina ia maua le olioli ma le faamalieina moni, e tatau ona tatou manumalo mai faasasaaga ma fevaevaeaiga na atonu e taofiofia ai i tatou. Ma e tatau ona tatou amanaia i latou o loo tatou auauna faatasi atu ia Ieova. E manaomia tele ona tatou utagia le fautuaga: “O lea e tatau ai ona tatou talimalo i tagata faapea, ina ia avea ai i tatou o se aufaigaluega faatasi i le upu moni.” (3 Ioane 8, NW) O le faaalia o le talimalo i ē ua tatau i ai, i le tele e mafaia e o tatou tulaga, e lua ni vala ua aogā ai—e aogā mo ē foai atu ma ē o loo talia maia. O ai la, i latou, o loo aofia i ē ua tatau i ai lea e ao ona tatou ‘taliaina i se uiga talimalo’?
ʻIa Tausia Ē Mātua Oti ma Fafine ua Oti a Latou Tane’
4. O le ā le suiga i faiā faaleaiga ua vaaia e oo lava i totonu o nisi o tagata o Ieova?
4 Ua seāseā maua i aso nei ni aiga mautū ma ni faaipoipoga fiafia. O le faatupulaia o talagā faaipoipoga ma le aofai faateleina o tinā ua faifanau e aunoa ma ni faaipoipoga i le lalolagi atoa, ua suia vave ai le tulaga o aiga e masani aʻi. O le iuga, e toatele ē ua avea ma Molimau a Ieova i ni tausaga e lei leva tele atu e ō mai i latou mai aiga malepelepe. A lē o ni ē ua tatala a latou faaipoipoga pe ua teteʻa ma a latou paaga faaipoipo, pe o nisi o i latou o loo iai i ni aiga e taitoatasi mātua. E lē gata i lea, e pei ona valoia e Iesu, o le upu moni ua ia aʻoaʻoina ua iu ai i fevaevaeaiga i le tele o aiga.—Mataio 10:34-37; Luka 12:51-53.
5. O le ā na fetalai Iesu e mafai ona avea ma puna o faalaeiauga ia i latou o loo i aiga e lē o iai uma le auaiga i le tapuaiga moni?
5 O se faamafanafanaloto ia i tatou le vaai atu i ē fou o loo tutū mausalī mo le upu moni, ma e masani ona tatou faamatalaloto ia i latou i le folafolaga faalaeiau a Iesu: “E moni, ou te fai atu ia te outou, ai se tasi ua ia tuua le fale, po o uso, po o tuafāfine, po o le tinā, po o le tamā, po o le fanau, po o fanua, ona o aʻu ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola faavavau.”—Mareko 10:29, 30.
6. E mafai faapefea ona avea i tatou o ni ‘uso, ni tuafāfine, ni tinā, ma ni fanau’ i “e mātua oti ma fafine ua oti a latou tane” o loo tatou iai faatasi?
6 Ae, o ai nei ‘uso ma tuafāfine ma tinā ma fanau’? O le tau ina vaai atu i le aofaiga tele o tagata i le Maota o le Malo, e masani pe toʻa selau pe sili atu, o ē ua faapea mai o i latou o uso ma tuafāfine, e lē otometi ai ona lagona e se tagata faapea o ona uso, tuafāfine, tinā, ma fanau i latou ia. Seʻi mafaufau i le manatu lenei: Ua faamanatu mai e le soo o Iakopo ia i tatou e faapea, ina ia taliaina e Ieova la tatou tapuaiga, e tatau ona tatou ‘tausia ē mātua oti ma fafine ua oti a latou tane i o latou puapuaga ma ia leoleo foi i tatou ia i tatou lava ina ia lē pisia mai le lalolagi.’ (Iakopo 1:27) O lona uiga, e lē tatau ona tatou faataga uiga faalelalolagi o le faamaualuga i le telē o so tatou tamaoaiga pe maualuluga ni o tatou tulaga i le soifuaga, e tatou te lē faaalia atu ai le alofa mutimutivale i na tagata “mātua oti ma fafine ua oti a latou tane.” Nai lo lea, e tatau ona tatou tausolomua e faasafua atu ia i latou o tatou lagona faaleuso ma le talimalo.
7. (a) O le ā le fuafuaga moni o le faaalia o le talimalo i “e mātua oti ma fafine ua oti a latou tane”? (e) O ai foi isi e mafai ona auai i le faaali atu o le talimalo faa-Kerisiano?
7 O le faaalia o le talimalo i “e mātua oti ma fafine ua oti a latou tane” e lē faapea ai o taimi uma lava e tatau ona avatu ai ia i latou ni meafaitino latou te lē o maua. E lē faapea o aiga e taitoatasi mātua pe lē o tapuai faatasi le auaiga ona lē lelei ai lea o lo latou tulaga tau tupe. Ae peitai, o se auaufaatasiga e aogā, ni taaʻiga lelei e faaalia i le aiga, le fegalegaleai faauso ma tagata o so o se matua, ma le fetufaʻi o mea lelei faaleagaga—o vala nei o le olaga e sili atu ona faatāuaina. O lea, o le manatuaina faapea e lē o le faatelē naʻuā o se faatasiga, ae o le iai o le agaga o le alofa ma le autasi e faitaulia, i nisi la taimi, e maeu le manaia, pe a oo lava foi i “e mātua oti ma fafine ua oti a latou tane” e mafai ona latou faaali atu le talimalo i o latou uso Kerisiano!—Faatusatusa i le 1 Tupu 17:8-16.
Pe o Tatou Faatasi ma ni Tagata Ese?
8. O le ā le suiga ua vaaia i totonu o le tele o faapotopotoga a Molimau a Ieova?
8 O loo tatou ola nei i se vaitaimi o le faateleina o tagata femalagaai solo. Ua faapea mai le World Press Review: “E silia i le 100 miliona tagata i le lalolagi aoao o loo nonofo i atunuu e lē o ni o latou atunuu moni, ma le toʻa 23 miliona ua aveesea faamalosi mai o latou lava atunuu moni.” O le iuga o lenei mea, ua tele ai vaipanoa, ae maise lava i aai tetele, o faapotopotoga a tagata o Ieova ia sa masani ona toatele lava i tagata o se lanu e tasi po o se atunuu e tasi, ae i le taimi nei ua iai tagata mai vaega eseese uma o le lalolagi. Pe atonu e moni lenei mea i le vaipanoa o loo e iai. Peitai, o le ā la tatou vaaiga e tatau ona iai mo nei “tagata aumau” ma “tagata ese,” e pei ona o loo faaigoa ai i latou e le lalolagi, o ē atonu e ese la latou gagana, o a latou tū masani, ma o latou olaga o loo ola ai, mai ia i tatou?
9. O le ā le mailei matautia e mafai ona maileia ai i tatou e faatatau i la tatou vaaiga i “ē aumau” ma “tagata ese” o loo gasolo mai i le faapotopotoga Kerisiano?
9 Pe a faafaigofie, e lē tatau ona tatou faatagaina so o se lagona fefe po o le ʻinoʻino i tagata ese e māfua ai ona ia i tatou se lagona faapea atonu ua sili atu ona talafeagai ia i tatou le faaeaga e iloa ai le upu moni nai lo o i latou mai ni atunuu ese po o ni atunuu o loo faapea e faapaupau; e lē tatau foi ona tatou manatu e peiseai o nei tagata fou e lē talafeagai ona latou faaaogaina le Maota o le Malo po o isi meatotino. Sa tatau ona faamanatu atu e le aposetolo o Paulo i nisi Kerisiano Iutaia o le uluai senituri, o ē sa teulotoina na vaaiga e faapea, e mautinoa lava e leai se tasi sa talafeagai lona mauaina o ni lelei; o le alofa tunoa o le Atua lea ua mafai ai e so o se tasi ona maua le faaolataga. (Roma 3:9-12, 23, 24) E tatau ona tatou olioli ona ua oo atu nei le alofa tunoa o le Atua i le toatele o tagata o ē, ona o mafuaaga eseese, sa latou lē maua le avanoa e faalogo ai i le tala lelei. (1 Timoteo 2:4) E mafai faapefea ona tatou faaali atu e matuā moni lo tatou naunau fiafia ia i latou?
10. E mafai faapefea ona tatou faaali atu o loo tatou faaalia moni lava le talimalo i “tagata ese” o loo tatou iai faatasi?
10 E mafai ona tatou faataitai i le timaʻiga a Paulo: “Ia outou talia ai le tasi e le tasi, faapei o Keriso foi ona talia o i tatou, e oo ai le viiga i le Atua.” (Roma 15:7) I le nofouta faapea, o tagata mai isi atunuu po o isi talaaga o le olaga e masani ona latou lē tagolima, e tatau ai ona tatou faaali atu ia i latou le agalelei ma le manatu mamafa pe afai e mafai ona tatou faia faapea. E tatau ona tatou talia i latou i a tatou faatasitasiga, ia feutagai ma i latou “e tusa lava ia . . . ma le tama a le eleele,” ma ia “alofa atu ia te ia e pei o oe lava ia te oe.” (Levitiko 19:34) Atonu e lē faigofie ona fai lenei mea, ae o le a tatou taulau manuia pe a tatou manatua le fautuaga: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.”—Roma 12:2.
Ia Fetufaʻi ma le ʻAu Paia
11, 12. O le ā le manatunatu faapitoa na avatu i nisi o auauna a Ieova i (a) Isaraelu anamua (e) le uluai senituri?
11 O Kerisiano taʻumatuaina o ē o loo tautiga mo lo tatou lelei faaleagaga, ua aofia ai ia i latou ua tatau i ai lo tatou manatunatu ma le talimalo. Sa faia e Ieova ni sauniuniga faapitoa mo ositaulaga ma le ʻau sa Levī i Isaraelu anamua. (Numera 18:25-29) I le uluai senituri, sa talosagaina ai foi Kerisiano ina ia tausi atu i ē sa auauna ia i latou i ni vala faapitoa. O le faamatalaga i le 3 Ioane 5-8 ua faaemo mai ai ia i tatou le ata o le fusi vavalalata o le alofa lea na iai i uluai Kerisiano.
12 Sa matuā faatāua e le aposetolo matua o Ioane le agalelei ma le talimalo lea na faaalia e Kaio i nisi o uso femalagaai na aauina atu e asiasia le faapotopotoga. O nei uso—e aofia ai Tioterifi, e foliga mai na ia faaoo atu le tusi a Ioane—sa avea i latou uma o ni tagata ese pe na lei masani muamua ai Kaio. Peitai sa talia lelei i latou “auā na latou o atu ona o lona suafa [le suafa o le Atua].” Ua faaupu mai e Ioane faapenei: “O lea e tatau ai ona tatou talimalo i tagata faapea, ina ia avea ai i tatou o se aufaigaluega faatasi i le upu moni.”—3 Ioane 1, 7, 8, NW.
13. O ai o loo iai faatasi ma i tatou i aso nei ua sili ona tatau i ai le ‘talimalo’?
13 I aso nei, i totonu o le faalapotopotoga a Ieova, e toatele i latou o loo latou matuā faamalolosi mo le lelei o le faalapotopotoga atoa o uso. E aofia ai ovasia femalagaai, o loo faaalu o latou taimi ma malosi i lea vaiaso ma lea vaiaso i le atiina aʻe o faapotopotoga; o misionare, ua tuua o latou aiga ma uo ina ia talaʻi atu i atunuu ese; o i latou o loo auauna i aiga Peteli po o ofisa o lālā, ua tauofo atu a latou auaunaga ina ia lagolagoina ai le galuega talaʻi i le lalolagi aoao; ma i latou o loo i le auaunaga faapaeonia, o loo faaalu le tele o vaega o o latou taimi ma le malosi i le faiva i le fanua. O le mea moni lava, o i latou uma nei o loo galulue mamafa, e lē mo se viiga po o se manuia o le tagata lava ia, ae ona o le alofa mo le auuso Kerisiano ma le alofa mo Ieova. Ua onomea ona tatou faataitai atu ia i latou ona o lo latou tuutoina atu ma le loto atoa, ma ua tatau ia i latou le ‘talimalo.’
14. (a) E faapefea ona avea i tatou o ni Kerisiano e sili atu ona lelei pe a tatou faaalia le talimalo i ē faatuatua? (e) Aisea na fetalai ai Iesu faapea sa filifilia e Maria le “mea lelei”?
14 Pe a tatou “talimalo i tagata faapena,” ua faapea mai le aposetolo o Ioane, e “avea ai i tatou o se aufaigaluega faatasi i le upu moni.” O lona uiga, o le a iu ai i le avea o i tatou o ni Kerisiano ua sili atu ona lelei. Ua māfua lenei tulaga ona o galuega faa-Kerisiano e aofia ai le faia o mea lelei i uso talitonu. (Faataoto 3:27, 28; 1 Ioane 3:18) O loo iai taui i se isi foi itu. Ina ua talia Iesu e Maria ma Mareta i lo la fale, sa manao Mareta ia avea o ia o sē talimalo lelei e ala i le saunia o ni “mea e tele” mo Iesu. Sa faaalia e Maria le talimalo i se auala e ese mai. Sa “nofo o ia i lalo i tafatafa o vae o Iesu, ma faalogo i lana fetalaiga,” ma na faamālō atu Iesu ia te ia mo le filifilia o le “mea lelei.” (Luka 10:38-42) O ni talanoaga ma i latou ua autausagā lo latou tomai e masani lava ona avea o ni faatumutumuga i se afiafi e faatasitasi ai ma i latou.—Roma 1:11, 12.
I Faatasiga Faapitoa
15. O ā faatasiga faapitoa atonu e faamaonia le avea o ni taimi mananaia mo tagata o Ieova?
15 E ui e lē o mulimuli atu Kerisiano moni i tū masani ua taatele po o le tausia o ni aso mālōlō ma ni aso faamanatu faalelalolagi, ae o loo iai faatasiga latou te faapotopoto ai ina ia olioli i aufaatasiga a le tasi i le isi. Mo se faaaoaoga, na auai atu Iesu i le tausamaaga o se faaipoipoga i Kana ma faia ai sona sao i le olioli o le faatasiga e ala i le faatino ai iina o lana uluai vavega. (Ioane 2:1-11) Ua faapena foi i aso nei, e iai taimi e fiafia faatasi ai tagata o Ieova i ni faatasiga faapitoa faapena, ma o faamanatuga ma fiafiaga talafeagai e atili ai ona olioli na faatasiga. Ae, o le ā la e talafeagai?
16. O ā taʻiala ua ia i tatou i amioga tatau e faaalia e oo lava i faatasiga faapitoa?
16 I lo tatou suesueina o le Tusi Paia, ua tatou iloa ai amioga e talafeagai mo Kerisiano, ma tatou te tausisia na amioga i taimi uma lava. (Roma 13:12-14; Kalatia 5:19-21; Efeso 5:3-5) O faatasitasiga mo fiafiaga, pe o ni faaipoipoga po o nisi lava mea, e lē faatagaina ai i tatou e lafoaia a tatou tapulaa faa-Kerisiano pe faia ni mea e lē masani aʻi ona tatou fai; e lē faatagaina ai foi i tatou e faatino tū masani uma a le atunuu lea o loo tatou nonofo ai. E tele nisi o na tū masani ua faavae aʻe i ni faiga faalotu sese po o ni talitonuga i faiga faataulaitu, ma o nisi tū masani e aofia ai amioga ua manino le lē taliaina e Kerisiano.—1 Peteru 4:3, 4.
17. (a) O ā vala ua faaalia ai o le tausamaaga o le faaipoipoga lea na fai i Kana sa lelei ona faamaopoopoina ma lelei le vaavaaiga? (e) O le ā e faaalia ai sa faamaonia e Iesu lena faatasiga?
17 Pe a faitauina le Ioane 2:1-11, e lē faigata ai ia i tatou ona iloa o lea faatasiga sa matuā telē ma e toatele ni malo na iai. Ae peitai, sa iai iina Iesu ma ona soo o ni malo ‘na valaaulia’; latou te lei oso faalava atu i ai, e ui lava atonu o nisi o i latou e aiga atu i lē na talimalo. Tatou te mātauina foi, sa iai i latou o ē na “auauna” faapea ma “lē pule i le tausamaaga,” sa ia avatua faatonuga i mea sa tatau ona laulau atu pe faia. O nei mea uma e faaalia mai ai sa lelei ona faamaopoopoina ma talafeagai le vaavaaiga o le faatasiga. Ua faaiu le tala i le faapea mai, o le mea na faia e Iesu i le tausamaaga, na “faaali mai ai lona mamalu.” Pe faamata ea na te filifilia lena faatasiga e faia ai sana vavega pe ana fai o se fiafiaga e malomaloā ma lē pulea lelei? E mautinoa e leai.
18. O ā manatunatuga tāua e tatau ona mafaufau i ai i so o se faatasiga mo fiafiaga e fai?
18 E faapefea la ni faatasiga faapitoa atonu tatou te talimalo ai? Tatou te mananao e manatua o le fuafuaga na tatou talimalo ai i isi ina ia mafai ona “avea ai i tatou o se aufaigaluega faatasi i le upu moni.” O lea, e lē lava le tau ina taʻu se mea e fai faapea o se faatasitasiga a “Molimau.” Atonu e fesiligia le fesili, Pe o le mea moni ea o se molimau atu i le po o ai i tatou ma o ā mea o tatou talitonu ai? E lē tatau lava ona tatou manatu i na faatasiga o se avanoa e iloa ai po o le ā le mamao e mafai ona tatou faataitaia ai ala o le lalolagi, i le losilosi atu i “le tuʻinanau o le tino, ma le tuʻinanau o mata, ma le faalialia o lenei olaga.” (1 Ioane 2:15, 16) Nai lo lea, e tatau i nei faatasiga ona atagia tonu atu ai la tatou matafaioi o ni Molimau a Ieova, ma e tatau ona tatou mautinoa o a tatou amioga e faamamaluina ai Ieova.—Mataio 5:16; 1 Korinito 10:31-33.
‘Ia Talimalo ma le Lē Muimui’
19. Aisea e manaomia ai ona tatou “talimalo le tasi i le isi ma le lē muimui”?
19 A o faasolo pea ina faaleagaina tulaga o le lalolagi ma ua atili fevaevaeai tagata, e manaomia ona tatou faia mea uma tatou te mafai ina ia faamalosia ai le fusi vavalalata lea o loo iai i Kerisiano moni. (Kolose 3:14) Ona o lenei tulaga, e tatau ai ona ia i tatou le “alofa naunau o le tasi i le tasi,” e pei ona aioi mai ai Peteru ia i tatou. O lea, i ni upu talafeagai, ua ia faaopoopo mai: “Ia talimalo le tasi i le isi ma le lē muimui.” (1 Peteru 4:7-9, NW) Po o tatou nofo sauni ea e tausolomua ona talimalo atu i o tatou uso, ia tatou vilivilitai e agalelei atu ma loto fesoasoani? Pe o tatou muimui pe a tulai mai lena avanoa? Afai o tatou faia faapea, ua tatou misia la le olioli e ono mafai ona tatou maua ma tatou misia ai le taui o le fiafiaga mo le faia o le mea lelei.—Faataoto 3:27; Galuega 20:35.
20. O ā faamanuiaga tatou te faatalitalia pe a tatou faaalia le talimalo i aso nei i se lalolagi fevaevaeai?
20 O le galulue vavalalata ma o tatou uso Kerisiano, le faaalia o le agalelei ma le talimalo o le tasi i le isi, o le a aumaia ai le anoanoai o faamanuiaga. (Mataio 10:40-42) O i latou na sa folafola i ai e Ieova e faapea, o le a ‘ia malutia i latou. Latou te lē toe fia aai, e lē toe fia inu foi.’ Ina ia malutia e Ieova o lona uiga ia olioli i lana puipuiga ma lana talimalo. (Faaaliga 7:15, 16; Isaia 25:6) Ioe, ua latalata mai lava le faamoemoe o le olioli i le talimalo o Ieova e faavavau.—Salamo 27:4; 61:3, 4.
Pe Mafai Ona E Faamatalaina?
□ O le ā e lē tatau ona tatou faagaloina pe afai tatou te fia maua le olioli ma le faamalieina moni?
□ O ai “e mātua oti ma fafine ua oti a latou tane,” ma e tatau faapefea ona tatou “tausia” i latou?
□ E ao faapefea ona tatou manatu atu i “ē aumau” ma “tagata ese” o loo tatou iai faatasi?
□ O ai ē ua tatau ona manatunatu faapitoa atu i ai i aso nei?
□ E tatau faapefea i faatasiga faapitoa ona atagia atu ai le agaga moni o le talimalo?
[Fesili mo le Suʻesuʻega]
[Ata i le itulau 16, 17]
I faatasiga fiafia, e mafai ai ona tatou talimalo atu i tagata ese, i tamaiti ua mātua oti, i latou o loo i le auaunaga faataimi atoa, ma isi lava malo