Le Olaga pe a Mavae le Oti—E Faapefea, i Fea, ma o Afea?

UA AUMAIA e Lē na Foafoaina le tagata ma o Lē Foaiola lana faamaoniga e faapea, e lē faaiuina ai e faavavau le ola i le maliu o le tagata. E lē gata i lena, ua faamautinoa mai e le Atua ia i tatou e lē gata e mafai ona toe soifua mai mo se isi vaitaimi faatapulaaina, ae e mafai foi ona maua le avanoa e lē toe oo ai i le oti! Na faafaigofie mai ma le mautinoa e le aposetolo o Paulo e faapea: “O loo faamaoni mai ai e ia [le Atua] i tagata uma lava i lona toe faatu mai ia te ia [Iesu Keriso] i e ua oti.”—Galuega 17:31.

Ae, o loo iai pea fesili autū e tolu e lē o taliina: E faapefea ona toe soifua mai le tagata ua maliu? O afea e tupu ai lenei mea? O fea o le a mafai ona maua ai lenei soifuaga fou? I le lalolagi atoa, e eseese lava tali o loo maua mai e faatatau i nei fesili, ae o le ki tāua e maua mai ai le moni o le mataupu, o le mauaina lea o le malamalamaga saʻo i le mea e tupu i tagata i le taimi e latou te maliliu ai.

Pe o le Lē Mafai Ona Oti o le Tali Lea?

O le talitonuga o loo i le toatele e faapea, e iai se vaega o tagata soifua uma lava e lē mafai ona oti ae na o latou tino e maliliu. E mautinoa ua e faalogo i lena faamatalaga. O le vaega lea e faapea mai e lē mafai ona oti o loo faasino i ai i nisi taimi o le “solu” (soul) po o le “agaga.” E faapea le talitonuga e ola pea pe a oti le tino ona faaauau lea ona ola i se isi mea. E manino lava, o lea ituaiga talitonuga e lei faavae maia i le Tusi Paia. E moni, sa vaavaai atu i luma tagata Eperu anamua o loo taʻua i le Tusi Paia i se soifuaga pe a mavae le oti, ae e lē faapea o le a ola pea se vaega o o latou tino e lē oti. Sa latou tepa taulai atu i luma ma le mautinoa i le toe faafoisia mai i le ola i le lumanai e ala i le vavega o le toetu.

O le tamā matua o Aperaamo o se faataitaiga matilatila o se tasi sa iai le faatuatua i le toetutū mai o ē ua maliliu i le lumanai. I le faamatalaina o le loto malie o Aperaamo e ofo atu le taulaga i lona atalii o Isaako, ua taʻu mai ia i tatou e le Eperu 11:17-19 e faapea: “O le faatuatua na fai taulaga ai Aperaamo ia Isaako, ina o tofotofoina o ia, . . . Ua manatu o ia e mafaia e le Atua ona toe faatu mai tagata nai e ua oti, o lea foi na ia toe maua mai ai o ia, ua fai lea ma faatusa,” auā sa lei manaomia e le Atua ona osi atu le taulaga ia Isaako. O nisi faamaoniga atili o le muai iai i tagata Isaraelu o le talitonuga e faapea e mafai ona latou toe foi mai i le ola i se taimi mulimuli ane (nai lo le faaauau atu pea lava o le ola i se nofoaga o agaga), na tusia e le perofeta o Hosea e faapea: “Ou te laveai ia te i latou ai le malosi o le tuugamau; ou te faaola ia te i latou ai le oti.”—Hosea 13:14.

O anafea la na oo ane ai i tagata Iutaia le manatu e lē mafai ona oti le tagata? Ua taʻutino mai e le Encyclopaedia Judaica e faapea: “Atonu o aafiaga mai tagata Eleni na oo mai ai le aʻoaʻoga o le lē mafai ona oti le solu i aʻoaʻoga faa-Iutaia.” Ae ui i lea, o tagata Iutaia sa faamaoni i le tapuaiga e oo mai i le taimi o Keriso sa talitonu pea ma vaai atu i le toetu i le lumanai. E tatou te iloa manino  mai lenei mea i le talanoaga a Iesu ma Mareta i le maliu o lona tuagane o Lasalo. “Ona faapea mai lea o Mareta ia Iesu: ‘Le Alii e, ana e iinei, po ua le oti loʻu tuagane. . . . Ua fetalai atu Iesu ia te ia, ‘E toe tu mai lou tuagane.’ Ua fai mai Mareta ia te ia, ‘Ua ou iloa e toe tu mai lava ia i le toe tu i le aso gataaga.’”—Ioane 11:21-24.

Le Tulaga o Ē ua Maliliu

I lenei foi tulaga, e lē manaomia ona tatou taumatemate i ai. O le faamatalaga moni ma le faigofie a le Tusi Paia lava ia e faapea, o ē ua oti o loo “momoe,” ua lē iloa se mea, ua matuā leai lava se poto po o ni faalogona. O lenei upu moni e lē o aumaia i se tulaga lavelave, po o se auala e faigata ona tatou malamalama i ai i le Tusi Paia. Seʻi manatu mai i nisi nei o mau e faigofie ona malamalama i ai: “Auā o e ua ola, ua latou iloa e oti i latou; a o e ua oti, latou te le iloa se mea; . . . O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 10) “Aua tou te faatuatua i alii, po o le fanau a tagata, e le o i ai se olataga. E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.”—Salamo 146:3, 4.

E manino lava la le mafuaaga, na faasino atu ai Iesu Keriso i le oti o le moe. Ua faamauina e le aposetolo o Ioane le talanoaga a Iesu ma ona soo e faapea: “Ua faapea atu o ia ia te i latou, ‘O loo moe la tatou uo o Lasalo; a e ou te alu e fafagu ia te ia.’ Ona faapea mai lea o ona soo, ‘Le Alii e, afai o moe ia, e ola.’ Ua fetalai Iesu i lona oti, a ua latou masalo ua fetalai o ia i le taoto ma moe. Ona taʻutino atu lea e Iesu ia te i latou, ‘Ua oti Lasalo.’”—Ioane 11:11-14.

E Oti le Tagata Atoa Lava

O taualumaga o le maliu o le tagata e aofia ai le peresona atoa lava, ae lē faapea na o le tino e oti. E tusa ai o faamatalaga manino a le Tusi Paia, e ao ona tatou ioe e faapea, e lē o i le tagata se solu e lē mafai ona oti lea e ola pea pe a oti lona tino. O loo faaali manino mai e le Tusi Paia e mafai ona oti le solu. “Faauta, o agaga [solu] uma, o oʻu lava i latou; e pei o le agaga [solu] o le tamā ona fai moʻu, e faapea foi le agaga [solu] o le atalii; o le tagata [solu] e agasala e oti ia.” (Esekielu 18:4) E lē o iai se mea o faapea mai ai o upu ia o le “lē mafai ona oti” po o le “ola pea” e iai i tagata.

Ua aumaia e le New Catholic Encyclopedia lenei faamatalaga e aogā ona mātauina, e faatatau i upu Eperu ma le Eleni lea e faauigaina “solu” i le Tusi Paia e faapea: “O le “solu” i le FT [Feagaiga Tuai] o le nepeš, ae i le FF [Feagaiga Fou] o le [psy·kheʹ]. . . . O le nepeš e sau mai le upu autū o lona uiga ia mānava, o lea la . . . ona o le mānava e faaeseese ai ē ola ma ē ua oti, o le nepeš la ua uiga i le ola po o oe ia po o le tagata ola lava ia. . . . I le Feagaiga Tuai e lē o [vaevaeina i ni vaega se lua] ia le tino ma le solu. Sa vaai tagata Isaraelu i mea i lo latou tino mai, tulaga atoa, e vaai la i le tagata o se peresona ae e lē o se tuufaatasiga o ni vaega eseese se tele. O le taʻu la nepeš, e ui ina faaliliuina i le tatou upu solu, ae lē tāitai uiga faapea e ese le solu mai le tino po o le tagata lava ia. . . . O le taʻu [psy·kheʹ] o le upu lea o le Feagaiga Fou e tutusa ma le nepeš. E mafai ona uiga o le vaega autū o le ola, le ola lava ia, po o le mea ola.”

Ua mafai nei la ona e mātauina i le taimi e maliu ai se tasi, o le tagata ola lea sa iai, po o le solu ola, ua lē o toe iai. E toe foi atu i le “efuefu” pe i mea na faia aʻi mai le palapala a lē o le faifai malie e ala i le tanu i le tuugamau ma faasolo ina pala, ia po o le faavave e ala i le faaliulefulefu. Na fetalai atu Ieova ia Atamu e faapea: “Auā o le efuefu oe, e te toe foi atu lava i le efuefu.” (Kenese 3:19) E faapefea la, ona mafai ona toe soifua mai pe a mavae le oti? E mafai auā e manatua e le Atua lava ia le tagata ua maliu. E ia Ieova le mana faavavega ma le tomai e foafoaina ai le tagata, e lē o se mea la e ofo ai, i lona lava finagalo e  mafai ona ia manatuaina le talaaga o soifuaga o tagata taitoatasi. Ioe, o faamoemoega uma mo lena tagata ina ia toe soifua ai e faalagolago i le Atua.

O le uiga lenei o le upu “agaga,” lea e faapea e toe foi atu i le Atua moni o lē na foai maia. I le faamatalaina o lenei mea, na faamatala e le tusitala faagaeeina o le tusi o Failauga e faapea: “Ma toe foi atu le efuefu i le eleele e pei ona i ai ia, ma toe foi atu le agaga i le Atua o le na foaiina mai ai.”—Failauga 12:7.

E na o le Atua e mafai ona ia faaolaina se tagata. Ina ua foafoaina e le Atua le tagata i Etena ma mānava atu i ona pogaiisu “le mānava ola,” e lē gata i le faatumuina o māmā o Atamu i le ea, ae na faapogaia e Ieova le malosi ola e faagaoioi ai sela uma o lona tino. (Kenese 2:7) Ona o lenei malosi ola e mafai ona faasolo mai e mātua agaʻi i tamaiti e ala i le faagasologa o le afuafua ma fanau mai, o le ola la o le tagata e mafai ona faapogaia e le Atua, ae e ala mai i mātua.

Toetutu Mai—O se Taimi Fiafia

E ao ona aua neʻi faafenumiaia le toetu ma le toe ola mai i se isi tino (reincarnation), lea e lē o lagolagoina e le Tusi Paia. O le toetu mai i se isi tino o le talitonuga lea e faapea pe a maliu le tagata, e toe fanau mai i se tasi po o le sili atu foi nisi olaga o le a faasolosolo i ai. E faapea le talitonuga, a lē o se tulaga maualuga, ia o se ituaiga olaga maulalo e faatusatusa i le soifuaga na iai muamua, e faalagolago lava i le talaaga na ia faia aʻe i lona olaga muamua. E tusa ai ma lenei talitonuga, e mafai ona “toe fanau” mai se tasi a lē o se tagata ia o se manu. E matuā feteenai lava lena ma le mea o loo aʻoaʻoina e le Tusi Paia.

O le upu “toe tu” e faaliliu mai i le upu Eleni o le a·naʹsta·sis, lea o lona uiga moni lava o le “ia toe tu i luga.” (O le aufaaliliu Eperu o le gagana Eleni latou te tuufaatasia le a·naʹsta·sis ma upu Eperu o le techi·yathʹ ham·me·thimʹ, e uiga i le ‘toe ola mai le oti.’) O le toetu e aofia ai le toe faafoisia o le ituaiga olaga sa iai le tagata muamua, le ituaiga olaga lena o loo manatua e le Atua i lona finagalo. E tusa ai ma le finagalo o le Atua mo tagata taitoatasi, e mafai ona toe faafoi mai le tagata a lē o se tino faaletino o se tino faaleagaga; ae e tumau pea ona uiga totino, o ona uiga faaletagata ma lona mafaufau a o lei maliu.

Ioe, o loo tautala le Tusi Paia i ituaiga toetu e lua. O le tasi o le toetu i le lagi ma le tino faaleagaga; e lē toatele nisi o le a latou maua lenei toetu. O le ituaiga toetu lena na maua e Iesu Keriso. (1 Peteru 3:18) Ma na ia faailoa mai o le a maua lenei toetu e nisi o le a filifilia mai i ona soo o ē mulimulituʻi ia te ia, e amata mai lava i aposetolo faamaoni, ia na ia folafola atu i ai e faapea: “Ou te alu e sauni se mea e nonofo ai outou . . . ou te toe sau, ou te talia foi outou ia faatasi ma aʻu; ina ia i ai outou i le mea ou te i ai aʻu.” (Ioane 14:2, 3) E taʻua e le Tusi Paia lenei mea o “le uluai toe tu” e muamua i le taimi, atoa foi ma lona tulaga. E faamatalaina e le Tusi Paia i latou o le a toe faatutūina i le soifuaga faalelagi o le a avea i latou ma faitaulaga a le Atua ma fai ma tupu faatasi ma Keriso Iesu. (Faaaliga 20:6) O lenei “uluai toe tu” e mo se fuainumera faatapulaaina, ma ua taʻu mai e le Tusi Paia e na o le 144,000 o le a filifilia mai i tane ma fafine faamaoni. E latou te faamaonia lo latou faamaoni ia Ieova le Atua ma Keriso Iesu e oo lava i lo latou oti, i le maelega e molimau atu i isi e uiga i lo latou faatuatua.—Faaaliga 14:1, 3, 4.

E aunoa ma se masalosalo, o le toe tutū mai o ē ua oti o se taimi o le fiafiaga tele mo i latou e toe tutū i le lagi. Ae o le a lē uma ai iina le fiafia, auā ua folafola mai foi le toe tutū mo le ola iinei lava i le lalolagi. O i latou e faatutūina o le a latou aufaatasi ma i latou e lē mafaitaulia o ē o le a faasaoina mai i le iuga o lenei faiga amioleaga o mea. Ina ua uma ona mātauina le fuainumera toaitiiti o ē ua agavaa mo le toe tutū faalelagi, na avatu i le  aposetolo o Ioane se faaaliga o se “motu o tagata e toatele mai atu nuu uma, ma aiga, ma nuu, ma gagana eseese, e le ma faitaulia e se tasi.” Maeu se taimi fiafia o le a iai pe a toe faafoisia mai i le ola le faitau miliona, e ono oo atu foi i le piliona tagata, iinei lava i le lalolagi!—Faaaliga 7:9, 16, 17.

O Afea e Tupu ai Lenei Mea?

Po o le ā lava se fiafia ma se olioli, o le a puupuu pe a toe foi mai ē ua oti i se lalolagi e faatumulia i fetauaiga, faamasaa toto, polusione, ma le sauā—e pei ona iai le tulaga i aso nei. E leai, o le a oo mai le toe tutū i le taimi e faatulaga ai “se lalolagi fou.” Seʻi tau ina tomānatu, i se lalolagi e aunoa ma tagata atoa ma faalapotopotoga ia o loo taumafai i le taimi nei e faaleagaina le lalolagi ma aveesea lona matagofie, ae maise foi puapuaga e tele ua latou aumaia i ē o loo aināina le lalolagi.—2 Peteru 3:13; Faaaliga 11:18.

E manino lava, o le taimi mo le toe tutū o tagata lautele o loo i le lumanai e lei oo mai. Peitai o le tala fiafia e lē o toe mamao ae faataunuu. E moni, e ao ona faatali mo le iuga o lenei faiga amioleaga o mea. Peitai, e anoanoai mea tutupu e faamaonia ai o le taimi mo le oo mai faafuasei o le “puapuaga tele” ua i faitotoa, e taualuga i le “taua o le aso tele o le Atua e ona le malosi uma lava”—lea e masani ona faasino atu i ai o Amaketo. (Mataio 24:3-14, 21; Faaaliga 16:14, 16) O le a aveesea ai e lenei mea le amioleaga uma mai i lenei paneta matagofie, le Laueleele. E sosoo mai ai i lena le Pulega a Keriso Iesu mo le Afe o Tausaga, o lea o le a faasolosolo ai ona avea le lalolagi o se parataiso.

Ua taʻu mai ia i tatou e le Tusi Paia e faapea o le taimi o le pulega lea i le Meleniuma, o le a faataunuu ai le toe tutū mai o ē ua oti. Ona faataunuu ai lea o le folafolaga na fai e Iesu a o iai o ia i le lalolagi e faapea: “Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou o mai ai.”—Ioane 5:28, 29.

Āuga o le Faamoemoe o le Toetu

Maeu se faamoemoe matagofie mo le lumanai, lenei avanoa o le toetu—le taimi o le a toe ola mai ai ē ua oti! Maeu le faalaeiauina ai o i tatou a o tatou fesagai ma faigata o le faasolo atu ina tagata matua, o faamaʻi, o mala tutupu faafuasei ma le faanoanoa, ia ma omiga foi o aso faisoo ma faafitauli o le soifuaga! E aveesea ai le tui o le oti—e lē aveesea atoatoa ai le faanoanoa, peitai e vavae ese ai i tatou mai ia i latou o ē e aunoa ma se faamoemoe mo le lumanai. Na taʻutino mai e le aposetolo o Paulo nei āuga faamafanafana loto o le faamoemoe o le toetu i upu nei: “Matou te loto ina ia outou iloa, le au uso e, e uiga i e o momoe, ina neʻi outou faanoanoa, pei o isi e leai so latou faamoemoe. Auā afai tatou te talitonu ua maliu Iesu ma toe tu mai, e faapea foi ona aumaia e le Atua faatasi ma ia e o momoe ona o Iesu.”—1 Tesalonia 4:13, 14.

Atonu pe ua uma ona tatou iloa i lo tatou lava tulaga le moni o mea na mātauina e le tagata mai Sasaʻe o Iopu e faapea: “E palagia lava o ia e pei o le mea ua pala, e pei o se ofu ua atia e le mogamoga. O le tagata ua fanau mai i le fafine, ua saasaa ona aso, mona ua tumu i le atuatuvale. E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.” (Iopu 13:28–14:2) Ua tatou iloa foi le lē tumau o le olaga atoa ma le moni o le oo mai i so o se tasi o i tatou “o le tausaga ma le mea e tupu ai.” (Failauga 9:11) E mautinoa, e leai se tasi o i tatou e olioli i le manatu e faapea tatou te oo uma lava i le oti. Ae ui i lea, o le faamoemoe mautinoa o le toetu ua fesoasoani mai e aveesea le fefe i le oti.

O lea la, ia tatou loto tetele! Ia tepa taulai atu i le mea moni e mafai ona moe i le oti ma toe foi mai i le ola e ala i le vavega o le toetu. Tagai atu ma le mautinoa i le avanoa e ola ai e faavavau i le lumanai, ma e lē gata i lea o le olioli i le iloaina e faapea o lena taimi o faamanuiaga ua lata tele mai.