O le “Aiga o Tavita”—Se Tala Moni po o se Talafatu?

O TAVITA—o le tama talavou leoleo mamoe o lē na avea ma faimusika, o se fatusolo, o se fitafita, o se perofeta, ma o se tupu— na tumatilatila ma aloaia i le Tusi Paia. E faaafeselau tolusefuluvalu ona taʻua lona igoa; i le faaupuga “Aiga o Tavita”—lea e masani ona faasino atu i le augātupu o Tavita—e faaluasefululima ona faaaogaina. (1 Samuelu 20:16) Pe o le tupu ea o Tavita ma ona augātupu ua na o se talafatu? O le ā ua faaalia mai e suesuega o toega mai anamua? O se suesuega mataina lata mai nei i se eligā palapala i Tel Dan i le itu i mātū o Kalilaia ua lipotia mai le lagolagoina ai o le talafaasolopito o Tavita ma ona augātupu.

I le tau mafanafana o le 1993, na faamamāina ai e se ʻau e suesueina toega o mea mai anamua se vaegā eleele i tua atu o le pa o Tanu anamua, ma na taʻitaʻia e Polofesa Avraham Biran. Na latou mauaina se malae e fai faapaepae. O se maa lanu uliuli na elia mai ai ma sa faigofie ona aveesea mai le eleele. Ina ua fuli lea maa i le la, na iloagofie ai ni mataitusi. Ona alaga ai lea o Polofesa Biran e faapea: “Auoi, le Atua e, ua tatou maua isi faamaumauga!”

O Polofesa Biran ma lona soa, o Polofesa Joseph Naveh mai le Iunivesite Eperu i Ierusalema, sa saunia se lipoti faasaienisi e uiga i lea faamaumauga. Ua faavae mai lenei lipoti se mataupu i le lomiga o Mati ma Aperila 1994 i le mekasini o le Biblical Archaeology Review, lea ua faapea mai: “E lē masani ona faatomua i le uluai itulau o le New York Times (e faapena foi le mekasini o le Time) ni faamatalaga e uiga i mea na maua i suesuega o toega mai anamua. Ae o le mea lena na tupu talu ai nei i mea na maua i Tel Dan i le vaitaimi o le tau mafanafana, i se faaputuga matagofie na i le itu i mātū o Kalilaia, i le auvaemauga o le Mauga o Heremoni i talaane o le matāvai o le Vaitafe o Ioritana.

“O iina na maua ai e Avraham Biran ma lana ʻau suesue o toega mai anamua se faamaumauga mataina mai le senituri lona iva T.L.M., ma ua faasino atu lea faamaumauga i le ‘Aiga o Tavita’ atoa ma le ‘Tupu o Isaraelu.’ O le uluai taimi lea ua maua ai le igoa o Tavita i se faamaumauga anamua e ese mai le Tusi Paia. Ona o le faamaumauga e lē o faasino atu i se ‘Tavita’ patino ae o le mea e sili ona mataina ona o loo faasino i le Aiga o Tavita, o le augātupu o le aiga o le tupu sili o Isaraelu.

“O le ‘Tupu o Isaraelu’ o se faaupuga e taatele i le Tusi Paia, ae maise lava i le Tusi o Tupu. Peitai ane, o lenei suesuega i Tel Dan, e mafai ona avea ma faasinoga e sili ona leva i tusitusiga paia faa-Iutaia ia Isaraelu e ese mai le Tusi Paia. E tasi se mea ua faamaonia e lenei faamaumauga, ua matuā faaalia mai ai e faapea o Isaraelu ma Iuta  o ni malo tāua i lea taimi, ma ua feteenai ai la ma le taʻutinoga a nisi o tagata atamamai o ē e faitio i mea moni e lagolagoina ai le Tusi Paia.”

Ua fuafuaina lona vaitaimi i foliga o mataitusi, i sailiiliga auiliili i faguele ia na maua i talaane o le maa, ma faamatalaga nai le faamaumauga. O vala uma nei e tolu e faasino atu i le vaitaimi e tasi, le senituri lona iva T.L.M., e tusa e sili atu ma le selau tausaga talu ona mavae le tupu o Tavita. Ua talitonu tagata atamamai e faapea o le faamaumauga o se vaega o le maa o le manumalo na faatūina i Tanu e se fili Arama o le “Tupu o Isaraelu” ma le “[Tupu o le] Aiga o Tavita.” O tagata Arama e nonofo i le itu i sasaʻe o Isaraelu, ma e tapuai i se atua lauiloa o matagi, e taʻua o Hatata.

I le tau mafanafana o le 1994, e lua nisi toega o le maa ua iai faamaumauga na mauaina. Ua lipotia mai e Polofesa Biran e faapea: “I nei toega e lua o loo iai igoa o le atua o Arama o Hatata, faapena foi ma le faamatalaga i le taua i le va o tagata Isaraelu ma tagata Arama.”

O le toega sili na toe maua i le 1993 e iloa atu ai vaega o laina e 13 ua tusia i tusitusiga tuai faa-Eperu. I lena taimi, na faaaogaina ai togitogi e vaevae ai upu ina ia faaeseese ai upu i se mau. Ae peitai, o le “Aiga o Tavita” ua tusia i se upu e tasi i mataitusi “bytdwd” (tusia i mataitusi masani) nai lo le “byt” (fale), ona sosoo ai lea ma se togi, ona faatoʻā sosoo ai loa lea ma le “dwd” (Tavita). E mautinoa lava le tulai mai o fesili e tusa ai ma le faamatalaina o le “bytdwd.”

O Polofesa Anson Rainey e iai lona tomai faapitoa i gagana eseese ua ia faamatalaina e faapea: “E lei faamatalaina auiliili e Joseph Naveh ma Avraham Biran le faamaumauga, atonu ona o loo maumauai i lo la iloaina e faapea ua iloa e le ʻau faitau, e so o se upu lava e vaevaeina ai le va o upu e lua ia e faavae aʻe ai sea faamatalaga e masani lava ona lē faaaogaina, ae maise lava pe afai o le tuufaatasiga o se igoa faapitoa e lauiloa. ‘O le Aiga o Tavita’ sa avea ma se taʻu faapitoa ma e tusa ma faiga malo ma suesuega faasolopito i le vaeluaga o le senituri lona iva T.L.M.”

Se Isi Faamaoniga o Suesuega o Toega Mai Anamua

Ina ua mavae lena suesuega, ona toe lipotia mai foi lea e se tagata atamai ni tusitusiga i le maa Mesa (e taʻua foi o le Maa Moapi), o Polofesa André Lemaire, sa faapea mai e faasino foi i le “Aiga o Tavita.” * O le maa Mesa, na mauaina i le 1868, e tele mea e tutusa ai ma le maa na maua i Tel Dan. Ua maua nei maa e lua mai le senituri lona iva T.L.M., e tutusa mea ua fausia aʻe ai, e tutusa o la tetelē, ma ua toeitiiti lava tutusa o la tusiga faa-Iutaia.

E faatatau i le toe faaleleia o se laina ua faaleagaina o le maa Mesa, na tusi ai Polofesa Lemaire e faapea: “E toeitiiti lava atoa le lua tausaga ae mauaina loa toegā mea i Tel Dan, ma ua ou manatu ai e faapea o le maa Mesa o loo iai ni faamatalaga i le ‘Aiga o Tavita.’. . . O le mafuaaga na lē mātauina muamua ai lenei faamatalaga e faatatau i le ‘Aiga o Tavita’ ona o le mea moni sa lei faia se editio priceps [le uluai lomiga aloaia] o le maa Mesa. O le mea lena ua ou sauniunia, ina ua mavae le 125 tausaga talu ona mauaina le maa Mesa.”

O ia faamatalaga e mai suesuega o toega mai anamua, o se mea e naunau i ai auā o se agelu, o Iesu lava ia, o ona soo, ma tagata lautele ua latou faamaonia le moni o le talafaasolopito o Tavita. (Mataio 1:1; 12:3; 21:9; Luka 1:32; Galuega 2:29) Ua mauaina e suesuega o toega mai anamua ia faamaoniga ma ua ioeina foi e faapea o ia ma ona augātupu, o le “Aiga o Tavita,” o ni mea moni, e lē o ni talafatu.

[Faaopoopoga i lalo]

[Ata i le itulau 31]

O toegā mea mai Tel Dan,* na maua i le 1993 i le aai o Tanu, i le itu i mātū o Kalilaia

* O le tusi e faavae mai le ata o loo i le Israel Exploration Journal.