O se Tamā ma o se Toeaina—Le Faataunuuina o Matafaioi Uma e Lua

“Auā afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?”—1 TIMOTEO 3:5.

1, 2. (a) I le uluai senituri, na mafai faapefea e ovasia nofofua ma ovasia ua faaipoipo ae leai ni fanau, ona auauna atu i o latou uso? (e) Ua avea faapefea Akula ma Pisila ma faaaoaoga lelei i ulugalii faaipoipo i aso nei?

ATONU o ovasia i le uluai faapotopotoga Kerisiano o ni tane sa nofofua po o ni tane ua faaipoipo ae leai ni fanau, po o ni tane foi ua faaipoipo ma fai fanau. E mautinoa o nisi o na Kerisiano sa mafai ona latou usitaia le fautuaga a le aposetolo o Paulo i lana uluai tusi atu i uso i Korinito, i le mataupu e 7, ina ia nofofua pea. Na fetalai Iesu: “O i ai foi eunuka o e ua faaeunukaina i latou e i latou, ona o le malo o le lagi.” (Mataio 19:12) O na tane nofofua, e pei o Paulo ma nisi o ana aumea faimalaga, sa mafai ona saʻoloto e femalagaai solo e fesoasoani atu i o latou uso.

² E lē o taʻu maia e le Tusi Paia pe o ni tane nofofua Panapa, Mareko, Sila, Luka, Timoteo, ma Tito. Pe afai sa faaipoipo, ae mautinoa sa tele so latou saʻolotoga mai tiute tauave faaleaiga ina ia mafai ai ona femalagaai mamao atu i ni tofiga eseese. (Galuega 13:2; 15:39-41; 2 Korinito 8:16, 17; 2 Timoteo 4:9-11; Tito 1:5) Pe atonu sa latou ō faatasi ma a latou avā, i le pei o Peteru ma isi “aposetolo uma,” o ē foliga mai na ō ma ave a latou avā a o ō atu mai lea vaipanoa i lea vaipanoa. (1 Korinito 9:5) Ua avea Akula ma Pisila ma faaaoaoga lelei o se ulugalii faaipoipo o ē na lotomalilie e fesuisuiai o la nofoaga, a o mulimuli atu ia Paulo mai Korinito e agaʻi atu i Efeso, ona see atu lea i Roma, ma toe foi ane ai i Efeso. E lē o taʻua e le Tusi Paia pe na iai se la fanau. Ae o le la auaunaga tuutoina mo o la uso na talafeagai ai lo la mauaina o le agaga faafetai o “ekalesia uma i nuu ese.” (Roma 16:3-5; Galuega 18:2, 18; 2 Timoteo 4:19) I aso nei, e mautinoa le toatele o ulugalii faaipoipo o ē, i le pei o Akula ma Pisila, ua mafai ona latou auauna atu i isi faapotopotoga, atonu i lo latou see atu i se vaipanoa o loo tele ai le manaomia.

O se Tamā Fai Fanau ma o se Toeaina

3. O le ā e faaalia ai o le toatele lava o toeaina i le uluai senituri sa avea o ni tane ua faaipoipo ma fai fanau?

³ E foliga mai i le uluai senituri T.A., o le toatele lava o toeaina Kerisiano sa avea o ni tane ua faaipoipo ma fai fanau. Ina ua faataatia atu e Paulo agavaa e manaomia mo se tane o loo “naunau . . . i le faiva o le epikopo,” na ia taʻua ai faapea e tatau i lena Kerisiano ona avea o se tane e “pule lelei i lona lava aiga, o loo ua usiusitai  mai ia te ia o lana fanau ma le faaaloalo lava.”—1 Timoteo 3:1, 4.

4. O le ā sa manaomia mai toeaina ua faaipoipo ma fai fanau?

⁴ E pei ona uma ona tatou taʻua, sa lē o se manaoga faapitoa mo se ovasia le iai o sana fanau, pe tatau foi ona faaipoipo. Ae afai ua faaipoipo, o le mea e fai ina ia agavaa ai e avea o se toeaina po o se auauna o le faiva, sa tatau i se Kerisiano ona faatino ma le talafeagai ma le alofa lona tulagaulu i lana avā ma ia faaalia mai o ia o sē e mafai ona ia tausia lana fanau i le gauai talafeagai. (1 Korinito 11:3; 1 Timoteo 3:12, 13) E so o se vaivaiga matuia i le tausia o lona auaiga o le a lē agavaa ai se uso mo faaeaga faapitoa i le faapotopotoga. Aisea? Ua faamatala mai e Paulo: “Auā afai e le iloa e se tasi ona pule i lona lava aiga, pe faapefea ona tausia e ia le ekalesia a le Atua?” (1 Timoteo 3:5) Pe afai e lē naunau tagata o lona auaiga e gauai atu i lana vaavaaiga, o le a faapeī la uiga faaalia o isi?

‘O Loo Iai se Fanau e Faatuatua’

5, 6. (a) O le ā le manaoga e faatatau i fanau na taʻu atu e Paulo ia Tito? (e) O le ā le mea ua faatalitalia mai toeaina o ē iai a latou fanau?

⁵ Ina ua faatonuina Tito e tofia ni ovasia i faapotopotoga i Kereta, sa taʻua e Paulo ni faatulagaga e manaomia e faapea: “O se tasi e le mataʻuleagaina, o le tane a le fafine e toatasi, o i ai ana fanau e faatuatua, e lei taʻua i latou ua ulavavale pe soli i tulafono. Auā e tatau lava i le epikopo ona le mataʻuleagaina o ia, auā o ia le auauna e tausi i mea a le Atua.” Ae o le ā ua uiga i ai le manaoga ina ia ‘iai se fanau e faatuatua’?—Tito 1:6, 7.

⁶ O le faaupuga “fanau e faatuatua” e faasino atu i fanau talavou o ē ua uma ona tuuina atu o latou ola ia Ieova ma ua papatisoina, pe o ē laiti ua agaigai i le tulaga o le tuuina atu ma papatisoina. E faatalitalia e tagata o le faapotopotoga fanau a toeaina ina ia amio lelei ma usiusitai. E tatau ona faamaonia mai o loo faia e le toeaina mea uma na te mafai ina ia atiina aʻe le faatuatua i lana fanau. Na tusi mai le tupu o Solomona: “Aʻoaʻo ia i le tama e tusa ma lona ala; a oo ina toeaina lava o ia, e le teʻa ese ai.” (Faataoto 22:6) Ae faapefea pe afai o se talavou ua uma ona ia maua na toleniga ae ua musu e auauna ia Ieova pe ua oo foi ina faia se sese matuia?

7. (a) Aisea ua manino ai e lē o faailoa maia e le Faataoto 22:6 se tulafono e lē mafai ona fetuutuunai? (e) Pe afai e lē filifili se atalii po o se afafine o se toeaina e auauna atu ia Ieova, aisea o le a lē faafuasei ai loa ona aveesea mai ona faaeaga?

⁷ E manino lava o le faataoto ua sii mai luga e lē o faataatia mai ai se tulafono maumauai. E lē o faaleaogā ai le mataupu silisili o filifiliga saʻoloto. (Teuteronome 30:15, 16, 19) Pe a oo atu se atalii po o se afafine i le matua ua ia amoina ai ana lava tiute tauave, e tatau la ia te ia ona faia lana lava faaiuga e tusa ai o le tuuina atu ma le papatisoga. Pe afai ua manino lelei na tuuina atu i ai e lona tamā o se toeaina, ni fesoasoani faaleagaga, o taʻiala, ma aoaiga na manaomia, peitai e lē o filifili le talavou e auauna ia Ieova, e lē faafuasei la ona lē agavaa ai le tamā mai le auauna o se ovasia. Ae i le isi itu, afai o iai se fanau laiti a se toeaina o loo latou nonofo faatasi i le aiga, o ē o loo faasolosolo lava ona mamaʻi faaleagaga ma aafia i ni faafitauli, atonu o le a lē toe taʻua ai o ia o sē o loo “pule lelei i lona lava aiga.” (1 Timoteo 3:4) O le manatu autū, e tatau ona manino mai o loo faia e se ovasia le mea sili na te mafai ina ia iai sana “fanau e faatuatua, e lei taʻua i latou ua ulavavale pe soli i tulafono.” *

Ua Faaipoipo Atu i se “Avā Le Faatuatua”

8. E tatau faapefea ona amioaʻi se toeaina i lana avā lē faatuatua?

⁸ E tusa ai o tane Kerisiano ua faaipoipo atu i ē lē faatuatua, na tusi atu Paulo: “Ai se tasi o le au uso ua i ai le avā le faatuatua, ua loto ina la nonofo ma ia, aua le molia o ia . . . Auā . . . e faapaiaina foi le avā le faatuatua i le tane; ana le o lea, po ua leaga a outou fanau; a o lenei,  e paia i latou. E le ma iloa e . . . [le] tane pe faaolaina lau avā ia te oe.” (1 Korinito 7:12-14, 16) O le upu “le faatuatua” iinei e lē o faasino atu i se avā e leai ni ona talitonuga faalelotu, ae o le avā e lē o auauna atu ia Ieova. Atonu o ia o se tagata o le lotu Iutaia, po o sē talitonu i atua faapaupau. I aso nei, atonu ua faaipoipo atu se toeaina i se fafine e ese lana lotu, o sē e lē iloa le Atua, po o sē e faafitia le iai o le Atua. Pe afai o loo lotomalie o ia e nonofo pea ma le tane, e lē tatau la i le tane ona tuua o lena avā ona o le eseese o o la talitonuga. E tatau pea ona ‘nonofo faatasi ma ia ma le poto, ia ava ia te ia o le ipu ua sili ona vaivai,’ e nonofo ma le faamoemoe ina ia faasaoina mai o ia.—1 Peteru 3:7; Kolose 3:19.

9. I atunuu ua avatu ai e le tulafono i le tane ma le avā le aiā e aʻoaʻo ai le la fanau i o la talitonuga faalelotu, e tatau faapefea ona gaoioi se toeaina, ma o le a faapefea ona aafia ai ona faaeaga i lenei mea?

⁹ Pe afai e iai se fanau a le ovasia, o le a ia faatinoina ma le talafeagai lona tulagaulu o se tane ma o se tamā i le tausia aʻe o i latou “i aoaiga ma apoapoaiga a le Alii [Ieova].” (Efeso 6:4) I le tele o atunuu ua avatu ai e le tulafono i paaga faaipoipo uma e toalua le aiā e saunia ai aʻoaʻoga faalelotu mo le la fanau. I lenei tulaga atonu e manao ai le avā e faatino lana aiā e aʻoaʻo ai i le fanau ona talitonuga ma faiga faalelotu, atonu e aofia ai ma le avatu o i latou i lana lotu. * O le mea moni, e tatau i fanau ona mulimuli i o latou loto fuatia ifo ua aʻoaʻoina i le Tusi Paia, e tusa ai o le aua le auai i ni sauniga faalotu sese. Ona o le tamā o le ulu o le aiga, o le a ia faatino ai lana lava aiā e suesue ai ma lana fanau ma ave i latou i sauniga i le Maota o le Malo pe a mafai. Pe a latou oo i le matua ua mafai ona fai a latou lava faaiuga, o le a latou filifili ai mo i latou lava po o lē fea ala latou te uia. (Iosua 24:15) Pe afai e mātauina e isi ona uso toeaina ma tagata o le faapotopotoga lona faia o mea uma o loo faataga o ia e le tulafono e fai ina ia faatonu lelei ai lana fanau i ala o le upu moni, o le a lē faaleaogaina ai la le avea o ia o se ovasia.

‘O Loo Pule Lelei i Lona Auaiga’

10. Pe afai o le ulu o le aiga o se toeaina, o le ā lona tiute e tatau ona faamuamua?

¹⁰ E oo lava i se toeaina ua avea o se tamā fai fanau ma o lana avā foi o se Kerisiano, e lē o se tiute faigofie le tau faasoasoaina lelei o lona taimi ma lona uaʻi atu i lana avā, le fanau, ma tiute tauave i le faapotopotoga. O loo manino le Tusi Paia e faapea ua iai i se tamā Kerisiano le avega tauave e tausia lana avā ma le fanau. Na tusi atu Paulo: “A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faatuatua.” (1 Timoteo 5:8) I lena lava tusi, na taʻua ai e Paulo e faapea e na o tane ua faaipoipo o ē ua latou faamaonia mai le avea o i latou o ni tane ma o ni tamā lelei, e tatau ona fautuaina e auauna o ni ovasia.—1 Timoteo 3:1-5.

11. (a) I ā auala e tatau ai i se toeaina ona ‘tausi i lona aiga’? (e) E mafai faapefea ona fesoasoani lenei mea i se toeaina ina ia faataunuu ai ona tiute tauave faalefaapotopotoga?

¹¹ E tatau i se toeaina ona “tausi” mo lona lava auaiga e lē gata i le itu faaletino ae i le itu faaleagaga foi ma faalogona ootia. Na tusi mai le tupu poto o Solomona: “Ia sauniuni i fafo lau galuega, ma ē teuteu ai i le vao; mulimuli ane, ona e faia lea o lou fale [“auaiga,” NW].” (Faataoto 24:27) O lea la, a o tausi atu i ai i manaoga faaletino, i faalogona ootia, ma tafaoga ma faafiafiaga o lana avā ma le fanau, ae tatau foi i se ovasia ona tausia aʻe i latou i le itu faaleagaga. O lenei mea e alu ai se taimi—se taimi o le a lē mafai ona ia tuuina atu i mataupu faalefaapotopotoga. Ae o le taimi lea e mafai ona aumaia ai se taui tele i le fiafiaga ma le tulaga faaleagaga o le aiga. E mulimuli ane, pe afai e malolosi faaleagaga lona aiga, atonu o le a faaitiitia mai le taimi e faaalu e le toeaina i le taulimaina o faafitauli o le aiga. Ona faateleina ai lea o le avanoa mo ia e uaʻi atu ai i mataupu a le faapotopotoga. O lana faaaoaoga o se tane lelei ma o se tamā lelei o le a manuia faaleagaga ai le faapotopotoga.—1 Peteru 5:1-3.

12. I le ā le mataupu faaleaiga e tatau i tamā o ē o loo avea ma toeaina ona faataatia ai se faaaoaoga lelei?

 ¹² O le tausia lelei o se auaiga e aofia ai le faatulagaina o taimi e taʻimua ai i se suesuega a le aiga. E faapitoa ona tāua le faataatia e toeaina o se faaaoaoga lelei i lenei vala, auā o aiga malolosi e faia aʻe ai ni faapotopotoga malolosi. E lē tatau i se ovasia ona faaalu uma lona taimi i isi faaeaga o le auaunaga ae leai se taimi e suesue ai ma lana avā ma le fanau. Pe afai o le tulaga lea, e tatau ona ia toe iloiloina lana faasologa. Atonu e tatau ona ia toe faatulaga pe faaitiitia le taimi o loo ia tuuina atu i isi mataupu, pe oo foi ina tatau ona faaitiitia mai ona faaeaga i nisi taimi.

Se Vaavaaiga e Paleni

13, 14. O le ā le fautuaga ua tuuina mai e “le auauna faamaoni ma le mafaufau” i toeaina o ē ua tausi aiga?

¹³ E lē fou le aumaia o fautuaga ina ia faapaleni ai tiute tauave faaleaiga ma tiute tauave faalefaapotopotoga. Ua tele tausaga o aumaia pea e “le auauna faamaoni ma le mafaufau” fautuaga i toeaina e tusa ai o lenei mataupu. (Mataio 24:45) I le silia ma le 37 tausaga ua mavae, na fautua mai ai le Watchtower o Setema 15, 1959, itulau e 553 ma le 554, e faapea: “Pe lē o le mea moni lava, o se mataupu o le faapaleniina o nei manaoga uma i o tatou taimi? E tatau ona e muai faatāuaina ma le talafeagai manaoga o lou lava aiga. E mautinoa, o le a lē faatalitalia mai e Ieova le Atua se tagata ina ia faaaogā uma lona taimi i meafai a le faapotopotoga, i le fesoasoani atu i ona uso ma tuaoi ina ia faaolaina, ae lē o manatu mamafa mo le faaolaina o lona lava auaiga. O le avā ma le fanau a se tane o lana tiute tauave muamua lava lea.”

¹⁴ Na fautua mai Le Olomatamata o Aokuso 1, 1987, itulau 22 e faapea: “O le auai o se aiga i le faiva i le fanua o le ā tosina ai outou ia vavalalata, peitaʻi o manaoga tutasi o fanau e manaomia ai le taulai atu o lou taimi totino ma le malosi faalefaalogona. O lea, e manaomia le paleni e fuafua ai po le ā le tele o le taimi e mafai ona e faaaogāina mo . . . tiute faalefaapotopotoga a e i le taimi lava e tasi o loo e tausia le itu faaleagaga, faalefaalogona, ma le faaletino mo i latou o ‘lou lava aiga.’ E tatau [i se Kerisiano] ona ‘aʻoaʻoina . . . ia muamua ona agalelei i [lona] lava aiga.’ (1 Timoteo 5:4, 8)”

15. Aisea e manaomia ai le poto ma le faautauta e se toeaina e iai sana avā ma le fanau?

¹⁵ E faapenei se faataoto faale-Tusi Paia: “Ua atiina ae le fale i le poto; a e faamausaliina i le faautauta.” (Faataoto 24:3) Ioe, ina ia faataunuu e le ovasia ona tiute faatiokarate ae i le taimi lava e tasi o loo atiina aʻe lona auaiga, e na te matuā manaomia ai lava le poto ma le faautauta. I le vaaiga la faale-Tusi Paia, e lē na o le tasi se vaipanoa na te vaavaaia. Ua aofia ai ona tiute tauave faaleaiga ma faalefaapotopotoga. Na te manaomia le faautauta e tausisia ai le paleni i nei tiute tauave. (Filipi 1:9, 10) Na te manaomia le poto e faatulaga lelei ai mea e tatau ona ia faamuamua. (Faataoto 2:10, 11) E ui lava i le tele o ona lagona popole mo le tausia o ona faaeaga  faalefaapotopotoga ae tatau ona ia iloa lelei, ona o ia o se tane ma o se tamā fai fanau, o lona tiute tauave muamua lava na foaiina mai e le Atua o le tausiga ma le faaolataga o lona aiga.

O ni Tamā Lelei ma o ni Toeaina Lelei Foi

16. O le ā se aogā ua maua e se toeaina pe afai o ia foi o se tamā fai fanau?

¹⁶ E mafai ona avea o se oloa moni se toeaina o loo iai sana fanau amio lelei. Pe afai ua ia iloa ona tausia lelei lona aiga, e mafai foi la ona ia fesoasoani atu i isi aiga o le faapotopotoga. E sili atu ona ia malamalama lelei i o latou faafitauli ma mafai ona avatu ni fautuaga e atagia atu ai lona lava poto masani. O se tulaga fiafia ona e faitau afe toeaina i le lalolagi aoao o loo latou faia se galuega lelei i le avea o ni tane, ni tamā fai fanau ma ni ovasia.

17. (a) O le ā le mea e lē tatau ona faagaloina e le tane o loo avea ma toeaina ma o ia foi o se tamā fai fanau? (e) E tatau faapefea i isi tagata o le faapotopotoga ona faaalia lagona alofa ma le malamalama?

¹⁷ Ina ia mafai ona avea ma toeaina se tane ua fai sana fanau, e ao ona avea o ia o se Kerisiano taʻumatuaina o lē, na te tausia lana avā ma le fanau, ae i le taimi e tasi e mafai ona ia faamaopoopoina ona tiutefai ina ia mafai ona ia tuutoina atu le taimi ma lana vaavaaiga i isi i le faapotopotoga. E lē tatau lava ona ia faagaloina o lana galuega faaleoleo mamoe e amata atu i le aiga. I le iloaina o loo iai i toeaina e iai avā ma fanau le tiute tauave i o latou aiga ma o latou tiute faalefaapotopotoga, o le a lē taumafai ai la tagata o le faapotopotoga e tagisā ma le lē tatau taimi o na toeaina. Mo se faataitaiga, o se toeaina o loo iai sana fanau e tatau ona usupo i le aʻoga i le aso e sosoo ai, atonu o le a lē mafai i taimi uma ona ia faatali umi pe a uma sauniga i le afiafi. E tatau i isi tagata o le faapotopotoga ona malamalama i lenei itu ma faaalia ai o latou lagona alofa.—Filipi 4:5.

E Ao Ona Pele ia i Tatou a Tatou Toeaina

18, 19. (a) O le ā ua mafai ona tatou iloa lelei mai i la tatou iloiloga o le 1 Korinito mataupu e 7? (e) E tatau faapefea ona tatou manatunatu i na tane Kerisiano?

¹⁸ O la tatou iloiloga o le mataupu e 7 o le uluai tusi a Paulo i uso i Korinito ua mafai ai ona tatou iloa lelei, i le usitaia o le fautuaga a Paulo, ua toatele ai uso nofofua ua faaaogā o latou saʻolotoga e auauna ai mo manaoga o le Malo. Ua iai foi le faitau afe o uso ua faaipoipo e lē faia ni fanau, o loo latou uaʻi tatau atu i a latou avā, ma auauna foi o ni ovasia lelei i itumalo, i matagaluega, i faapotopotoga, ma i lālā o le Olo Matamata, faatasi ai ma le lagolagosua malosi a a latou avā. Ae o se manatu mulimuli lava, i faapotopotoga e toetoe 80,000 o tagata o Ieova, ua iai le toatele o tamā e lē gata ina tausia ma le alofa a latou avā ma fanau, ae ua latou faaalu foi le taimi e auauna ai i o latou uso i le avea o ni leoleo mamoe alolofa.—Galuega 20:28.

¹⁹ Na tusi atu le aposetolo o Paulo: “O toeaina o e pule lelei, ia taʻuaogaina i latou ona faaluaina atu i ai o le taui, a e faasili i e galulue i le upu atoa ma le aʻoaʻo atu.” (1 Timoteo 5:17) Ioe, o toeaina o ē pule lelei i o latou aiga ma i le faapotopotoga, ua onomea ia i latou lo tatou alofa ma lo tatou faaaloalo. E tatau ona tatou matuā “faapelepeleina [tane] ua faapea.”—Filipi 2:29.

[Faaopoopoga i lalo]

I se Autaluga

□ E faapefea ona tatou iloa o le toatele lava o toeaina i le uluai senituri T.A. o ni tane ua faaipoipo ma fai fanau?

□ O le ā ua manaomia mai toeaina ua faaipoipo ma fai fanau, ma aisea?

□ O le ā e uiga i ai le iai o ni “fanau e faatuatua,” ae faapefea pe a lē filifili le atalii po o le afafine o se toeaina ina ia auauna ia Ieova?

□ I ā vala e tatau ai i se toeaina ona ‘tausi i lona aiga’?

[Fesili mo le Suʻesuʻega]

[Ata i le itulau 23]

O aiga malolosi e faia aʻe ai ni faapotopotoga malolosi