Aisea e Foai Atu ai ia Ieova?

A O FAASOLO ina goto mālie ifo le la i le aai laititi o Saitonu i Sarefata, na punouai ai se fafine ua oti lana tane i le aoina o fafie. Na manao e tafu se afi auā le kukaina o sina toe meaʻai—masalo o si toe ʻaiga lava lea o totoe mo ia ma lana tama tama e aai ai. Na tauivi ia faaolatia atu o ia ma lana tama tama i le lāmala ma le oge umi, ma o se tulaga faanoanoa lea na iu i ai. Na la matelaina i le fia aai.

Na faalatalata ane se tamaloa. O lona igoa o Elia, ma e lei umi ae iloa e le fafine lenei ua oti lana tane o ia o se perofeta a Ieova. E foliga mai na faalogo muamua o ia i lenei Atua. E ese Ieova mai ia Paala, o lē e sauā, sa taatele ona tapuaia sese i lona nuu o Saitonu. O lea ina ua talosaga ane Elia ia te ia mo se vai inu, na naunau o ia e fesoasoani atu. Atonu na ia manatu o le faia faapea na te maua ai le finagalo malie o Ieova. (Mataio 10:41, 42) Ae na toe talosaga atu Elia i se isi mea e sili atu—o sina fasi meaʻai. Na ia faamatala atu e faapea ua na o sina meaʻai o totoe ia te ia mo le ʻaiga e tasi. Ae, na tauanau ane pea Elia, ma faamautinoa atu ia te ia o le a saunia faavavega e Ieova meaʻai mo ia seia oo ina uma le oge. O le ā loa na ia faia? Ua fai mai le Tusi Paia e faapea: “Ona alu lea o ia, ua ia faia e tusa ma le upu a Elia.” (1 Tupu 17:10-15) O nei faaupuga faigofie ua faamatalaina ai gaoioiga o se faatuatua telē—e matuā sili ona telē, ma na viiviia e Iesu Keriso lena fafine ua oti lana tane, i le toetoe lava atoa le afe tausaga mulimuli ane ai!—Luka 4:25, 26.

E tusa lava po o le tulaga lea, ae foliga mai e lē o se mea masani le talosagaina e Ieova o se mea telē mai se fafine mativa. Ua atili ai lenei tulaga pe a tatou mafaufau i le tatalo na faia e se tamaloa taʻutaʻua. O le aoina e le tupu o Tavita o foai tauofo mo lona atalii o Solomona e faaaogā i le fausiaina o le malumalu na uunaia ai le tāua o le limafoai. O meaalofa na foai ane, e faaaluina ai le faitau piliona o tālā e tusa ai ma aso nei! Ae na tatalo atu Tavita ia Ieova e faapea: “A o ai ea aʻu nei? O ai ea foi loʻu nuu, ina ua matou mafaia ona fai taulaga ma le loto faapenei? Auā mai ia te oe mea uma lava; o au mea foi ua matou foaiina atu ai ia te oe.” (1 Nofoaiga a Tupu 29:14) E pei ona fai mai Tavita, o mea uma lava e ā Ieova lea. O lea la, o so o se mea lava tatou te foai atu mo le faaauilumaina o le tapuaiga mamā, ua tatou foai atu ia Ieova ana lava mea. (Salamo 50:10) Ae, ua tulai mai ai se fesili, Aisea ua finagalo ai Ieova tatou te foai atu pe afai o lea?

O se Vaega Tāua o le Tapuaiga Moni

O le tali faigofie e faapea i taimi anamua na faaaofia e Ieova le foai atu o se isi lea vaega tāua o le tapuaiga mamā. Na faataulaga e le tagata faatuatua o Apelu lana lafumanu faapelepele ia Ieova. Na faia foi e le augatamā o Noa, Aperaamo, Isaako, Iakopo ma Iopu taulaga lava ia e tasi.—Kenese 4:4; 8:20; 12:7; 26:25; 31:54; Iopu 1:5.

Na poloaia e le Tulafono faa-Mose ma na oo lava ina faatonutonuina le avatua o foai tauofo ia Ieova. Mo se faaaoaoga, na faatonuina tagata Isaraelu uma ina ia fai le sefulu aʻi, po o le foai atu o le tasi o vae sefulu o fua o le laueleele ma faatelega o a latou lafu manu. (Numera 18:25-28) O isi foai tauofo sa lei faatonuina faamalosi. Mo se faataitaiga, o tagata Isaraelu taitoatasi na manaomia ona foai atu ia Ieova uluai fua o a latou lafumanu ma fua o le laueleele. (Esoto 22:29, 30; 23:19) Ae, na faatagaina e le Tulafono tagata taitoatasi e fuafua po o le ā le tele o uluai fua e foai atu, a o le mea tāua ia sili ona lelei. Na saunia foi e le Tulafono aso faafetai ma feagaiga o taulaga, lea na faia faatauofo. (Levitiko 7:15, 16) Na faalaeiau e Ieova ona tagata ia foai atu e tusa ai ma mea ua ia faamanuiaina ai i latou. (Teuteronome 16:17) E pei ona sa faia i le fausiaina o le fale fetafai ma mulimuli ane le malumalu, na avatu e tagata taitoatasi mea na uunaia i  latou e o latou loto e foai atu. (Esoto 35:21; 1 Nofoaiga a Tupu 29:9) E mautinoa o na foai tauofo na matuā faafiafiaina ai Ieova!

I lalo o le “tulafono a Keriso,” o foai uma sa faatauofo. (Kalatia 6:2; 2 Korinito 9:7) E lei faapea ai la na taofia e soo o Keriso le foai atu pe faaitiitia foi. E lē o le tulaga lena! A o talaʻi Iesu ma ona aposetolo i Isaraelu, na mulimuli i ai se vaega o fafine ma tausi atu ia i latou e ala i a latou mea totino. (Luka 8:1-3) Na faapena foi ona maua e le aposetolo o Paulo meaalofa na lagolagoina ai lana galuega faamisionare, ma sa ia faalaeiauina nisi o faapotopotoga e foai atu mea totino mo isi pe a manaomia. (2 Korinito 8:14; Filipi 1:3-5) Na tofia e le vaega pule i Ierusalema tane agavaa e faamautinoa ua tufaina atu alamanuia ia i latou o manaomia. (Galuega 6:2-4) E manino mai la, na vaai i ai uluai Kerisiano o se faaeaga le lagolagoina o le tapuaiga mamā i na auala.

Ae, atonu tatou te tau mānatu po o le ā le pogai ua faaaofia ai e Ieova le foai atu, o se vaega o lana tapuaiga. Seʻi manatunatu i mafuaaga nei e fa.

Le Pogai Tatou te Foai Ai

Muamua, na faaaofia e Ieova le foai atu o se vaega o le tapuaiga moni ona o le faia faapea e lelei mo i tatou. E taʻu atu ai lo tatou talisapaia o le agalelei o le Atua. Mo se faataitaiga, pe afai ua faatau mai pe ua saunia e se tamaitiiti se meaalofa mo se matua, aisea e faatumuina ai le matua i le olioli? Pe faamalieina e le meaalofa se manaoga na lei mafai ona maua e mātua? Atonu e leai. Nai lo lena, e olioli mātua ona ua vaai atu ua tuputupu aʻe le agaga talisapaia o le tamaitiiti ma lona agaga foai. O mafuaaga tutusa lava foi na ua faalaeiauina ai e Ieova i tatou e foai ma e olioli o ia pe a tatou faia faapea. O le auala lena e faaali atu ai ia te ia tatou te talisapaia moni lona agalelei lē faatuaoia ma lona aao mafola ia i tatou. O ia o le foai “o mea lelei uma e foaifuaina mai, atoa ma mea alofa uma e atoatoa ona lelei,” o lea e lē uma mafuaaga tatou te faafetai atu ai ia te ia. (Iakopo 1:17) Ae sili atu i lena, na foai mai e Ieova lona lava Alo pele e toatasi, i le faatagaina o ia e maliu ina ia tatou maua ai le ola e faavavau. (Ioane 3:16) Pe ua lava ea mea tatou te faafetai atu ai ia te ia?

O lona lua, pe afai e fai ma tatou masani le foai, ua tatou aʻoaʻoina ai ia faataitai ia Ieova ma lona Alo, o Iesu Keriso, i se vala e sili ona tāua. O Ieova e tumau pea lona foai ma le aao mafola. E pei ona fai mai le Tusi Paia, na ia tuuina ia i tatou le “ola, ma le mānava, ma mea uma lava.” (Galuega 17:25) O se mea tatau lo tatou faafetai atu ia te ia mo le ola o ia i tatou, o meaʻai uma tatou te taumafaina, ma taimi fiafia uma o o tatou olaga. (Galuega 14:17) I le pei o lona Tamā, na faaalia ai e Iesu le agaga foai. Na ia foai o ia lava ma le lē manatu faapito. Ae pe e te silafia ina ua faia e Iesu vavega, na ia faia e ui ina leiloa ai nisi o ana mea? E sili atu i le faatasi ona taʻu mai e le Tusi Paia ia i tatou e faapea ina ua ia faamālōlō i ē mamaʻi, na ‘alu ese mai ai ia te ia’ le mana. (Luka 6:19; 8:45, 46) Sa agalelei tele Iesu na iu lava ina ua tuuina mai lona lava tagata atoa, lona ola, ina ia maliu.—Isaia 53:12.

O lea la pe a tatou foai atu, pe o lo tatou taimi, lo tatou malosi, po o a tatou mea totino, ua tatou faataitai ia Ieova ma ua faafiafiaina ai lona finagalo. (Faataoto 27:11; Efeso 5:1) Ua faapena foi ona tatou mulimuli atu i se faataitaiga e sili ona lelei mo amioga faaletagata lea na tuuina mai e Iesu Keriso mo i tatou.—1 Peteru 2:21.

O lona tolu, o le foai e faafetaiaia ai manaoga moni ma le tāua. E moni, e faigofie ia Ieova ona faafetaiaia manaoga mo le faaauilumaina o le Malo e aunoa ma la tatou fesoasoani, e pei lava ona ia mafai ona faia maa e alalaga mai nai lo le faaaogaina o i tatou e talaʻia le upu. (Luka 19:40) Ae ua ia filifili e tuuina mai ia i tatou nei faaeaga. O lea pe afai e foai atu a tatou alamanuia e faalautele ai manaoga o le Malo, ua ia i tatou foi la se lotomalie sili i le iloaina e faapea ua faia sa tatou vaega moni i le galuega sili ona tāua o loo faia i lenei lalolagi.—Mataio 24:14.

E mautinoa e manaomia tupe mo le faagaoioia o le galuega a Molimau a Ieova i le  lalolagi aoao. A o faagasolo le tausaga faaleauaunaga o le 1995, na faaaluina ai e le Sosaiete pe tusa o le 60 miliona tālā (U.S.) i le na o le tausiaina o paeonia faapito, o misionare, ma ovasia faimalaga i o latou tofiga o le auaunaga i le faiva. Ae peitai, ua na o se vaegatupe itiiti lena pe a faatusatusa atu i galuega o faugā fale ma le faagaoioia o ofisa o lālā ma nofoaga lomitusi i le lalolagi aoao. Ae, o le tele lava ua faataunuuina ona o foai tauofo!

E lē manatu tagata o Ieova e faapea a lē tagolima, atonu e sili ai le tuu atu i isi e tauavea le avega. O uiga faapena e mafai ona taitaiina atu ai i tatou i le misia o lenei faaeaga o la tatou tapuaiga. E tusa ai ma le aposetolo o Paulo, na mafatia Kerisiano i Maketonia ona o lo latou “mativa matuā tele.” Ae, na latou augani ane pea mo le faaeaga o le foai atu. Ma o mea na latou foai ane, na taʻua e Paulo na ‘sili atu i mea na latou maua’!—2 Korinito 8:1-4.

O lona fa, ua faaaofia e Ieova le foai atu o se vaega o le tapuaiga moni ona o le foai atu e fesoasoani ai ia i tatou ia fiafia. Na fetalai Iesu lava ia e faapea: “E sili le manuia o le na te foai atu, i lo le na te talia mai.” (Galuega 20:35) O le auala lena na foafoaina ai i tatou e Ieova. O se isi foi lena mafuaaga tatou te lagona ai e tusa lava po o le ā le tele tatou te foai atu ia te ia, e lē tāitai ona faatusalia i le agaga talisapaia o loo tatou lagona mo ia i o tatou loto. E fiafia ai, ona e lē o faatalitalia mai e Ieova ni mea e sili atu mai ia i tatou nai lo o mea ua mafai ona tatou avatu. E mafai ona tatou mautinoa e faapea e olioli o ia pe a tatou foai atu ma le fiafia pe a mafai ai!—2 Korinito 8:12; 9:7.

O Faamanuiaga Mai le Faaalia o le Agaga Foai

Pe a toe tepa i la tatou faataitaiga lea na taʻua i le amataga, ma faaāta i o tatou mafaufau, seʻi faapea na manatu le fafine lenei mai Sarefata ua oti lana tane o loo iai se isi e mafai ona tausia manaoga o Elia mo se meaʻai. Maeu se faamanuiaga semanū na te misia!

E lē taufesiligia le faamanuiaga a Ieova ia i latou e faaalia le agaga foai. (Faataoto 11:25) Na lei mafatia lenei fafine ua oti lana tane mai Sarefata ona ua na foai atu si fasi toe meaʻai na ia mafaufau o lana toe ʻaiga lea. Na tauia o ia e Ieova e ala i se vavega. E pei ona folafola e Elia, na lei faaitiitia lana apa falaoamata ma lana fagu suauu seia oo ina uma le oge. Ae na ia mauaina se taui e sili atu. Ina ua maʻi lana tama tama ma iu ina oti, na toe faatūina aʻe o ia e Elia le auauna moni a le Atua. Maeu se faalaeiauga faaleagaga na atiina aʻe ai o ia ona o lena mea!—1 Tupu 17:16-24.

Tatou te lē o toe faatalitalia le faamanuiaina o i tatou e ala i vavega i aso nei. (1 Korinito 13:8) Ae ua faamautinoa mai e Ieova ia i tatou e faapea o le a ia lagolagoina i latou o ē auauna atu ia te ia ma le loto atoa. (Mataio 6:33) O lea e mafai foi ona pei i tatou o le fafine lenei ua oti lana tane mai i Sarefata, i le foai atu ma le loto malie, ma le mautinoa o le a tausiaina i tatou e Ieova. Ua faapena foi, e mafai ona tatou olioli i taui sili faaleagaga. Afai o la tatou foai o se vaega o a tatou faasologa faifai pea, nai lo o se mea e fai pe a manao i ai, po o le faia foi pe a manatua, o le a fesoasoani la ia i tatou e faafaigofie ai la tatou vaai ma taulai atu i manaoga o le Malo, e pei ona fautuaina mai e Iesu. (Luka 11:34; faatusatusa i le 1 Korinito 16:1, 2.) E mafai foi ona fesoasoani ia i tatou e faalatalata atu ia Ieova ma Iesu o ni aufaigaluega faatasi ma i laʻua. (1 Korinito 3:9) Ma o le a faateleina ai le agaga foai lea ua iloagofie ai tagata tapuai o Ieova i le lalolagi aoao.

 [Pusa i le itulau 31]

AUALA UA FILIFILI AI NISI E FOAI

MEAALOFA MO LE GALUEGA I LE LALOLAGI AOAO

E toatele tagata latou te tuuesea se vaega tupe pe faasoa se tupe e lafo i pusa o loo faailogaina o: “Meaalofa mo le Galuega a le Sosaiete i le Lalolagi Aoao—Mataio 24:14.” E avatu e faapotopotoga i masina taitasi ia tupe i le ofisa ulu i Brooklyn, i New York, po o so o se ofisa o le lālā e latalata ane.

O foai tauofo o tupe, e mafai ona aauina saʻo atu lava i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, pe aauina atu i le ofisa o le Sosaiete lena o loo vaavaaia lo outou atunuu. E mafai foi ona foai atu maatāua po o isi mea tāua. O na foai e tatau ona aauina atu faatasi ma se tusi puupuu e faamanino atu ai o lena foai o se foai patino lava.

FUAFUAGA O FOAI E IAI MA NI TUUTUUGA

E mafai ona auina atu i le Watch Tower Society se tupe e teuina ai o se mavaega seia maliu lē na ia foaiina atu lena vaega tupe, ma se fuafuaga o le toe faafoi i le tagata e ana le foai pe afai na te manaomia. Mo nisi faamatalaga atili, faamolemole faafesootai le Treasurer’s Office i le tuatusi o loo taʻua i luga.

FOAI UA UMA ONA FUAFUAINA

E faaopoopo atu i foai tuusaʻo tautupe ma fuafuaga o foai tautupe e iai ma ni tuutuuga, e iai foi isi auala e foai atu ai mo le aogā o le auaunaga o le Malo i le lalolagi aoao. Ua aofia ai mea nei:

Inisiua: E mafai ona faaigoaina le Watch Tower Society o sē e mauaina le aogā o le inisiua o ola o tagata po o taui e maua pe a faamālōlō litaea pe penisione le tagata. E ao ona logoina le Sosaiete pe a faia sea fuafuaga.

Teuga Tupe: O teuga tupe, o tusi o teuga tupe tetele, po o ni vaega tupe a le tagata pe a faamālōlō litaea, e mafai ona tuu faamavaega i le Watch Tower Society pe totogi atu i ai pe a maliu lē e ana, e tusa ai ma faatulagaga manaomia a le faletupe a lea atunuu. E ao ona logoina le Sosaiete pe a faia sea fuafuaga.

Oloa ma Pepa Faamaonia mo Tupe: O oloa ma pepa faamaonia mo tupe e mafai ona foai atu i le Watch Tower Society a lē o se meaalofa e tuusaʻo, po o se fuafuaga e faapea o se tupe maua e faaauau pea ona totogi atu i le tagata e ana le foai.

Fanua ma Fale: O fanua ma fale e mafai ona faatauina atu, e mafai ona foai atu i le Watch Tower Society e ala i le faia o se meaalofa e tuusaʻo po o le taofia lea ia faaauau ona nofo ai pea lē e ana, seia maliu. E ao i lena tagata ona faafesootai le Sosaiete a o ia lei faapepaina faaletulafono so o se fanua totino o le a ia foai atu mo le Sosaiete.

Uili ma Mavaega: E mafai ona faaui atu se mea totino po o se vaega tupe i le Watch Tower Society e ala i se uili ua faatulafonoina, pe avea foi le Sosaiete ma ē e mauaina le mavaega. O se mavaega e faia mo le manuia o se faalapotopotoga faalelotu atonu o le a iai ni lelei i le itu tau lafoga. E tatau ona auina atu i le Sosaiete se kopi o le uili po o le mavaega.

O i latou uma e fia iloa nei faatulagaga fuafuaina mo le foai atu e tatau ona faafesootai le Planned Giving Desk (Ofisa o Foai ua Uma Ona Fuafuaina) i le tuatusi o loo lisiina i lalo po o le ofisa o le Sosaiete lena o loo vaavaaia lo outou atunuu. E tatau ona maua e le Ofisa o Foai ua Uma Ona Fuafuaina kopi o pepa manaomia e talafeagai uma i nei faatulagaga.

Ua saunia e le Sosaiete se polosiua i le gagana faa-Peretania ua faaulutalaina Planned Giving. O i latou o loo i le Iunaite Setete o loo fuafua e faia se meaalofa faapitoa i le Sosaiete i le taimi nei, po o le tuu o se faamaoniga tusitusia mo le taimi o le maliu, atonu o le a aogā i ai lenei faamatalaga. Ua moni lenei mea, ae maise lava pe a latou mananao e faia nisi fuafuaga a le aiga po o ni meatotino ua fuafuaina, a o faaaogaina ai tupe o lafoga e faaitiitia ai le tupe e totogi mo lafoga na e manaomia ona totogia. E avatu lenei polosiua pe a talosagaina, e ala i le tusi mai po o le telefoni mai foi.

PLANNED GIVING DESK

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telefoni: (914) 878-7000