Faamafana Fanaga mo Ē ua Sauāina

PE O e mātauina ea a o faagasolo lou olaga o loo iai upu patino ua taʻua soo i le tele o taimi i ulutala? Pe ua e lē lavā ea i le faitauina o upu ia e pei o taua, solitulafono, mala, matelaina, ma puapuaga? Peitai e iai se upu o loo manino lona misi mai lipoti o tala i mea tutupu. Ae, o se upu o loo suitulaga i se mea lea e matuā manaomia tele e tagata. O lenei upu o le “faamafanafanaga.”

“Ia faamafanafana” o lona uiga “ia tuuina atu le malosi ma le faamoemoe” ma “ia faamāmā mafatiaga po o popolega” o se tasi. I fevesiaiga uma ua aumaia e le lalolagi i le gasologa o le 20 senituri, o le faamoemoe ma le saʻoloto mai mafatiaga ua matuā manaomia lava. E moni, o nisi o i tatou i aso nei ua sili atu le olioli i le mautū ma le sologa lelei faaletino nai lo o mea na ono manatu i ai o tatou tuaa e mafai moni ona iai. Ua mafaia lenei mea ona o le faaauilumaina o le faasaienisi. Peitai o le faasaienisi ma le malamalamaga faatekinisi (technology) ua lē faamafanafanaina ai i tatou i le uiga faapea e na te mafaia ona aveesea atoatoa uma mafuaaga o puapuaga mai tagata. O ā nei mafuaaga?

I le tele o senituri ua mavae, sa tautala ai le tagata poto o Solomona i le mafuaaga autū e tasi o mafatiaga ina ua ia faapea mai: “E pule ai le tasi tagata i le tasi, e leaga ai o ia lava.” (Failauga 8:9) Ua lē mafai e le faasaienisi ma le malamalamaga faatekinisi ona suia le faanaunauga o le tagata e manao e pulea ona uso a tagata. I lenei 20 senituri, ua taʻitaʻiina atu e lenei mea i pulega sauā i totonu o atunuu ma taua matautia i le va o atunuu.

Talu mai le 1914 e sili atu i le selau miliona tagata ua fasiotia e māfua mai taua. Seʻi manatu i mafatiaga tele o tagata lea ua taʻu mai e lenei fuainumera—e faitau miliona aiga faanoanoa o loo manaomia se faamafanafanaga. Ma o taua ua taʻitaʻiina atu ai i isi ituaiga o puapuaga e ese mai i le oti faifaamalosi. I le iuga o  le Taua Lona Lua a le Lalolagi, sa silia i le 12 miliona tagata sulufai i Europa. O tausaga talu ai nei, e sili atu i le tasi ma le ʻafa miliona na sosola ese i tafā o taua i Saute i Sasaʻe o Asia. O fetauaiga i Balkans ua faamalosia ai le sili atu i le lua miliona i latou e sosola ese mai i o latou aiga—o le tele o tulaga ia sosola ese ai mai le “tafiesea atoatoa o ni ituaiga patino o tagata.”

E manaomia moni e le ʻau sulufai se faamafanafanaga, ae maise lava i latou ua aveesea faamalosi mai i o latou aiga ma na latou avea na o ni mea faitino lava sa mafai ona latou tauaveina, ma sa latou lē iloa le mea o latou ō atu i ai po o le ā le lumanai mo i latou ma o latou aiga. O ia tagata o se vaega o i latou ua matuā aafia i tulaga e sili ona faigata o sauāga; o loo latou manaomia le faamafanafanaga.

I vaega e aupito sili ona filemu o le lalolagi, o loo ola aʻe ai le faitau miliona o i latou o loo nofo pologa i le faiga o mea tau i le tamaoaiga o le lalolagi. E moni, o nisi o loo anoanoai mea faitino. Ae o le toatele, o loo fesagai pea ma le tauiviga i aso taitasi i le tausia aʻe o le olaga. E toatele o loo tau sailia ni fale talafeagai e nonofo ai. Ua faatuputeleina le faitau aofai o i latou e lē faigaluega. Ua folafola mai e se nusipepa i Aferika e faapea: “O loo agaʻi atu le lalolagi i tulaga e sili ona leaga tau galuega, ma e oo atu i le tausaga e 2020 o le a sili atu i le 1.3 piliona tagata o loo tau sailia ni galuega.” Ma le mautinoa o ē mafatia tau tamaoaiga ua manaomia le “malosi ma le faamoemoe”—se faamafanafanaga.

I le tali atu i tulaga atuatuvale ua iai, o nisi ua liliu atu i se olaga solitulafono. O le mea moni, ua na ona aumaia ai o faigata ia i latou ua aafia ai fua, ma o soligatulafono matautia ua na ona faaopoopo atu ai i lagona mafatia. O se ulutala talu ai nei i le nusipepa The Star, a Johannesburg, i Aferika i Saute, e faitauina e faapea: “O se aso i le olaga masani o ‘le atunuu e aupito sili ona fasioti tagata i le lalolagi.’” Sa faamatalaina i lea mataupu se olaga masani i totonu o Johannesburg, ma vaipanoa o loo latalata ane i ai. I lena lava aso, e toafa tagata na fasiotia ma e toavalu sa ave faamalosia a latou taavale. E sefulufitu gaoiga na lipotia mai i se tasi o nofoaga o ē e feoloolo lo latou tulaga faaletino, e tu lata i le taulaga. E faaopoopo atu i ai, sa iai ni gaoiga sa tauaveina ai ni auupega. E tusa ai ma le nusipepa, sa faamatalaina e leoleo  lenei tulaga e faapea o se aso “ua faaitiitia ai le solitulafono.” Ma le manino, o aiga o i latou ua fasiotia fua, o i latou o loo afaina i gaoiga o fale ma le ave faamalosia o taavale ua latou matuā lagonaina le pagatia. E latou te manaomia se faamautinoaga ma se faamoemoe—se faamafanafanaga.

I nisi o atunuu, o loo iai ni mātua ua latou faatauina atu a latou fanau i faiga faatalitane. O se tasi o atunuu o Asia lea e lolofi atu i ai turisi “i faigamalaga mo faiga faaleituaiga” ua lipotia mai ai le ʻau talitane e lua miliona, o le toatele o i latou nei sa faatauina po o le ave faamalosia a o laiti. Pe o iai nisi o sili atu ona mafatia nai lo nei tamaiti ua aafia fua? O le talanoaina o nei faiga leaga, na lipotia mai e le mekasini o le Time i le fonotaga i le 1991 a faalapotopotoga a tamaitai i Saute i Sasaʻe o Asia. O iina, sa iai se fua faatatau faapea e “30 miliona o fafine na faatauina atu i le lalolagi aoao talu mai le taulotoaiga o vaitausaga o le 1970.”

O le mea moni, e lē tau faatauina atu tamaiti i faiga faatalitane ina ia aafia ai fua. Ua faatupulaia le faitau aofai o i latou ua faia i ai faiga faatautala po o le tosoina faamalosi i totonu o o latou lava aiga e mātua ma tauaiga. O na tamaiti e mafai ona latou tauaveina faalogona ua faamanuʻalia mo se taimi umi. O le mea moni, o le mafatia ona o le aafia fua i faiga leaga, e latou te manaomia ai se faamafanafanaga.

Se Tagata Suesue Anamua Tau i Sauāga

Sa matuā faateʻia le tupu o Solomona i le tulaga na oo i ai le sauā o tagata. Sa ia tusia e faapea: “Ona ou toe manatunatu lea i sauaga uma ua faia i lalo o le la; faauta foi i loimata o e ua sauaina, ua leai foi se na te faamafanafanaina i latou; ua lima malosi foi e na saua ia te i latou; a ua leai se na te faamafanafanaina i latou.”—Failauga 4:1.

Afai na mātauina e le tupu poto i le 3,000 tausaga ua mavae faapea o tagata ua sauāina ua matuā manaomia sē e faamafanafana atu, o le ā la sana faamatalaga o le a faia i aso nei? E ui i lea, sa iloa lelei e Solomona faapea e leai se tagata lē lelei atoatoa, e aofia ai ma ia, e mafai ona aumaia le faamafanafanaga o loo manaomia e tagata. E manaomia se tasi e sili atu e na te aveesea le malosi o i latou o loo sauā. Po o iai ea sea ituaiga o peresona?

 I le Tusi Paia, ua tautala ai le Salamo 72 i sē e sili mo faamafanafanaga mo tagata uma lava. Sa tusia le salamo e le tamā o Solomona, le tupu o Tavita. O lana upu tomua e faitauina faapea: “O le salāmo ma Solomona.” Ma le mautinoa, sa tusiaina e le tupu ua matua o Tavita e faatatau i Lē o le a soloai ane i lona nofoalii. O Ia lenei, e tusa ai ma le salamo, o le a ia aumaia le saʻolotoga tumau mai sauāga. “O lana nofoaiga e tupu olaola mai ai le ua amiotonu; e manuia tele ai, seia leai se masina. E pule foi o ia e pau mai i le tasi sami e oo atu i le tasi sami . . . e oo atu i tuluʻiga o le lalolagi.”—Salamo 72:7, 8.

E foliga mai a o tusia e Tavita nei upu, sa ia manatu i lona atalii o Solomona. Ae na iloa e Solomona e faapea e lē mafai e lona malosi ona auauna atu i tagata i le auala o loo faamatalaina i le salamo. E mafai ona ia faataunuuina upu o le salamo i sina auala itiiti ma i le fai ai ma sui o le nuu o Isaraelu, ae lē o le lelei o le lalolagi aoao. O le mea moni, o lenei salamo faagaeeina sa faasino atu i se tasi e matuā sili atu nai lo Solomona. O ai ia lena? Ua na o Iesu Keriso lava.

Ina ua fofogaina atu e se agelu le fanau mai o Iesu, sa ia taʻua e faapea: “E foai atu e le Alii le Atua ia te ia le nofoaiga a Tavita lona tamā.” (Luka 1:32) E lē gata i lea, sa faasino atu e Iesu ia te ia lava e faapea o “lē sili ia Solomona.” (Luka 11:31) Talu mai le toe faatūina aʻe o Iesu i le itu taumatau o le Atua, ua iai o ia i le lagi, o le nofoaga lea o le a mafai ai ona ia faataunuuina upu o loo i le Salamo 72. E lē gata i lea, ua ia mauaina le malosi ma le pule mai le Atua e gausia ai le amo o i latou o sauāina tagata. (Salamo 2:7-9; Tanielu 2:44) O lea la o Iesu o ia lea e na te faataunuuina upu o loo i le Salamo 72.

Ua Toeitiiti Ona Faaiuina Lea o Sauāga

O le ā le uiga o lenei mea? O lona uiga o le saʻolotoga mai i so o se ituaiga o sauāga, o le a toeitiiti ona faataunuuina lea. O puapuaga ma sauāga e lē mafaatusalia ua molimauina i lenei 20 senituri sa muai taʻua e Iesu o se vaega o le faailoga lea e faailogaina ai ‘le faaiuiuga o le faiga o mea.’ (Mataio 24:3) Faatasi ai ma isi mea, na ia valoia faapea: “Auā e sii le taua e le tasi nuu i le tasi nuu, ma le tasi malo i le tasi malo.” (Mataio 24:7) O lena vala o le valoaga sa amata lona faataunuuina pe tusa o le taimi lea na pa ai le Taua Muamua a le Lalolagi i le 1914. “E maalili foi le alofa o le toatele o tagata,” sa toe faaopoopo mai ai Iesu, “ona ua tupu tele o le amio leaga.” (Mataio 24:12) O le amioleaga ma le leai o se alofa ua aumaia ai se tupulaga amioleaga ma le sauā. O lea la, ua tatau ona latalata mai le taimi mo Iesu Keriso e faalaa ane ai o se Tupu fou o le lalolagi. (Mataio 24:32-34) O le ā o le a uiga i ai mo tagata ua sauāina o ē o iai le faatuatua ia Iesu Keriso ma o loo vaai atu ia te ia o Lē Faamafanafana ua tofia e le Atua mo tagata?

Mo se tali i lena fesili, seʻi o tatou faitau ni upu faaopoopo i le Salamo 72 lea e faataunuu ia Keriso Iesu: “Auā e laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva. E laveai o ia ia i latou ai le saua ma le faamalo; e silisili foi o latou toto i lona manatu.” (Salamo 72:12-14) O lea la o le Tupu tofia a le Atua o Iesu Keriso, o le a tagai i ai o le a leai se tasi o puapuagatia ona o le sauā. O loo ia te ia le malosi e faaiuina ai ituaiga uma o faamasinoga lē tonu.

‘E foliga mai e manaia tele,’ atonu e faapena mai se tasi, ‘ae faapefea le taimi nei? O le ā le faamafanafanaga o loo iai mo i latou o puapuagatia i le taimi nei?’ O le mea moni, o loo iai le faamafanafanaga mo ē ua puapuagatia. O mataupu e lua o loo mulimuli mai i lenei mekasini o le a faaalia ai le auala e mafai ai e le faitau miliona ona maua faamafanafanaga e ala i le atiina aʻe o se faiā vavalalata ma le Atua moni o Ieova, ma lona Alo pele o Iesu Keriso. O lena ituaiga o faiā e mafai ona faamafanafanaina ai i tatou i nei taimi o sauāga ma e mafai ona taʻitaʻiina atu ai se tagata i le ola e faavavau e aunoa ma le sauāina. Na taʻua e Iesu i lana tatalo i le Atua e faapea: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

[Ata i le itulau 4]

O le a leai se tagata e sauāina le isi tagata i le lalolagi fou a le Atua