Faamafanafanaga a o Faagasolo Tausaga e Fa o le Taua

A O FAAGASOLO tausaga e fa o le taua i oganuu o le atunuu lea na taʻua muamua o Yugoslavia, e toatele tagata na mafatia ona o tulaga faigata ma oge matautia. E aofia ai ia i latou na le faitau selau o Molimau a Ieova, o ē na faaauau pea ona tapuai ma le faamaoni i le “Atua foi e ana le faamafanafanaga uma.”—2 Korinito 1:3.

I Sarajevo, na matuā mafatia ai tagata i faigata matautia o le olaga i se tasi o aai tele na osofaia e vaegaau a o faagasolo le taua. Sa tau lē maua se eletise, vai, fafie, ma ni meaʻai. Na faapefea ona faagaoioia le faapotopotoga a Molimau a Ieova i Sarajevo a o iai i nei tulaga lamatia? Na tuuina atu e nisi o Kerisiano mai i nuu tuaoi o latou ola i lamatiaga ona o le avatuina o sapalai tele o mea manaomia mo i latou. (Tagai i Le Olomatamata, Novema 1, 1994, itulau 23-27.) Sa faapea foi, ona tufa atu e uso i Sarajevo mea na latou maua i isi, ae na sili ona faamamafa le faia faapea i le fetufaaiga o mea faaleagaga. A o aasa osofaiga a vaegaau na avatu ai e se ovasia Kerisiano mai i lena aai se lipoti lea e mulimuli mai:

“Matou te faatāuaina tele a matou sauniga. O aʻu ma laʻu avā, faatasi ai ma le isi toʻa 30 o tagata, matou te savalia le 15 kilomita [9 maila] le alu i sauniga ma le 15 kilomita [9 maila] le toe foi mai. E iai taimi sa faasilasila ai e faapea o le a faasoasoa le suavai i taimi tonu sa faia ai sauniga. O le ā e faia e uso? Pe o le a latou nonofo ea i fale ina ia mauaina le suavai pe o le a auai atu i sauniga? Na sili atu ona naunau o tatou uso e auai i sauniga. E masani ona fesoasoani isi uso i isi; ma latou te fetufaai i so o se mea ua latou maua. O se tasi o tuafafine i la matou faapotopotoga e nofo i se nuu maotua o le aai, e latalata i le togavao; o lea sa faigofie ai mo ia ona mauaina ni fafie. E faigaluega foi o ia i se fale faifalaoa, ma e totogi o ia i falaoamata. Pe a talafeagai, e na te taoina se pāpāfalaoa telē ma ave i le sauniga. Pe a uma le sauniga, e na te tufatufaina atu fasi falaoa i tagata uma, a o gasolo mai i fafo.

“E matuā tāua tele le mautinoa e leai se uso po o se tuafafine e lagona ua tuulafoaiina. E lē iloa e se tasi po o ai o i matou o le a manaomia se fesoasoani pe a tulai mai tulaga lē logolelei. Ina ua oo i le tau mālūlū, ma sa aisā ai le auala na tosoina ai e uso talavou malolosi se tasi o tuafafine maʻi, i le sauniga i luga o se taavale toso.

“O i matou uma e auai i le galuega talaʻi, ma ua faamanuia e Ieova a matou taumafaiga. Ua ia silafia le tulaga matautia o loo matou iai i Bosnia, ae ua ia faamanuia i matou e ala i faatelega—o faatelega sa matou lei iloa muamua a o lei oo mai le taua.”

Ua faapena foi, i isi vaega fetauai o le nuu na taʻua muamua o Yugoslavia, ua olioli ai Molimau a Ieova i faatelega e ui lava i tulaga matautia. Mai i le ofisa o Molimau a Ieova i Croatia na aumai ai le lipoti lenei e uiga i se vaega o Molimau a Ieova: “O uso o loo nonofo i Velika Kladuša ua matuā sili ona oo i ai taimi e faigata tele ona faafesagaia. Na osofaia le taulaga i le tele o taimi. Na ono faamatalaina atu e uso lo latou solitu i le auai i vaegaau a Croatia, Serbia, ma ituaiga vaegaau eseese a le ʻau Musalimi. E matuā moni lava, sa latou onosaia tele—o faafalepuipuiina, sasaina, fiaʻai, ma lamatiaga e oti ai. Ae peitai, na tumau ma le faamaoni i latou uma ma ua maua le faaeaga matagofie o le vaai atu i le faamanuiaga a Ieova i a latou galuega.”

E ui lava i na tulaga faigata, ae na faaauau pea ona olioli Molimau a Ieova i faatelega i Velika Kladuša ma nuu tuaoi o Bihać a o latou auai ma le maelega i le faasoaina atu o le feau faamafanafana a le Atua i o latou tuaoi. E toʻa 26 le aofai o tagata talaʻi o le Malo e mai i nei nofoaga e lua ma o loo faia ni suesuega faale-Tusi Paia e 39 i aiga!