Fetufaaiga i Faamafanafanaga ua Saunia Mai e Ieova

“Ua tumau foi lo matou faatuatua ia te outou; o loo matou iloa, faapei ona faatasia outou i tiga, e faapea foi i le faamafanafanaina.”—2 KORINITO 1:7.

1, 2. O le ā se mea ua oo i le toatele o ē ua avea ma Kerisiano i aso nei?

E TOATELE tagata o loo faitauina nei Le Olomatamata, sa soifua aʻe e aunoa ma se poto i upu moni a le Atua. Pe atonu o le tulaga foi lena o loo e iai. Pe afai o lena, seʻi toe mānatu la i ou faalogona na iai a o amata ona faapupulaina ou mata o le malamalama. Mo se faaaoaoga, ina ua faatoʻā e malamalama lava e lē o faapuapuagatiaina ē o feoti ae ua latou lē toe iloa se mea, pe sa lē o se mapusaga ea lena ia te oe? Ma ina ua e iloa le faamoemoe mo ē ua maliliu, e faitau piliona tagata o le a toe tutū mai i le ola i le lalolagi fou a le Atua, pe sa lei faamafanafanaina ai ea oe?—Failauga 9:5, 10; Ioane 5:28, 29.

² Ae faapefea le folafolaga a le Atua e faaiuina le amioleaga ma toe suia lenei lalolagi e avea ma parataiso? Ina ua e aʻoaʻoina lenei folafolaga, pe sa lē o se faamafanafanaga ea ia te oe ma e matuā naunautai ai e faatalitalia? Na faapeī ou lagona ina ua e faatoʻā iloa e ono mafai ona lē oo lava i le oti ae faasaoolaina atu i lena Parataiso faalelalolagi o loo fotuai mai? E lē masalomia lou matuā fiafia. Ioe, ua avea oe o sē taliaina le feau faamafanafanaloto a le Atua lea ua talaʻia atu nei i le lalolagi aoao e Molimau a Ieova.—Salamo 37:9-11, 29; Ioane 11:26; Faaaliga 21:3-5.

3. Aisea ua mafatia ai foi i puapuaga i latou o ē o loo tufaina atu le feau faamafanafana a le Atua i isi?

 ³ Peitai ane, a o e taumafai e tufa atu le feau a le Tusi Paia i isi, na oo ai foi ina e iloa “e le o i tagata uma le faatuatua.” (2 Tesalonia 3:2) Atonu ua ulagia oe e nisi o au uo sa iai muamua ona o lou faaalia atu o lou faatuatua i folafolaga a le Tusi Paia. Atonu foi ua e mafatia i sauāga ona o le faaauau ona e suesueina le Tusi Paia ma Molimau a Ieova. Atonu e faateteleina le matuitui o teteega a o amata ona e faia ni suiga ina ia ogatusa ai lou olaga ma mataupu silisili o le Tusi Paia. Ua amata ona e tofo i puapuaga ia o loo aumaia e Satani ma lana lalolagi i ē uma o loo latou talia faamafanafanaga a le Atua.

4. I ā auala eseese e mafai ona tali atu ai i puapuaga tagata fou ua naunau fiafia?

⁴ O se tulaga faanoanoa, e pei ona sa muai fetalai Iesu, o puapuaga e faapogaia ai ona tausuai nisi ma lē toe auaufaatasi ai ma le faapotopotoga Kerisiano. (Mataio 13:5, 6, 20, 21) O loo onosaia e isi puapuaga e ala i le taulai atu o o latou mafaufau i folafolaga faamafanafanaloto o loo latou aʻoaʻoina. Mulimuli ane, ona tuuina atu lea o o latou ola ia Ieova ma papatisoina e avea ma soo o lona Alo, o Iesu Keriso. (Mataio 28:19, 20; Mareko 8:34) O le mea moni, e lē taofia puapuaga pe a papatisoina se Kerisiano. Mo se faaaoaoga, e mafai ona avea le tausia o le tulaga mamā o se tauiviga faigata mo se tagata na matuā masani lona olaga i amioga lē mamā. O isi e tatau ona latou tauivi ma teteega faifai pea mai tagata lē talitonu o o latou aiga. Po o ā lava puapuaga, ae tasi le mea e mafai ona mautinoa e i latou uma o loo tausisia pea ma le faamaoni se olaga o le tuuina atu i le Atua. I o latou lava tulaga totino, o le a latou tofo ai i le faamafanafanaga ma le fesoasoani a le Atua.

“O le Atua Foi e Ana le Faamafanafanaga Uma”

5. E lē gata i le tele o tofotofoga na mafatia ai Paulo, ae o le ā ma le isi mea na ia tofo i ai?

⁵ O lē na ia matuā talisapaia faamafanafanaga o loo foai mai pea e le Atua, o le aposetolo lea o Paulo. Ina ua mavae ni taimi na sili ona tofotofoina ai i Asia ma Maketonia, sa ia tofo ai i se mapusaga tele ina ua logotala i le talia lelei e le faapotopotoga i Korinito o lana tusi o aoaiga. O lenei mea na uunaia ai o ia e tusi atu ia i latou se tusi lona lua, lea o loo iai le faaupuga lenei o viiviiga: “Ia faamanuina le Atua, o le Tamā o lo tatou Alii o Iesu Keriso, o le Tamā e ona le alofa mutimuti vale, o le Atua foi e ana le faamafanafanaga uma; o le na te faamafanafanaina mai ia te i matou i lo matou puapuaga uma lava.”—2 Korinito 1:3, 4.

6. O le ā tatou te aʻoaʻoina mai upu a Paulo o loo maua i le 2 Korinito 1:3, 4?

⁶ O nei upu faagaeeina ua tatou aʻoaʻoina mai ai ni mea se tele. Seʻi o tatou iloiloina. Ina ua faaali atu e Paulo ana viiviiga po o faafetai i le Atua pe faia se talosaga ia te ia i ana tusi, e masani ona tatou iloa o loo aofia ai foi ma lona talisapaia tele o Iesu, le Ulu o le faapotopotoga Kerisiano. (Roma 1:8; 7:25; Efeso 1:3; Eperu 13:20, 21) O lea, ua faasino atu ai e Paulo lenei viiga i “le Atua, o le Tamā o lo tatou Alii o Iesu Keriso.” Ona sosoo ai lea, mo le uluai taimi i ana tusitusiga, ua ia faaaogā se nauna faa-Eleni ua faaliliuina “alofa mutimuti vale.” O lenei nauna e sau mai se upu o loo faaaogā e faaali atu ai lagona faanoanoa i mafatiaga o se isi. O lea ua faamatala ai e Paulo lagona mutimutivale o le Atua mo so o se tasi o Ana auauna faamaoni o loo mafatia i puapuaga—o lagona mutimutivale ua uunaia ai le Atua ia gaoioi ma le alofa mutimutivale mo i latou. I le faaiuga, na taulai atu ai Paulo ia Ieova o le puna o lenei uiga moomia e ala i lona taʻua o ia “o le Tamā e ona le alofa mutimuti vale.”

7. Aisea e mafai ai ona faapea atu o Ieova “o le Atua foi e ana le faamafanafanaga uma”?

⁷ O le “alofa mutimuti vale” o le Atua e maua ai e le tagata o loo mafatia i puapuaga se mapusaga. O lea la ua faaauau ai ona faamatala e Paulo Ieova e faapea “o le Atua foi e ana le faamafanafanaga uma.” Po o ā lava la faamafanafanaga tatou te mafai ona maua mai le agalelei o o tatou uso talitonu, e mafai  pea ona tatou manatu o Ieova na puna mai ai. E leai se faamafanafanaga moni ma tumau, e lē aumaia mai le Atua. E lē gata i lea, o ia na foafoaina le tagata i lona faatusa, lea ua mafai ai ona avea i tatou o ni ē faamafanafana atu. Ma o le agaga paia o le Atua ua uunaia ai ana auauna e faaalia le alofa mutimutivale ia i latou o loo manaomia faamafanafanaga.

Ua Aʻoaʻoina e Avea ma Ē Faamafanafana Atu

8. E ui e lē māfua mai le Atua o tatou tofotofoga, ae o ā āuga aogā e mafai ona tatou maua mai lo tatou onosaia o puapuaga?

⁸ A o faataga e Ieova le Atua tofotofoga eseese e oo i ana auauna faamaoni, ae lē tāitai ona māfua mai ia te ia na tofotofoga. (Iakopo 1:13) Peitai ane, o faamafanafanaga ua ia saunia pe a tatou onosaia puapuaga e mafai ona aʻoaʻoina ai i tatou ina ia sili atu lo tatou manatunatu i manaoga o isi. O le ā le iuga? “Ina ia [tatou] mafaia ona faamafanafana atu ia te i latou ua maua i se tasi lava puapuaga, i le faamafanafanaga ua faamafanafanaina ai i [tatou] e le Atua.” (2 Korinito 1:4) O lea ua aʻoaʻoina ai i tatou e Ieova ina ia tatou tufa atu ma le uigā ana faamafanafanaga i isi uso talitonu ma i latou o ē tatou te feiloai i ai i le faiva a o tatou faataitai atu ia Keriso ma “faamatalaloto i e faanoanoa uma lava.”—Isaia 61:2; Mataio 5:4.

9. (a) O le ā o le a fesoasoani ia i tatou ina ia onosaia ai mafatiaga? (e) Ua faapefea ona faamafanafanaina isi pe a tatou onosaia ma le faamaoni puapuaga?

⁹ Sa onosaia e Paulo le tele o ona mafatiaga, e faafetaia ai le tele o faamafanafanaga na ia maua mai le Atua e ala ia Keriso. (2 Korinito 1:5) E mafai foi ona tatou tofo i le anoanoai o faamafanafanaga e ala i le mafaufau loloto i folafolaga tautele a le Atua, i le tatalo atu mo le lagolagosua a lona agaga paia, ma le iloaina o tali mai a le Atua i a tatou tatalo. Ona faamalosia ai lea o i tatou ia faaauau ona tatou sapasapaia le pule silisili ese a Ieova ma faamaonia ai le pepelo o le Tiapolo. (Iopu 2:4; Faataoto 27:11) Pe a tatou onosaia ma le faamaoni so o se ituaiga o puapuaga, o le a tatau ai ona pei i tatou o Paulo, ia tuuina atu viiga uma ia Ieova, o lē ana faamafanafanaga ua mafai ai e Kerisiano ona tutumau i le faamaoni i taimi o tofotofoga. O le onosai o Kerisiano faamaoni ua iai ni āuga faamafanafanaloto i le auuso, ua mafai ai e isi ona latou ‘onosaia foi puapuaga lava na.’—2 Korinito 1:6.

10, 11. (a) O ā nisi mea na faapogai ai mafatiaga i le faapotopotoga i Korinito anamua? (e) Na faapefea ona faamafanafanaina e Paulo le faapotopotoga i Korinito, ma o le ā le faamoemoe na ia faaali atu?

¹⁰ Sa oo foi i uso Korinito puapuaga ia ua oo mai i Kerisiano moni uma. E lē gata i lea, sa latou manaomia ni fautuaga ina ia faateʻaina se tagata na faia le faitaaga ae lē salamō. (1 Korinito 5:1, 2, 11, 13) O le lē taulau ona faia o lenei gaoioiga, ma faaiu misa ma fevaevaeaiga, na avatu ai se faalumaina i le faapotopotoga. Peitai na mulimuli ane latou faaaogā le fautuaga a Paulo ma faaalia le salamō moni. O lea, na ia faamālō atu ai ma le māfana ia i latou ma taʻua faapea o lo latou talia lelei o lana tusi sa avea o se faamafanafanaga ia te ia. (2 Korinito 7:8, 10, 11, 13) E foliga mai, sa salamō foi lē na faateʻaina. O lea na fautua atu ai Paulo ia i latou ina ia ‘faamagalo ma faamafanafana ia te ia, ina neʻi tofatumoanaina o ia i le tiga matuā tele.’—2 Korinito 2:7.

¹¹ O le tusi lona lua a Paulo e mautinoa sa faamafanafanaina ai le faapotopotoga i Korinito. Ma o se tasi lena o ona faamoemoega na iai. Na ia faamatala atu: “Ua tumau foi lo matou faatuatua ia te outou; o loo matou iloa, faapei ona faatasia outou i tiga, e faapea foi i le faamafanafanaina.” (2 Korinito 1:7) I le faaiuga o lana tusi, na faalaeiau atu ai Paulo e faapea: “Ia faamafanafanaina . . . ona ia te outou lea o le Atua e ona le alofa ma le manuia.”—2 Korinito 13:11.

12. O le ā le manaoga o loo iai i Kerisiano uma?

¹² Maeu se lesona tāua e mafai ona tatou aʻoaʻoina mai lenei mea! E manaomia e tagata uma o le faapotopotoga Kerisiano ona ‘fetufaai i faamafanafanaga’ ua saunia e le Atua e ala mai i lana Afioga, i lona agaga paia, ma i lana faalapotopotoga i le lalolagi. E oo lava i ē ua faateʻaina atonu o loo moomia ni  faamafanafanaga pe afai ua latou salamō ma faasaʻoina o latou ala sese. O lea, ua faatulaga ai e “le auauna faamaoni ma le mafaufau” se sauniuniga alofa mutimutivale e fesoasoani atu ai i na tagata. E faatasi i le tausaga, e ono asiasi atu ai ni toeaina se toalua i nisi o loo faateʻaina. Atonu o nei tagata latou te lē o toe faaalia ni uiga fouvale po o toe faia ni agasala matuia ma atonu o loo latou manaomia se fesoasoani ina ia faia ni laasaga talafeagai e toe faaeaina ai.—Mataio 24:45; Esekielu 34:16.

O Puapuaga o Paulo i Asia

13, 14. (a) Na faamatalaina faapefea e Paulo se taimi o puapuaga matuitui na oo i ai o ia i Asia? (e) O le ā le mea na tupu lea atonu sa mafaufau i ai Paulo?

¹³ O ituaiga o mafatiaga na oo i le faapotopotoga i Korinito e lē mafai ona faatusatusa atu i le tele o puapuaga sa tau onosaia e Paulo. O lea, na mafai ai ona ia faamanatu atu ia i latou: “Le au uso e, matou te loto ina ia outou iloa lo matou puapuaga na oo mai ia te i matou i Asia, sa silisili ona mafatia tele ai o i matou, e lei au i ai lo matou malosi, na oo lava ina matou masalo ai a matou oti. A o i matou, sa i o matou loto le manatu o le a oti, ina neʻi matou faatuatua ia te i matou, a ia faatuatua i le Atua na te toe faatuina e ua oti; o le na laveai mai ia i matou ai le oti e matuā leaga, o le a laveai mai foi, ua matou faamoemoe foi ia te ia, o le a toe laveai mai ia te i matou.”—2 Korinito 1:8-10.

¹⁴ E talitonu nisi tagata popoto o loo sailiili i le Tusi Paia e faapea sa faasino atu upu a Paulo i le vevesi lea na iai i Efeso, lea na semanū e maimau ai le ola o Paulo faapea ma ola o ana aumea faimalaga e toalua mai Maketonia, o Kaio ma Aritako. Sa avatu faamalosi na Kerisiano e toalua i totonu o se fale mataaga na faatumulia i tagata sa ‘alalaga mai pe tusa ma le lua itula: “Ua silisili Tiana [le atua fafine] o Efeso.”’ Mulimuli ane, sa mafai ona faafilemu e se tusiupu o le aai le motu o tagata. Atonu sa matuā mafatia Paulo ona o lenei faamataʻuga o ola o Kaio ma Aritako. Ae maise, sa manao e alu atu ina ia talanoa i le motu o tagata sa soona maelega valelea, peitai na taofia mai o ia ina neʻi lamatia ai lona ola i lenei auala.—Galuega 19:26-41.

15. O le ā le tulaga matautia lea atonu o loo faamatalaina i le 1 Korinito 15:32?

¹⁵ Peitai, atonu o loo faamatalaina e Paulo se tulaga e sili atu ona matautia nai lo le mea na tupu lea na seʻi faatoʻā taʻua. I lana uluai tusi i uso i Korinito, na fesili atu ai Paulo: “Se a ea se aoga ia te au ona ua ou tau ma manu feai i Efeso, pei o le tu a tagata?” (1 Korinito 15:32) Atonu o le uiga o lenei mea e lē gata sa faamataʻuina le ola o Paulo e tagata pei ni manu feai, ae o manu feai moni lava foi i le malae o taaloga i Efeso. O nisi taimi sa faasalaina ai tagata solitulafono i le avatu faamalosi e tau ma manu feai a o matamata atu i ai le motu o tagata ua fiafia i le faamasaatoto. Pe afai o le uiga o upu a Paulo sa fetaiai o ia ma ni manu feai moni, atonu la i le toe minute lava na faavavega ai ona faasaoina o ia mai se oti matautia, e pei ona sa laveaiina Tanielu mai gutu o ni leona moni.—Tanielu 6:22.

O Faaaoaoga i Ona Po Nei

16. (a) Aisea e mafai ai e mea o loo tutupu i le toatele o Molimau a Ieova, ona faapei o puapuaga ia na mafatia ai Paulo? (e) O le ā e mafai ona tatou mautinoa i ai e faatatau i ē ua maliliu ona o lo latou faatuatua? (i) O ā ni aafiaga lelei ua oo i ai ina ua sao mai Kerisiano i ni tulaga na toetoe lava oo ai i le oti?

¹⁶ E toatele Kerisiano i aso nei e mafai ona fesootai atu mea o loo tutupu ia i latou ma puapuaga ia na mafatia ai Paulo. (2 Korinito 11:23-27) I aso nei foi, ua oo Kerisiano i ni tulaga ua “silisili ona mafatia tele ai o i [latou], e lei au i ai lo [latou] malosi,” ma e toatele ua fesagai ma tulaga ua oo ina latou ‘matuā lē mautonu ai po o le ā o le a tupu i o latou olaga.’ (2 Korinito 1:8) O nisi ua fasiotia e tagata o ē latou te fasiotia tagata e toatele ma le ʻau faaoosala faasauā. E mafai ona tatou mautinoa o le mana faamafanafana o le Atua sa mafai ai e i latou ona onosaia na mea ma ua latou maliliu ai ma o latou loto ma mafaufau ua matuā mausalī i le faataunuuga o o latou faamoemoega, pe o le faamoemoe faalelagi po o le faamoemoe i le lalolagi. (1 Korinito 10:13;  Filipi 4:13; Faaaliga 2:10) I isi mea tutupu, ua suia ai e Ieova tulaga o mea, ma faasaoina ai o tatou uso mai le oti. E mautinoa o i latou ua maua lena faasaoina ua matuā faatuputeleina lo latou faatuatua “i le Atua na te toe faatuina e ua oti.” (2 Korinito 1:9) Ina ua mavae na mea, sa mafai ona latou tāutala ma le matuā maumauai a o latou tufa atu le feau faamafanafana a le Atua i isi.—Mataio 24:14.

17-19. O ā mea na tutupu e faaalia ai sa avea o tatou uso i Rwanda ma ni ē fetufaai i faamafanafanaga a le Atua?

¹⁷ Talu ai nei lava na fetaiai ai o tatou uso pele i Rwanda ma se mea e talitutusa i lea na tupu ia Paulo ma ana aumea. E toatele na maliliu, ae sa lē taulau taumafaiga a Satani ina ia faamutaina lo latou faatuatua. Nai lo lea, ua maua e o tatou uso i lenei atunuu le faamafanafanaga a le Atua i le tele o auala totino. A o faagasolo le fefasiotiga tagata i le va o ituaiga o Tutsi ma Hutu o loo nonofo i Rwanda, sa iai ni tagata Hutu na lamatia o latou ola a o taumafai e puipuia ni tagata Tutsi, ma ni tagata Tutsi o ē na puipuia tagata Hutu. O nisi na fasiotia e tagata sa faia ni gaoioiga soona maelega valea, talu ai lo latou puipuia o o latou uso talitonu. Mo se faaaoaoga, na fasiotia se Molimau Hutu e igoa ia Gahizi ina ua ia faalafiina se tuafafine Tutsi e igoa ia Chantal. O le tane Tutsi a Chantal, o Jean, sa faalafi i se isi nofoaga e se tuafafine Hutu e igoa ia Charlotte. E 40 aso o lalafi pea Jean ma le isi uso Tutsi i se alāasu telē, e na o ni taimi lava o le po e ō mai ai i fafo mo sina taimi puupuu. I lea taimi atoa, sa fafaga ai ma puipuia i laua e Charlotte, e ui ina nonofo e latalata i se togalauapi a le vaegaʻau a Hutu. I lenei itulau, e mafai ona e vaaia ai se ata ina ua toe faatasia Jean ma Chantal, o ē o loo loto faafetai ona ‘sa tuuina e o la uso Hutu o o latou ola i se tulaga lamatia’ ona o i laua, e pei lava ona faia e Pisila ma Akula mo le aposetolo o Paulo.—Roma 16:3, 4.

 ¹⁸ O se isi Molimau Hutu o Rwakabubu, sa viiviia o ia e le nusipepa o le Intaremara ona o lona puipuia o ni ona uso Tutsi. * Ua faapea mai le nusipepa: “O loo iai foi Rwakabubu, o se tasi o Molimau a Ieova, o lē na faaauau pea ona ia faalalafiina solo tagata i nofoaga o ona uso (o le igoa lena e taʻu ai e le tasi uso talitonu le isi). Sa masani ona ia faaaogā le aso atoa e felaʻuai ai meaʻai ma vaiinu mo i latou e ui ina aafia o ia i le maʻisela. Ae na foai e le Atua ia te ia le malosi e uigaese.”

¹⁹ Seʻi manatu foi, i se ulugalii Hutu loto fiafia, e igoa ia Nicodeme ma Athanasie. A o lei mapuna aʻe fefasiotiga tagata i le va o ituaiga, sa faia ai se suesuega faale-Tusi Paia a lenei ulugalii ma se Molimau Tutsi e igoa ia Alphonse. I se tulaga sa lamatia ai o la ola, na la faalafiina ai Alphonse i lo la fale. Mulimuli ane na la iloa ua lē toe saogalemu le fale, auā sa iloa e o la tuaoi Hutu le la uo Tutsi. Ona faalafi ai lea e Nicodeme ma Athanasie ia Alphonse i se lua i totonu o lo la fanua. O se gaoioiga lelei lena auā na toetoe lava o aso uma, e ō ane ai tuaoi e saili ia Alphonse. A o taoto o ia i lenei lua mo le 28 aso, sa manatunatu loloto ai Alphonse i tala o loo i le Tusi Paia e pei o le tala ia Raava, o lē na faalafiina ni tagata Isaraelu se toalua i le taualuga o lona fale i Ieriko. (Iosua 6:17) I aso nei, o loo faaauau pea le auaunaga a Alphonse i Rwanda o sē e talaʻia le tala lelei, ma na te faafetaia ana tagata aʻoga Hutu o le Tusi Paia, i le tuuina o o la ola i se tulaga lamatia ona o ia. Ae faapefea Nicodeme ma Athanasie? Ua avea nei i laua o ni Molimau papatisoina a Ieova ma ua la faia ni suesuega faale-Tusi Paia e silia ma le 20 ma tagata loto fiafia.

20. I le ā le auala ua faamafanafanaina ai e Ieova o tatou uso i Rwanda, ae o le ā le manaoga o loo faaauau pea ona iai i le toatele o i latou?

²⁰ I le taimi na amata ai fefasiotiga tagata i le va o ituaiga i Rwanda, sa toʻa 2,500 le autalaʻi o le tala lelei i le atunuu. E ui e faitau selau na maliliu ai pe sosola ese mai le atunuu, ae ua faateleina le aofai o Molimau i le silia i le 3,000. O le faamaoniga lena e iloa ai sa faamafanafanaina moni e le Atua o tatou uso. Ae faapefea le toatele o tamaiti ua mātuaoti ma fafine ua feoti a latou tane sa iai faatasi ma Molimau a Ieova? E mautinoa lava, o loo pagatia pea i latou nei i puapuaga ma le manaomia o le faamafanafana atu pea i ai. (Iakopo 1:27) O le a soloiesea atoatoa o latou loimata pe a faatino le toetu i le lalolagi fou a le Atua. E ui i lea, e faafetaia le tausiga a o latou uso, ma e talu ai o i latou o tagata tapuai a ‘le Atua e ana faamafanafanaga uma,’ ua mafai ai ona latou tauivi ma le manumalo i le olaga.

21. (a) O fea isi vaipanoa o loo matuā manaomia ai e o tatou uso le faamafanafanaga a le Atua, ma o le ā se auala e mafai ai e i tatou uma ona fesoasoani atu? (Tagai i le pusa “Faamafanafanaga a o Faagasolo Tausaga e Fa o le Taua.”) (e) O afea o le a faamalieina atoatoa ai lo tatou manaoga mo faamafanafanaga?

²¹ I le tele o isi nofoaga, e pei o Eritrea, Sigapoa, ma atunuu na muai taʻua o Yugoslavia, o loo auauna ai pea ma le faamaoni o tatou uso ia Ieova e ui lava i puapuaga. Seʻi o tatou fesoasoani atu i na uso e ala i a tatou faatoga e lē aunoa ina ia latou maua ni faamafanafanaga. (2 Korinito 1:11) Ma tau ina ia tatou onosai pea ma le faamaoni seia oo i le taimi o le a ‘sōloiesea ai loimata uma mai o tatou mata’ e le Atua e ala mai ia Iesu Keriso, i se tulaga atoatoa. Ona tatou tofo ai lea i le atoaga o faamafanafanaga o le a foai mai e Ieova i lana lalolagi fou amiotonu.—Faaaliga 7:17; 21:4; 2 Peteru 3:13.

[Faaopoopoga i lalo]

E te Silafia?

□ Aisea ua taʻua ai Ieova “o le Atua foi e ana le faamafanafanaga uma”?

□ E tatau faapefea ona tatou manatu i puapuaga?

□ O ai e mafai ona tatou tufa atu i ai faamafanafanaga?

□ O le a faapefea ona faamalieina atoatoa o tatou manaoga mo faamafanafanaga?

[Fesili mo le Suʻesuʻega]

[Ata i le itulau 17]

E ui o Jean ma Chantal, o ni Molimau Tutsi, ae sa faalalafi i ni nofoaga eseese e ni Molimau Hutu i le taimi o fefasiotiga tagata i le va o ituaiga i Rwanda

[Ata i le itulau 17]

O loo faaauau pea ona tufa atu e Molimau a Ieova le feau faamafanafana a le Atua i o latou tuaoi i Rwanda