Saili Atu ia Ieova mo Faamafanafanaga

“Ia foai atu foi ia te outou e le Atua, o ia e tupu mai ai le onosai ma le faamafanafana, ina ia gatasitasi o outou loto e tusa ma le finagalo o Keriso Iesu.”—ROMA 15:5.

1. Aisea ua aumaia ai e aso taitasi se manaoga faateleina mo faamafanafanaga?

E FAAGASOLO lava aso taitasi ma aumaia ai ma se manaoga faateleina mo faamafanafanaga. E pei ona mātauina e se tusitala o le Tusi Paia i le silia i le 1,900 tausaga ua mavae, “ua oi faatasi, ma oono [tiga] faatasi mea uma lava na faia, ua oo mai lava i ona po nei.” (Roma 8:22) Ua sili atu ona faateteleina le “oi” ma le “tiga” i o tatou taimi nai lo o se isi lava taimi. Talu mai le Taua Muamua a le Lalolagi, ua mafatia ai tagata i mala sosoo e pei o taua, o solitulafono, ma mala lē maʻalofia lea ua masani ona māfua ona o le faaleagaina e tagata o le laueleele.—Faaaliga 11:18.

2. (a) O ai e sili ona tuuaʻia mo le feoi o tagata i aso nei? (e) O le ā le mea moni e aumaia ai ia i tatou se faavae mo faamafanafanaga?

² Aisea ua tele ai mafatiaga i o tatou taimi? I le faamatalaina o le lafoina ifo o Satani mai le lagi ina ua mavae ona faavaeina le Malo i le 1914, ua tali mai ai le Tusi Paia: “Oi talofa ia te oulua le fanua ma le sami, auā ua alu ifo ia te oulua le tiapolo ua lotoa tele, auā ua na iloa ua saasaa ona po.” (Faaaliga 12:12) O le faamaoniga manino o le faataunuuga o lena valoaga ua uiga faapea, ua toeitiiti lava tatou oo atu i le iuga o le pulega leaga a Satani. Maeu se faamafanafanaina ai i le iloa ua lē o toe mamao ona toe foi atu lea o le olaga i luga o le lalolagi i le tulaga filemu lea na muai iai a o lei taaʻina e Satani o tatou uluai mātua i le fouvalega!

3. O fea le vaitaimi sa lē manaomia ai e tagata ni faamafanafanaga?

³ I le amataga, na saunia ai e Lē na Foafoaina le tagata se paka matagofie e avea ma aiga o le uluai ulugalii faaletagata. Sa faavaeina i se vaipanoa na taʻua o Etena, o lona uiga “Olioli” po o “Fiafiaga.” (Kenese 2:8, faamatalaga faaopoopo i le pito i lalo o le mau i le NW) E lē gata i lea, sa olioli Atamu ma Eva i se soifuaga maloloina atoatoa, faatasi ai ma le faamoemoe o le lē tāitai ona feoti. Seʻi tau ina manatu i le tele o vala na semanū e mafai ona la atiina aʻe ai o la tomai—le faitogalaau, le tusiata, le fauina o ni galuega tetele, le faimusika. Seʻi manatu foi, i galuega uma o le foafoaga na semanū la te mafai ona iloiloina a o la faataunuu lo la tofiga ina ia faatoilalo pe faatoʻa le laueleele ma faia e avea ma parataiso. (Kenese 1:28) O le mea moni, na semanū e faatumulia olaga o Atamu ma Eva, e lē i le oi ma tiga, ae i le fiafia ma le olioli. E manino la, na semanū la te lē manaomia ni faamafanafanaga.

4, 5. (a) Aisea na lē taulau ai Atamu ma Eva i le tofotofoga o le usiusitai? (e) Na faapefea ona iu ina manaomia e tagata ni faamafanafanaga?

⁴ Ae peitai, o mea sa manaomia e Atamu ma Eva, o le atiina aʻe o se alofa loloto ma se agaga talisapaia mo lo la Tamā agalelei faalelagi. O lena alofa na semanū e uunaia ai i laua e usiusitai i le Atua i so o se tulaga lava. (Faatusatusa i le Ioane 14:31.) E faanoanoa ai, auā na lē taulau uma o tatou uluai mātua i le usiusitai atu i lo la Pule Silisili Ese amiotonu, o Ieova. Nai lo lea, sa la faataga i laua e gauai atu i le pulega leaga a le agelu malaia, o Satani le Tiapolo. O Satani na faaosoosoina Eva i le agasala ma ʻaia ai le fua faasaina. Ona agasala ai lea ma Atamu ina ua ia ʻaia foi le fua o le laau lea na manino le lapataia ai e le Atua e faapea: “O le aso e te ʻai ai e te oti ai lava.”—Kenese 2:17.

⁵ O le mafuaaga lena, na amata ai ona feoti  le ulugalii agasala. Ina ua fofogaina le faasalaga o le oti, na fetalai atu foi le Atua ia Atamu: “Ua malaia ai le laueleele ona o oe; e te ʻai ai ma le tiga i aso uma o lou ola; e tutupu mai ai o laau tuitui ma laau talatala ia te oe; e te ʻai foi laau afu o le fanua.” (Kenese 3:17, 18) Ona lē toe maua ai lea e Atamu ma Eva le faamoemoe o le faia o le lalolagi lafulafuā ina ia avea ma parataiso. Ina ua tulia i laua mai Etena, sa tatau loa ona la galulue malosi i le sueina o ni meaʻai mai le laueleele ua faamalaiaina. Ua oo i ē na tupuga mai ia i laua se manaoga tele mo faamafanafanaga, talu ai ua tuufaasolo mai ia te i latou lenei tulaga o le agasala ma le oti.—Roma 5:12.

Ua Faataunuuina se Folafolaga Faamafanafanaloto

6. (a) O le ā le folafolaga faamafanafanaloto na faia e le Atua ina ua paʻū atu le tagata i le agasala? (e) O le ā le valoaga e faatatau i faamafanafanaga na valoia mai e Lameko?

⁶ Ina ua faasalaina lē na faapogaia le fouvalega a le tagata, na faamaonia ai o Ieova o ‘le Atua o lē foai maia faamafanafanaga.’ (Roma 15:5) Na ia faia faapea e ala i le folafola o le auina mai o le “fanau” o le a ia faasaoina mulimuli ane le fanau a Atamu mai āuga matautia o le fouvalega a Atamu. (Kenese 3:15) A o faagasolo taimi, na saunia ai foi e le Atua muai faaātaga o lenei faasaoina. Mo se faataitaiga, na ia faagaeeina Lameko, o sē na tupuga mai ia Atamu e ala mai i lona atalii o Setu, ia vavalo e faatatau i mea o le a faia e le atalii o Lameko: “E faamafanafanaina i tatou e ia i la tatou galuega ma le tiga o tatou lima, ona o le laueleele ua malaia ia Ieova.” (Kenese 5:29) Ina ia ogatusa ma lenei folafolaga, na faaigoa ai le tama ia Noa, lea e mautinoa o le uiga o lona igoa o le “Mapu” po o le “Faamaisega.”

7, 8. (a) O le ā le tulaga na māfua ai ona salamō Ieova i lona foafoaina o le tagata, ma o le ā na Ia fuafua e fai e tusa ai ma lenei tulaga? (e) Sa faapefea ona faataunuuina e Noa le uiga o lona igoa?

⁷ O le taimi lea, na maua ai e Satani ni ona soo mai nisi o agelu faalelagi. Na faaliliu e i latou nei o latou tino ia pei o ni tagata ma latou avea ai afafine lalelei o ē na tupuga mai ia Atamu ina ia fai ma a latou avā. O na faatasiga lē faalenatura na atili faaleagaina ai le olaga masani o tagata ma faatupuina ai se ituaiga o tagata amioleaga na iloa o Nefilimi, o le “au fasitagata,” o ē na faatumuina le lalolagi i faiga sauā. (Kenese 6:1, 2, 4, 11; Iuta 6) “Ua silafia e Ieova ua leaga tele lava tagata i le lalolagi . . . Ua salamo foi Ieova ina ua faia e ia tagata i le lalolagi, ma ua tiga ai lona finagalo.”—Kenese 6:5, 6.

⁸ Na fuafuaina e Ieova ina ia faaumatia lena lalolagi leaga i se lolo tele, ae na muamua faatonuina Noa e fau se vaa mo le faasaoina o ola. O lea, na faasaoina ai tagata ma ituaiga uma o manu. Maeu se mapusaga na oo ia Noa ma lona aiga ina ua mavae le Lolo a o latou ulufafo mai le vaa i se lalolagi ua faamamāina! Maeu se faamafanafanaloto i le iloa ua soloia le faamalaiaga na tuu i le laueleele, ua sili atu foi ona faigofie galuega faafaatoaga! Ioe, na moni le valoaga a Lameko, ma sa faataunuuina ai e Noa le uiga o lona igoa. (Kenese 8:21) Ona o se auauna faamaoni a le Atua, na avea ai Noa o se sauniuniga i le aumaia o ni ‘faamafanafanaga’ i tagata. Peitai ane, na lei gata ai i le Lolo taaʻiga leaga a Satani ma ana agelu faatemoni, ma ua faaauau ai pea ona oi tagata ona o le mamafa o le agasala, o maʻi, ma le oti.

O Lē e Sili Atu Nai lo Noa

9. Ua faapefea ona faamaonia le avea o Iesu Keriso ma fesoasoani ma faamafanafanaloto mo tagata ua salamō?

⁹ Mulimuli ane, i le iuga o le tusa ma le 4,000 tausaga o le talafaasolopito o le tagata, na oo mai ai loa le Fanau folafolaina. Ona o le alofa tele mo tagata, na auina mai ai e Ieova le Atua lona Alo pele e toatasi i le lalolagi ia maliu e togiola ai tagata agasala. (Ioane 3:16) Ua aumaia e Iesu Keriso le mapusaga tele i tagata agasala ua salamō o ē faaalia le faatuatua i lona maliu faataulagaina. O ē uma ua tuuina atu o latou ola ia Ieova ma avea ma soo papatisoina o lona Alo ua tofo i latou i le faafouina ma faamafanafanaga tumau. (Mataio 11:28-30; 16:24) E ui lava i lo latou lē lelei atoatoa, ae ua latou olioli tele i le auauna atu i le Atua ma se loto fuatia ifo mamā. Maeu se faamafanafanaloto mo i latou e iloa pe afai latou te faaalia pea le faatuatua ia Iesu, o le a tauia i latou i le ola e faavavau! (Ioane 3:36; Eperu 5:9) Afai ona o vaivaiga ua latou faia ai se agasala matuia, ona  latou maua lea o le fesoasoani, po o le faamafanafanaloto, i le Alii o Iesu Keriso, o lē ua toetu mai. (1 Ioane 2:1, 2) I le taʻutino o lena agasala ma uia laasaga faale-Tusi Paia ina ia alofia ai le avea ma ē faia pea le agasala, latou te maua ai se mapusaga, i le iloaina ‘e faamaoni ma amiotonu le Atua na te faamagalo mai i a latou agasala.’—1 Ioane 1:9; 3:6; Faataoto 28:13.

10. O le ā tatou te aʻoaʻoina mai vavega na faia e Iesu a o iai o ia i le lalolagi?

¹⁰ A o iai Iesu i le lalolagi, na ia aumaia ai foi se faafouina e ala i le faasaʻoloto o ē na uluitinoina e temoni, e ala i le faamaloloina o maʻi eseese, ma e ala i le toe faatutūina mai i le ola o ē pele na maliliu. O le mea moni lava, o na vavega sa aogā mo na o sina taimi, auā o i latou na faamanuiaina ai na mulimuli ane oo ina ola matutua ma feoti. Peitai ane, o iina na tataʻi atu ai e Iesu manatu i faamanuiaga tumau i le lumanai o le a ia faatotōina ifo i tagata uma. Nei la ua avea o ia ma Tupu malosi i le lagi, o le a lē pine ona ia faia loa lea o mea e silisili atu nai lo le na ona tutuli o temoni. O le a ia lafoina i le to e lē gata i latou faatasi ma lo latou taʻitaʻi, o Satani, i se tulaga o le lē toe gaoioi. Ona amata ai lea o le Pulega mamalu a Keriso mo le Afe Tausaga.—Luka 8:30, 31; Faaaliga 20:1, 2, 6.

11. Aisea na fetalai ai Iesu o le “alii lava ia o le sapati”?

¹¹ Na fetalai Iesu o le “alii lava ia o le sapati,” ma o le tele o ana faamalologa sa faia i le aso Sapati. (Mataio 12:8-13; Luka 13:14-17; Ioane 5:15, 16; 9:14) Aisea na ia faia ai faapea? Auā o le Sapati o se vaega o le Tulafono a le Atua ia Isaraelu ma na avea ai o “le ata o mea lelei atali.” (Eperu 10:1) O aso aunoa e ono e galulue ai ua faamanatu mai ai ia i tatou tausaga e 6,000 ua tuanai na faapologaina ai le tagata i pulega sauā a Satani. O le aso Sapati i le iuga o le vaiaso e faamanatu mai ai le malologa faamafanafanaloto lea o le a tofo i ai tagata a o faagasolo le Pulega e Afe Tausaga a le Noa Sili, o Iesu Keriso.—Faatusatusa i le 2 Peteru 3:8.

12. O ā ni mea faamafanafanaloto o le a tutupu e mafai ona tatou tulimatai atu i ai?

¹² Maeu se mapusaga o le a logo i ai tagatānuu faalelalolagi o le pulega a Keriso, pe a iu ina latou saʻoloto atoatoa mai aafiaga leaga a Satani! O le a aumaia faamafanafanaga atili a o latou tofo i le faamalologa o o latou maʻi i le tino, i faalogona, ma i le mafaufau. (Isaia 65:17) Ae, seʻi manatu la i lo latou matuā lē manofo a o amata ona latou faafeiloai atu i ē pele a o toe faatutūina mai le oti! I nei auala, o le a ‘sōloiesea ai e le Atua loimata uma i o latou mata.’ (Faaaliga 21:4) A o faasolosolo ona faatatauina aogā o le taulaga togiola a Iesu, o le a iu ai ina lelei atoatoa tagatānuu usiusitai o le Malo o le Atua, ma oo ina saʻoloto atoatoa mai aafiaga leaga uma o le agasala a Atamu. (Faaaliga 22:1-5) Ona tatalaina mai lea o Satani “i nai aso.” (Faaaliga 20:3, 7) O tagata uma o loo lagolagoina ma le faamaoni le pule silisili ese amiotonu a Ieova o le a tauia i le ola e faavavau. Seʻi tepa faalemafaufau i le olioli lē mafaamatalaina ma le mapusaga o le matuā “tuusaunoa . . . ia le faapologaina e le iu vale”! Ona olioli ai loa lea o tagata usiusitai i “le saolotoga o le fanau a le Atua e manuia ai.”—Roma 8:21.

13. Aisea e manaomia ai e Kerisiano moni uma le faamafanafanaga lea o loo foai mai pea e le Atua?

¹³ Ae i lenei taimi, o loo faaauau ai ona oo ia i tatou le oi ma tiga o loo taatele foi i tagata uma o loo ola i le faiga leaga o mea a Satani. O le faateleina o maʻi faaletino ma faafitauli tau i faalogona ua aafia ai ituaiga uma o tagata, o loo aofia ai foi Kerisiano faamaoni. (Filipi 2:25-27; 1 Tesalonia 5:14) E lē gata i lea, ona o ni Kerisiano, ua masani ona tatou mafatia i faifaiga ma sauāga lē tonu e faafaupuʻe mai e Satani ia i tatou ona o ‘le sili o lo tatou anaana i le Atua nai lo le anaana i tagata.’ (Galuega 5:29) O lea, pe afai tatou te fia tutumau i le faia o le finagalo o le Atua seia oo i le iuga o le lalolagi a Satani, tatou te manaomia la le faamafanafanaga, le fesoasoani, ma le malosi o loo Ia foai mai pea.

Le Mea e Maua ai Faamafanafanaga

14. (a) O le ā le folafolaga na faia e Iesu i le po a o lei oo i lona maliu? (e) O le ā e talafeagai ona fai pe a tatou fia mauaina aogā atoatoa mai faamafanafanaga a le agaga paia o le Atua?

¹⁴ I le po a o lei oo i lona maliu, na faamanino atu ai e Iesu i ona aposetolo faamaoni e faapea, e lē o toe umi ona ia tuua lea o i latou ae toe foi atu i lona Tamā. Sa latou matuā atuatuvale ma  faanoanoa ai i lena mea. (Ioane 13:33, 36; 14:27-31) I lona silafiaina o lo latou manaomia pea o ni faamafanafanaga, na folafola ai e Iesu: “Ou te fai atu foi i le Tamā, ona foai mai ai lea e ia ia te outou le tasi Fesoasoani, ina ia tumau pea o ia ia te outou e faavavau.” (Ioane 14:16, faamatalaga faaopoopo i le pito i lalo o le mau i le NW) Sa faasino atu Iesu i le agaga paia o le Atua, lea na liligiina ifo i ona soo i le 50 o aso talu ona mavae lona toetu. * E lē gata i isi mea, ae sa faamafanafanaina foi i latou e le agaga o le Atua i taimi o o latou tofotofoga ma faamalosia ai i latou ina ia faaauau ona faia le finagalo o le Atua. (Galuega 4:31) Peitai ane, e lē tatau ona manatu i lena fesoasoani o se mea e faafuasei ona maua. Ina ia manuia atoatoa mai ai, e tatau i Kerisiano taitoatasi ona tatalo atu pea mo le fesoasoani faamafanafanaloto o loo saunia e le Atua e ala mai i lona agaga paia.—Luka 11:13.

15. O ā nisi o auala ua foaiina mai ai pea e Ieova faamafanafanaga ia i tatou?

¹⁵ O le isi auala e saunia ai e le Atua faamafanafanaga e ala mai lea i lana Afioga, le Tusi Paia. Na tusi mai Paulo e faapea: “O mea uma foi na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) Ua faaalia i lenei mea le manaoga mo i tatou ina ia suesue ma mafaufau loloto e lē aunoa i mea ua tusia i le Tusi Paia ma lomiga faale-Tusi Paia. Tatou te manaomia foi ona auai e lē aunoa i sauniga faa-Kerisiano, o iina o loo faasoasoa ai mafaufauga faamafanafanaloto mai le Afioga a le Atua. O se tasi o fuafuaga autū o na faatasitasiga ina ia faalaeiau ai le tasi i le isi.—Eperu 10:25.

16. O le ā e tatau i sauniuniga faamafanafanaloto a le Atua ona uunaia i tatou e fai?

¹⁶ Ua faaauau atu pea le tusi a Paulo i uso i Roma e faaali atu ai iuga lelei tatou te maua mai le faaaogaina o sauniuniga faamafanafanaloto a le Atua. Na tusi mai Paulo: “Ia foai atu foi ia te outou e le Atua, o ia e tupu  mai ai le onosai ma le faamafanafana, ina ia gatasitasi o outou loto e tusa ma le finagalo o Keriso Iesu; ina ia vivii outou i le Atua, le Tamā o lo tatou Alii o Iesu Keriso, ma le loto e tasi, ma le leo e tasi.” (Roma 15:5, 6) Ioe, e ala i le faaaogaina atoatoa o sauniuniga faamafanafanaloto a le Atua, o le a atili ai ona tatou faapei o lo tatou Taʻitaʻi lototele, o Iesu Keriso. O le a uunaia e lenei mea i tatou ina ia faaaogā pea o tatou fofoga e faamamaluina ai le Atua i la tatou galuega o le molimau atu, i a tatou sauniga, i a tatou lava talanoaga patino ma isi o tatou uso talitonu, ma i a tatou tatalo foi.

I Taimi o Tofotofoga Matuitui

17. Na faapefea ona faamafanafanaina e Ieova lona Alo, ma o ā iuga na iu i ai?

¹⁷ Na “atuatuvale” ma “matuā tiga” Iesu i le po a o lei oo i lona maliu tiga. (Mataio 26:37, 38) O lea na ia tuumuli ese atu ai i sina vaipanoa e lē mamao tele mai ona soo ma tatalo atu i lona Tamā mo se fesoasoani. “Na faafofogaina foi o ia ona o lona migao [“mataʻu faale-Atua,” NW].” (Eperu 5:7) Ua taʻua e le Tusi Paia e faapea “ona faaali mai ai lea ia [Iesu] o le agelu mai le lagi, ua faamalosi ia te ia.” (Luka 22:43) O le ala lototele ma le faatamatane na uia e Iesu a o fesagai ma ē na tetee ia te ia o se faamaoniga lea e iloa ai, e sili ona uigā le auala sa faamafanafana mai ai le Atua i lona Alo.—Ioane 18:3-8, 33-38.

18. (a) O le ā le vaitaimi o le olaga o le aposetolo o Paulo sa sili ona tofotofoina ai? (e) E mafai faapefea ona avea i tatou o ni faamafanafanaga i toeaina alolofa mutimutivale ma galulue mamafa?

¹⁸ Sa fetaiai foi le aposetolo o Paulo ma vaitaimi o tofotofoga matuitui. Mo se faataitaiga, sa iloga lana faiva i Efeso i le “maligi tele o loimata, ma tofotofoga na oo ia te [ia] ona o le taupulepulega a Iutaia.” (Galuega 20:17-20) Na iu lava ina alu ese Paulo mai Efeso ina ua faatupu e i latou o ē tapuai i le atua fafine o Tiana, se vevesi i le aai ona o lana galuega talaʻi. (Galuega 19:23-29; 20:1) A o agaʻi atu Paulo i le itu i mātū i le aai o Teroa, sa iai se isi mea na matuā faapopoleina ai o ia. A o lei tupu le vevesi i Efeso, na ia maua ai se tala e atuatuvale ai. Sa matuā pagatia le faapotopotoga fou i Korinito i fevaevaeaiga, ma sa faaauau pea le faia o le faitaaga. O lea na aauina atu ai e Paulo mai Efeso, se tusi o aoaiga mamafa ma le faamoemoe e faasaʻo ai le tulaga na iai. Sa lē faigofie mo ia le faia o lenei mea. I se taimi mulimuli ane i lana tusi lona lua, na ia faaalia ai lena tulaga i lona faapea mai: “O le puapuaga tele atoa ma le atuatuvale o le loto na ou tusi atu ai ia te outou ma loimata e tele.” (2 Korinito 2:4) I le faapei o Paulo, ua faapena foi ona lē faigofie mo toeaina alolofa mutimutivale ona latou avatuina fautuaga ma aoaiga e faasaʻo ai, auā i se isi itu, o loo mafaufau foi i latou ia i o latou vaivaiga. (Kalatia 6:1) O lea, seʻi tau ina avea i tatou o ni faamafanafanaga i ē o loo taʻimua ia i tatou, e ala i lo tatou nofo sauni e talia fautuaga alofa ua faavae mai le Tusi Paia.—Eperu 13:17.

19. Aisea na alu ese ai Paulo mai Teroa ae agaʻi atu i Maketonia, ma na faapefea ona iu ina ona maua se mapusaga?

¹⁹ A o iai i Efeso, sa lē gata ina tusi atu Paulo i uso i Korinito ae na ia aauina atu foi Tito e fesoasoani ia i latou, ma faatonu Tito e toe taʻu atu ia te ia sa latou tali e tusa ai ma le tusi. Sa iai le faamoemoe o Paulo e la te feiloai ma Tito i Teroa. O iina na faamanuiaina ai Paulo i ni avanoa lelei na ia maua e faia ai ni soo. Ae sa lei avea lena ma faamāmā avega i ona popolega auā o le taimi lena e lei taunuu atu Tito. (2 Korinito 2:12, 13) O lea na ia malaga atu ai i Maketonia, ma lona faamoemoe e feiloai atu ai iina ia Tito. Sa matuā faateteleina popolega o Paulo ona o teteega mamafa i lana faiva. Ua ia faamatala mai: “Na matou o mai i Maketonia sa  leai se mapu i o matou tino, a e peitai sa puapuagatia i matou i mea uma, o taua i fafo, o i totonu o mataʻu. A o le Atua o le na te faamafanafanaina e ua faamaulaloina, na ia faamafanafana mai ia te i matou i le oo mai o Tito.” (2 Korinito 7:5, 6) Maeu se mapusaga ina ua taunuu ane loa Tito ma taʻu atu ia Paulo le talia lelei e uso i Korinito o lana tusi!

20. (a) E pei ona iai i le tulaga o Paulo, o le ā le isi auala tāua o loo foaiina mai ai pea e Ieova faamafanafanaga? (e) O le ā le mea o le a talanoaina i le mataupu o loo sosoo mai?

²⁰ O mea na tutupu ia Paulo o se faamafanafanaga i auauna a le Atua i aso nei, o le toatele o i latou o loo fesagai ma tofotofoga ua faapogai ai ona latou “faamaulaloina,” po o le “lotomafatia.” (Phillips) Ioe, ua silafia e ‘le Atua o lē foaiina mai pea faamafanafanaga’ o tatou manaoga taitoatasi ma ua mafai ona ia faaaogā i tatou e avea ma faamafanafanaga o le tasi i le isi, e pei lava ona sa maua e Paulo faamafanafanaga e ala mai i lipoti a Tito i le uiga salamō na faaalia e uso Korinito. (2 Korinito 7:11-13) I la tatou mataupu o loo sosoo mai, o le a tatou talanoaina ai le tali mafana atu a Paulo i uso Korinito ma le auala e mafai ona fesoasoani ai ia i tatou ina ia avea ai o ni ē tufa atu ma le uigā faamafanafanaga a le Atua i aso nei.

[Faaopoopoga i lalo]

Pe Mafai Ona E Tali Mai?

□ Na faapefea ona iu ina manaomia e tagata ni faamafanafanaga?

□ Ua faapefea ona faamaonia le sili atu o Iesu nai lo Noa?

□ Aisea na fetalai ai Iesu o le “alii lava ia o le sapati”?

□ Ua faapefea ona foaiina mai pea e le Atua faamafanafanaga i aso nei?

[Fesili mo le Suʻesuʻega]

[Faafanua i le itulau 10]

(Tagaʻi i le lomiga mo le ata atoa)

Na maua e Paulo faamafanafanaga sili e ala mai i le lipoti a Tito e faatatau i uso i Korinito

MAKETONIA

Filipi

ELENI

Korinito

ASIA

Teroa

Efeso