Ua Aloaia le Saʻolotoga o Lotu i Iapani

MO LE tele o tausaga i Iapani, na fesagai ai tamaiti aʻoga talavou Molimau a Ieova ma se mataupu faigata: Pe tatau ona latou mulimuli atu i o latou loto fuatia ifo ua aʻoaʻoina i le Tusi Paia, pe e latou te talia se mataupu faaleaʻoaʻoga e faaleagaina ai o latou loto fuatia ifo. Aisea ua lagā ai lea mataupu? Auā o le faia o faamalosi tino e aofia ai le karate ma le aʻoaʻoina o le taupelu, o se tasi lea o mataupu i a latou aʻoga. Na lagona e Molimau talavou e faapea, o na faamalosi tino, sa lē ogatasi ma mataupu silisili o le Tusi Paia, e pei o lea e maua i le Isaia mataupu e 2 fuaiupu e 4. Ua faitauina faapenei: “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.”

Ona o le lē mananao e aʻoaʻoina tomai e pei ona faaaogaina i taua lea e aofia ai le faamanuʻaina o se tasi tagata, na faamatala atu ai e Molimau Kerisiano talavou i o latou faiaoga, e lē mafai ona latou auai i na faamalosi tino auā e aafia ai o latou loto fuatia ifo. Ina ua uma ona taumafai e faatosina nei tamaiti aʻoga ina ia talia le mataupu a le aʻoga, e toatele faiaʻoga malamalama na iu ina lolo atu e faaaloalo i loto fuatia ifo o tamaiti aʻoga ma saunia ai nisi galuega e ese mai ai.

Ae peitai, sa oo ina lē malilie nisi faiaʻoga ma teena ai e nisi aʻoga ia Molimau talavou mai le mauaina o ni togi i le mataupu o le faamalosi tino. I le 1993, a itiiti mai e toaiva Molimau na taofia mai le siitia atu i le isi vasega e sosoo ai, ma na uunaia faamalosi ai ina ia faamavae mai le aʻoga po o le tutuli ese ona o le lē auai i le aʻoaʻoina o tomai e pei ona faaaogā i taua.

Ma le mautinoa lava, ua oo i le taimi ua tatau ai ona puipuia le aiā a talavou Kerisiano e maua ai se aʻoaʻoga e aunoa ma le faaleagaina ai o o latou loto fuatia ifo. O tamaiti aʻoga e toalima ia na taofia mai le sii atu i isi vasega maualuga i le Kolisi o Matātā Eseese i Kobe, na filifili e tuuina atu le mataupu i le faamasinoga.

O le ā le Mataupu na Finauina?

I le tau e totogo ai mea i le 1990 ina ua ulufale atu tamaiti aʻoga e toalima i le Matātā Eseese i Kobe, na latou faamatala atu i faiaʻoga e faapea, o i latou, e lē mafai ona auai i le aʻoga taupelu faa-Iapani o le kendo, ona o o latou talitonuga e faavae i le Tusi Paia. Sa tetee malosi i ai se vaega o faiaʻoga o le vasega faamalosi tino ma lē tuuina atu ai ia i latou se isi gaoioiga e fai ina ia mafai ai ona maua ni o latou togi i le mataupu o le faamalosi tino. Mulimuli ane, e lei pasi nei tamaiti aʻoga i le mataupu o le faamalosi tino, ma o le iuga, na toe nonofo ai i le vasega muamua (po o le tausaga muamua i le kolisi). Ia Aperila 1991, na latou tuuina atu ai le mataupu i le Faamasinoga Itumalo i Kobe, e faamatala atu ai e faapea, o gaoioiga a le aʻoga sa feteenai ma le faavae e faamaonia ai le saʻolotoga o lotu. *

Ua faapea mai le aʻoga, o le saunia o nisi mea faaopoopo e fai e sui ai lea vasega, o le a iu i le faafiafiaina ai o se lotu patino ma i le faia faapea, o le a faaalia ai le faaituau i le aʻoga. E lē gata i lea, ua latou faapea mai, e leai se fale po o ni faiaʻoga e saunia se isi polokalame faaopoopo mo le aʻoga faamalosi tino.

Ua Uunaia e le Faaiuga a le Faamasinoga Itumalo Ē na Logo Tala i Ai

I le taimi a o faia le faamasinoga, e toalua mai le toalima o tamaiti aʻoga na lē pasi foi i le mataupu o le faamalosi tino, a o le isi toatolu, na pasi ma sii ai i le isi vasega. Na taʻua i tulafono a le aʻoga e faapea, o tamaiti sa lē lelei a latou taumafaiga i le aʻoga ma i latou na ave faalua le vasega e tasi mo le lua tausaga, e mafai ona tutuli mai le aʻoga. E tusa ai ma lenei tulafono, na manatu ai le tasi tamaitiiti aʻoga o le toalua lea e faamavae mai le aʻoga a o lei tuliesea o ia, ae o le isi,  o Kunihito Kobayashi, na musu e faamavae. O lea na tuli ai o ia mai le aʻoga. E mālie lava ona o le faatatauga o togi o Kunihito mo mataupu uma lava, e 90.2 vae 100, e aofia ai ma le mataupu lea na lē pasi ai o ia o le faamalosi tino, e 48 togi. Sa tulaga muamua o ia i lana vasega e toʻa 42 tamaiti aʻoga.

Ia Fepuari 22, 1993, na lau ai le faaiuga a le Faamasinoga Itumalo i Kobe e aloaia ai le faaiuga a le aʻoga o Matātā Eseese i Kobe ma faapea mai: “O le gaoioiga na faia e le aʻoga, e lei solia ai le faavae,” e ui lava sa iloa e le faamasinoga e faapea, “e lē mafai ona ia faafitia le mea moni, o le saʻolotoga tau tapuaiga o ē ua tagi, sa taofia ona o le manaoga o le aʻoga ia auai i le aʻoga taupelu.”

I le pei o le aposetolo o Paulo i le uluai senituri, na filifili ai ē ua tagi ina ia tuuina atu le talosaga i pule maualuluga o le tulafono. (Galuega 25:11, 12) Na oo atu le mataupu i le Faamasinoga Maualuga i Osaka.

Uiga Lē Manatu Faapito o Ē na Tagi

O se tagata aʻoga iloga, o Polofesa Tetsuo Shimomura o le Iunivesite o Tsukuba, ona o ia o se molimau faapitoa, na malie ai na te tuuina atu se faamaoniga i le Faamasinoga Maualuga i Osaka. Ona o sē e tomai faapitoa i tulaga tau aʻoaʻoga ma le tulafono, na ia faamamafa ai le matuā lē magafagafa o faiga a le aʻoga i le feagai ai ma tamaiti aʻoga. Na faaalia e Kunihito Kobayashi ona lagona i le faamasinoga, ma o ona uiga faamaoni na ootia ai loto o i latou na iai i le potu faamasino. E lē gata i lea, ia Fepuari 22, 1994, na faalauiloa mai ai e le Sosaiete a Loia i Kobe e faapea, o gaoioiga a le aʻoga, ua faoa ai le saʻolotoga tau tapuaiga a Kunihito faapea ma lana aiā e maua ai se aʻoaʻoga, ma fautuaina le aʻoga ina ia toe faaaʻe o ia.

A o lata i le taimi e lauina aloaia ai le faaiuga i le Faamasinoga Maualuga i Osaka, sa naunau ai Kerisiano talavou uma lava na aafia ai e lagolagoina le tauiviga seia oo lava ina faaiuina. Na latou lagona sa latou tauina se taua faaletulafono mo le faitauafe o isi Molimau talavou o ē o loo fesagai ma lea lava mataupu i aʻoga i Iapani atoa. Ae talu ai e lei tutulia i latou mai le aʻoga, sa iai le manatu maualuga o le a faaleaogaina e le faamasinoga la latou mataupu. Ma ua mafai ai ona latou iloa e faapea, afai e latou te toe avea i tua la latou talosaga, o le a faamatilatila ai i lea mea le lē faimeatonu o le aʻoga i le tuliesea o Kunihito. O lea, na filifili ai isi tamaiti aʻoga uma e faataatia le mataupu seʻi vaganā ai Kunihito.

Ia Tesema 22, 1994, na tuuina mai ai e le Faamasino Sili o Reisuke Shimada o le Faamasinoga Maualuga i Osaka se faaiuga na suia ai le faaiuga a le Faamasinoga Itumalo i Kobe. Na iloa e le faamasinoga, sa faamaoni Kunihito i le mafuaaga na ia teena ai le auai i le aʻoga taupelu, ma faapea o le faaleagaina o ia ona o lana gaoioiga e faavae i lona talitonuga faalelotu, sa matuā telē se aafiaga. Na faapea mai le Faamasino Sili o Shimada: “Sa tatau lava i le aʻoga ona saunia ni gaoioiga faaopoopo. O lenei faaiuga sili ona lelei na faafiafiaina ai i latou o ē sa manatu mamafa i aiā tatau a tagata. Ae peitai, na toe tuuina atu e le aʻoga le mataupu i le Faamasinoga Sili a Iapani, ma taofia ai Kunihito mai le aʻoga mo le isi tausaga.

I le Faamasinoga Sili

Na taʻua mulimuli ane i se faamatalaga a le faatonu o le nusipepa o le Kobe Shimbun e faapea: “Sa tatau i le Komiti o Aʻoga i le Aai o Kobe ma le aʻoga ona toe talia le Susuga a Kobayashi i le aʻoga i lena taimi [ina ua maua le faaiuga a le Faamasinoga Maualuga i Osaka]. . . . O o latou uiga faatautee lē tatau, ua faoa ai mai le tagata aʻoga se vaitaimi tāua o lona olaga talavou.” Ae, sa tumau pea ona tetee malosi le aʻoga o Matātā Eseese i Kobe i lenei mataupu. O le iuga, na avea  ai ma mataupu iloga o tala fou i le atunuu atoa. Sa mātauina lelei e faiaʻoga ma pule o aʻoga i le atunuu atoa, ma o se faaiuga mai le faamasinoga aupito sili ona maualuga i le atunuu, o le a avea o se faavae malosi faaletulafono mo nisi faamasinoga faapenei i le lumanai.

Ia Ianuari 17, 1995, pe tusa ma se vaiaso talu ona uma ona tuuina atu e le aʻoga le talosaga i le Faamasinoga Sili, na taia ai e le mafuie i Kobe ia le aai o Ashiya, o iina e nonofo ai Kunihito ma lona aiga. I le tusa o le 5:30 i lena taeao, i ni nai minute lava a o lei lūlū le mafuie i lea vaipanoa, na tuua ai e Kunihito lona fale mo lana galuega faavaitaimi. Sa tietie atu o ia e ui atu i le auala sima i lalo o le eleele, le Hanshin Expressway, ma e lūlū le mafuie ae ua toeitiiti lava oo atu o ia i le vaega o le auala lea na masofa i lalo. Na toe foi loa o ia i lona aiga ma iloa ai ua matuā masofa atoatoa i lalo le fogafale muamua o lo latou fale. Na iloa ai e Kunihito e faapea, sa ono mafai ona oti ai o ia i le mafuie, ma na faafetai atu ia Ieova mo le faasaoina o lona ola. Auā ana faapea e oti o ia, e foliga mai la semanū e iu ai le faamasinoga i le mataupu e faatatau i le aʻoga taupelu e aunoa ma se faaiuga a le Faamasinoga Sili.

O le masani a le Faamasinoga Sili i Iapani, o le iloiloina lea o talosaga e ala i na o tusitusiga, ma iloa ai pe saʻo pe leai le faaiuga a le faamasinoga maulalo. Seʻi vaganā lava ua iai se mafuaaga tāua e toe suia ai le faaiuga a le faamasinoga maulalo, ona toe faia lea o le faamasinoga. E lē logoa atu e le faamasinoga i le itu tagi ma le itu tetee le taimi e tuuina atu ai le faaiuga. O lea na faateʻia ai Kunihito i le taeao o Mati 8, 1996, ina ua faailoa atu ia te ia e faapea, o le a lauina le iuga i le taeao lena. Sa olioli ma fiafia tele o ia ina ua ia iloa na lagolagoina e le Faamasinoga Sili le faaiuga a le Faamasinoga Maualuga i Osaka.

E toʻafa faamasino na ioe faatasi ma le Faamasino o Shinichi Kawai e faapea, “o le faaiuga o loo iloiloina, e tatau ona manatu i ai e matuā lē talafeagai lava e tusa ai ma tulaga masani o le olaga i amioga tatau, ua see ese le faaiuga a le aʻoga mai le tulafono e faatatau i aiā tatau, ma o lea, ua manatu ai i nei gaoioiga ua lē tusa ma le tulafono.” Na faailoa mai e le faamasinoga le loto faamaoni o Kunihito i lona teena o le auai i le aʻoga taupelu ma faapea mai: “O le mafuaaga o le teena e lē na talosaga o le auai i aʻoga taupelu, sa faia ma le loto faamaoni ma sa fesootai moni atu lava ma le faavae autū o lona faatuatuaga.” Na faia e le Faamasinoga Sili se faaiuga e faapea, sa tatau lava ma e tatau i le aʻoga ona saunia ni galuega faaopoopo ina ia mafai ai ona faaaloalo i talitonuga faalotu o lē ua talosaga.

Aafiaga mo se Taimi Umi

O lenei faaiuga e lē taumatea o le a fai ma faaaoaoga lelei i le lumanai, i le amanaiaina o le saʻolotoga o tapuaiga i aʻoga. Na faapea mai le Japan Times: “O le faaiuga muamua lea ua faia e le Faamasinoga Sili i le mataupu e faatatau i aʻoaʻoga ma le saʻolotoga o lotu.” Ae peitai, e lei aveesea ai i le faaiuga le tiute tauave a tamaiti aʻoga talavou taitoatasi e faia lana lava filifiliga tonu e tusa ai ma lona loto fuatia ifo pe a fesagai ma tofotofoga o le faatuatua.

Na faapea mai Polofesa Masayuki Uchino o le Iunivesite o Tsukuba, o le tasi o mafuaaga moni na uunaia ai faamasino e tuuina atu le manumalo ia Kunihito, ona o ia “o se tamaitiiti aʻoga loto faamaoni, o lē sa matuā maoaʻe ana taumafaiga i le aʻoga.” Ua tuuina mai e le Tusi Paia lenei fautuaga i Kerisiano o ē o fesagai ma tofotofoga o lo latou faatuatua e faapea: “Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.” (1 Peteru 2:12) E mafai e talavou Kerisiano faamaoni ona faaalia o lo latou tulaga faale-Tusi Paia, e mafai ona faaaloalogia e tagata pe a ola atoatoa o latou olaga e tusa ai ma tapulaa a le Tusi Paia.

Ina ua mavae le tuuina atu o le faaiuga a le Faamasinoga Sili, na toe talia ai Kunihito Kobayashi i le aʻoga o Matātā Eseese i Kobe. O le toatele o tamaiti aʻoga na ulufale faatasi ma Kunihito i le aʻoga, ua uma ona faauu. Ua aʻoʻoga faatasi nei Kunihito ma tamaiti o ē e tailima tausaga e laiti ai ia te ia. I manatu o le toatele o tagata o le lalolagi, e foliga mai, ua maimau lea lima tausaga tāua o lona olaga. Ae peitai, o le faamaoni maumauai o Kunihito, e tautele i le silafaga a Ieova le Atua, ma e mautinoa e lē o faaleaogaina lona tautiga.

[Faaopoopoga i lalo]

[Ata i le itulau 20]

Tauagavale: Le aiga o Kunihito ina ua mavae le mafuie

I lalo: O Kunihito i aso nei