Ia Faaaogā Lenei Avanoa e Lē Laumaua!

SA MATUĀ lelei lava suesuega faafomaʻi a Peteru i le taimi na amata ai ona fiafia i le feau a le Tusi Paia mo le faaolataga. Ina ua faauu mai i lana aʻoga ma amata ona galue o se fomaʻi i le falemaʻi, sa faaauau ona faamalosia o ia e i latou e maualuluga atu tulaga ia te ia ina ia avea o ia ma fomaʻi tipitipi o neula o le tino. O le avanoa lenei e matuā vave lava ona faaaogā e le toatele o fomaʻi fou e aunoa ma le faatalatū.

Peitai, na filifili Peteru * ia lē faaaogaina lenei avanoa. Aisea? Pe sa aunoa ea ia ma se faanaunauga atoa ma se uunaiga manaomia? Leai, auā sa manatunatu ma le faaeteete Peteru i le ofo. Ina ua avea ma Molimau tuuina atu a Ieova, ma papatisoina, na ia faanaunau e faaalu le tele o taimi na te mafaia i vala eseese o le faiva faa-Kerisiano. O lona manatu, afai e avea o ia ma fomaʻi tipitipi o neula o le tino, o le a alu uma ai lona taimi ma lona malosi i lana galuega. Pe sa valea ea lona lafoaia o lenei avanoa tutasi, pe sa atamai lana mea na fai?

O le filifiliga a Peteru, atonu e foliga mai i nisi e valea. Peitai, sa ia manatunatu i mau o le Tusi Paia e pei o le Efeso 5:15, 16 (NW). O loo faalaeiauina ai iina e le aposetolo o Paulo ia Kerisiano e faapea: “O lenei, ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia outou faaaogā tatau le taimi avanoa, auā o ona po nei ua leaga.”

Mātau faamolemole le faaupuga “taimi avanoa.” E faaliliu mai i le upu Eleni o loo faaaogaina i le Tusi Paia e tele lava ina faatatau atu i se taimi po o se vaitaimi e faailogaina mo se mea patino po o le talafeagai mo se gaoioiga faapitoa. O loo faamalosia e Paulo iinei Kerisiano ia iai ni taimi mo mea tāua. O le mea moni lava ia, e manaomia ona latou “faamautinoa mea e sili ona tāua.” (Filipi 1:10, NW) O lona uiga e manaomia ona faamuamua mea tāua.

Afai o lea, o le ā la le fuafuaga tauatua mo o tatou taimi? O le ā le finagalo o le Atua mo i latou e alolofa ia te ia? E manino le faailoaina mai e valoaga o le Tusi Paia o o tatou aso e faapea o “le taimi o le iuga,” po o “aso e gata ai.” (Tanielu 12:4; 2 Timoteo 3:1) Na matuā faamanino mai e Iesu po o le ā le mea aupito i tāua i o tatou aso. Sa maʻoti ona ia taʻu mai a o lei oo i le iuga o lenei faiga amioleaga o mea, “e talaʻiina atu foi lenei tala  lelei o le malo i le atu laulau uma, e fai ma molimau i nuu uma.” Ona faatoʻā oo mai lea o le iuga.—Mataio 24:3, 14.

O lea la, tatou te mananao e faaaogā avanoa uma e talaʻi ai le tala lelei o le Malo ma fai ma soo. (Mataio 28:19, 20) Ona o nei gaoioiga e lē toe faia i se isi lava taimi, o le avanoa mulimuli la lenei e fai ai le mea e sili tatou te mafai i lenei galuega faasaoola. “O lenei le tausaga e talileleia mai ai.” Ma le mautinoa, “o lenei le aso e faaolaina ai.”—2 Korinito 6:2.

Faia o se Filifiliga Saʻo

O Peteru—le taulealea na taʻua i le amataga—sa mafaufau ma le faaeteete i lana filifiliga ma fuafua ona avanoa. Na ia iloa e lē sese le suesue ma le manatu ia avea ma fomaʻi tipitipi o neula o le tino. Ae o le ā sa sili ona tāua ia te ia? O lona tulaga i le faiva faa-Kerisiano, na ia iloa le faanatinati o lenei galuega. I le taimi lava e tasi, sa iai ona tiute tauave e ao ona faataunuuina. E faaipoipo ma e ao ona lagolagoina lana avā, o lē sa auai i le galuega talaʻi faataimi atoa. (1 Timoteo 5:8) Sa ao foi ia Peteru ona totogi aitalafu o ana aʻoaʻoga. O le ā la, na ia filifili e fai?

Sa filifili Peteru e suesue faapitoa le faʻataina o le tino atoa ma le faʻata e lagonaina ai leo e iloiloina ai itutino i totonu ma ni faaletonu o iai. O le galuega lenei e fai i taimi faigaluega masani. E toleni faapitoa foi o ia mo lenei mataupu i itula faigaluega masani i aso taitasi. Ioe, e ono faapea mai nisi o se galuega e lē taualoa tele lenei tulaga, peitai o le a tele ai lona taimi e faaalu i mea faaleagaga.

E iai se isi mafuaaga na uunaia ai Peteru. E ui na te lei faamasinoina isi o ē sa ese a latou filifiliga sa fai, ae na ia iloa o le aafia tele i galuega faaletino e ono matautia mo Kerisiano. E ono faapogaia ai o ia e lē manatu mamafa i tiute tauave faaleagaga. Ua iloa lelei lenei mea i se isi faataitaiga lea sa aafia ai foi mea tau galuega.

O se tagata talaʻi faataimi atoa o le Malo, o ia o se tusiata. Sa mafai ona ia tausia o ia i mea tau tupe e ala i le faatau atu o ana ata tusi. A o tuuina atu le tele o lona taimi i le faiva faa-Kerisiano e sili ona tāua, sa mafai lava ona ia tausia o ia e aunoa ma se faaletonu. Peitai, na amata ona oso aʻe se faanaunauga e faalautele lona malamalama tau tusi ata. Na iu ina matuā aafia ai i tusigā ata ma faatasitasi ma tagata tusi ata, tuua le faiva faataimi atoa, ma iu ina matuā aunoa ma se mea e toe faia e tusa ai ma gaoioiga o le talaʻiga o le Malo. Na iu ina aafia ai i amioga e lē faale-Tusi Paia, ma iu ai ina lē toe avea o ia ma vaega o le faapotopotoga Kerisiano.—1 Korinito 5:11-13.

E Faapitoa le Taimi o Loo Tatou Ola Ai

I le avea ma ē o loo auauna nei ia Ieova, e mautinoa tatou te mananao e tumau i le faamaoni ia te ia. Ua tatou iloa o loo tatou ola nei i le taimi aupito mataina o le talafaasolopito o tagata. Ina ia faaauau ona auauna i le Atua ma faafetaiaia ma le manuia mea tutupu i aso nei, tatou te ono manaomia le faia o ni fetuutuunaiga. Tatou te ono faatusaina lenei mea i le taimi o le seleselega a se faifaatoaga. O le vaitaimi lea o gaoioiga faapitoa, e faatalitalia ai ē galulue i le faatoaga ina ia fai le mea e sili atu i le tulaga masani ma ia umi atu taimi o le aso e galulue ai. Aisea? Auā e faatapulaa le taimi e tatau ona faia ai le seleselega.

Ua puupuu lava si taimi o totoe mo lenei faiga amioleaga o mea. O le taimi lenei nai lo se isi lava taimi muamua, e manaomia ai e se Kerisiano moni ona matuā taumafai e mulimuli i le faataitaiga a Iesu ma savali i ona tulaga aao. O ana gaoioiga a o soifua i le lalolagi ua faailoa mai ai le mea sa sili ona tāua ia te ia. Na ia fetalai e faapea: “E tatau ona ou faia galuega a le ua auina mai aʻu,  manū o ao; e oo i le po, e le mafaia e se tasi ona galue ai.” (Ioane 9:4) I lona faapea mai o le a oo i le po, sa faatatau atu e Iesu i le taimi o ona tofotofoga, le faasatauroina, ma le maliu, lea o le a faagata ai lana faiva ma o le a lē toe mafai ai ona ia auai i le galuega a lona Tamā i le lagi.

E moni, i lana faiva mo le tolu ma le ʻafa tausaga, sa faaalu e Iesu nisi ona taimi e fai ai vavega ma faamālōlō ē mamaʻi. Ae ui i lea, sa ia faaaogā le tele o lona taimi e talaʻi ai le feau o le Malo ma ia “talaʻi le saolotoga i le tafeaga” i lotu sese. (Luka 4:18; Mataio 4:17) Sa tuu atu e Iesu taumafaiga mamafa i lana faiva ma faaalu se taimi e toleni ai ona soo ina ia mafai ona latou ati ae i luga o le faavae na ia faataatia, ma ia faaauau ma le uigā i le galuega talaʻi. Na faaaogā e Iesu avanoa uma e faaauiluma ai manaoga o le Malo ma sa finagalo i ona soo ia faia le mea lava lena.—Mataio 5:14-16; Ioane 8:12.

I le pei o Iesu, o i tatou ua avea ma ona soo i aso nei, e manaomia ona tatou vaai i le tulaga o le lalolagi e pei ona silasila i ai Ieova. Ua puupuu lava le taimi o totoe o lenei faiga o mea, ma o loo finagalo alofa le Atua ia maua e tagata uma le avanoa e maua ai le faaolataga. (2 Peteru 3:9) O lea la, pe e lē atamai ea le tuu o isi galuega e faatulaga lua i le faia o le finagalo o Ieova? (Mataio 6:25-33) Ae maise lava i se taimi faapitoa faapenei, o mea sa masani ona vaai i ai e tāua e mafai ona avea ma mea e lē tāua tele i o tatou olaga o ni Kerisiano.

Pe e iai ea se tasi o i tatou ua salamō ona o le faamuamua o le faia o le finagalo o le Atua i o tatou olaga? E matuā leai lava, auā o loo tauia ma le matagofie le olaga faataulagaina totino o Kerisiano. O se faataitaiga, na taʻu atu e Iesu i ona soo e faapea: “E moni, ou te fai atu ia te outou, ai se tasi ua ia tuua le fale, po o uso, po o tuafāfine, po o le tinā, po o le tamā, po o le fanau, po o fanua, ona o aʻu ma le tala lelei, e maua lava e ia taisautuaselau i lenei olaga, o fale, ma uso, ma tuafāfine, ma tinā, ma fanau, ma fanua, atoa foi ma sauaga, a o le ola atali e maua ai le ola faavavau.”—Mareko 10:29, 30.

E leai se tasi e mafai ona ia fuaina i tupe taui o loo olioli ai i latou o loo faaaogā o latou taimi e vivii ai ia Ieova ma faalauiloa le feau o le Malo. O loo latou olioli i le tele o faamanuiaga! E aofia ai i lenei ia uo moni, le loto malie i le faia o le finagalo tauatua, le soisoi o le faamaoniga a le Atua, ma le avanoa i le ola e faavavau. (Faaaliga 21:3, 4) Ma e maeu se faamanuiaga o le avea ma Molimau ma fesoasoani faaleagaga i tagata ma aumaia ai le faamamaluina i le suafa paia o Ieova! E aunoa ma se fesili, o le “faaaogā tatau o le taimi avanoa” o se ala atamai ma le tauia. O le taimi lenei nai lo se isi lava taimi muamua e auai ai i le faalauiloaina o le tala lelei o le Malo o le Atua. Pe o le a e faaaogā ea ma taofi mau ia lenei avanoa e lē laumaua?

[Faaopoopoga i lalo]