Le Aiā Tatau i le Maliega ua Faia ma le Atamai ua Toe Faamautuina

I SE faaiuga talu ai nei na faailoa atu e le Faamasino mo Uluai Suesuega i le Fale Faamasino i Messina, i Italia, ua faamautuina mai ai e faapea o manaoga o se tagata maʻi ua matua e tatau ona aloaia e fomaʻi. O lenei faaiuga na faaooina atu ona o se faamasinoga na aafia ai se tasi o Molimau a Ieova.

Ia Ianuari i le 1994, na auina atu ai faanatinati i se falemaʻi i Taormina i Messina, ia Antonino Stellario Lentini, e 64 tausaga le matua, o ia o se tasi o Molimau a Ieova na maʻi i se tulaga o le totolēutu. O le avā a Antonino o Catena, na ia faailoa atu i le ʻau faigaluega a le falemaʻi e faapea ona o i laua o ni Molimau a Ieova e lē taliaina ai e ia ma lana tane se togafitiga e faaaogā ai le tuiga toto. (Galuega 15:20, 28, 29) Na aloaia lo la manaoga.

Peitai ane, a o aveina atu o ia i se tasi vaega mo tausiga faafomaʻi, na oo ai ni faafitauli ia Antonino o le faigata lea ona mānava ma e taunuu atu ua matuā faaletonu lava lona malosi. E lei leva, ae maliu loa o ia. Na matuā mafatia Catena, ae na ia maua se faamafanafanaga tele i le folafolaga a le Tusi Paia e faatatau i le toetu. (Galuega 24:15) Ona oo lea i se tulaga na matuā faateʻia ai o ia, na tuuaʻia o ia e le faamasino—atonu ua faaseseina e tala lē saʻo na faatupuina e tusitusiga mo tala fou—i le faapogaia o le maliu o lana tane talu ai lona teena o se taotoga na manatu i ai fomaʻi e aogā mo lana tane.

Ina ua tuanai se tausaga atoa, ia Iulai 11, 1995, na faaleaogaina ai tuuaʻiga e faasaga ia Catena, auā na te lei faia se solitulafono. O le mea moni lava, ua faasino mai i taʻutinoga a nisi fomaʻi atamamai e faapea, pe a manatu i le tulaga o lē na gasegase, o taotoga e taumafai e faaofi atu semanū e leai lava ma se aogā.

Ae na oo atu le faamatalaga a le faamasino i le mataupu tonu na aafia ai. Na ia faaali mai, e faigata ona taliaina le manatu faapea, e tatau ona faauilavea atu le ʻau faigaluega a le falemaʻi pe a fai e teena e se maʻi po o se tagata foi o fai ma sui o le maʻi ia togafitiga faafomaʻi. Ua ia faaopoopo mai, o le tulafono e tusa ai ma amioga tatau faafomaʻi i Italia, “ua iloa le manaomia ona maua le maliega ua faia ma le atamai e le tagata maʻi po o lē o fai ma sui o lē ua maʻi a o lei faauilavea atu.” O lea, na ia faapea mai ai, o Catena na “puipuia e ia lana tane e tusa ai ma le tulafono mai le faia i ai o se togafitiga faapena.”

O lenei faamasinoga ua toe faamautuina mai ai le aiā tatau a se tagata matua na te teteeina ai ni togafitiga faafomaʻi, o loo faapea ona feteenai ma ona manaoga.