Ovasia Femalagaai—O Meaalofa i Tagata

“Na afio ae o ia i luga, ma na taʻitaʻi faatagataotaua i le tafeaga; ua na foaiina foi mea alofa i tagata.”—EFESO 4:8.

1. O le ā le galuega fou na faasilasila mai i lenei mekasini i le 1894?

E SILIA ma le senituri ua mavae, na faasilasila mai ai e le Olo Matamata se mea fou. Na faamatalaina faapea o se “Tasi Vala o le Galuega.” O le ā na aafia i lenei galuega fou? O le faavaeina aloaia faaonaponei o le galuega a ovasia femalagaai. I le lomiga o Setema 1, 1894, o lenei mekasini na faamatala mai ai e faapea, o le a asiasi atu uso agavaa i vaega o Tagata Aʻoga o le Tusi Paia ‘mo le fuafuaga ina ia faalaeiauina i latou i le upu moni.’

2. O ā tiutefai o ovasia matagaluega ma ovasia itumalo?

² I le uluai senituri T.A., na asia ai faapotopotoga Kerisiano e ovasia faapena e pei o Paulo ma Panapa. Sa iai i nei tane faamaoni le naunautaiga o le ‘atiina ae’ o faapotopotoga. (2 Korinito 10:8) I aso nei, ua faamanuiaina i tatou i le iai o le faitau afe o tane o loo faia lenei galuega i se auala ua faasolosolo lelei. Ua tofia i latou e le Vaega Pule o Molimau a Ieova e avea o ni ovasia matagaluega ma ovasia itumalo. E tautuaina e se ovasia matagaluega faapotopotoga pe tusa ma le 20 mo se vaiaso i faapotopotoga taitasi i le tusa e faalua ona fai i le tausaga, e iloilo faamaumauga a le faapotopotoga, faia lauga, ma auai i le faiva i le fanua faatasi ai ma tagata talaʻi o le Malo i le faapotopotoga o loo asia. O le ovasia itumalo e taitaifono o ia i fonotaga matagaluega taitasi faaletausaga mo ni matagaluega, e auai o ia i le faiva i le fanua ma faapotopotoga o loo talimalo mo le vaiaso o le fonotaga, ma saunia ni faalaeiauga e ala atu i lauga faale-Tusi Paia.

Lo Latou Agaga Faataulagaina

3. Aisea e manaomia ai e ovasia femalagaai se agaga faataulagaina totino?

³ O taimi uma lava e faimalaga solo ai ovasia femalagaai. O lenei mea e manaomia ai se agaga faataulagaina totino. E masani ona faigata le faimalaga atu mai le tasi faapotopotoga i le isi faapotopotoga, ae o loo faia faapena e nei tane ma a latou avā i se uiga olioli. Na faapea mai se tasi ovasia matagaluega: “E sili ona lagolagosua laʻu avā ma e lē tāitai ona faitio . . . Ua matuā tatau ia te ia le faamālō ona o lona agaga faataulagaina.” O nisi ovasia matagaluega  e silia ma le 600 maila [1,000 kilomita] e femalagaai ai i le va o faapotopotoga. E toatele o loo iai a latou lava taavale, ae o isi e faaaogā taavale o loo feoai ai tagata lautele, o uila vilivae, o solofanua, pe savavali foi. O se tasi ovasia matagaluega mai Aferika e tatau ona ia tauaveina lana avā i ona tauʻau a o la āsā se vaitafe, ina ia mafai ona oo atu i se tasi faapotopotoga. I malaga faamisionare a le aposetolo o Paulo, sa tatau ai ona ia gafatia le vevela ma le mālūlū, le fiaʻai ma le fiainu, le lē maua o se moe i po, o lamatiaga eseese, ma sauāga matuitui. Sa ia te ia foi le ‘popole mo ekalesia uma’—o se popolega ua masani ai ovasia femalagaai i aso nei.—2 Korinito 11:23-29.

4. O ā aafiaga e mafai ona oo i olaga o ovasia femalagaai ma a latou avā ona o ni faafitauli i le soifua maloloina?

⁴ I le pei o le aumea a Paulo o Timoteo, ua faapena foi i nisi taimi ona iai ni faafitauli i le soifua maloloina o ovasia femalagaai ma a latou avā. (1 Timoteo 5:23) O se tasi foi lena faaopoopoga o popolega ia i latou. Ua faamatala mai e le avā a se tasi ovasia matagaluega e faapea: “Ou te lagona le faigata i le faatasitasi pea ma uso, ae e lē o atoatoa loʻu malosi. Ina ua ou oo i le vaitaimi o le suiga o loʻu malosi faafanautama (menopause), sa ou iloa ai le matuā faigata o lenei tulaga. O se matuā luʻi le tapenaina o a ma meatotino uma i vaiaso taitasi ma toe faasolo atu i se isi nofoaga. E masani lava, ou te toe nofo teisi ma tatalo atu ia Ieova ina ia foai mai ia te au le malosi e faaauau ai.”

5. E ui i faafitauli eseese, ae o le ā le agaga ua faaalia e ovasia femalagaai ma a latou avā?

⁵ E ui i faafitauli o le soifua maloloina ma isi tofotofoga, ae o loo olioli pea ovasia femalagaai ma a latou avā i la latou auaunaga ma faaalia lo latou alofa faataulagaina. O nisi ua lamatia o latou ola a o latou avatu fesoasoani faaleagaga i taimi o sauāga po o taimi o taua. Pe a asiasi atu i faapotopotoga, ua latou faaalia ai se agaga e talitutusa ma le agaga na faaalia e Paulo, o lē na faapea atu i Kerisiano i Tesalonia: “Ua matou agamalu ina ua matou i ai ia te outou na, faapei o se failele na te tausi lelei i ana lava tama. Sa faapea lava lo matou maelega i le alofa ia te outou, na matou manao i le fia avatu ia te outou e le na o le tala lelei i le Atua, a o matou lava ola foi, auā na alofaina outou e i matou.”—1 Tesalonia 2:7, 8.

6, 7. O ā ni taaʻiga lelei e mafai ona aumaia e ovasia femalagaai o ē galulue malolosi?

⁶ I le pei o isi toeaina i le faapotopotoga Kerisiano, ua faapena i ovasia femalagaai ona “galulue i le upu atoa ma le aʻoaʻo atu.” O na toeaina uma e tatau ona “taʻuaogaina i latou ona faaluaina atu i ai o le taui.” (1 Timoteo 5:17) E mafai ona aogā a latou faaaoaoga pe afai, ‘tatou te faaaʻoaʻo i lo latou faatuatua, pe a uma ona mafaufau i le iuga o a latou amio.’—Eperu 13:7.

⁷ O ā ni āuga ua oo i nisi ona o nisi o toeaina femalagaai? Na tusi mai se tasi o Molimau a Ieova: “Maeu le matagofie o taaʻiga a le uso o P—— i loʻu olaga! Sa ovasia femalagaai o ia i Mekisikō mai le tausaga e 1960 ma faasolo mai ai. A o oʻu laitiiti lava, sa ou faatalitalia ai ma le olioli ana asiasiga. I le sefulu o oʻu tausaga, na ia faapea mai ai ia te au, ‘O le a avea foi oe o se ovasia matagaluega.’ A o faagasolo tausaga faigata o loʻu olaga talavou, sa ou saili atu pea ia te ia auā e masani ona ia te ia upu atamai e ofoina mai. O lona lava faanaunauga autū ia leoleoina le lafu mamoe! Nei la ua avea aʻu o se ovasia matagaluega, ou te taumafai pea e faaalu se taimi tele ma ē talavou ma faalaeiauina i latou e tuliloaina sini faatiokarate e pei foi ona ia faalaeiauina ai aʻu. E oo foi i tausaga faaiuiu o lona soifuaga, e ui lava i faafitauli o lona maʻifatu, ae sa masani lava ona saili le uso o P—— mo se avanoa e avatu ai se upu faalaeiau. A o toe tasi lava le aso ae maliu o ia, ia Fepuari 1995, sa ma ō faatasi ai ma ia i se aso faapitoa o fonotaga, ma na ia faalaeiauina ai foi ni sini aogā i se uso o lē na avea o se tusiata mo ni faugafale. O le taimi lava lena na malie ai le uso e faia sana talosaga mo le auaunaga i Peteli.”

 E Talisapaia i Latou

8. O ai “mea alofa i tagata” ia o loo faamatala mai i le Efeso mataupu e 4, ma ua aogā faapefea i latou i le faapotopotoga?

⁸ O ovasia femalagaai ma isi toeaina ua tuuina atu i ai tofiga o le auaunaga ona o le alofa tunoa o le Atua, ua taʻua i latou o “mea alofa i tagata.” Talu ai ua avea Iesu ma sui o Ieova ma o le Ulu foi o le faapotopotoga, ua ia sauniunia ai nei tane faaleagaga ina ia mafai ona atiina ae i tatou taitoatasi ma maua ai le taʻumatuaina. (Efeso 4:8-15) E so o se meaalofa lava ua onomea i ai le faaalia o le talisapaia. Ae ua sili ona moni lena mea i se meaalofa e faamalosia ai i tatou ina ia auauna atu pea ia Ieova. O lea la, e mafai faapefea ona tatou faaalia lo tatou talisapaia mo le galuega a ovasia femalagaai? I ā auala e mafai ona tatou faaalia ai o loo tatou ‘faapelepeleina pea nei tane’?—Filipi 2:29.

9. I ā auala e mafai ona tatou faaalia ai le talisapaia mo ovasia femalagaai?

⁹ Pe a faasilasila mai se asiasiga a le ovasia matagaluega, e mafai ona amata fai a tatou fuafuaga ina ia faia se sao atoatoa i galuega a le faapotopotoga mo lena vaiaso. Atonu e mafai ona tatou faataatia ese se taimi faaopoopo e lagolagosua ai i faatulagaga i le auaunaga i le fanua a o faagasolo le asiasiga. E mafai ona tatou auauna o ni paeonia lagolago i lena masina. E mautinoa o le a tatou mananao e faatino fautuaga a le ovasia matagaluega ina ia faaleleia atili ai la tatou faiva. O lena agaga talileleia o le a aogā ia i tatou ma o le a toe faamautinoa atu ai ia te ia le aogā o lana asiasiga. Ioe, e asiasi atu ovasia matagaluega i le faapotopotoga ina ia atiina ae ai i tatou, ae latou te manaomia foi ona atiina ae faaleagaga i latou. Sa iai taimi na manaomia ai e Paulo ni faamafanafanaga, ma sa masani ona ia aioi atu i ona uso Kerisiano ina ia tatalo mo ia. (Galuega 28:15; Roma 15:30-32; 2 Korinito 1:11; Kolose 4:2, 3; 1 Tesalonia 5:25) Ua faapena foi i ovasia femalagaai i aso nei ona latou manaomia a tatou tatalo ma faalaeiauga.

10. E mafai faapefea ona tatou fesoasoani ina ia avea le galuega a se ovasia femalagaai o se mea e olioli ai?

¹⁰ Pe ua tatou taʻu atu ea i le ovasia matagaluega ma lana avā le tele o lo tatou talisapaia o a la asiasiga? Pe tatou te faafetai atu ea ia te ia mo fautuaga aogā o loo ia aumai ia i tatou? Pe tatou te faailoa atu ea ia te ia le avea o ana fautuaga mo le auaunaga i le fanua, ma pogai ua faateleina ai lo tatou olioli i le faiva? Pe afai tatou te faia, o le a fesoasoani lena e olioli ai o ia i lana galuega. (Eperu 13:17) Sa faapitoa lava ona taʻua e se tasi ovasia matagaluega i Sepania le tele o lo la talisapaia ma lana avā o tusi faafetai la te mauaina pe a uma ona la asiasia faapotopotoga. Fai mai o ia: “Ma te teuina lava nei tusi ma toe faitau i ai pe a ma lagona le faavaivai. O le puna lena o faalaeiauga moni.”

11. Aisea e tatau ai ona tatou faailoa atu i avā a ovasia matagaluega ma itumalo le alofagia ma le talisapaia o i latou?

¹¹ E mautinoa lava le mauaina e le avā a le ovasia femalagaai aogā mai upu faamālō. Ua ia faia ni faataulaga tetele e fesoasoani ai i lana tane i lenei vala o le auaunaga. Ua teena e nei tuafāfine faamaoni o latou faanaunauga masani o le fia maua o ni o latou lava fale, ma i le tele o tulaga, ia faia foi ni fanau. Sa avea le afafine o Iefata o se tasi o auauna a Ieova o lē na lotomalie e faafitia lona avanoa e fai ai sana tane ma se fanau, ona o le tautoga ua uma ona fai e lona tamā. (Faamasino 11:30-39) Sa faapeī manatu i lana taulaga? Ua taʻua i le Faamasino 11:40 e faapea: “O lea tausaga ma lea tausaga ua o ai afafine o Isaraelu e vivii i le afafine o Iefata le Kiliata e taifa aso i tausaga.” Maeu le matagofie pe a tatou taumafai e taʻu atu i avā a ovasia matagaluega ma itumalo le alofagia ma le talisapaia o i latou!

ʻAua Neʻi Galo le Agaga Talimalo’

12, 13. (a) O le ā le faavae faale-Tusi Paia ua iai mo le faaalia o le agaga talimalo i ovasia femalagaai ma a latou avā? (e) Ia faataitai le auala e mafai ai e lena agaga talimalo ona matuā aogā i itu uma.

¹² O le faaali o le agaga talimalo o le isi lea auala e faaalia ai le alofa ma le talisapaia mo i latou o loo i le galuega femalagaai faa-Kerisiano. (Eperu 13:2) Na faamālō atu le aposetolo o Ioane ia Kaio mo lona talimalo ia i latou o ē na asiasi ane i le faapotopotoga o ni  misionare femalagaai. Na tusi atu Ioane: “Le pele e, ua e faamaoni lava i mea uma o faia e oe i le au uso aemaise tagata ese, o e ua faailoa mai lou alofa i luma o le ekalesia; afai e te fesoasoani i lo latou moliga e tusa i le Atua, e lelei lau mea e fai. Auā na latou o atu ona o lona suafa, e lei talia sina mea mai nuu ese. O lea e tatau ai ona tatou talia [“talimalo,” NW] tagata faapea, ina ia tatou fai ma fesoasoani i le upu moni.” (3 Ioane 5-8) I aso nei, e mafai ona tatou faalauteleina le galuega talaʻi o le Malo e ala i le faaalia o lea lava agaga talimalo i ovasia femalagaai ma a latou avā. O le mea moni, e tatau i toeaina o le faapotopotoga ona faamautinoa ua lelei ni nofoaga e api ai, ae na faapea mai se tasi ovasia itumalo: “O la matou faiā ma uso e lē mafai ona faavae aʻe i le po o ai e mafai ona ia faia se mea mo i maʻua. E ma te lē mananao e faaali atu lena uiga. E tatau ona ma lotomalie e talia le agaga talimalo o so o se tasi o o ma uso, pe mauoa pe mativa.”

¹³ E mafai ona matuā aogā i itu uma le agaga talimalo. E manatua e Jorge, o sē na avea muamua ma ovasia matagaluega ae o loo auauna nei i le Peteli e faapea: “O le masani a lo matou aiga, le valaaulia o ovasia femalagaai ina ia nonofo i lo matou fale. Ou te lagona na tele atu se fesoasoani a nei asiasiga ia te au nai lo mea sa ou manatu i ai i na taimi. A o faasolo ina avea aʻu ma tagata matua, sa iai oʻu faafitauli faaleagaga. Sa faapopoleina ai loʻu tinā i lenei mea, ae sa ia lē iloa le auala tonu e fesoasoani mai ai, o lea na ia talosaga atu ai i le ovasia matagaluega ina ia talanoa mai ia te au. I le taimi muamua sa ou taumafai e alofia o ia, auā na ou fefe i le faitioina o aʻu. Ae o ona uiga faaleuo na iu ina mafai ona ia uunaia ai aʻu ou te talanoa atu ia te ia. Sa ia valaaulia aʻu ina ia ma faitaumafataga faatasi i se tasi Aso Gafua, ma sa ou faaali uma atu i ai oʻu faalogona auā na ou mautinoa sa ia malamalama ia te au. Na ia faalogologo lelei. O ana fautuaga uigā na aogā moni, ma na amata ai loa ona ou agaigai i luma faaleagaga.”

14. Aisea e tatau ai ona tatou talisapaia toeaina femalagaai nai lo le faitioina o i latou?

¹⁴ E taumafai se ovasia femalagaai e fesoasoani atu faaleagaga i ē talavou ma ē matutua. E mautinoa la, e tatau ona tatou faaalia lo tatou talisapaia mo ana taumafaiga. Peitai, e faapefea pe afai tatou te faitioina o ia i ni ona vaivaiga pe fefaatusatusaai o ia i se uiga lē lelei ma nisi o ē na latou asia foi le faapotopotoga? E foliga mai, o se matuā faavaivai loto lenei mea. Sa lē o se faalaeiau mo Paulo le faalogo atu i faitioga o lana galuega. E manino mai, sa faia e nisi Kerisiano i Korinito ni faamatalaga lē logoleleia e faitioina ai ona foliga mai ma lona tomai tau failauga. O ia lava na otooto maia na faitioga i lona faapea mai: “O ana tusi e mamafa ma malolosi ia; a o lona tino pe a nofo mai e vaivai lea, ma lana upu e faatauvaa lea.” (2 Korinito 10:10) E ui i lea, o se fiafiaga, ona ua masani pea ona lagona e ovasia femalagaai upu o le talisapaia alofa.

15, 16. Ua faapefea ona aafia ovasia femalagaai ma a latou avā i le alofa ma le maelega lea ua faaalia e o latou uso talitonu?

¹⁵ E iai se tasi ovasia matagaluega i Amerika Latina, o le aso atoa e tauasa atu ai i se auala  palapalā ma le vaivaia, ina ia mafai ona asia ona uso ma tuafāfine faaleagaga o loo nonofo i se vaipanoa e pulea e fitafita lalafi solo faatupu faalavelave. Ua tusi mai o ia: “E faamomoiloto le vaai atu i le auala o loo faaalia ai e uso lo latou talisapaia o le asiasiga. E ui i le tele o aʻu taumafaiga ina ia oo atu iina, ae o le fesagai ma le tele o lamatiaga ma faigata, o nei mea uma ua tauia i le alofa ma le maelega ua faaalia e uso.”

¹⁶ Ua tusi mai se ovasia matagaluega i Aferika e faapea: “Talu ai le alofa na faaalia mai e uso ia i maʻua, ua sili ai lo ma alofa i le oganuu i Tanzania! Sa nofosauni uso e fia aʻoaʻoina ni mea mai ia i maʻua, ma sa latou fiafia e talia i maʻua i o latou aiga.” Sa iai se faiā alofa ma le fiafia i le va o le aposetolo o Paulo ma le ulugalii faaipoipo Kerisiano i le uluai senituri o Akula ma Pisila. O le mea moni, na faapea mai Paulo e uiga ia i laua: “Ua ou alofa atu ia Pisila ma Akula, na la fai galuega faatasi ma aʻu i le galuega a Keriso Iesu. O i laua ia na la tuu atu o la ua e sui aʻi aʻu, ia aʻu ola; e le na o aʻu e faafetai ia te i laua, a e atoa ma ekalesia uma i nuu ese.” (Roma 16:3, 4) Ua loto faafetai ovasia femalagaai ma a latou avā i le iai o ni a latou uo i ona po nei e pei o Akula ma Pisila, o ē ua latou faia ni taumafaiga faapitoa e faaalia le agaga talimalo ma fiafia e aumea ma i latou.

Le Faamalosia o Faapotopotoga

17. Aisea e mafai ai ona faapea atu ua atamai le faatulagaga mo ovasia femalagaai, ma o fea o loo maua mai ai o latou faatonuga?

¹⁷ Na fetalai Iesu: “A e taʻuamiotonuina le poto i ana galuega.” (Mataio 11:19) Ua manino le atamai o le faatulagaga mo ovasia femalagaai, auā ua fesoasoani i le faamalosiaina o faapotopotoga a tagata o le Atua. A o faagasolo le malaga taamilo faamisionare lona lua a Paulo, sa la taulau manuia ai ma Sila ina ua “ui ane . . . i Suria ma Kilikia, ua faamalosi i ekalesia.” Ua taʻu mai ia i tatou e le tusi o Galuega e faapea: “Ua ui ane i latou i aai, ma latou tuuina atu ia te i latou iugafono, na tuu e le au aposetolo ma toeaina o i Ierusalema, latou te tausia. Ua faamalosia foi ekalesia i le faatuatua, ma ua faatoateleina i lea aso ma lea aso.” (Galuega 15:40, 41; 16:4, 5) Ua maua e ovasia femalagaai i aso nei ni faatonuga faaleagaga e ala mai i le Tusi Paia ma lomiga a “le auauna faamaoni ma le mafaufau,” e pei foi ona maua e isi Kerisiano uma.—Mataio 24:45.

18. Ua faapefea ona faamalosiau atu ovasia femalagaai i faapotopotoga?

¹⁸ Ioe, e tatau i toeaina femalagaai ona latou aai mai pea i le laoai faaleagaga a Ieova. E tatau ona latou faamasani lelei i auala ma taʻiala o loo mulimuli ai le faalapotopotoga a le Atua. Ona avea ai lea o na tane o se faamanuiaga moni i isi. E ala i a latou faaaoaoga lelei o le maelega i le auaunaga i le fanua, e mafai ona latou fesoasoani atu ai i o latou uso talitonu ina ia faaleleia atili i le faiva faa-Kerisiano. O lauga e faavae i le Tusi Paia o loo aumaia e nei toeaina asiasi e faalaeiauina ai faaleagaga le aufaalogologo. O le fesoasoani atu i isi ina ia faatatauina fautuaga o le Afioga a le Atua, le auauna gatasitasi ma tagata o Ieova i le lalolagi aoao, ma le faaaogaina o sauniuniga faaleagaga ua faia e le Atua e ala mai i le ‘auauna faamaoni,’ ua faapena ona faamalosiau atu ai ovasia femalagaai i faapotopotoga ua faaeaina i latou e asiasia.

19. O ā fesili o loo totoe mo le talanoaina?

 ¹⁹ Ina ua faavaeina e le faalapotopotoga a Ieova le galuega a toeaina femalagaai i Tagata Aʻoga o le Tusi Paia i le tusa ma le selau tausaga ua mavae, ua faapea mai lenei mekasini: “O le a tatou tulimataʻia ni iuga ma le taitaiga atili a le Alii.” Ua manino mai lava le taitaiga a Ieova. Ona o lana faamanuia ma le vaavaaiga a le Vaega Pule, ua faalautele atu ai ma faaleleia lenei galuega a o faagasolo tausaga. O le iuga, ua faamalosia ai i le faatuatua faapotopotoga o Molimau a Ieova i le lalolagi atoa, ma ua faatoateleina i lea aso ma lea aso. E manino la, o loo faamanuiaina e Ieova le agaga faataulagaina o nei meaalofa i tagata. Ae mafai faapefea e ovasia femalagaai ona tauaveina pea ma le manuia la latou galuega? O ā o latou sini? E mafai faapefea ona latou avatuina le mea e sili ona lelei?

O le a Faapefea Ona E Tali?

□ O ā nisi o tiutefai o ovasia matagaluega ma ovasia itumalo?

□ Aisea e manaomia ai e ovasia femalagaai se agaga faataulagaina totino?

□ E mafai faapefea ona faaalia le talisapaia mo le galuega a toeaina femalagaai ma a latou avā?

□ O le ā e mafai e ovasia femalagaai ona fai ina ia faamalosia ai le faatuatua i faapotopotoga?

[Fesili mo le Suʻesuʻega]

[Ata i le itulau 10]

O le femalagai solo e manaomia ai se agaga o le faataulagaina totino

[Ata i le itulau 13]

Pe ua e faaalia ea le agaga talimalo i ovasia femalagaai ma a latou avā?