Pe ua Lē Toe Aogā ea le Anapogi?

SA FAAPEA mai Mrudulaben o se fafine Initia maumea e 78 ona tausaga: “Sa ou anapogi i Aso Gafua uma talu mai lava loʻu talavou.” O se vaega lenei o lana tapuaiga, o se auala e faamautinoa ai le sologa lelei o lana faaipoipoga ma se fanau ola maloloina lelei, faapea foi ma le puipuiga mo lana tane. O lenei la ua maliu lana tane, o loo faaauau pea ona ia anapogi i Aso Gafua mo le ola maloloina lelei, ma le manuia o lana fanau. I le pei o ia, o le toatele o fafine Hinitu, ua avea anapogi faifai pea ma vaega o o latou olaga.

O Prakash o se faipisinisi e faamatuātagata e nofo i se vaega o le taulaga o Mumbai (Bombay), i Initia, ua faapea mai o ia, e anapogi i tausaga uma i Aso Gafua o Sawan (Shravan). O se masina lenei e faapitoa lona tāua i uiga faaletapuaiga i le kalena faa-Hinitu. Ua faamatalaina e Prakash e faapea: “Sa amata ona ou anapogi mo mafuaaga faaletapuaiga, ae o le taimi nei ua ou mauaina se uunaiga faaopoopo e faaauau ai ona e mo le soifua maloloina. Talu ai o Sawan e latalata atu i le suiga o savili ma e masani ona ō mai ai ma timuga, ua mauaina ai e loʻu tino se avanoa e faamamāina ai o ia lava mai faamaʻi patino o le tau timuga.”

Ua manatu nisi o le anapogi ua fesoasoani i se tagata i le tino, i le mafaufau, ma le faaleagaga. Mo se faataitaiga, ua faapea mai le Grolier International Encyclopedia: “O suesuega faasaienisi lata mai nei ua fautuaina ai e faapea o le anapogi e mafai ona lelei mo le soifua maloloina ma afai e faia ma le faaeteete, o le a mafai ona māfua ai le tulaga maoaʻe o le ala o le mafaufau, ma lagona.” Ua taʻua faapea o lena faifilosofia Eleni o Plato e anapogi mo aso e sefulu po o le sili atu foi, ma e faapea o le fai matematika o Pythagoras sa ia faamalosia le anapogi o ana tamaiti aʻoga a o lei aʻoaʻoina i latou.

I nisi, o le anapogi o lona uiga o le taumamao atoatoa lea mai i meaʻai ma vai mo se vaitaimi faatulagaina, ae o isi e latou te inuina na o mea faasuāvaia a o anapogi. O le lē tausamia o ni ʻaiga patino po o le aloese mai i se ituaiga o meaʻai faapitoa ua manatu i ai le toatele, o le anapogi. Ae peitai o le anapogi e lē lelei ona pulea mo se vaitaimi faaumiumi e mafai ona oo atu ai i se tulaga e sili ona matautia. Ua faapea mai se tusitala o Parul Sheth, pe a uma ona utufia mai i le tino lana sapalai o le masoā, ona ia faaliliuina loa lea o polotini o loo i musele e avea ma suka, a uma lea ona faasolo atu lea i gaʻo o le tino. O le suia o le gaʻo i le suka e tatalaina mai ai mea oona e taʻua o ketone. A o faateleina nei mea, e latou te agaʻi atu i le faiʻai ma faaleagaina ai le faiga o loo pulea ai neula o le tino. Ua faapea mai Sheth: “Pe a tupu lenei mea, ona oo atu ai lea o le anapogi i lona tulaga matautia. E mafai ona e lē mautonu, fenuminumiai, ma e sili atu ona leaga. . . . [E mafai ona māfua] ai le matapogia ma oo atu ai i le oti.”

O se Auupega ma o se Sauniga Faalelotu

O le anapogi ua faaaogaina o se auala malosi mo le faataunuuina o ni sini faapolotiki, ma mataupufai. O se tagata sa taʻutaʻua i le faaaogaina o lenei auupega o Mohandas K. Gandhi o Initia. Sa viiviia o ia e le faitau selau miliona o tagata, sa ia faaaogaina le anapogi e pulea malosi ai tagata lautele o Hinitu i Initia. O le faamatalaina o le iuga o lana anapogi ina ia foia ai se feteenaiga i le va o tagata faigaluega i fale  gaosimea, ma i latou o pulea, sa taʻua e Gandhi e faapea: “O le iuga sa faapea ona faia aʻe ai se tulaga lelei ma tagata uma lava sa aafia ai. Sa pāʻia ai loto o i latou e ana falegaosimea ina ia faafilemuina le feteenaiga . . . Sa faamutaina feteenaiga ina ua uma ona ou anapogi mo aso e tolu.” Sa musu le peresitene o Aferika i Saute o Nelson Mandela e ʻai i aso e lima, i tausaga a o avea o ia ma se pagota ona o ni mafuaaga faapolotiki.

Ae, o le toatele o i latou ua fai ma a latou masani le anapogi, ua latou faia mo ni mafuaaga faaletapuaiga. O le anapogi o se sauniga faalelotu lauiloa i le faa-Hinitu. I aso faapitoa, ua taʻua ai e le tusi Fast and Festivals of India, e faapea: “E faamanatuina atoatoa le anapogi . . . e oo lava i le vai e lē inuina lava. O tamaloloa ma fafine e latou te faamamaluina le anapogi . . . e faamautinoa ai le fiafia, le lelei o le tamaoaiga ma le faamagaloina o solitulafono ma agasala.”

Ua taatele ona faaaogaina le anapogi i le lotu Jain. Sa lipotia mai e le Sunday Times of India Review e faapea: “O le tagata muni [atamai] a le lotu Jain i Bombay [Mumbai] sa inuina e ia na o le lua ipuvai puna i le aso e leai se meaʻai e ʻaia—mo aso e 201. Sa paʻū ai kilokalama e 33 [73 pauna].” O nisi ua oo atu la latou anapogi i le tulaga o le faaogea e oo atu ai lava i le oti, ua latou talitonu faapea o le a maua ai e lenei mea le faaolataga.

O le lautele o tagata matutua o loo auai i le Isalama, e tatau ona anapogi i le masina o Ramadan. E leai se meaʻai po o se vai e ono mafai ona tagofia, mai i le taimi e oso aʻe ai le la seia oo atu i le goto o le la mo le masina atoa. So o se tasi e maʻi pe alu malaga i lea taimi e tatau ona ia faaatoaina ia aso o le anapogi e tusa ai ma aso na lē faia ai. O le Litania, o se vaitaimi e 40 aso a o lei oo i le Eseta, o le taimi lea o le anapogi mo nisi o loo i Kerisinetoma, ma o le tele o vasega faalelotu e faamamaluina ai le anapogi i isi aso faapitoa.

O le anapogi e mautinoa e lē o mou uma atu. Ma talu ai o loo avea o se vaega o le tele o tapuaiga, atonu tatou te fesili ifo, Pe o manaomia mai e le Atua le anapogi? Po o iai ea ni taimi atonu e filifili ai ni Kerisiano e anapogi? Pe e mafai ona aogā? O le mataupu o loo sosoo ai o le a talanoaina ai nei fesili.

[Ata i le itulau 3]

Ua manatu le lotu Jain i le anapogi o se auala e maua ai le faaolataga o le tagata

[Ata i le itulau 4]

Sa faaaogā e Mohandas K. Gandhi le anapogi o se auupega malosi mo le faataunuuina o sini faapolotiki po o mataupufai

[Ata i le itulau 4]

I le Isalama, o le anapogi o se mea e tatau ona faia i le masina o Ramadan

[Ē Ana le Ata]

Garo Nalbandian