Avatuina o Fesoasoani Laveai i Taimi o Puapuaga

O TAUMAFAIGA a tagata mo le tuuina atu o fesoasoani laveai i taimi o mala e matuā viia lava. O le tele o polokalame laveai ua fesoasoani i le toe fausiaina o fale, toe faatasia o aiga ma e sili atu i lena o le faasaoina ai o ola.

Afai e taia i se mala, e faaaogaina e Molimau a Ieova—ma lo latou loto faafetai—so o se sauniuniga e faia e ala i polokalame fesoasoani laveai a le atunuu. Ae i le taimi lava e tasi, ua ia i latou se matafaioi faale-Tusi Paia o le “galulue mo le lelei . . . ae maise lava ia i latou i le aiga o le faatuatua.” (Kalatia 6:10, NW) Ioe, e lagonaina e Molimau e pei i latou o se aiga; o la latou vaaiga i isi e pei lava o se “auaiga” e tasi. O le pogai lea ua taʻua ai e le tasi le isi o le “uso” ma le “tuafafine.”—Faatusatusa i le Mareko 3:31-35; Filemoni 1, 2.

O lea la afai ua aafia se vaipanoa i se mala, e faia e toeaina o Molimau a Ieova taumafaiga filigā e faamautinoa ai le mea o iai le auuso ma mea e manaomia e tagata taitoatasi o le faapotopotoga ma faia ai ni fuafuaga mo se fesoasoani manaomia. Manatunatu i le moni o lenei  mea i Accra, Ghana; San Angelo, i le Iunaite Setete o Amerika; ma Kobe i Iapani.

Accra—“Se Lolo e Tai Pei o Aso o Noa”

Sa amata totō ifo timuga pe tusa o le 11 i le po, ma sa mamafa lava i le tele o itula. “Sa oo ina matuā mamafa lava ma ua lē mafai ai e loʻu aiga ona momoe,” o le tala lea a John Twumasi, o se tasi o Molimau a Ieova i Accra. Ua taʻua e le Daily Graphic e faapea o “se lolo e tai pei o aso o Noa.” Ua toe faaauau mai John e faapea: “Sa matou taumafai e ave a matou mea aogā i le falealuga o lo matou tuaoi, ae e tatala atu le faitotoa o le sitepu agaʻi i luga, ua pa mai i totonu le vai.”

Sa lapataia e le malo le ō ese mai, peitai e toatele i latou sa faatalatū, ona o le fefefe faapea o le a tuufua ai fale—e tusa lava pe lolovaia—ae atonu e ō ane ai ni tagata gaoi. O nisi sa lē mafai lava ona ō ese e ui lava sa mananao i ai. “Sa lē mafai e i maʻua ma loʻu tinā ona tatala le faitotoa,” o le tala lea a se teine e igoa ia Paulina. “Sa faasolo atu ina loloto le vai, o lea sa ma tutū ai i luga o paelo laupapa ma piipii atu i se lagolago pito i luga o le fale. Mulimuli ane, ina ua ta le lima i le taeaopo lava, sa laveaiina ai i maʻua e o ma tuaoi.”

O le taimi lava na mafai ai, sa galulue loa Molimau a Ieova. Ua taʻua e se tuafafine Kerisiano e igoa ia Beatrice e faapea: “Sa sailia e toeaina o le faapotopotoga i matou, ma maua ai i le fale o se isi uso Molimau, lea na matou sulufai i ai. E na o le tolu aso ina ua mavae le lolo, ae ō mai loa toeaina ma talavou o le faapotopotoga i la matou itu ma faamamā ese le palapala sa i totonu ma fafo o lo matou fale. Sa auina mai e le Sosaiete o le Olo Matamata ia vailaau faamamā, o vailaau tapē siama, o vali, o faamalū, o palanikete, o ie, ma lavalava mo tamaiti. Na aumai e le auuso meaʻai mo i matou mo nai aso. Sa matuā ootia ai lava aʻu!”

O John Twumasi lea na muai taʻua, ua ia lipotia mai e faapea: “Sa ou taʻu atu i tagata o loo matou mautotogi faatasi e faapea sa auina mai e la matou Sosaiete vailaau faamamā ma vailaau tapē siama—e lava mo le faamamāina ai o le fale atoa. E tusa ma le 40 o tagata mautotogi sa fesoasoani i le faamamāina. Sa ou tuuina atu nisi o vailaau faamamā i oʻu tuaoi, e aofia ai se tasi tamaloa o se patele o se lotu o lea nuu. Sa faaseseina aʻu aumea faigaluega i le manatu e faapea o Molimau a Ieova e alolofa na o o latou lava tagata.”

Sa talisapaia e uso ma tuafāfine Kerisiano le fesoasoani alofa na tuuina atu ia i latou. Ua faapea mai upu faaiu a le uso o Twumasi: “E ui lava ina taugata ma tāua mea na leiloloa i le lolo nai lo fesoasoani laveai na aumai, ae ua matou lagonaina ma loʻu aiga le mauaina o mea e sili atu nai lo a matou mea na leiloloa ona o le sauniuniga alofa mai le Sosaiete.”

I San Angelo—“Sa Paʻō e Faapei ua Iu le Lalolagi”

O asiosio matautia na taia ai San Angelo ia Me 28, 1995, na liaiina ai laau, gaui ai pou molī, ma toulu ifo ai laina eletise o loo ola ma felavasai i luga o ala tetele. Sa to faataʻutaʻu le matagi i le 100 maila [160 kilomita] i le itula, ma faaleagaina ai le tele o mea aogā. E silia i le 20,000 aiga na iu ina nonofo pogisa. Ona sosoo ai lea ma le timu aisa. Na lipotia mai e le National Weather Service e faapea sa pei le lapopoa o le “timu aisa o le polo ta polo,” ona pei ai lea o le telē o le “polo pesipolo,” ma mulimuli  ane ua pei o le “lapoa o le moli meleke.” O le paʻō o le timu aisa sa matuā paʻō lava. Sa faapea mai se tasi tagata: “Sa paʻō e faapei ua iu le lalolagi.”

Na lagona le toʻa ina ua mavae le matagi. Na faasolosolo malie ona ō i fafo tagata mai o latou fale ua malepelepe e vaai mea ua faaleagaina. O laau o loo tutū a ua leai ni lau. O fale o loo tutū ae ua masofasofa. I nisi vaipanoa ua ufitia ai le laueleele i le aisa e tusa ma le tolu futu [1 mita] le mafiafia. E faitau afe faamalama o fale ma taavale na nuti i le matagi, o lea la o na nutigatioata feilafi sa fefiloi ma le aisa ma sa fola solo ma lilo ai le eleele. Ua faapea mai se tasi fafine, “ina ua ou taunuu i le fale, sa na o loʻu saofai i laʻu taavale ma tagi. Sa matuā leaga lava le faatamaʻiaga, ua matuā pagatia ai lava aʻu.”

Sa vave lava ona saunia e polokalame laveai ma falemaʻi ia fesoasoani tautupe, saunia mea tau faugafale, o togafitiga faafomaʻi, ma fautuaga. O le mea e lelei ai, o le toatele o tagata lautele o ē na afatia i le matagi sa latou faia le mea e latou te mafaia e fesoasoani ai i isi.

Sa gaoioi foi faapotopotoga o Molimau a Ieova. Ua faapea mai le lipoti a Aubrey Conner, o se toeaina i San Angelo: “Ina ua faatoʻā uma lava le afā, sa matou fetelefoniai loa e siaki isi. Sa matou fesoasoaniai ma fesoasoani atu foi i o matou tuaoi e lē o ni Molimau ina ia tutuʻi ni mea e ufi ai faamalama, āto le fale i pepa iila ma fai taumafaiga uma e tapunipuni ai fale mai le tau. Ona faia lea o se faamaumauga o tagata uma o le faapotopotoga ia sa aafia o latou fale. E tusa ma le selau fale sa manaomia ona toe faaleleia, ma o meafaufale sa maua mai i vaega na aumaia fesoasoani laveai sa lē lava. O lea na matou faatauina mai ai mea faaopoopo ma sauniuni loa mo le galuega. E toaafe le aofaiga o Molimau sa tauofo e fesoasoani, ma e taʻi 250 tagata e galulue i faaiuga o vaiaso taitasi. E silia i le 460 maila [740 kilomita] le mamao e malaga mai ai nisi. Sa galulue uma tagata ma le lē faavaivai, e ui lava ina 100 tikeri [toeitiiti lava 40 tikeri Celsius] le vevela o le tau. E oo lava i se tuafafine e 70 tausaga le matua sa matou galulue faatasi i faaiuga uma lava o vaiaso seʻi vaganā ai le vaiaso e tasi na lē sau ai, ona o le taimi lena sa toe faaleleia ai lona fale. Ma i le faaiuga o lena lava vaiaso, sa aʻe ai o ia i luga o lona lava fale e fesoasoani i le toe faaleleia!

“E masani ona matou faalogo i faaupuga mai ē matamata mai e pei o le, ‘Pe e lē o se mea lelei foi i isi lotu le faia faapea mo o latou lava tagata lotu?’ Sa maofa nisi o matou tuaoi ina ua vaaia se vaega e toʻa 10 i le toʻa 12 tagata galulue tauofo (e aofia ai tuafāfine) ua taunuu atu i le taeaopo lava o le Aso Faraile i le fale o se uso a Molimau, e sauni le toe atoina atoa o le fale e aunoa ma se totogi. O le tele o galuega e maeʻa i le faaiuga o le vaiaso e tasi. I nisi taimi a o faagasolo se galuega ua leva ona amata a se kamuta faapitoa tau faugafale i le atoina o se fale ae taunuu loa foi la matou vaega fesoasoani i le aiga e sosoo ane ai. Sa matou aveesea apa ma toe tutuʻi apa ma faamamā le lotoā a o lei uma le galuega a le kamuta ma lana aufaigaluega. O nisi taimi e tuu ai a latou galuega ona o le fia matamata mai ia i matou!”

O upu faaiu nei a le uso o Conner: “O le a misia uma e i matou le faifaimea faatasi. Sa masani le isi i le tasi i se tulaga e lē masani ai e ala i le maua ma le faaalia o le alofa faaleuso e lei iai muamua. Sa matou lagonaina o se faataitaiga lea o le a iai le lalolagi fou a le Atua, e faatasi ai uso ma tuafāfine e fesoasoaniai auā e latou te loto moni atu i ai.”—2 Peteru 3:13.

 Kobe—“Se Faatamaʻiaga o Laau, Ogasima, ma Tagata”

Sa tatau ona lava saunia tagata o Kobe. O le mea sa fai, i aso muamua uma lava o Setema, e latou te faamanatuina le Aso o Puipuiga mai Mala. E faataitai ai e tamaiti gaoioiga e fai pe a tupu se mafuie, e faataitai ai e le vaegaʻau le faia o galuega laveai i le helikopa, ma faaaogā ai e matagaluega tineimu a latou masini e faataitai ai se mafuie, ma faataitai ai e tagata galulue tauofo o latou tomai e faasaoina mai ai a o i totonu o se tamai potu e pei se pusa a o luluina e faapei lava o se mafuie moni. Ae ina ua lūlū moni lava le mafuie ia Ianuari 17, 1995, o sauniuniga uma lava sa foliga mai e lei aogā. E faitau sefulu afe taualuga o fale na paʻūū—o se mea sa lei tupu i taimi o faataitaiga. Na mafulifuli nofoaafi, sa motusia nisi o auala laupapa; sa pāpā ogapaipa sa iai kasa ma vaipaipa; sa paʻūū fale faapei o ni mea e faia i se pepa malō. Sa faamatalaina e le mekasini o le Time e faapea sa faapei “o se faatamaʻiaga o laau, ogasima ma tagata.”

Ona sosoo ai lea ma le mu. Sa talalī aʻe fale a o taumafai atu ma le lē mautonu le ʻau tineimu ina ua poloka i le faitau afe o taavale i le auala. Ina ua taunuu nisi i le mu na latou iloa ai ua leai se vai o totoe i ogapaipa ona ua faatamaʻia le suavai i le aai. Sa faapea mai se tasi o tagata fuimu: “O le aso muamua o se popolega sili lava. Ou te lei lagonaina muamua lava i loʻu olaga le leai o se malosi, i le iloaina o le toatele o tagata ua tanumia i fale na mu. Ma le iloaina e faapea e leai se mea e mafai ona ou faia.”

E tusa ma le 5,000 tagata sa maliliu, ma e toeitiiti lava atoa le 50,000 o fale na nutipalaina. I Kobe sa mauaina ai na o le tasi vae tolu o meaʻai sa manaomia. Ina ia maua ni vai, sa salusalu ai e nisi vai palapalā e lepa i lalo o ogapaipa sa pāpā. O le toatele o tagata sa leai ni fale sa sosola atu i fale faapitoa mo puipuiga, o nisi o nei fale sa faasoasoa ai ma le fuafua meaʻai, o tagata taitoatasi sa tufatufa atu i ai sina potoi araisa mo le aso. E lei umi ae faaalia le lē faamalieina o tagata lautele. Sa faitio mai se tasi tamaloa e faapea: “E leai ma se mea o faia e le malo. Afai e faaauau pea ona tatou faalagolago atu ia i latou e tatou te feoti ai i le mole manava.”

Sa vave lava ona sauniuni faapotopotoga lalata ane o Molimau a Ieova i Kobe. O se pailate o se helikopa o lē na vaai i la latou galuega na ia faapea mai: “Sa ou alu i le nuu ua faaleagaina i le aso na tupu ai le mala ma faaaluina ai se vaiaso iina. Ina ua ou taunuu atu i se tasi o fale sulufai, sa matuā faaleagaina mea uma. E leai ma se galuega laveai e tasi na faia. Ae na o Molimau a Ieova lava na vave ona latou oo atu i lea nofoaga, ma faia faasolosolo ai galuega o loo manaomia.”

O le mea moni, e tele naua galuega e fai. E sefulu Maota o le Malo sa lē mafai ona toe faaaogaina, ma le sili atu i le 430 Molimau na leai ni fale e nonofo ai. E sili atu i le 1,206 fale sa latou nonofo ai na manaomia ona toe faaleleia. E lē gata i lena o aiga o Molimau e toʻa sefululima ia na maliliu i lea mala sa latou matuā manaomia lava se faamafanafanaga.

E toaafe nisi Molimau mai isi itu o le atunuu sa tauofo o latou taimi e fesoasoani ai i le galuega o le toe faaleleia. Ua mātauina e se tasi uso e faapea: “A o matou galulue i fale o isi tagata suesue o le Tusi Paia o ē e lei papatisoina, e masani lava ona fesili mai, ‘E fia le totogi mo le toe faaleleia mo lenei galuega?’ Ina ua matou taʻu atu i ai o le galuega o loo lagolagoina e faapotopotoga, sa latou faafetai ma faapea mai, ‘O le mea ua matou suesueina ua faatinoina moni lava!’”

O le toatele na faagaeetia i le vave ona tali atu ma le atoatoa o Molimau i le mala. Ua faapea mai le pailate na muai taʻua: “Sa matuā faagaeetia lava loʻu loto. E taʻua e le tasi le isi o se ‘uso’ po o se ‘tuafafine.’ O lea la ua ou vaai i le auala e fesoasoani ai le tasi i le isi; o outou moni lava o se aiga e tasi.”

Na aʻoaʻoina e Molimau lava latou se lesona aogā mai le mafuie. Na taʻutino mai e se tasi tuafafine e faapea: “E masani lava ona iai oʻu lagona e faapea o le telē o se faalapotopotoga e iai, o le faafaigata foi lena ona faaalia le naunau totino atu.” Ae peitai, o le tausiga alofa lea na ia mauaina sa suia ai lona manatu. “Ua ou iloa nei e faapea, o loo tausia i tatou e Ieova e lē gata o se faalapotopotoga, ae o ni tagata taitoatasi foi.” Peitai ane, o loo tulimataia pea le laveaiga tumau mai mala.

Toeitiiti Oo Mai le Mapusaga Tumau!

Ua vaavaai atu ma le naunautai Molimau a Ieova i le taimi o le a lē toe faapuupuuina ai e ni mala le olaga faaletagata ma mea e tausia ai le ola. I le lalolagi fou a le Atua, o le a aʻoaʻoina ai le tagata ia galulue faatasi ma le siosiomaga. Afai e tuuesea e tagata le fai mea faapito, o le a faaitiitia ai le afaina i lamatiaga faalenatura.

E lē gata i lea o Ieova le Atua—Lē na Foafoaina malosiaga faalenatura—ua ia finagalo ina ia lē toe faaleagaina lona aiga faaletagata ma le foafoaga faalelalolagi e malosi faalenatura. Ona avea moni ai lava lea o le lalolagi ma parataiso. (Isaia 65:17, 21, 23; Luka 23:43) O le a faataunuuina ai ma le faamamaluina le valoaga i le Faaaliga 21:4: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

[Ata i le itulau 5]

O Beatrice Jones (itu tauagavale) o loo ia faataitaia le auala sa taumafai ai o ia faatasi ma isi e uulima ina ia sopoia lologa

[Ata i le itulau 6]

Galuega laveai ina ua mavae asiosio