“Ia Manatua Aso ua Mavae”—Aisea?

“IA MANATUA aso ua mavae.” O lenei timaʻiga a le aposetolo o Paulo na tusia pe tusa ma le 61 T.A., na faatatau atu i Kerisiano Eperu sa i Iutaia. (Eperu 10:32, The New English Bible) O le ā na faapogaia ai le taʻuina atu o lenei faamatalaga? Aisea na manaomia ai e na tagata tapuai o Ieova i le uluai senituri ona lē faagaloina aso ua mavae? Pe e mafai ona aogā ia i tatou le gauai atu i se fagufagu mai faapea i aso nei?

I le faagasologa o senituri, ua lapatai mai pea tusitala o le Tusi Paia faasaga i le lē manatuaina po o le lē amanaiaina o aso ua mavae. O aso ua mavae ma mea na tutupu ai e tatau ona manatua ma talanoa i ai. E oo lava ia Ieova na ia fetalai mai e faapea: “Ia outou manatunatu i mea muamua talu mai le vavau; auā o aʻu o le Atua, e leai lava se tasi; o le Atua, e leai se ma te tutusa.” (Isaia 46:9) Seʻi o tatou iloiloina ni mafuaaga maumaututu se tolu mo le usitaia o lenei timaʻiga.

O Uunaiga ma Faalaeiauga

Muamua, e mafai ona avea o se mafuaaga sili o uunaiga ma faalaeiauga. Ina ua tusi atu e Paulo lana tusi i le faapotopotoga i Eperu, sa ia tusi atu i uso Kerisiano o ē na tofotofoina lo latou faatuatua i lea aso ma lea aso ona o teteega mai i tagata Iutaia. I le iloa lelei o le manaomia ona ati ae lo latou tutumau, na faapea atu ai Paulo: “Ia outou manatu i aso anamua, ina o faamalamalamaina outou, na outou onosai ai i le taua tele o tiga.” (Eperu 10:32) O lo latou manatuaina o amioga faamaoni ua mavae i le taua faaleagaga o le a aogā e avatu ai ia i latou le lototele o loo manaomia ina ia faaiuina ai le tausinioga. E faapena foi le mea na tusi faatatau i ai le perofeta o Isaia: “Ia manatua lenei mea, ina ia outou maua ai le lototele.” (Isaia 46:8, NW) E faapena foi ni āuga lelei sa i le finagalo o Iesu Keriso ina ua ia fetalai atu i le faapotopotoga i Efeso e faapea: “O lenei, ia e manatua le mea na e paū mai ai [lou uluai alofa], ma ia e salamo, ma e faia au uluai galuega.”—Faaaliga 2:4, 5.

O le faalaeiauga ina “ia e manatua aso o le vavau; mafaufau ia i tausaga o lea tupulaga ma lea tupulaga,” sa avea o se mataupu e taʻua soo i lauga na tuuina atu e Mose ia Isaraelu, a o ia augani atu i le nuu ina ia faaalia le alofa faamaoni ia Ieova. (Teuteronome 32:7) Seʻi mātau ana upu ua tusia i le Teuteronome 7:18: “Aua lava e te mataʻu ia te i latou [o sa Kananā]; ia e matuā manatua mea na faia e Ieova lou Atua ia Farao ma Aikupito uma lava.” O le toe manatua o gaoioiga laveai a Ieova mo ona tagata sa tatau ona avea o se uunaiga mo lo latou faaauau ona usiusitai atu ma le faamaoni i tulafono a le Atua.—Teuteronome 5:15; 15:15.

E faanoanoa lava, ona sa masani ona lolo atu tagata Isaraelu i le agasala o le loto galo. O le ā le iuga na oo i ai? “Na latou toe tofotofo lava i le Atua; ma latou faaonoono i le Paia o Isaraelu. Latou te lei manatua lona aao, o le aso na ia faaolaina ai i latou ai le puapuaga.” (Salamo 78:41, 42) Mulimuli ane ai lava, o le galo ia i latou o poloaiga a Ieova na iu ina teena ai i latou e Ieova.—Mataio 21:42, 43.

Na faataatia e le faisalamo se faaaoaoga lelei o lē na tusi mai e faapea: “Ou te manatua galuega a Ioa; e moni, ou te matuā manatua ou vavega anamua. Ou te manatunatu foi i au galuega uma, ou te mafaufau i mea na e faia.” (Salamo 77:11, 12) O manatunatuga  loloto faapena i le mafaufau i auaunaga faamaoni ua mavae ma gaoioiga alofa a Ieova o le a saunia ai mo i tatou le uunaiga o loo manaomia, o faalaeiauga, ma le talisapaia. E lē gata i lea, o le “manatua o aso ua mavae” e mafai ona aogā e aveesea ai le faavaivai ma e mafai ona faaosofia ai i tatou ina ia faia mea uma e gata mai ai lo tatou malosi ma tausisia le tumau i le faamaoni.

Aʻoaʻoina Mai i Mea Sese ua Tuanai

Lona lua, o le lē faagaloina e mafai ona avea o se auala e aʻoaʻoina ai mai mea sese ua tuanai ma āuga na oo i ai. A o manatua e Mose lenei mea, na ia fautua atu ai i tagata Isaraelu e faapea: “Ia e manatua, aua neʻi galo ia te oe o mea na e faatupuina ai le toasa o Ieova lou Atua i le vao; e afua mai i le aso na e tuua ai le nuu o Aikupito, e oo lava i lo outou o mai i le mea nei, ua outou fou vale lava ia Ieova.” (Teuteronome 9:7) O iuga o le lē usiusitai o tagata Isaraelu, e pei ona sa faailoa atu e Mose e faapea ‘na faasavavali i latou e Ieova lo latou Atua i le vao i tausaga e fasefulu.’ Aisea na faalaeiau atu ai ia i latou ina ia latou manatua lenei mea? Ina ia maua ai e i latou le loto maulalo ma fai o se faasaʻoga i o latou ala fouvale ina ia mafai ai ona latou “tausiusi i poloaiga a Ieova [lo latou] Atua, ina ia [latou savavali] i ona ala, ma ia mataʻu ia te ia.” (Teuteronome 8:2-6) Sa tatau ona aʻoaʻoina i latou i se uiga latou te lē toe foi ai e faia a latou mea sese ua tuanai.

Na mātauina e se tasi tusitala e faapea: “O se tagata e faautauta e maua e ia aogā mai mea na tutupu ia te ia, ae o se tagata e poto, e maua e ia aogā mai mea na oo i isi.” A o valaaulia e Mose tagata Isaraelu ina ia maua aogā e ala i le toe manatunatu i a latou mea sese ua mavae na timai atu le aposetolo o Paulo i isi—o le faapotopotoga Kerisiano o le uluai senituri, ma i se faalautelega, e aofia ai i tatou—ina ia matuā maua mai se lesona aogā mai lena faamaumauga o talafaasolopito. Na ia tusi mai e faapea: “Na oo na mea uma ia te i latou [tagata Isaraelu] e fai ma faailoga; ua tusia foi e fai ma apoapoaiga mo i tatou o e ua aulia mai ai tausaga e gata ai.” (1 Korinito 10:11) Sa manatua foi i le finagalo o Iesu Keriso se tasi o mea ua leva ona tupu i taimi a o tusia le Tusi Paia ma le tulaga manaomia o le aʻoaʻoina mai ai i lena mea ina ua ia fetalai e faapea: “Ia outou manatua le avā a Lota.” (Luka 17:32; Kenese 19:1-26) Na tusia e le faifilosofia ma le fatusolo o Samuel Taylor Coleridge mai Egelani e faapea: “Pe afai e mafai ona aʻoaʻoina e le tagata ni mea aogā mai le talafaasolopito, maeu ni lesona atonu e aʻoaʻoina ai i tatou!”

Agamalu ma le Loto Faafetai

Lona tolu, o le manatuaina e mafai ona faatupuina ai ia i tatou uiga logoleleia o le Atua o le agamalu ma le loto faafetai. A o tatou olioli i le tele o vala o lo tatou parataiso faaleagaga i le lalolagi aoao, ia aua lava neʻi galo ia i tatou o loo faalagolago atu i isi uiga faapitoa e pei o ni poloka o fauina aʻe ai. O nei uiga e aofia ai le faamaoni, alofa, faataulagaina totino, lē fefe pe a fesagai ma fili, onosai, faapalepale ma le faatuatua—o uiga ua faaalia e o tatou uso ma tuafāfine Kerisiano o ē na latou amataina le galuega i nisi o atunuu i le faitau sefulu o tausaga ua tuanai atu. I le faaiuina o lea lipoti i le talafaasolopito o ona po nei o tagata o le Atua i Mekisikō, ua faapea mai le 1995 Yearbook of Jehovah’s Witnesses: “Mo i latou na faatoʻā auaufaatasi ma Molimau a Ieova, atonu e ono faateʻia i tofotofoga na feagai ai ma ē na faia se vaega i le tatalaina o le galuega i Mekisikō. Ua masani i latou nei o ē e fou mai i se parataiso faaleagaga o iai iina i le mea o loo iai le anoanoai o meaʻai faaleagaga, i le nofoaga o loo iai le faitau selau afe o aumea o ē matataʻu i le Atua i se auala ua sili atu ona lelei le faamaopoopoina.”

O na uluai paeonia sa masani ona galulue taitoatasi po o le galulue i ni vaega laiti tumamao ese. Na oo ia i latou le lagona tuuatoatasi, faaogea mai le mauaina o mea e tatau ai, ma isi tofotofoga matuiā o le faamaoni a o latou naunautai e folafola atu le feau o le Malo. E ui o le toatele o nei auauna o taimi ua tuanai ua mavae atu ma le lalolagi ona ua maliliu, ae maeu le faamafanafanaloto o le iloaina e faapea  e manatua pea e Ieova a latou auaunaga faamaoni! Na faamautinoa mai e le aposetolo o Paulo lenei mea, ina ua ia tusi e faapea: “Auā e le amioletonu le Atua, na te le faagalogaloina la outou galuega ma le alofa ua outou faaali mai i lona suafa.” (Eperu 6:10) Pe afai e manatua ma le talisapaia e Ieova, pe ua lē tatau foi la ona tatou faia faapea i se agaga o le loto faafetai?

O i latou e faatoʻā fou mai i le upu moni e mafai foi ona latou iloa lenei talafaasolopito e ala i le lomiga Jehovah’s Witnesses—Proclaimers of God’s Kingdom. * E lē gata i lea, pe afai ua faaeaina i tatou i le iai i se aiga po o le auai i se faapotopotoga Kerisiano o loo iai ni uso po o ni tuafāfine ua loa o auauna, ua uunaia ai la i tatou i le agaga o loo i le Teuteronome 32:7 ina “ia e manatua aso o le vavau; mafaufau ia i tausaga o lea tupulaga ma lea tupulaga; fesili atu i lou tamā, na te taʻu mai ai ia te oe; o outou toeaina foi, latou te fai mai ai ia te oe.”

Ioe, o le manatuaina o galuega ua tuanai o le tuutoina atu i le Atua e mafai ona faatupu ai ia i tatou se naunautaiga ina ia tumau ma le olioli i la tatou auaunaga faa-Kerisiano. O loo iai foi i le talafaasolopito ia lesona e manaomia ona tatou aʻoaʻoina. Ma o le mafaufau loloto i le parataiso faaleagaga ua faamanuiaina e le Atua, e fuaina mai ai uiga o le agamalu ma le loto faafetai. E moni lava, ia matuā “ia manatua aso ua mavae.”

[Faaopoopoga i lalo]