Le Vasega Lona 101 o Kiliata Maelega i Galuega Lelei

O LĒ na Foafoaina i tatou, o Ieova le Atua, e maelega i galuega lelei, ma e faapena foi i lona Alo o Iesu Keriso. I le avea o ia ma o tatou faataitai, sa faaalia e Iesu le maelega e ala i le tauaveina o lona tofiga mai le Atua, lea e aofia ai le foaiina mai “o ia e ia mo i tatou . . . ma ia faamamāina mai e ia e fai mona, o lona lava nuu, e maelega i galuega lelei.” (Tito 2:14) O le toʻa 48 o i latou o le vasega lona 101 o le Aʻoga Faale-Tusi Paia a le Olomatamata o Kiliata ua mautinoa lo latou faataitaia o lo latou maelega i galuega lelei. O le polokalame o le faauuga mo nei misionare sa faia ia Setema 7, 1996, i le Watchtower Educational Center i Patterson, Niu Ioka.

O Fautuaga Aogā e Tumau ai i le Maelega

Sa taʻitaʻifono Carey Barber i le polokalame o le faauuga, o ia o se tasi o le Vaega Pule, ma ua silia i le 70 tausaga i le auaunaga faataimi atoa. I ana upu amata, sa tataʻi atu ai e le uso o Barber manatu i le talaʻiga ma galuega tau aʻoaʻoga a Iesu, o ia o le “malamalama o le lalolagi.” (Ioane 8:12) Sa ia faasino atu e faapea sa lei taofia e Iesu lena tofiga faamamaluina ia te ia lava, ae na ia faalaeiau atu i ona soo ia faasusuluina foi lo latou malamalama. (Mataio 5:14-16) O lenei faaeaga o le auaunaga ua atili uigā ai le olaga o se Kerisiano ma ua tuuina atu ai se avega tauave mamafa i luga o i latou o loo “savavali ia pei o e ua malamalama.”—Efeso 5:8.

I le sosoo atu ai ma na faamatalaga amata, sa faafeiloaia atu loa ia Don Adams o le Executive Offices i le nofoaga autū i Brooklyn. Sa ia talanoaina le mataupu “Agaʻi i Luma, ae Lē o Tua.” Sa tataʻi atu e le uso o Adams manatu i le Aʻoga lava ia o Kiliata ma lona fuafuaga—ia faalauteleina le talaʻiina o le tala lelei i atunuu ese. Sa ia talanoaina le alualu i luma o le faalapotopotoga a le Atua, lea ua lomiaina lomiga faale-Tusi Paia i le lalolagi aoao i le silia i le 300 gagana. O le tusi Le Poto e Taʻitaʻia ai i le Ola e Faavavau, sa lomia i le 1995, ua mafai ona mauaina nei i gagana e 111 ma ua fuafuaina e lomia atili i isi gagana. Ua iloga lona aogā i le fesoasoani i soo fou o Iesu ia oo atu i le tuuina atu ma le papatisoga i totonu o ni nai masina. O lea o le a mauaina e misionare fou fesoasoani aupito fou faale-Tusi Paia mo le faia o la latou galuega.

Na sosoo ai ma le lauga a Lyman Swingle o se tasi o le Vaega Pule, i le mataupu “Ia Faaauau Ona Tuuina Atu ia Ieova Lau Auaunaga Paia,” sa faavae mai i le Faaaliga 7:15. Talu ai o Ieova o ia o le Atua fiafia, o le faaauau la ona auauna atu ia te ia, o lea o le a mafai ai ona maua e se tasi le fiafia. (1 Timoteo 1:11) O le iuga o lenei auaunaga fiafia, ua ō mai ai se motu o tagata e toatele mai i itu uma o le lalolagi e tapuai atu ia te ia. I le faagasologa o tausaga, o i latou sa toleniina i le Aʻoga o Kiliata, ua iai so latou sao i le fesoasoani atu i le toatele o i latou nei ia maua le poto saʻo o le upu moni. O lea la, ua ia i tatou mafuaaga uma e talitonu ai o le a faaauau pea ona faamanuia Ieova ia i latou ua auina atu nei e aoaoina mai isi vaega o le motu o tagata e toatele o loo faatuputupulaia pea.

“Ia Faaatagia Mai le Olioli o Ieova” o le matua lena na faamatilatila e Daniel Sydlik, o ia foi o se tasi o le Vaega Pule. Sa ia faamatalaina e faapea, o auauna uma a le Atua, e aofia ai ma misionare fou, ua iai se faaeaga o le aʻoaʻoina o tagata i le ala e ola ai e faavavau ma le auala e maua ai se olaga sili ona lelei i le taimi nei. Sa taʻua faapea e le uso o Sydlik, o le “aʻoaʻo atu o se galuega e tauia totino ai. E  atagia mai i foliga o tagata o loo faia le aʻoaʻo atu ma foliga o i latou o loo aʻoaʻoina.” (Salamo 16:8-11) Sa ia taʻua se faamatalaga a se misionare i Esitonia na faapea mai: “Ua ia i tatou se feau pito sili i lenei lalolagi atoa, ma o o tatou foliga e atagia atu ai.” O o tatou foliga faaalia atonu e mafai ona faalogo mai ai tagata ia i tatou ma faagaeeina ai le fiafia. O loo fia iloa e tagata po o le ā ua mafai ai ona fiafia auauna a Ieova. O le fautuaga a le uso o Sydlik: “O lea ia manatunatu i o outou foliga faaalia, e olioli tagata i le vaai atu i tagata foliga fiafia.”

O Ulysses Glass, o lē na faia sana vaega i le aʻoaʻoina o le ʻau aʻoʻoga o Kiliata talu mai le vasega lona 12 i le 1949, sa ia lauga atu i le aofia i le mataupu “Ma le Onosai, ia Leoleoina ai Outou.” O le ā le onosai? E na te faailoa maia le manatu o le faatali ma le filemu mo se mea, o le faailoaina mai o le onosai i lalo o tulaga e oso ai le ita po o le omia faalemafaufau. O le tagata e onosai e tumau ona fifilemu; o le tagata e lē onosai e vave ona gaoioi ma lē toʻa. Na mātauina e le uso o Glass e faapea: “O le toatele e manatu faapea o le onosai e faaalia ai se vaivaiga po o le lē mautonu, ae ia Ieova o le faailoga o le malosi ma fuafuaga.” (Faataoto 16:32) O ā taui e maua i le onosai? Ua faapea mai se alagaupu faa-Saina: “O le onosai i le taimi e ita ai e puipuia ai oe mai i le tele o aso e te faanoanoa ai.” Sa faamatala faapea e le uso o Glass: “O le onosai e faaleleia atili ai uiga o se tasi, o le iuga, e na te faamalosia ai isi uiga lelei e tumau ai. E na te faamatagofieina le faatuatua, le filemu tumau, ma e lē maluelue ai le alofa.”

“O se faaeaga le mauaina o se tofiga mai ia Ieova le Atua e ala i lana faalapotopotoga,” o le faamatalaga lea a Mark Noumair, o lē sa auauna o se misionare i Kenya mo le 11 tausaga ma o loo faiaʻoga nei i Kiliata. A o ia faalautele atu le matua “Seʻi Vaganā ua Iai Lou Faatuatua, Ona mafai Lea Ona E Tumau,” sa faasino atu e le uso o Noumair i le faataitaiga a le tupu o Aasa o Iuta. Sa faamautinoa atu e Isaia i le tupu le fesoasoani a Ieova i lona tofiga, ae sa lē taulau pea ona talitonuina o ia e Aasa. (Isaia 7:2-9) O lea sa faasino atu e le uso o Noumair e faapea o misionare—ioe, o i tatou uma lava—e manaomia ona iai le faatuatua ia Ieova ina ia umi ona tumau ai i o latou tofiga faatiokarate. O luʻi faapitoa o se tofiga faamisionare e matuā manaomia ai se faatuatua malosi. Sa taʻua e le uso o Noumair e faapea: “Ia teu pea i le mafaufau faapea e leai se tulaga e lelei atoatoa i lenei faiga o mea.”

O Mea ia na Tutupu e Faalaeiauina ai Galuega Maelega

A o faagasolo lo latou toleniga i Kiliata, o faaiuga o vaiaso taitasi e faaalu ai e tagata aʻoga se taimi i le faiva i le lautele, lea o le a avea foi o la latou matafaioi i o latou tofiga faamisionare. O Wallace Liverance o se tasi o faiaʻoga i Kiliata, sa ia faatalanoaina tagata aʻoga e toʻa 15, o ē sa faamatalaina mai mea na tutupu ia i latou. O Leon Weaver o le Service Department Committee ma Lon Schilling o le Bethel Operations Committee, sa la faatalanoaina sui o komiti o lālā mai Aferika ma Amerika Latina, o ē na faamatalaina mai mea na tutupu i le galuega a misionare ma sa iai ni a la fautuaga lelei mo misionare ua faauuina. I Sierra Leone, sa taʻuina mai ai e faapea, pe ā ma le 90 pasene o i latou na papatiso a o faagasolo le tausaga faaleauaunaga o le 1995 sa fesoasoani atu i ai misionare. Maeu se faamaumauga ina lelei o galuega maelega!

Mulimuli lava, o le lauga a le peresitene o le Sosaiete o Milton Henschel i le aofia e 2,734 i le mataupu “E Tutasi le Faalapotopotoga Vaaia a Ieova.” O le ā ua mafai ai ona avea le faalapotopotoga a le Atua o se mea e lē mafaatusalia?  E lē o lona telē po o lona malosi ae o le mea moni faapea o loo faatonutonuina e ala i tulafono faamaoni a le Atua ma filifiliga faafaamasinoga. I aso anamua o tagata o Ieova, le nuu o Isaraelu, sa tuuina atu i ai ana faatonuga paia, lea sa tutasi ai lea nuu. (Roma 3:1, 2) I aso nei, ua autasi le faalapotopotoga a Ieova a o faagaoioia i lalo o le taʻitaʻiga a Iesu Keriso. (Mataio 28:19, 20) Ua matuā tupu olaola. Pe o iai ea se isi faalapotopotoga i le lalolagi o ē e saili atu i le Afioga a le Atua le Tusi Paia, a o lei faia ni filifiliga tāua? O auala nei ma isi foi auala, ua tutasi moni ai lava le faalapotopotoga vaaia a Ieova.

Sa faaiuina le polokalame matagofie i le tuuina atu o tipiloma ma le faitauina o se tusi mai i le vasega e faailoa ai lo latou talisapaia o le toleniga faapitoa.

[Pusa i le itulau 22]

Faamaumauga o le Vasega

Aofai o atunuu o loo iai o latou sui: 9

Aofai o atunuu ua tofia i ai: 12

Aofai o tagata aʻoga: 48

Faatatauga o tausaga: 31.7

Faatatauga o tausaga i le upu moni: 13.8

Faatatauga o tausaga i le faiva faataimi atoa: 9.8

[Ata i le itulau 23]

Le Vasega Faauu Lona 101 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai i luma agaʻi i tua, ma o igoa e lisi mai le itu agavale i le itu taumatau i laina taitasi.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.