O Talavou o Ē Manatua Lē na Faia i Latou

“Ia e manatua le na faia oe i ona po o lou taulealea.”—FAILAUGA 12:1.

1. O ā faamatalaga a se tamaitiiti e 11 ona tausaga o loo faaalia ai le moni o Lē na Faia i tatou ia te ia?

E MAEU le matagofie pe a talanoa ma gaoioi talavou i se ala e faaalia ai o loo latou manatu ia Ieova le Atua o se peresona moni latou te mataʻina ma mananao e faafiafia! Na faapea mai se tamaitiiti e 11 ona tausaga: “Pe a ou nofo na o aʻu ma tilotilo atu i fafo o le faamalama, ou te vaaia ai le matagofie o foafoaga a Ieova. Ona ou vaai faalemafaufau ai lea i le matagofie o le a iai le Parataiso i le lumanai ma le mafai ona ou paʻi atu i manu i lena taimi.” (Isaia 11:6-9) Na ia toe faapea mai: “Pe a ou nofo na o aʻu, ou te tatalo atu ia Ieova. Ou te iloa e lē o ita o ia i loʻu talanoa atu ia te ia i taimi uma. Ou te iloa o loo iai lava o ia iina i taimi uma ma silasila mai ia te au.” Pe o moni ea ia te oe Lē na Faia i tatou e pei ona moni i lenei tamaitiiti?

O Faapeī le Moni o le Atua ia te Oe?

2. (a) E mafai faapefea ona moni ia te oe Lē na Faia oe? (e) O le ā le vaega e mafai ona iai i mātua i le fesoasoani atu i a latou fanau ia talisapaia o le Atua o se peresona moni lava?

² Ina ia moni ia te oe Ieova ma ana folafolaga, e tatau ai ona e muai aʻoaʻoina e uiga ia te ia ma le lumanai matagofie o loo ia ofoina mai ia te oe i le lalolagi fou amiotonu lea o loo faamatalaina mai e le Tusi Paia. (Faaaliga 21:3, 4) Pe afai ua aʻoaʻoina oe e ou mātua i nei mea, ua tatau ai la ona e loto faafetai auā o le mea lena ua mafai ai ona e utagiaina le poloaiga faagaeeina e faapea: “O lenei, ia e manatua le na faia oe.” (Failauga 12:1) Na taʻua faapenei e se teine talavou e faatatau i toleniga sa faia e ona mātua ia te ia a o itiiti: “E so o se mea lava i le olaga, e faatāuaina ai lava Ieova. O le ki lena i loʻu manatuaina o Lē na Faia aʻu.” Na faapea mai le isi teine talavou:  “Ou te faafetaia pea oʻu mātua mo lo la aʻoaʻo mai ia te au e faapea o Ieova o se peresona moni lava. Na la faaali mai ia te au le auala ia ou alofa atu ai ia te ia, ma taʻu mai ia te au le olioli i le auauna atu ia te ia faataimi atoa.”

3, 4. O le ā e mafai ona fesoasoani ia te oe ina ia e manatu ia Ieova o se peresona moni?

³ Peitai, e toatele tagata ua faafaigata ia i latou ona matuā manatunatu i le Atua o se peresona moni o loo naunau atu ia i latou. Pe o faapena ea oe? Sa avea o se fesoasoani i se alii talavou ina ia mafaufau ai e uiga i le Atua i se auala totino, le fuaitau lenei i Le Olomatamata e faapea: “E tatou te lē iloa pe faapeī le telē o le fuaitino o Ieova le Atua.” O le mea moni, o le silisili ese o le Atua e lē fuaina i se telē o sona fuaitino po o ona foliga mai, e pei ona taʻua i le fuaiupu o sosoo mai o lena Olomatamata e faapea: “O lona silisili ese moni e fuafua i le ituaiga o Atua e iai o ia,” ioe, o le Atua e faamaoni, e alofa mutimutivale, e agaalofa, ma loto faamagalo. * (Esoto 34:6; Teuteronome 32:4; Salamo 86:5; Iakopo 5:11) Pe ua e manatu ea la ia Ieova o se peresona faapena, o se uo maufaatuatuaina o lē e mafai ona iai sa oulua faiā tautele?—Isaia 41:8; Iakopo 2:23.

⁴ Sa fesoasoani Iesu i ona uluai soo ina ia latou olioli i se faiā totino ma le Atua. O lea, ina ua tusi le aposetolo o Ioane e faatatau i lona toetu sa faatalitalia i le olaga faalelagi, na taʻua ai e Ioane e faapea: “Ona foliga ai lea o i tatou [i le Atua], auā tatou te iloa tino ai lava o ia.” (1 Ioane 3:2; 1 Korinito 15:44) E mafai foi ona fesoasoani atu i talavou i aso nei ina ia latou manatu i le Atua o se peresona moni, o lē e mafai ona latou iloa lelei e ui lava ina lē mafai ona latou vāai tino ia te ia. Na taʻua e se tasi tama talavou: “Sa fesoasoani mai oʻu mātua ia te au ina ia ou manatua Ieova e ala i lo la fesiligia o le tele o fesili, e pei, ‘O le a faapeī se fetalaiga a Ieova? E mafai faapefea ona e faamatala mai i au lava upu? O le ā le uiga o lena mea?’” Pe ua lē mafai ea e fesili faapenei ona tatou mafaufau ai i la tatou faiā totino ma le Atua?

Le Uiga o le Manatua

5. O ā faaaoaoga faale-Tusi Paia e faaalia ai, e iai nisi mea e aofia ai i le manatuaina o se tasi nai lo le tau ina manatua lona igoa?

⁵ O le utagiaina o le poloaiga, “O lenei, ia e manatua le na faia oe,” e sili atu lona uigā nai lo le tau ina mafaufau ia Ieova. E aofia ai gaoioiga, le faia o mea e fiafia i ai o ia. Ina ua aioi atu le pagota ia Iesu, “Ia e manatua mai aʻu, pe a e afio mai i lou malo,” sa ia manao e faia e Iesu nisi mea e sili atu nai lo le tau ina manatua o lona igoa. Sa ia manao e gaoioi Iesu, ia toe faatūina o ia. (Luka 23:42) Sa faapena foi ona faatalitalia e Iosefa lea na faafalepuipuiina, ni gaoioiga e faia mo ia a o ia aioi atu i le tautū uaina a Farao ina ia faamanatu o ia ia Farao. Ma ina ua faatoga Iopu i le Atua, “Ia e manatua mai ai aʻu,” sa talosaga atu Iopu faapea i se taimi i le lumanai, o le a gaoioi ai le Atua ina ia toe faatūina o ia.—Iopu 14:13; Kenese 40:14, 23.

6. E faapefea i le upu Eperu mo le “manatua” ona faaalia ai le alofa māfana mo se mea po o se tagata o manatuaina?

⁶ Ua taʻua e se faamatalaga maufaatuatuaina e faapea o le upu Eperu ua faaliliuina “manatua” e masani ona faasino i “mafaufauga ma gaoioiga alofa māfana ua tutupu aʻe pe a toe manatua se mea.” O le faatatauina o le “alofa māfana” i le upu “manatua” e mafai ona iloa i le alaga mai a le “vao tagata ese” i le vaomatua e faapea: “Ua tatou manatu i iʻa na tatou saʻoloto ona aai ai i Aikupito.” E pei lava ona augani atu Iopu ina ia manatua lelei mai o ia e le Atua, sa faapena foi ona aioi atu Esekia, o Neemia, o Tavita, ma le faisalamo e lē o taʻua sona igoa, ina ia manatua ma le alofa mai i latou e Ieova i le taliaina o lo latou faamaoni.—Numera 11:4, 5; 2 Tupu 20:3; Neemia 5:19; 13:31; Salamo 25:7; 106:4.

7. Pe afai tatou te manatua le Atua i ni lagona alofa māfana, o le a faapefea e lenei mea ona aafia ai la tatou amio?

⁷ O lea tatou te ono fesili ai, ‘Pe o tatou manatua ea Lē na Faia i tatou i ni lagona alofa māfana ma alofia le faia o so o se mea e faatiga ai o ia?’ Na faapea mai se teine talavou: “Sa fesoasoani mai Tinā ia te au ina ia ou iloa e iai faalogona o Ieova, ma i oʻu uluai tausaga, sa ou iloa ai e iai se aafiaga o aʻu gaoioiga ia te ia.” (Salamo  78:40-42) Na faamatala mai e le isi tamaitai: “Sa ou iloa o aʻu gaoioiga a lē o le fesoasoani e taliina ai le luʻi, po o le faalavelavea ai foi o le taliina o le luʻi na faia e Satani ia Ieova. Sa ou manao e faafiafia le finagalo o Ieova, ma na aogā lena ia te au, ma o loo faaauau pea ona aogā ia te au i aso nei.”—Faataoto 27:11.

8. (a) O le sailia o le ā o le a faaalia ai o loo tatou manatuaina Ieova i ni lagona alofa māfana? (e) O ā fesili e tatau i talavou ona manatunatu ma le atamai i ai?

⁸ O le mea moni lava, i lenei lalolagi amioleaga, e lē faigofie ai pea ona manatua Ieova e ala i le auai atoatoa i gaoioiga na e faafiafia ai o ia. Ae maeu le lelei pe a mafai ona e faataitai atu i le talavou o Timoteo o le uluai senituri—e lē o taʻua ai le faitau afe o talavou o ē matataʻu i le Atua i aso nei—e ala i le sailia o le auaunaga faataimi atoa faa-Kerisiano o se faifeau paeonia! (Galuega 16:1-3; 1 Tesalonia 3:2) Peitai ane, atonu e fesiligia, Faamata e mafai ona e tausia oe lava i le faiva faapaeonia? Ma pe afai e te faaipoipo, pe o le a iai ea ni ou tomai e saunia ai mea mo i latou i lou aiga? (1 Timoteo 5:8) O ni fesili tāua nei, ma e matuā tāua ona e manatunatu mamafa i ai.

O Aʻoaʻoga e Iai se Fuafuaga

9. O le ā le filifiliga ua fesagai ma talavou e faatatau i aʻoaʻoga masani?

⁹ A o faasolo ina lavelave atili le olaga masani o tagata, e ono manaomia ai foi ni aʻoaʻoga atili ina ia mafai ona maua ni galuega talafeagai mo le tausia o oe lava i le galuega paeonia. Atonu ua e mātauina e oo lava i nisi sa aʻoʻoga i iunivesite ua manaomia ona toe fai nisi a latou aʻoga faaopoopo ina ia maua ai ni tomai fou o loo manaomia e pule o galuega i aso nei. O le ā la le tele o ni aʻoaʻoga o le a sailia e outou talavou o loo mananao e faafiafia le finagalo o le Atua? E talafeagai ona fai se filifiliga faatasi ai ma le manatuaina o le poloaiga faagaeeina lea: “O lenei, ia e manatua le na faia oe.”

10. O le ā le aʻoaʻoga ua sili ona lelei e mafai ona tatou mauaina?

¹⁰ E moni, o le a e manao e sailia le aʻoaʻoga lea ua oo lava i le tele o pule faalemalo ua latou manatu i ai o se aʻoaʻoga ua sili ona lelei—lea e maua mai le suesueina maeʻaeʻa o le Afioga a le Atua. Na taʻua e le tusitala Siamani o Johann Wolfgang von Goethe e faapea: “O le tele lava e oo i ai le agaigai i luma o le atamai o [le tagata], o le matuā sili atu foi lea ona mafai ona ia faaaogaina le Tusi Paia e avea o se faavae ma o se sauniuniga mo aʻoaʻoga.” Ioe, o le suesueina o le Tusi Paia o le a faaauupegaina lelei ai oe mo le olaga nai lo o se isi lava aʻoaʻoga!—Faataoto 2:6-17; 2 Timoteo 3:14-17.

11. (a) O le ā le galuega e sili atu ona tāua e mafai ona tatou faia? (e) Aisea na filifili ai se tasi talavou ia maua se aʻoaʻoga lelei?

 ¹¹ Talu ai o le poto e uiga i le Atua e aumaia ai le ola, o le galuega la e sili atu ona tāua e mafai ona e faia i aso nei o le tufa atu lea o lena poto i isi. (Faataoto 3:13-18; Ioane 4:34; 17:3) Ae ina ia faia ma le uigā lenei mea, e manaomia ona aʻoaʻoina oe i auala autū. E manaomia ona mafai ona e mafaufau manino, ia tautala ma le atamai, ma faitau ma tusitusi lelei—o tomai o loo aʻoaʻoina i aʻoga. O lea, ia faamaoni i le tauaveina o au mataupu i le aʻoga, e pei ona sa faia e Tracy, o se talavou i Florida, i le Iunaite Setete, o lē na faauu mai se aʻoga maualuga ma ona faailoga maualuluga. Sa ia faaalia lona faamoemoe: “Ua fai lava ma oʻu sini le avea o se auauna faataimi atoa mo loʻu Atua o Ieova, ma ou te faamoemoe o le a fesoasoani mai aʻu aʻoaʻoga ia te au ina ia ausia lenei sini.”

12. Pe afai e filifilia ni aʻoaʻoga masani faaopoopo, o le ā le fuafuaga e aogā ona faataunuuina ai?

¹² Pe ua e mafaufau ea i le mafuaaga e ala ai ona e alu i le aʻoga? Pe o le pogai autū ea ina ia faaauupegaina ai oe e avea o se faifeau uigā a Ieova? Afai o lena, o le a e manao la e manatunatu loloto po ua faataunuuina lelei e au aʻoaʻoga lenei fuafuaga. Pe a uma ona outou talanoa ma ou mātua, atonu tou te filifili e tatau ona e sailia nisi aʻoaʻoga e faaopoopo atu i aʻoaʻoga ua uma ona faatulaga e le tulafono. O na aʻoaʻoga faaopoopo e mafai ona fesoasoani ia te oe e maua ai se galuega ina ia tausia oe ae maua ai pea lou taimi ma lou malosi e auai atoatoa ai i le galuega o le Malo.—Mataio 6:33.

13. Ua faapefea e nisi Kerisiano Rusia se toalua o ē na sailia ni aʻoaʻoga faaopoopo, ona faaalia mai a la fuafuaga i le olaga?

¹³ O nisi o loo latou sailia ni aʻoaʻoga faaopoopo o loo auai i le faiva faataimi atoa e ui lava o loo toe faia nei aʻoaʻoga. Seʻi manatu ia Nadia ma Marina, o ni teine talavou se toalua i Moscow, i Rusia. Na papatiso uma laua ia Aperila 1994 ma amata auauna ai o ni faifeau paeonia lagolago. E lei umi, ae faauu i laua mai aʻoga maualuluga ma la auai atu i se polokalame e lua tausaga mo mataupu faasuetusi. Ia Me 1995 na amata ai ona la paeonia sauatoa, ae sa la maua pea le A i a la mataupu faasuetusi. E lē gata i lea, sa mafai ona la faia, pe a tuufaatasi a la suesuega, se faatatauga e 14 suesuega faale-Tusi Paia i vaiaso  taitasi a o ō atu pea i aʻoga. O loo faamoemoe teine e avea a la aʻoaʻoga faasuetusi e mafai ai ona la maua ni galuega talafeagai, ina ia mafai ona la tausia i laua lava i le faiva faataimi atoa.

14. E tusa lava po o le ā le tele o ni aʻoaʻoga masani tatou te filifilia, ae o le ā e tatau ona avea ma mea e sili ona tāua i o tatou olaga?

¹⁴ Pe afai o loo e sailia ni aʻoaʻoga e faaopoopo atu i aʻoga ua faatulaga e le tulafono, ia iloilo ma le atamai lau mafuaaga mo le faia faapea. Pe ina ia e taʻutaʻua ai ea ma maua le mauoa faaletino? (Ieremia 45:5; 1 Timoteo 6:17) Pe o lou sini ia faaaogā aʻoaʻoga faaopoopo e atili ai ona e auai atoatoa i le auaunaga ia Ieova? O Litia, o se talavou na filifili e sailia ni aʻoaʻoga faaopoopo, na ia faaalia se uaʻi lelei atu i mataupu faaleagaga, i lona faamatala mai faapea: “Ua sailia e isi ni aʻoaʻoga maualuluga ma faatagaina ai le matapeapea i meafaitino e faalavelavea i latou, ma ua latou faagaloina ai le Atua. Ia te au lava ia, o laʻu faiā ma le Atua o le mea lea e sili atu ona tāua ia te au.” Maeu se uiga lelei mo i tatou uma lava!

15. O ā talaaga eseese tau aʻoaʻoga na maua e Kerisiano o le uluai senituri?

¹⁵ E mautinoa, sa tele ituaiga o talaaga eseese tau aʻoaʻoga na maua e Kerisiano o le uluai senituri. Mo se faaaoaoga, sa manatu tagata i aposetolo o Peteru ma Ioane o ni “tagata e lei aʻoaʻoina i laua ma le valelea” talu ai sa lei aʻoaʻoina i laua i aʻoga faarapi. (Galuega 4:13) E ese mai la le aposetolo o Paulo, na ia maua ni aʻoaʻoga, e tutusa ma aʻoaʻoga faaiunivesite i aso nei. Peitai, sa lei faaaogā e Paulo na aʻoaʻoga e fia faatāuaina ai o ia lava; nai lo lea, sa avea o se fesoasoani ina ua ia talaʻi atu i tagata i tulaga eseese o le olaga. (Galuega 22:3; 1 Korinito 9:19-23; Filipi 1:7) Sa faapena foi Manaena, o lē “sa tausia [aʻoʻoga] faatasi o ia ma Herota le tupu,” na iai o ia faatasi ma i latou o ē na taʻimua i le faapotopotoga i Anetioka.—Galuega 13:1.

Aisea ia Faaaogā ai ma le Atamai Au Tupe?

16. (a) Aisea atonu e atili faigata ai ona tatou manatua Lē na Faia i tatou pe afai o tatou nofo aitalafu? (e) Ua faapefea i se tasi o tala faatusa a Iesu ona faaalia ai le tāua o le mafaufau muamua a o tatou lei faaaogaina tupe?

¹⁶ Pe afai e lē lelei ona e faaaogaina ma le atamai au tupe, e ono faigata ai ona e manatua Lē na Faia oe e ala lea i le faia o mea e faafiafiaina ai o ia. Auā pe a oo ina e nofo aitalafu, e mafai ona faapea atu o loo iai ma se isi ou matai. Ua faamatala mai e le Tusi Paia e faapea: “A e nonō tupe ona avea lea o oe ma auauna i lē ua e nonōina mai ana tupe.” (Faataoto 22:7, Today’s English Version) O loo faamatilatila mai i se tasi o tala faatusa a Iesu le tāua o le mafaufau muamua a o tatou lei faaaogaina tupe. Na fetalai Iesu e faapea: “O ai foi so outou ua fia fai se ʻolo, e le muai nofo i lalo e faitau tupe e totogi aʻi, po ua lava ana mea e faauma ai? ina neʻi tauemu mai ia te ia o tagata uma e maimoa, ina ua tuu le faavae, a e le mafai ona faauma ai.”—Luka 14:28, 29.

17. Aisea e masani ai ona faigata le pulea o le faaaogaina e se tasi o ana tupe?

¹⁷ Ma le atamai lava la, o le a e taumafai ai e faatatauina le mataupu silisili faale-Tusi Paia ina ia ‘aua neʻi nofo aitalafu i se mea e tasi a se tasi tagata; ae tau lava ina ia alofa le tasi i le isi.’ (Roma 13:8) Ae faigata ona fai lenei mea, ae maise lava le vaai atu i le laʻu mai pea o oloa fou o loo faapea mai ē o faasalalauina e te manaomia moni lava. O se tasi matua, o lē na taumafai e fesoasoani i lana fanau e faaalia le faautauta, na ia mātauina faapea: “E tele ni taimi sa matou faaalu i le talanoaina po o le ā le mea e manaomia moni, ae o le ā le mea e na ona manao i ai.” I le tulaga lautele ua lē o aʻoaʻoina i aʻoga na mataupu, i le itiiti lava o ni faatonuga e saunia mai pe afai foi o iai, i le auala e faasoasoa ai tupe i se uiga faautauta. Na faapea mai se tagata faigaluega i le matagaluega mo le vaaia o le lelei lautele: “Ina ua matou faauu mai aʻoga maualuluga, na pau le mea na tele i ai lo matou iloa o le tafatolu e tutusapau ona itu e lua nai lo le iloa ona faasaoina tupe.” O le ā la e mafai ona fesoasoani ia te oe ina ia faaaogā ma le atamai au tupe?

18. O le ā le ki i le faaaogaina ma le atamai o tupe, ma aisea?

¹⁸ O le utagiaina o le timaʻiga, “O lenei, ia e manatua le na faia oe,” o le ki lena i le faaaogaina ma le atamai o au tupe. Auā pe a e usitaia lena poloaiga, o le a e faamuamua ai le  faafiafiaina o Ieova, ma o lou alofa māfana ia te ia e taaʻina ai le auala e te faaaogā ai au tupe. Ua talafeagai ai la, ona e taumafai ia lē faatagaina ou lava manaoga totino e faalavelavea ai le avatuina i le Atua o lau tuutoina atoatoa. (Mataio 16:24-26) O le a e tauivi ai e ‘faafaigofie’ lau vaai, o lona uiga, ia matuā taulai saʻo atu i le Malo o le Atua ma le faia o lona finagalo. (Mataio 6:22-24) Ona e manatu ai lea i le timaʻiga tauatua ina ia “ava ia Ieova i lou oa” o se faaeaga olioli.—Faataoto 3:9.

O Talavou ua Tatau ma Onomea Ona Faataitai i Ai

19. Na faapefea e ni talavou i aso ua teʻa ona manatua Lē na Faia i latou?

¹⁹ E fiafia lava, ona o loo manatua e le toatele o talavou, i aso ua teʻa ma aso nei, Lē na Faia i latou. Sa tumau pea le talavou o Samuelu i le auaunaga i le malumalu e ui i taaʻiga o amioga lē mamā a i latou na latou auauna faatasi. (1 Samuelu 2:12-26) Sa lē mafai e le fafine faatosina, le avā a Potifara, ona ia faavaleaina le talavou o Iosefa i le faia o le faitaaga. (Kenese 39:1-12) E ui lava sa na o se “tama itiiti” Ieremia, ae na ia talaʻi atu ma le lototele a o fesagai ma teteega matuitui. (Ieremia 1:6-8) Sa faasino atu ma le lē fefe e se teineitiiti Isaraelu i le taʻitaʻiʻau malosi a Suria, ina ia saili se fesoasoani i Isaraelu, o iina na mafai ona ia aʻoaʻoina ai e uiga ia Ieova. (2 Tupu 5:1-4) Sa tausia pea e le talavou o Tanielu ma ana aumea lo latou faatuatua ina ua tofotofoina i tulafono tau i mea e ʻai a le Atua. Ma na filifili foi talavou o Sataraka, Mesako, ma Apeteniko ina ia lafoina i latou i le ogaumu aasa nai lo le lafoaia o lo latou faamaoni i le Atua i le tapuai atu i se faatusa.—Tanielu 1:8, 17; 3:16-18; Esoto 20:5.

20. Ua faapefea ona manatua e le toatele o talavou i aso nei Lē na Faia i latou?

²⁰ I aso nei, e silia i le 2,000 talavou mai le 19 i le 25 tausaga le matutua o loo auauna i le ofisa autū a Molimau a Ieova i le setete o Niu Ioka, i le Iunaite Setete. O i latou ua na o se vaega itiiti lea o le faitau sefulu o afe o talavou i le lalolagi aoao o loo manatuaina Lē na Faia i latou. I le pei o Iosefa o aso anamua, ua faapena foi ona latou lē lafoaia lo latou tulaga mamā tau amio. E toatele ua usiusitai atu i le Atua nai lo le usiusitai i tagata, pe a faamalosi e filifili po o ai latou te auauna i ai. (Galuega 5:29) I Polani i le 1946, na faasalaina faamoʻamoʻa ai le talavou e 15 tausaga o Henryka Zur, ona o lona lē faatinoina se gaoioiga o ifoga tupua faalotu. Na faapea atu i ai se tasi o ē na faaoosala ia te ia: “E pule oe po o le ā le mea e te talitonu i ai, ae tau lava ina ia e faia se faailoga faa-Katoliko o le koluse.” Talu ai lona lē faia, na toso faatātā atu ai o ia i le togavao ma fanaina, ae sa lē faaleagaina lona faamoemoe mautinoa o le ola e faavavau! *

21. O le ā le valaaulia e atamai ona taliaina, ma o le ā e iu i ai?

²¹ Maeu le faafiafiaina o le finagalo o Ieova e talavou o ē o loo manatuaina o ia a o faagasolo mai senituri! Pe o le a e tali atu ea i lana valaaulia, “O lenei, ia e manatua le na faia oe”? O le mea moni lava ua tatau ma onomea ona e manatuaina o ia! Ia mafaufau i aso taitasi i mea uma ua ia faia mo oe ma mea foi o le a ia faia, ma talia lana valaaulia: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—Faataoto 27:11.

[Faaopoopoga i lalo]

E te Manatua?

□ E mafai faapefea ona fesoasoani atu i talavou ina ia latou manatu i le Atua o se peresona moni lava?

□ O le ā le uiga o le manatua o Lē na Faia oe?

□ O le ā le fuafuaga e tatau ona faataunuu e a tatou aʻoaʻoga?

□ Aisea e matuā tāua ai le faaaogaina ma le atamai o a tatou tupe?

□ O ai talavou ua tatau ma onomea ona outou faataitai i ai?

[Fesili mo le Suʻesuʻega]

[Ata i le itulau 17]

Pe ua e mafaufau ea i le mafuaaga e ala ai ona e alu i le aʻoga?

[Ata i le itulau 18]

Po o e aʻoaʻoina ea le auala e faaaogaina ai ma le atamai tupe?