Lipoti a Ē Faalauiloa le Malo

O le Tumau Mausalī i Aʻoga e Tauia

UA VALOIA e le Tusi Paia e faapea: “E aʻoaʻoina lau fanau uma lava e Ieova; e tele foi le manuia o lau fanau.” (Isaia 54:13) I se tulaga faalauaitele, o “lau fanau uma lava” e mafai ona faasino atu i auauna uma a le Atua i le lalolagi, e aofia ai ma ē aupito i laiti. I aso nei, e faamautinoa e mātua Kerisiano o loo “aʻoaʻoina . . . e Ieova” a latou fanau i totonu o aiga ma sauniga faa-Kerisiano.

Ae peitai, o loo fesagai talavou Kerisiano ma luʻi faigata pe a auai atu i aʻoga. E masani ona latou manaomia le matuā tumau e faavae i mea ua latou aʻoaʻoina mai le Tusi Paia. A latou faia faapea, o iuga e mafai ona aogā i tamaiti aʻoga faapea ma faiaʻoga, e pei ona faaalia mai i le mea na tupu i Maikoronesia.

I le motu laititi o le Pasefika i sisifo o Tol i le Motu o Chuuk, na faatonuina ai e faiaʻoga o le aʻoga tamaiti uma ia sauniuni ma auai i le faamanatuina o le Holouini (Halloween). Na iloa e talavou aʻoʻoga o Molimau faapea o lea aso faamanatu e faasino atu i tū ma aga faataulaitu—e mafai ona aofia ai teuga ma laei e faaātaina ai aitu, o peresona laiti auleaga faafagogo e iai mana (goblins), ma faataulaitu. E lē mafai ona auai nei talavou ma lo latou iloa e sese lena aso faamanatu. *

E faavae aʻe i la latou aʻoaʻoga o le Tusi Paia i o latou aiga ma le faapotopotoga Kerisiano, ua latou iloa ai o nei faiga e lē fiafia i ai le Atua, e tusa lava pe tau ina auai atu i ai ona o mafuaaga tau faafiafiaga. Ina ia fesoasoani e faamanino atili lo latou tulaga, sa valaaulia ai e tamaiti se tasi o misionare Molimau o loo iai i le motu, e igoa ia Barak, ina ia talanoa atu o ia i o latou faiaʻoga.

Ina ua maeʻa la ona faalogologo i faamalamalamaga, na fuafuaina ai e faiaʻoga se fono lona lua, ina ia mafai ona talanoa atu ai Barak i faiaʻoga uma o le aʻoga. I lenei fono, na tuuina atu ai e Barak ni faamaoniga e faaalia ai le mea moni e faatatau i le Holouini. Sa maua ana faamatalaga mai ni lomiga a le Sosaiete o le Olo Matamata faapea foi ma isi tusitusiga. Sa maofa faiaʻoga ma le vaega o loo pulea le aʻoga i le mea ua latou aʻoaʻoina e faatatau i le amataga, le talafaasolopito, ma le tulaga faaletapuaiga o lenei aso faamanatu. Sa latou fuafua e faia se fono mo faiaʻoga ina ia filifili le auala e foia ai lea tulaga.

I nai aso mulimuli ane, sa faasilasila ai se faaiuga e lei faatalitalia. Ua lē faataunuu sauniuniga uma mo le Holouini. O le a lē faamanatuina e le aʻoga le Holouini i lena tausaga. Maeu se iuga lelei na maua mai nei talavou Molimau i lo latou maumauai e faia le mea saʻo i le aʻoga! E lē tatau i talavou ona fefefe pe matamuli e tutumau i se tulaga mausalī mo le upu moni o le Tusi Paia.

I le lalolagi aoao, e aʻoaʻoina e Molimau a Ieova a latou fanau e toaaga e fai meaaʻoga i le aʻoga. E toleniina foi talavou Molimau e ola aʻe i mataupu silisili o le Tusi Paia ma talatalanoa atu i isi tamaiti aʻoga e faatatau i lo latou faamoemoe ma talitonuga pe a avanoa. E tusa lava pe leai ni iuga lelei pe e lē vave maua foi e pei o le mea na tupu, ae e mafai e talavou ona maua le uiga mautinoa ma le faamalieloto lea e maua mai i le faia o le mea saʻo. Ae sili atu i lea, e mafai ona latou mautinoa o loo olioli lo latou Tamā faalelagi ma o le a ia faamanuiaina i latou ona lo latou usiusitai faamaoni.

[Faaopoopoga i lalo]