Pe a Taia e Mala Faalenatura

Accra, Ghana, Iulai 4, 1995: O timuga pito mamafa ia i le toetoe lava 60 tausaga, ia na māfua ai lologa matautia. E 200,000 nisi na leiloloa uma ai a latou meatotino, e 500,000 ē na leiloloa ai auala i o latou fale, ma le 22 na maliliu ai.

San Angelo, Texas, U.S.A., Me 28, 1995: Na faatamaʻia e asiosio ma le timu aisa lenei aai e 90,000 ē nonofo ai, e tusa ma le $120 miliona (Amerika) le tau o mea sa faaleagaina.

Kobe, Iapani, Ianuari 17, 1995: E na o le 20 sekone na lūlū ai le mafuie lea na maliliu ai le faitau afe o tagata, e faitau sefulu o afe ē na manunuʻa, ma le faitau selau o afe i latou ua leai ni mea e nonofo ai.

UA TATOU ola nei i le vaitaimi ua taʻua o vaitaimi o mala. O se lipoti mai Malo Aufaatasi ua faaalia ai e faapea i totonu o le tolusefulu tausaga e amata mai le 1963-1992, o le faitau aofai o tagata ua maliliu, manunuʻa, po o le ō ese mai mea e nonofo ai ona o mala ua faateleina nei i se fua faatatau e 6 pasene i tausaga taitasi. O le tulaga matautia ua faapogaia ai e Malo Aufaatasi le fuafuaina faapitoa o vaitausaga o le 1990 o le “Vaitausaga e Sefulu Faavaomalo e Faaitiitia ai Mala Faalenatura.”

 O le mea moni, o se malosiaga faalenatura—e pei o se matagi malosi, se pasae aʻe o se mauga mu, po o se mafuie—e lē o taimi uma e avea ai ma mala. E faitau selau mea faapea e tutupu i tausaga taitasi e aunoa ma le afaina ai o tagata. Ae afai e matuā afaina ai le ola ma aafia ai ma mea totino, ona taʻua lea o se mala.

O le faateleina o mala faalenatura ua foliga mai ua lē mafai ona alofia. I le tusi o le Natural Disasters—Acts of God or Acts of Man? ua ia mātauina e faapea: “Ua suia e tagata o latou siosiomaga i se tulaga e sili ona lamatia ai i nisi o mala, ma ua gaoioi i se auala e faigofie ona aafia ai i latou lava.” Ua aumaia e le tusi se manatu faataitai e faapea: “O si mafuie itiiti i se taulaga laitiiti e iai falepiliki e fai i le ele ma e tu i se itu vanu tifato, e mafai ona avea moni ma mala e faaumatia ai tagata i le oti ma mafatiaga. Ae pe o le mala ea e māfua mai i le luluina o le eleele po o le mea moni e māfua ona o tagata o loo nonofo i nei ituaiga o fale e lamatia ai i sea vaega eleele e sili ona matautia?”

I tagata aʻoga o le Tusi Paia, ua iai se isi mafuaaga ua lē faateʻia ai i le faateleina o mala faalenatura. E toeitiiti lava 2,000 tausaga talu ai, na fetalai ai Iesu Keriso e faapea “o le vaitaimi faaiuiu o le faiga o mea” o le a faailogaina i nisi nei o vala, o “oge ma mafuie i lea mea ma lea mea.” (Mataio 24:3, 6-8, NW) Ua valoia foi e le Tusi Paia e faapea a o faagasolo “aso e gata ai,” e avea tagata ma e alolofa i latou ia i latou lava, o ē mananao i tupe, o ē lē lotoaiga, ma e ʻinoʻino i le amio lelei. * (2 Timoteo 3:1-5) O uiga nei ua māfua ai ona feteenai faiga a tagata ma le natura o le siosiomaga ma faigofie ai ona aafia tagata i malosiaga faalenatura. O mala e māfua mai i tagata ua faapogaia mai le sosaiete lē alofa lea o loo siomia ai le toatele.

A o agaʻi atu lo tatou paneta ina matuā faatoateleina i tagata e mau ai, a o avea uiga faaletagata ma lamatiaga sili i tagata, ma a o faateleina le lē lelei o le tausiga o alamanuia o i le lalolagi, o le a faaauau pea ona avea mala e fai ma puapuaga o le tagata. O le mauaina o se mapusaga e aumaia ai luʻi, e pei ona faaalia i le mataupu o le a sosoo mai.

[Faaopoopoga i lalo]

[Ē Ana le Ata i le itulau 3]

I luga: O le Matagaluega e Saunia Faamatalaga, i Ghana; itu taumatau: San Angelo Standard-Times

[Ē Ana le Ata i le itulau 2]

COVER: Maxie Roberts/Courtesy of THE STATE