Le Evagelia e Tusa o Manatu o Tagata Atamamai

I LE toetoe lava lua meleniuma ua mavae, na fesili ai Iesu i lona ʻau soo e faapea: “Se a le upu a tagata ia te au po o ai?” (Luka 9:18). I lena taimi, na faia ai ni fefinauaiga i lea fesili. E foliga mai ua sili atu foi ona fefinauai ai i le taimi nei, ae maise lava i le vaitaimi o le Kirisimasi, lea e manatu i ai e faaautū ia Iesu. E toatele ua talitonu e faapea, na auina mai Iesu mai le lagi e togiolaina tagata. Po o lou manatu ea lena?

Ua faailoa mai e nisi tagata atamamai se isi manatu ese. Ua faapea mai Marcus J. Borg, o se polofesa i mea tau lotu ma aganuu: “O le tagata o Iesu o lē na aʻoaʻo mai e faapea o ia o le Alo o le Atua, o lē na maliu mo agasala a le lalolagi, e lē moni e tusa ai ma talafaasolopito.”

Ua taʻua e isi tagata atamamai, o le Iesu moni, e ese mai i le Iesu lea tatou te faitau i ai i le Tusi Paia. Ua talitonu nisi, o Evagelia uma na faatoʻā tusia i le fasefulu po o le sili atu foi o tausaga talu ona maliu Iesu, ma e oo ane i lena taimi ua lelei le teuteuina o foliga moni o Iesu. Ua faamautinoa mai e tagata atamamai e faapea, o le faafitauli, e lē o le faaletonu o mafaufau o le ʻau tusitala, ae o le auala latou te faamatalaina ai. Ina ua mavae le maliu o Iesu, sa oo ina ese ai le vaaiga a le ʻau soo ia te ia—e faapea o le Alo o le Atua, le Faaola, ma o le Mesia. Ua maumauai mai nisi, o Iesu sa na o se tagata poto e fealualuai solo, o se tagata sa taumafai e na te toe faaleleia mea i le tulaga lautele. Ua faapea mai tagata atamamai, o upu moni na e uiga i evagelia.

Manatu “Faaleaoaoga” a Tagata e Uiga ia Iesu

Ina ia lagolagoina o latou manatu “faaleaʻoaʻoga,” e foliga mai sa naunau tagata atamamai e aveesea so o se mea na foliga mai sa iloa ai le mana uigaese o Iesu. O se faaaoaoga, fai mai nisi, o le fanau mai o Iesu i se taupou, o se faamatalaga na faia e nanā ai le fanau mai o Iesu e leai se tamā. Ua teena e isi valoaga a Iesu e faatatau i le faaumatiaina o Ierusalema, i le maumauai mai e faapea, o mea na na faaofi ane i Evagelia ina ua uma ona “faataunuuina.” Ua oo foi ina faapea mai nisi, o faamalologa a Iesu, e manino lava e lē o ni faamalologa moni ae ua na o ni faamalologa i le mafaufau, ua malō le mafaufau i le maʻi. Pe e te lagona e saʻo na manatu pe e faigata ona talitonu i ai?

Ua oo lava ina faapea mai ni tagata atamamai na fatu e soo o Iesu le toetu ina ia mafai ai ona faaauau la latou galuega faa-Kerisiano. Auā foi, ua manatu tagata atamamai sa leai se malosi o soo o Iesu pe a aunoa ma ia, o lea na latou toe tusia ai ni tala faaopoopo e uiga i lo latou Matai i a latou tusitusiga ina ia toe amanaia ai le vaega tāua a Iesu. O le iuga, o le manatu autū o tagata atamamai, o le Faa-Kerisiano na toe faatūina mai ae lē o Keriso. Afai e foliga mai o le mea lena o loo faatuʻiese ai manatu o tagata atamamai, pe lē sili ai la ona maoaʻe le lē talafeagai o le faamatalaga a le faifeau aʻoaʻo o Barbara Thiering i le faapea mai, sa lei faasalaina Iesu i le oti? E talitonu o ia, na faasaoina Iesu mai lona faasatauroina ma soifua ai pea seia oo ina ia faaipoipo faalua ma maua ai se fanau e toatolu.

O nei faamatalaga uma ua tuu ai Iesu i se tulaga maulalo o le a talia ai o ia e le toatele o tagata atamamai: o se tagata poto, se Iutaia lē taualoa, se tagata na taumafai e toe fuatai manatu ma amioga a le nuu—ua talia ai o ia o se tagata lautele—seʻi vaganā ai le avea ma Alo o le Atua, o lē na sau ia “foaiina atu lona ola e fai ma togiola e sui aʻi tagata e toatele.”—Mataio 20:28.

 Atonu o le vaitaimi foi lenei o le tausaga ua e faitauina ai ni vaega o le Evagelia, e pei o le vaega e uiga i le fanau mai o Iesu i le fale o manu. Ia pe atonu na e faalogo foi i na faamatalaga o faia i le lotu. Sa e talia le faamatalaga a Evagelia e faapea e tāua ma talitonuina? Ia mātau la lenei tulaga e faateʻia ai. I se semina e taʻua o le Semina a Iesu, e faalua i le tausaga ona fono se vaega o tagata atamamai talu mai le 1985 e iloilo ai le moni o upu a Iesu. Pe na fetalaia moni mai e Iesu upu ia o loo tusia i le Tusi Paia e uiga ia te ia? Na faia e sui o le semina se palota i fetalaiga taitasi a Iesu e faaaogā ai ni lopa felanulanuai. O le lopa mūmū e faailoa ai o lea faamatalaga, e moni lava na fetalaia e Iesu; o le lopa piniki, o lona uiga, atonu na fetalaia mai e Iesu; o le lopa lanu efuefu, e faailoa ai e masalomia; ma o le lopa uliuli, e faailoa mai ai e sese.

Atonu e faateʻia oe i le iloa, ua faalauiloa mai e le Semina a Iesu e faapea, o le 82 pasene o upu na fetalaia e Iesu atonu na te lei fetalai moni i ai. E na o le tasi lava le faaupuga mai le Evagelia a Mareko sa mautinoa le maufaatuatuaina. Na faapea mai o le Evagelia a Luka, e tumu i ona lava manatu faaalia ua “faigata ai ona iloa le mea moni.” O fuaiupu uma o le Evagelia a Ioane na maua palota o lopa uli e faailoa ai le sese, seʻi vaganā ai laina e tolu mulimuli ia na maua le lanu faaefuefu e faailoa ai e masalomia.

E Lē na o se Poto Faalemafaufau

Pe e te ioe faatasi ma na tagata atamamai? Po o latou tuuina mai ia i tatou se poto e sili atu ona saʻo e uiga ia Iesu nai lo o lea o loo maua i le Tusi Paia? O nei fesili e sili atu nai lo o se mataupu mo ni felafolafoaiga faaleaʻoaʻoga. I le taimi lenei o le tausaga, atonu e faamanatu atu ai ia te oe e faapea, e tusa ai ma le faamatalaga a le Tusi Paia, na auina mai e le Atua Iesu ‘ina ia lē fano i latou uma o ē faatuatua ia te ia, a ia maua le ola e faavavau.’—Ioane 3:16.

Ana faapea o Iesu e na o se tagata poto e fealualuai solo, o lē atonu e itiiti so tatou iloa i ai, o le a leai la se uiga e ‘faatuatua ai’ ia te ia. Ae i le isi itu, afai e faamaoni faamatalaga a le Tusi Paia e uiga ia Iesu, ua aafia ai la lo tatou faaolataga e faavavau. O le mea lea, e manaomia ai ona tatou iloa—pe faamata o iai i le Tusi Paia le upu moni e uiga ia Iesu?