“O Fea la le Tou Falesa?”

PLAY

“O Fea la le Tou Falesa?”

E MASANI ona fesiligia Molimau a Ieova i Mozambique i lenei fesili. O le mea moni lava, e lei leva ona maua se tali faigofie i lena fesili. Talu ai o lea faatoʻā aloaia faaletulafono Molimau a Ieova i totonu o lenei atunuu i le tausaga e 1991. Ona o lea, sa lei mafai ai ona maua ni nofoaga e faigofie ona iloa ma faamautu ai a latou tapuaiga.

Ae peitai, na suia lena tulaga ia Fepuari 19, 1994. I lena aso vevela ma le mugalā, na tuuina atu ai Maota o le Malo e lua ma o se taimi muamua lea faatoʻā fausia ai i Mozambique. O se aofaiga e 602 na maimoaina le tuuina atu o nei maota matagofie mo sauniga i le taulaga o Beira, i le ogatotonu o le talafatai o Mozambique. O le a tausia e nei Maota manaoga o faapotopotoga e tolu ia o loo i lena aai.

O galuega mamafa e amata mai i le faataatiaina o le faavae seia oo ina maeʻa nei fale, na faaalu ai le tausaga ma masina e lua. E masani ona 30 pe sili atu ē na tauofo mai i le aai latou te tuaoi o Zimbabwe, e galulue faatasi ma Molimau i Beira. Ona o le lē lava o le fale o misionare i Beira e api uma ai, lea na avea ma nofoaga e faaautū i ai le galuega, o isi na tolauapi i fafo i tafatafa o le fale i faaiuga o vaiaso ma i nisi taimi e atoa lava ni vaiaso.

E tu lata i le auala tele i Beira le Maota o le Malo mo Faapotopotoga a Massamba ma Munhava. Ua mātaulia e se tasi o misionare e faapea: “I se aso pisi a o vave lava le faagasologa o le galuega ma o loo iloa gofie le agaigai i luma, na matou vaaia ai le tau lavevea o taavale ona o le faataupupula mai o ave taavale i le Maota o le Malo, ae tau galo ai ona taulai atu i le auala.” O le toatele na taofi a latou taavale ina ia matamata i le galuega, ma na sili ona faagaeetia i latou i le vaai atu i tagata lanu eseese o galulue faatasi.

E tele ni fuafuaga ma ni faamaopoopoga na aofia ai i le galuega. E lei taofia lava le fauina o Maota o le Malo ona o le lē lava o meafaufale, e lē pei o isi galuega i lenei itu o le lalolagi e tau lē maua ni meafaufale. I se tasi o mea na tupu, e 800 taga simā na manaomia, ma e pau le fale e maua ai lea ua lē lava a latou taga e tuu ai simā. Na faafesootai e le auuso le lālā a le Sosaiete o le Olo Matamata i le laumua o Maputo; ona faaaogā lea o le vaalele e auina atu ai taga i le falegaosi simā, ma faatutumu mai ai. Na faaauau pea le galuega ma le lē motusia.

I se isi mea na tupu, na lē lava ai lagolago uamea pito i luga a le ʻau faufale a o tau faapipii iviivi o le falealuga. E 370 maila [600 kilomita] le mamao na aumai ai uamea mo le galuega ona o le tau lē maua o ni meafaufale! Na fesiligia se tamaloa sa matamata a o faia le galuega pe na te silafia o fea e maua mai ai uamea e faauma ai le galuega. Na tali mai le tamaloa e faapea: “E sili atu ma le itula talu ona ou tūtū iinei, ma e lē o se mea na tupu fua lenei mea. Ou te mataʻia ma le fiafia la outou galuega ma le agaga o loo faatino ai. O loo ia te au le ituaiga o uamea o loo tou manaomia, ma ou te fiafia e avatu faameaalofa ma outou.” Na avea le ofo a le tamaloa ma se sauniuniga talafeagai i lena taimi.

O le toatele o le ʻau matamata na manatunatu po o ai le kamupani faufale tele o loo faia le galuega. Na mautinoa le fiafia o le ʻau faigaluega e taʻu atu o Molimau a Ieova o loo galulue i se tulaga tauofo. O le ā na sili ona maofa ai le ʻau matamata? Ua faapea mai se tasi: “O outou o ni tagata autasi. E ui e lanu eseese, ae o outou o uso e galulue faatasi.” O le iuga na toatele na talosaga mo ni suesuega faale-Tusi Paia. Na iai foi se aafiaga lelei i sauniga. Mo se faataitaiga, i se fua faatatau o ē e auai i sauniga a le Faapotopotoga i Manga e faalua e sili atu ai nai lo o le aofaiga o Molimau.

Ua avea moni Maota fou o le Malo ma se faamanuiaga sili mo Molimau i lena atunuu. Na masani ona faapotopoto le toatele i fale faaanamua e ufiufi i mutia po o nai apa, i tuāfale o se lotoā, po o totonu o se potu laitiiti i se fale o se aiga. Na latou auai ma le faamaoni i sauniga e ui lava na masani ona susū pe a timu. Mo le tele o tausaga, ua na o le pau ia o “Maota o le Malo” ua masani ai Molimau i Mozambique. Ua faapea mai le uso o Caetano Gabriel, o se tasi o toeaina i le Faapotopotoga o Massamba: “E matou te loto faafetai i o matou uso i le lalolagi aoao i le faia o se sao i le faataunuuina o lenei galuega.” Na toe manatua e se tasi talavou e faapea: “I le taimi na matou iai i Carico (i le nofoaga e faamalosia ai tagata ina ia gauai atu i mafaufauga faapolotiki “reeducation camps,” lea na taofia ai Molimau a Ieova pe ā ma le 12 tausaga), e masani ona matou faapea atu, ‘O le a tatou tutumau ma le faamaoni, ma o le a tauia i tatou e Ieova.’ O le Maota o le Malo fou o se taui lea mai ia Ieova.” E faaalia e a latou upu le loloto o lo latou loto faafetai ma lo latou maumauai e viia Ieova.

O le toatele o talavou na auai i faugafale na mauaina le agaga faapaeonia ma mulimuli ane auai i le auaunaga paeonia sauatoa. O le talavou o Isapela, o se paeonia sauatoa i le faapotopotoga i Manga, ua faapea mai a o tagai atu i le matuā mamā o le Maota o le Malo i le aso a o sosoo ma lona tuuina atu: “O laʻu vaai o le fale lenei e aupito sili ona matagofie i le aai atoa o Beira. O se fiafiaga sili ia te au loʻu iai iinei.” Na faamatala e se tasi o misionare o Adão Costa le matuā felagolagomai o alii maualuluga o le aai i le faatagaina ona uia o auala faapitoa e faaulufale mai ai i totonu o le atunuu ia meafaufale, auā ua latou iloa le faamaoni o Molimau. Ua ia faaopoopo mai e faapea: “E ui lava ina matuā vaivai lava i matou, ae o se mea e olioli ai o le vaaia lea o fua o nei galuega uma mo le mamalu ma le viiga o Ieova.”

O le taimi la lenei, a fesili mai se tagata faaleuō e nofo i le aai o Beira, “O fea la le tou falesa?” ona faasino lea e Molimau i se tasi o Maota fou o le Malo ma tali atu i upu faapea, “O loo i le International Road, Avenida Acordo de Lusaka, e faafesagai tonu lava ma le Fourth Squadron Police Station (Ofisa Leoleo).” Ma toe faasaʻo atu e faapea, “E pau lava le mea e lē o se falesa. O le Maota o le Malo!”

[Faafanua i le itulau 20]

(Tagaʻi i le lomiga mo le ata atoa)

AFERIKA

Mozambique

Beira

Maputo

[Ē Ana le Ata]