O le ā o Loo Faamuamua i Lou Olaga?

“Ia e faasino mai le ala ou te savali ai.”—SALAMO 143:8.

1. O le ā le faaiuga na faia e le tupu o Solomona e faatatau i mea o loo sailia ma faataunuuina e tagata?

ATONU ua e silafia le faatumulia o le olaga i galuega ma popolega. Pe a e mafaufau i ai, e mafai ona e mātaulia ai nisi o mea e matuā manaomia. O isi galuega ma popolega o ni mea e itiiti lo latou tāua pe lē aogā foi. Ona o lea ua e silafia lenei mea, o lona uiga ua ogatusa ou manatu ma se tasi o tagata e silisili lona atamai, o le tupu lea o Solomona. Ina ua uma ona ia autaluina maeʻaeʻa galuega o le olaga, ona ia faia lea o le faaiuga lenei: “Ia e mataʻu i le Atua, ma e anaana i ana poloaiga; auā o mea ia e tatau i tagata uma.” (Failauga 2:4-9, 11; 12:13) O le ā le uiga mataina o lenei mea ua iai mo i tatou i aso nei?

2. O le ā le fesili autū e tatau ona fesiligia ai e tagata o ē matataʻu i le Atua i latou lava, e taitaiina atu ai i ā fesili e fesootai atu i ai?

² Pe afai e te manao e “mataʻu i le Atua, ma e anaana i ana poloaiga,” ia e fesiligia oe i le fesili faatupu manatu lenei, ‘O le ā o loo faamuamua i loʻu olaga?’ E moni, atonu e te lē o mafaufau loloto i lena fesili i aso taitasi, ae aisea e te lē manatunatu nei loa i ai? Ae maise foi, ua faamanatu mai ai nisi o fesili e fesootai atu i ai, e pei o le, ‘Pe o oʻu soona faamamafa ea ma le lē tatau laʻu galuega po o soʻu tomai faapitoa po o mea faitino? O faapeī le tāua i loʻu olaga o loʻu aiga, oʻu tauaiga, ma ē pele ia te au?’ Atonu e fesili se talavou, ‘O le ā le tele o loʻu uaʻi atu ma oʻu taimi ua faaalu i aʻoaʻoga? Pe o le mea moni ea, o loo avea se mausa, se taaloga, po o nisi ituaiga o faafiafiaga po o ni tomai patino ma oʻu naunautaiga autū?’ Ma e tusa po o le ā lo tatou matua ma tulaga o iai, e tatau lava ona tonu lo tatou fesili ifo, ‘O le ā le tulaga o loo faatulaga ai le auaunaga a le Atua i loʻu olaga?’ E mautinoa e te ioe i le manaoga mo le faatulagaina o mea e tatau ona faamuamua. Ae faapefea ma o fea e mafai ona tatou maua mai ai fesoasoani ina ia faatulaga ma le atamai na mea e tatau ona faamuamua?

3. O le ā e aofia ai mo Kerisiano i le faatulagaina o mea e ao ona faamuamua?

³ Ua iai i le “faamuamua” le uiga autū o se mea e faatulaga muamua i isi mea uma lava, po o manaoga tatau e ao ona muai manatunatu i ai. Pe o oe o se tasi o Molimau a Ieova pe o se tasi o le faitau miliona o tagata aʻoga faamaoni o le Afioga a le Atua o loo auaufaatasi ma i latou, ia manatunatu i le mea moni lenei: “O le mea ma lona tausaga i mea uma, ma ona lava po i mea uma lava i lalo o le lagi.” (Failauga 3:1) Ma le tatau lava, o lena mea e aofia ai lou faaalia o le manatu mamafa alofa mo faiā faaleaiga. (Kolose 3:18-21) E aofia ai le faia o ni sauniuniga faamaoni mo lou auaiga, i le iai o se galuega e maua ai se totogi. (2 Tesalonia 3:10-12; 1 Timoteo 5:8) Ae mo se suiga foi, atonu e te faaalu se taimi mo se mausa po ni faafiafiaga po o ni tafaoga. (Faatusatusa i le Mareko 6:31.) E ui i lea, pe a matuā iloilo totoʻa, pe e te lē o iloa ea e leai se mea o nei mea uma e ao ona faamuamua i le olaga? E iai se isi mea e sili atu ona tāua.

4. Ua faapefea ona fesootai mai le Filipi 1:9, 10, i lo tatou faatulagaina o mea e tatau ona faamuamua?

⁴ Atonu ua e iloaina o mataupu silisili a le Tusi Paia ua fai ma taʻiala, o ni fesoasoani e mātua tāua i le faatulagaina o mea e tatau ona faamuamua ma le faia o filifiliga atamai. Mo se faaaoaoga, i le Filipi 1:9, 10 (NW), ua uunaia ai  Kerisiano ina ia “faatuputeleina pea lava . . . le poto saʻo, atoa ma le faautauta uma.” O le ā le iuga? Na faapea atili mai le aposetolo o Paulo: “Ina ia outou mautinoa i mea e sili atu ona tāua.” Pe ua lē talafeagai ea lena mea? E faavae aʻe i le poto saʻo, e mafai ai e se Kerisiano faautauta ona filifili le mea e tatau ona avea ma ona uluai faanaunauga—le mea e faamuamua—i le olaga.

Le Faaaoaoga i le Mea e Tatau Ona Faamuamua

5. I le faamatalaina o le faaaoaoga na tuu mo Kerisiano, ua faapefea ona faaalia i le Tusi Paia le mea sa faamuamua i le soifuaga o Iesu?

⁵ Ua tatou mauaina se vala tautele o le poto i upu nei a le aposetolo o Peteru: “Na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) Ioe, mo ni taʻiala ina ia iloa po o le ā e tatau ona faamuamua i le olaga, e mafai ona tatou iloiloina po o le ā se finagalo i ai o Iesu Keriso. Na taʻua faavaloaga e le Salamo 40:8 e faatatau ia te ia: “Loʻu Atua e, ou te fiafia e fai lou finagalo; o loo i totonu lava ia te au lau tulafono.” O le auala lenei na ia taʻua ai le manatu lava lea: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.”—Ioane 4:34; Eperu 12:2.

6. E mafai faapefea ona tutusa mea e oo ia i tatou ma mea ia na oo ia Iesu i le faamuamuaina o le finagalo o le Atua?

⁶ Seʻi mātau le ki lena—le faia o le finagalo o le Atua. Ua faamamafa e le faaaoaoga a Iesu le mea e tatau i ona soo ona faamuamua ma le tonu i o latou olaga, auā na ia fetalai faapea “ua taitasi ma faapei o lona aʻoaʻo o e ua atoatoa ona aoaoina.” (Luka 6:40) Ma a o uia e Iesu ala na fuafuaina e lona Tamā, na ia faaalia ai e iai le “fiafia e malie ai” i le faamuamuaina pea o le finagalo o le Atua. (Salamo 16:11; Galuega 2:28) Po o e iloa ea o le ā e faatatau i ai lena mea? E pei ona filifili soo o Iesu e avea le faia o le finagalo o le Atua ma mea e faamuamua i o latou olaga, o le a latou olioli i le “fiafia e malie ai” ma le ola moni. (1 Timoteo 6:19) O lea e sili atu i le tasi le mafuaaga mo le faatulagaina muamua o le faia o le finagalo o le Atua i o tatou olaga.

7, 8. O ā tofotofoga na fesagai ma Iesu, ma o le ā e mafai ona tatou aʻoaʻoina mai lenei mea?

⁷ Ina ua faatoʻā mavae lava ona faailogaina e Iesu le ofoina atu o ia lava e fai le finagalo o le Atua, ae saili loa le Tiapolo ina ia faaliliueseina o ia. E faapefea? I ni tofotofoga sa faia i ni tulaga eseese se tolu. I taimi taitasi sa tali atu ai Iesu i ni faaupuga faale-Tusi Paia, sa matuā manino lelei. (Mataio 4:1-10) Ae na iai foi isi tofotofoga na faatalitalia mai o ia—o sauāga, o tauemuga, le faalataina e Iuta, o tuuaʻiga sese, ma le maliu i le laau faaoosala. Peitai, e aunoa ma se tasi o nei tofotofoga na maluelue ai le tumau mausalī o le Alo faamaoni o le Atua. I se taimi na sili ona matuitui, na tatalo atu ai Iesu: “A e aua le faia loʻu loto, a o lou finagalo. . . . Ia faia  lou finagalo.” (Mataio 26:39, 42) Pe ua lē tatau ea la ia i tatou taitoatasi ona matuā uunaia i lenei vala o le faaaoaoga na faataatia mo i tatou, e faapogaia ai ona tatou “finafinau i le tatalo”?—Roma 12:12.

⁸ Ioe, pe a tatou faatulagaina mea tatou te faamuamua i le olaga, e faapitoa lava ona aogā taʻiala mai le Atua, ae maise pe a tatou fesagai ma fili o le upu moni ma ē tetee i le finagalo o le Atua. Seʻi manatu i le faatoga atu a le tupu faamaoni o Tavita mo se taitaiga ina ua ia fesagai ma teteega a fili. O le a tatou iloa lenei mea a o tatou talanoa i se vaega o le Salamo 143. E tatau ona fesoasoani lenei ia i tatou ina ia iloa le auala e mafai ona tatou faamalosia ai la tatou faiā totino ma Ieova ma ia faamalosia ai ina ia avea pea le faia o le finagalo o le Atua ma mea e faamuamua i o tatou olaga.

E Faafofoga ma Tali Mai Ieova i a Tatou Tatalo

9. (a) E ui lava o Tavita o se tagata agasala, ae o le ā ua faaalia mai i ana upu ma ana gaoioiga? (e) Aisea e lē tatau ai ona tatou faamaamulu i le faia o le mea ua tonu?

⁹ E ui lava o Tavita o se tagata agasala ma augavale, ae sa ia faatuatua o le a faafofoga mai Ieova i lana aioiga. Na ia ole atu ma le lotomaulalo: “Ieova e, ia e faafofoga mai i laʻu tatalo; ia liliu mai ou fofoga i laʻu aioi atu; ia e tali mai ia te au i lou faamaoni ma lau amiotonu. Aua foi e te faaoo le faamasinoga i lau auauna; auā e leai se tagata ola e amiotonu i ou luma.” (Salamo 143:1, 2) Sa iloa lava e Tavita lona lē lelei atoatoa, peitai sa tuu atu atoatoa lona loto i le Atua. O lea, na ia mautinoa ai o le a ia maua se tali amiotonu. Pe ua lē faalaeiauina ai ea i tatou i lenei mea? E ui lava ina ua tatou lē ausia le amiotonu a le Atua, ae mafai ona tatou mautinoa e faafofoga mai o ia ia i tatou pe a tuu atu atoatoa o tatou loto ia te ia. (Failauga 7:20; 1 Ioane 5:14) A o finafinau atu i le tatalo, e tatau ona tatou naunautai e “faatoilaloina le leaga i le lelei” i nei aso leaga.—Roma 12:20, 21; Iakopo 4:7.

10. Aisea na oo ai ia Tavita ni vaitaimi o popolega?

¹⁰ Sa iai fili o Tavita, e pei foi o i tatou. Pe i lona avea o sē na solasola solo mai ia Saulo, na ausulusulu e saili sona lafitaga i se nofoaga tuufua e lē mafai ona oo atu i ai se isi, pe i lona avea o se tupu na faatiga mai i ai ni fili, ae sa iai vaitaimi o popolega o Tavita. Na ia faamatalaina pe na faapefea i lenei mea ona aafia ai o ia: “Ua tuliloa mai o lē ita mai ia te au . . . ua na faanofo aʻu i le pouliuli, . . . I le ua lailoa loʻu loto i totonu ia te au; ua fememeai lava loʻu loto i totonu ia te au.” (Salamo 143:3, 4) Pe na iai ea se mafuaaga na oo ai ni lagona faapena ia te oe?

11. O ā vaitaimi o popolega ua fesagai ma auauna a le Atua i ona po nei?

¹¹ O omiga mai fili, o mea faigata ona o faigata tau i le tamaoaiga, o maʻi matuia, po o isi faafitauli e faapopoleina ai, ua oo ai i nisi o tagata o le Atua le lagona ua tau faavaivai o latou loto. I nisi taimi, ua oo atu ai o latou loto i se tulaga ua matuā vāivai e pei ua lē toe lagona se mea. Ua faapei lava o loo latou taitoatasi ma alalaga: “O le ua faailoa mai ia te au o puapuaga e tele ma le leaga, e te toe faaola mai ia te au, . . . E te liliu mai ma faamafanafana mai ia te au.” (Salamo 71:20, 21) Ua faapefea ona latou maua se fesoasoani?

Le Auala e Fesagai ai ma Taumafaiga a le Fili

12. Na faapefea ona gafatia e le tupu o Tavita lamatiaga ma tofotofoga?

¹² Ua faaalia mai e le Salamo 143:5 le mea na faia e Tavita ina ua pagatia i lamatiaga ma mea faigata tetele: “Ou te manatu i aso anamua; ou te manatunatu i mea uma na e faia; ou te mafaufau i galuega a ou aao.” Na manatua e Tavita feutagaiga a le Atua ma Ana auauna ma le auala na oo ai ia te ia lava le faasaoina. Sa ia mafaufau loloto i mea na faia e Ieova ona o Lona suafa sili. Ioe, sa manatu mamafa pea Tavita i galuega a le Atua.

13. Pe a tatou fesagai ma tofotofoga, o le a faapefea i lo tatou toe mānatu i faaaoaoga a auauna faamaoni i aso anamua ma i aso nei, ona fesoasoani ina ia tatou tutumau ai?

¹³ Pe ua lē masani ea ona tatou manatuaina feutagaiga a le Atua ma ona tagata? O le mea moni lena! Ua aofia ai i lenei mea tala ua faamaumauina o mea na faia e le ‘faapotopotoga o  molimau e toatele’ i taimi a o lei oo mai le Faa-Kerisiano. (Eperu 11:32-38; 12:1) Sa faalaeiau atu foi i Kerisiano faauuina i le uluai senituri ina ia “manatu i aso anamua” ma mea na latou tutumau ai. (Eperu 10:32-34) Ae faapefea i mea ua tutupu i auauna a le Atua i ona po nei, e pei o mea na o loo faamatalaina auiliili i le tusi Jehovah’s Witnesses—Proclaimers of God’s Kingdom? * O tala o loo tusia iina ma i isi lomiga a le Sosaiete ua mafai ai ona tatou manatua le auala ua fesoasoani ai Ieova i ona tagata ina ia tutumau i faasasaaga, o faafalepuipuiina, o sauāga mai i vaega tetee, ma nofoaga o faasalaga ma le faapologaina. Ua iai mea faigata i atunuu o loo vatau, e pei o Liperia, Rwanda, Burundi, ma atunuu sa muai faaigoa o Yugoslavia. Ina ua aliaʻe teteega, sa mafai ona tutumau auauna a le Atua ona o le tausisia o se faiā malosi ma Ieova. Na faatumauina e lona aao i latou o ē na avea le faia o lona finagalo ma mea e faamuamua i o latou olaga.

14. (a) O le ā se tasi o faaaoaoga o le faatumauina e le Atua o se tagata i se tulaga atonu e talitutusa ma o tatou tulaga? (e) O le ā ua e aʻoaʻoina mai lena faaaoaoga?

¹⁴ Peitai ane, atonu e te tali mai faapea e lei oo lava ia te oe na faiga leaga faasauā, ma atonu o loo e lagona ailoga lava o le a oo ia te oe na mea. Ae ui i lea, o le lagolagoina e le Atua o ona tagata, e lē faapea o taimi uma e foliga mai ai e pei ona manatu nisi faapea e faia i ni tulaga mataina. Ua ia lagolagoina le toatele o tagata “lautele” o ē o loo ola i ni tulaga “masani.” Ua na o se tasi lenei o faaaoaoga mai le tele o faaaoaoga: O loo iai i Le Olomatamata o Tesema 1, 1996 le tala na faamatalaina e Penelope Makris. E maeu lava se faaaoaoga ofoofogia o le faamaoni faa-Kerisiano! Pe e mafai ona e manatuaina mea na ia tutumau ai mai ona tuaoi, le auala sa ia tauivi ai ma maʻi matuitui o le tino, ma taumafaiga na ia faia ina ia tutumau ai pea i le faiva faataimi atoa? Ae faapefea le mea na tupu i Mytilene lea na tauia ai o ia? O le manatu tāua, Pe e te manatu ea i na faaaoaoga e avea o ni fesoasoani mo i tatou uma e faatulaga ai mea e tatau ona faamuamua, ina ia faamuamuaina i o tatou olaga le faia o le finagalo o le Atua?

15. O ā nisi o mea ua faia e Ieova e tatau ona tatou mafaufau loloto i ai?

¹⁵ E faamalosia ai i tatou e mafaufau loloto i galuega a Ieova, e pei ona sa faia e Tavita. I le galueaina o lana fuafuaga, na sauniunia ai e Ieova le faaolataga e ala mai i le maliu, le toetu, ma le faamamaluina o lona Alo. (1 Timoteo 3:16) Ua ia faavaeina lona Malo faalelagi, faamamāina ese mai le lagi Satani ma ana temoni, ma toe faaleleia le tapuaiga moni iinei i le lalolagi. (Faaaliga 12:7-12) Ua ia atiina aʻe se parataiso faaleagaga ma ua faamanuiaina ona tagata i se faatelega. (Isaia 35:1-10; 60:22) Ua avatu nei e ona tagata se molimau faaiu a o lei gāpā le puapuaga tele. (Faaaliga 14:6, 7) Ioe, e tele mea tatou te mafaufau loloto i ai.

16. O ā mea ua faalaeiauina i tatou e mafaufau mamafa i ai, ma o le ā o le a faaalia e lenei mea ia i tatou?

¹⁶ O lo tatou mafaufau mamafa pea i galuega e ala mai i aao o le Atua, nai lo le soona asosi atu i taumafaiga a tagata, e atili faatāuaina ai ia i tatou le faigata ona teena gaoioiga a le mana o Ieova. Peitai, o na galuega, ua lē na o galuega faitino ofoofogia o le foafoaga i le lagi ma iinei i le lalolagi. (Iopu 37:14; Salamo 19:1; 104:24) O ana galuega ofoofogia e aofia ai gaoioiga o le faasaoina o ona tagata mai fili tetee e pei ona faataitaia i mea na tutupu i ona tagata filifilia anamua.—Esoto 14:31; 15:6.

 Iloaina o le Ala e Savali Ai

17. Sa faapeī le moni o Ieova ia Tavita, ma e mafai faapefea ona faalaeiauina ai i tatou i lenei mea?

¹⁷ Sa tatalo Tavita mo se fesoasoani ina neʻi mou atu lona malosi. “Ou te faaloaloa oʻu lima ia te oe, ou te manao lava ia te oe, faapei o se nuu naumati. Ieova e, ia e vave tali mai ia te au, o le a faauma loʻu nei ola; aua le ʻalo ou fofoga ia te au, neʻi tusa aʻu ma tagata e o ifo i le lua.” (Salamo 143:6, 7) Sa iloa e Tavita, o se tagata agasala, e faapea na silafia e le Atua lona tulaga. (Salamo 31:7) E iai taimi tatou te ono lagona ai foi ua fāi ifo lo tatou tulaga faaleagaga. Ae lē faapea ua uma ai le faamoemoe. O loo faafofoga Ieova i a tatou tatalo, ma e mafai ona ia vave toe faafoisia i tatou e ala i le faafouina o i tatou e toeaina alolofa, o mataupu i Le Olomatamata, po o vaega o sauniga e foliga ua fuafuaina tonu mo i tatou.—Isaia 32:1, 2.

18, 19. (a) O le ā e tatau ona avea ma a tatou aioiga naunautai ia Ieova? (e) O le ā le mea e mafai ona tatou mautinoa i ai?

¹⁸ O lo tatou faalagolago atu ia Ieova e uunaia ai i tatou e aioi atu ia te ia: “Ia ou faalogologo i lou alofa i le taeao; auā ou te faatuatua ia te oe; ia e faasino mai le ala ou te savali ai.” (Salamo 143:8) Pe na ia lē taulau ea ona gaoioi mo le tuafafine o Makris, o lē sa nofo mamao ese i lea motu i Eleni? Pe o le a lē taulau foi la ona ia gaoioi ia te oe a o e faamuamua i lou olaga le faia o lona finagalo? E mananao le Tiapolo ma ana ʻau e faalavelavea pe taofia atoatoa la tatou galuega o le folafolaina atu o le Malo o le Atua. E tusa lava po o tatou auauna i ni atunuu o loo masani ona faataga ai le tapuaiga moni pe o tatou auauna i vaipanoa o loo faasāsā ai, ae ua ogatusa a tatou tatalo autasi ma le faatoga atu a Tavita: “Ieova e, ia e laveaiina mai aʻu i e ita mai; ou te lafi atu ia te oe.” (Salamo 143:9) O lo tatou saogalemu mai mala faaleagaga e faalagolago i le nofo i le mea lilo o iai Lē Silisili Ese.—Salamo 91:1.

¹⁹ O lo tatou talitonuga maumaututū i le mea e ao ona faamuamua ua matuā mausalī ona faavaeina. (Roma 12:1, 2) O lea, ia teena taumafaiga a le lalolagi e faaofi mai ia te oe mea ua latou manatu e tāua i fuafuaga o meafai a tagata. Ia faaauau ona faaatagia mai i vala taitasi o lou olaga le mea e te iloa e ao ona faamuamua—le faia o le finagalo o le Atua.—Mataio 6:10; 7:21.

20. (a) O le ā ua tatou aʻoaʻo mai i le Salamo 143:1-9 e uiga ia Tavita? (e) E faapefea ona faaatagia atu e Kerisiano i aso nei le agaga sa ia Tavita?

²⁰ O uluai fuaiupu e iva o le Salamo e 143 ua faamamafa mai ai le faiā totino vavalalata a Tavita ma Ieova. A o tulituliloa o ia e fili, sa ia matuā aioi atu i le Atua mo taitaiga. Na ia sasaa atu lona loto, ma saili atu se fesoasoani i le ala tonu e savali ai. Ua faapea foi i aso nei i ē totoe ua faauuina i le agaga o loo iai i le lalolagi ma a latou aumea. Latou te manatu i la latou faiā ma Ieova o se mea e tautele a o latou aioi atu ia te ia mo taitaiga. Latou te faamuamua pea le faia o le finagalo o le Atua, e ui i omiga mai le Tiapolo ma le lalolagi.

21. Aisea e tāua ai mo i tatou ona faataatia se faaaoaoga lelei pe afai tatou te aʻoaʻo atu i isi mea e ao ona faamuamua i o latou olaga?

²¹ E faitau miliona tagata o loo suesueina le Tusi Paia ma Molimau a Ieova, e tatau ona latou iloaina o le mea e ao ona faamuamua, o le faia lea o le finagalo o le Atua. E mafai ona tatou fesoasoani atu ia i latou ina ia malamalama i lenei mea a o talanoaina le mataupu e 13 o le tusi o Le Poto e Taʻitaʻia ai i le Ola e Faavavau, lea o loo faamamafaina mai ai mataupu silisili  ua aofia i le usiusitai atu i le Upu. * O le mea moni, e tatau ona latou vaaia ni faaaoaoga mai ia i tatou i mea o loo tatou aʻoaʻoina atu ai i latou. Pe a mavae sina vaitaimi puupuu, ona latou iloa ai foi lea o le auala e tatau ona latou savavali ai. A o malamalama totino lenei faitau miliona i mea e tatau ona sili le faatāuaina i o latou olaga, e toatele o le a uunaia ai e uia laasaga o le tuuina atu ma le papatisoga. Pe a mavae lea, e mafai e le faapotopotoga ona fesoasoani atu ia i latou ina ia latou savavali pea i le ala o le ola.

22. O ā fesili o le a talanoaina i le mataupu o loo sosoo mai?

²² E toatele ua latou ioeina ma le naunautai faapea o le faia o le finagalo o le Atua e ao ona sili le faatāuaina i o latou olaga. Ae ua faapefea la ona aʻoaʻoina faasolosolo e Ieova ana auauna ina ia faia lona finagalo? O ā aogā ua aumaia e lenei mea ia i latou? O le a iloiloina nei fesili, faatasi ai ma se talanoaga o le fuaiupu autū, le Salamo 143:10, i le mataupu o loo sosoo mai.

[Faaopoopoga i lalo]

O le ā Lau Tali?

□ I le faatatauina o le Filipi 1:9, 10, e mafai faapefea ona tatou faatulagaina ai mea e ao ona faamuamua?

□ Na faapefea ona faaalia e Iesu po o le ā le mea sa faamuamua i lona soifuaga?

□ O le ā e mafai ona tatou aʻoaʻoina mai gaoioiga a Tavita a o fesagai o ia ma tofotofoga?

□ I le ā le auala ua fesoasoani mai ai le Salamo 143:1-9 ia i tatou i aso nei?

□ O le ā le mea e ao ona faamuamua i o tatou olaga?

[Fesili mo le Suʻesuʻega]

[Ata i le itulau 10]

O gaoioiga a Tavita na faamaonia ai lona faalagolago atu ia Ieova

[Ē Ana le Ata]

Toe tusia mai le Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s